ಅಮ್ಮನ ಆಟಿದ ಪಾತೆರ…

ಅಮ್ಮನ ಆಟಿದ ಪಾತೆರ
ನಮ ಒವ್ವೆ ಒಂಜಿ ಬರೆಯೊಡಾಂಡ ಒಂಜ ಅನುಭವ ಇಪ್ಪೊಡು ಇಜ್ಜಾಂಡ ಅನುಭವದ ಪಾತೆರಂಡಲ ಕೇನುದುಪ್ಪೊಡುಗೆ ಇಂಚೆನೆ ಮೊರನಿದ ದಿನ ಜೋರ್ ಬರ್ಸ ಬರ್ಪಿ ಪೊರ್ತುಡು ಅಪ್ಪೆನೊಟ್ಟುಗು ಕುಲ್ಲೊಂದು ಬಯ್ಯ ದ ಚಾ ಪರೊಂದು ಇಪ್ಪುನಗ ಬಾರಿ ಕುಸಿಟ್ ಆಟಿ ತಿಂಗೊಳು ಬತ್ತ್ಂಡ್ ಅಮ್ಮ ನನ ನಮಕ್ ಗೌಜಿಯೇ ಗೌಜಿ, ಕಂಡೊಡು ಕೇಸರ್ ಗದ್ದೆ ಲ ಸುರು ಮಲ್ಪುವೇರ್ ಗಮ್ಮತ್ ನಮಕ್ ಪಂಡೆ . ವಾರೆ ಕಣ್ಣ್ ಡ್ ತೂದು ಅಮ್ಮ ಇತ್ತೆನೆ ಕಟ್ಟಪುನಿಟ್ ಕುಲ್ಲು ಪೋ.. ಪಂಡೆರ್. ಈತ್ ಕೇಂದ್ಲ ಮನಿಪಂದೆ ಕುಲ್ಲರೆ ಎಂಕ್ ಸಾದ್ಯ ಆಯಿಜಿ ಆಮ್ಮ ಇರ್ ಎಂಕ್ ಆಟಿ ದ ಪೂರಾ ತಿನಸ್ ಮಲ್ತ್ ಕೊರೊಡು ಪತ್ರಡ್ಡ್ಯೆ , ತೊಜಂಕ್ ದ ಕಜಿಪ್ ಬೊಳೆ ಪಡೋಡು, ತೆಟ್ಲ, ತೇವು, ಸಂತನಿ , ಪೆಲಕಾಯಿ ದ ಗಟ್ಟಿ, ಉಂದು ಪೂರ ಬೊಡು ಪಂದ್ ಉದ್ದ ಪಟ್ಟಿ ಕೊರ್ಯೆ . ಅವು ಅವು ಮಲ್ಪುಗ ಆಟಿಡ್ ಉಂಡು ಪೂರ ಆಟಿಲ್ ನಮ್ಮ ತುಳುನಾಡ್ ಡ್ ಮಾತ ಇಲ್ಲಾಡ್ ಮಲ್ಪುವೆರ್ ಅಂಡಾ ಆಟಿ ಪಂಡ ತಿನ್ಪಿನಿ, ಕಂಡೊಡ್ ಗೊಬ್ಬು ನ ಇತೇ ಅತ್ತ್ .ಇತ್ತೆದ ಕಾಲದ ಜೋಕುಲೆ ಇಂಚೆನೆ ಗಮ್ಮತ್ ಮಲ್ಪರೆನೇ ಕತೊಂದು ಇಪ್ಪುನು ನಮ್ಮ ತುಳುನಾಡ್ ಡ್ ಪ್ರತೀ ಒಂಜಿ ಆಚರಣೆಗ್ಲ ಐಕ್ ಆಯಿನನೆ ವಿಶೇಶ ಉಂಡು, ಪಿರಾಕ್ ದ ಅರ್ಥ ಉಂಡು ಮಗ ಅವೆನ್ ನಿಕುಲು ತೆರಿಯೋನುಜರ್ . ಎಂಕಲ್ನ ಕಾಲೊಡು ಏತ್ ಭಂಗೊಡು ಈ ಆಟಿ ತಿಂಗೊಲುನು ಕರ್ತೊಂದು ಇತ್ತ ಗೊತ್ತುಂಡ ನಿಕ್ಲೆ ಗ್ ? ಅಮ್ಮ ನ ಆಟಿದ ಪಾತೆರೊಗ್ ಯಾನ್ ಕೆಬಿಯಾಯೆ . ನಮ ತುಳುವೆರೆ ಗ್ ರಡ್ಡೆ ಕಾಲ,ಆಟಿರ್ದ್ ಬೊಕ್ಕ ಅರೆಗಾಲ ಮಾಯಿರ್ದ್ ಬೊಕ್ಕ ಮರ್ಯಾಲ. ಬಡಪತ್ ದ ಕಾಲ ಆಪಗ . ಎಲ್ಯ ಮುಳಿತ ಇಲ್ಲ್ ಕೂಡು ಕುಟುಂಬ ಅಯಿನೆರ್ದ್ದವರ ಇಲ್ಲ್ ನಲಿಕೆ ಜನ . ಆಟಿಡ್ ಮದಿಮೆ ಆತಿನ ಪೊಣ್ಣುಲು ಅಪ್ಪೆ ಇಲ್ಲ ಗ್ ಬತ್ತ್ ಆಟಿ ಕುಲ್ಲುನ ಕ್ರಮ ಉಂಡು . ವನಸ್ ಗ್ ಕುಲ್ಲುನಗ ಪತ್ತ್ ಪದಿನೆನ್ಮ ಬಟ್ಟಲ್ ಗ್ ಬಳಸೊಂದು ಇತ್ತ್ಂಡ್, ಕೆಲವರ ಬಳಸುನ ಕೈಕ್ ವನಸ್ ಮುಗಿದ್ ಪೆಲಕಾಯಿ ಪಚ್ಚಿರ್ ತಿಂದ್ ಜೆಪ್ಪುನ ಪರಿಸ್ಥಿತಿಲಾ ಎದುರಾಪುಂಡು . ಕಂಡದ ಬೇಲೆ ಮಲ್ತ್ ದೇ ದಿನ ಪೋವೊಂದು ಇತ್ತ್ಂಡ್ . ಪಗ್ಗು ಡ್ ಪಾಡಿನ ನೇಜಿ ನ್ ಬೇಸ ಕಾರ್ತೆಲ್ ತಿಂಗೊಲ್ಡು ನಟ್ಟಿ ನಡ್ಪುಂಡ್ ಅಪಗ ಬೇಲೆ ಮಲ್ತಿನ ಬತ್ತ್ಂಡ್ ಬೊಕ್ಕ ದೊರಿವುನ ಆ ಬರ್ಸದ ಪೊರ್ತುಗ್ ಇಲ್ಲ್ ದ ಜಾಲ್ ಗ್ ಕಾರ್ ದಿಪಿಲೆಕ್ಕನೆ ಇತ್ತುಜಿ ಮಾತ ಕಡೆ ಬೆನ್ನಿ ದ ಬೇಲೆ ಉಂತ್ತುದು ಉಪ್ಪುಂಡು ಬರ್ಸಗ್ . ಉನ್ಪಿ ನುಪ್ಪುಗ್ಲ ಕುತ್ತು ಬರೊಂದು ಇತ್ತ್ಂಡ್. ಆಟಿ ತಿಂಗೊಳುಡು ಬಡವು ಜಾಸ್ತಿ, ಕಸಬು ಕಮ್ಮಿ ಉಂದು ಒಂಜಿ ಚಲ್ಲ್ ದ ತಿಂಗೊಳು ಒವ್ವೆ ಎಡ್ಡೆ ಬೇಲೆ, ಲೇಸ್ ಉಂದು ಓವುಲ ನಡಪುಜಿ ಇತ್ತೆಗ್ಲ .ತುಳುನಾಡ್ ಡ್ ಒವ್ವೆ ದೈವ ದೇವೆರೆ ಗ್ ಸಾನ ಚಾವಡಿಡ್ ,ದೇವಸ್ಥಾನೊಲೆಡ್ ಅವಡ್ ಪೂ ಪೂಜೆ ನಡಪುಜಿ ಆಟಿ ತಿಂಗೊಲ್ಡು ದೈವ ದೇವೆರ್ ಘಟ್ಟ ಮಿತ್ತರ್ವೆರ್, ಅಪಾಗ ತನ್ನೊಟ್ಟು ಗ್ ಇತ್ತಿನಿ ಸೈದಿನಕ್ಲೆನ್ ಕುಲೆಕ್ಲೆನ್ ಬುಡ್ದು ಬುಡ್ಪೇರ್ ಅಂಚಾದ್ ಸೈದಿನಕ್ಲೆನ ತಿಂಗೊಳು ಪನ್ಪಿನ ನಂಬೊಲಿಗೆಲಾ ಉಂಡು . ಕಿರಿಕಿಟ್ ದ್ ಬರ್ಪಿನ ಬರ್ಸೊ ಗು ಊರುಗ್ ಊರೆ ಸೀಕ್ ಸಂಕಟ ಡ್ ಮುರ್ಕುದು ಪೋಪುಂಡು ಅಪಾಗ ನಾಗೆ ದೇಬೆರ್ ಪರತಿನ ಈ ಮಣ್ಣ್ ಡ್ ಬುಲೆಯಿನ ಕೊಡಿ ಲತ್ತ್ ,ದೈಬೂರು , ಮರಕ್ಲೆ ಡ್ ಮರ್ದ್ ದ ಸತ್ವ ದಿಂಜುಂಡು ನರಮಾನಿನ ಕುತ್ತ ಕಲೆಪರೆ ಈ ಕೊಡಿ ಮರ್ದುಲು ಸಹಾಯ ಅಪುಂಡು . ದುಂಬು ನಮ್ಮ ತುಳುವೆರ್ ತೇವು, ತೊಜಂಕ್ ,ಕೇನದ ಕಂಡೆ ,ಟೆಟ್ಲ ,ಗುಜ್ಜೆ , ಕನಿಳೆ ಉಂದೆನ್ ಪೂರ ಗುಡ್ಡೆ ರ್ದ್ ಕಂತ್ ದ್ ಸಂತಾನಿ ಬೈಪಾದ್ ತಿಂದ್ ಆಟಿಡ್ ದಿನ ಕಲೆತೊಂದು ಇತ್ತೇರ್. ಆಟಿದ ಬರ್ಸೊ ಗ್ ಮೆತ್ತನೆ ಮಣ್ಣ್ ಡ್ ಕೊಡಿಯಿನ ಈ ತಿನಸ್ ಡ್ ವಿಶೇಷವಾಯಿನ ಮರ್ದ್ ದ ಗುಣ ಇತ್ತ್ಂಡ್ . ನಮ್ಮ ತುಳುನಾಡ್ ಡ್ ಆಟಿಡ್ ವಿಶಿಷ್ಟವಾಯಿನವು ದಾದ ಪಂಡ ಅವು ಆಟಿದ ಅಮಾಸೆ ಈ ಅಮಾಸೆ ಗ್ ತುಳುವೆರ್ ಮಾತೆರ್ಲ ಪಾಲೆದ ಮರತ ಚೆಕ್ಕೆ ದ ಕಸಾಯ ಮಲ್ತ್ ಪರ್ರೆ ಕಾತ್ ಕುಲ್ಲು ವ ಈ ಕಸಾಯ ವರ್ಸೊಗ್ ಒರ ಪರ್ಯಡ ನಮ್ಮ ಸರ್ರ ಗ್ ಬಯ್ದಿನ ಕುತ್ತನ್ ಕಳೆದ್ ಬರ್ಪಿ ನ ಸೀಕ್ ಸಂಕಟೊಳು ಬರಂದಿಳೆಕ್ಕ ವರ್ಸ ಇಡಿಕ ಕತೊಂದು ಬರ್ಪಿನ ಸಾರತ್ತ ಒಂಜಿ ಬಗೆತ ಆಯುರ್ವೇದ ಸಗ್ತಿ ನೆಕ್ಕ್ ಉಂಡು. ಇಲ್ಲದ ಆನ್ ಅಂಜೋವುಳು ದುಮುಣನಿ ಪೊದು ಪಾಲೆದ ಮರಕ್ ಒಂಜಿ ನೂಲು ಕಟ್ಟ್ ದ್ ಬರ್ಪೆರ್ ಕಾರಣ ಮರತ ಗುರ್ತ ಗ್ ಇಲ್ಲಡ್ ಬೊಳ್ಳು ಕಲ್ಲ್ ಚೆಕ್ಕೆ ಗುದ್ಯರೆ ತಯಾರ್ ದೀಪೆರ್ ಮನದನಿ ಕಾಂಡೆ ನೆಸರೆ ದೇವೆರೆನ ಬೊಲ್ಪುದ ವಸರ್ ಭೂಮಿ ಗ್ ಪಸರೋರ್ದುಂಬು ಕಾಂಡೆ ಕತ್ತಲೆದ ಜಾವಗ್ ಲಕ್ಕ್ ದ್ ಬತ್ತಲೆ ಆ ನೂಲು ಕಟ್ದಿನ ಪಾಲೆದ ಮರತ ಮುದೆಲ್ ಗ್ ಪೋದು ಚೆಕ್ಕೆ ನ್ ಬೊಲ್ಲು ಕಲ್ಲ್ ಡ್ ಕೆತ್ತ್ ದ್ ಕನ್ಪೆರ್ ಈ ಬೊಲ್ಲು ಕಲ್ಲ್ ಡ್ ದಾಯೆ ಗ್ ಚೆಕ್ಕೆ ಕೆತ್ತುನ್ ಪಂಡ ಕತ್ತಿ ಡ್ ಕೆತ್ತ್ಂಡ ಪಾಲೆದ ಮರತ ಕಸಾಯ ವಿಷವಾಪುಂಡುಗೆ ಇಲ್ಲದ ಪೊಣ್ಣು ಪೊಂಜೋವುಳು ಕಂತಿನ ಚೆಕ್ಕೆಗ್ ಎಡ್ಡೆ ಮುಂಚಿ, ಓಮ ಬೊಳ್ಳೊಳ್ಳಿ ಒಟ್ಟುಗ್ ಗುದ್ದುದ್ ಬೊಕ್ಕ ಬೊಲ್ಲು ಕಲ್ಲ್ ನ್ ಗೆಂಡೊಡ್ ಕೈತ್ದ್ ಅವೇನ್ ಗುದ್ದು ದೀತಿನ ಕಸಾಯಗ್ ಪಡುಂಡು, ಈ ಕಸಾಯ ಮಸ್ತ್ ಕೈಪೆಲಾ, ಉಷ್ಣ ಲಾ ಅಂಚದ್ ಸಂಪು ಗ್ ಬೊಡಾದ್ ಮೆತ್ತೆದ ಗಂಜಿ ಮಲ್ಪುಂಡು ನಮ್ಮ ತುಳುನಾಡ್ ಕರಿದ್ ಪೋತಿನ ಇಲ್ಲದ ಪೆರಿಯಕ್ಲೆನ್ ನೇನೆತ್ ದ್ ಆಟಿ ಅಮಾಸೆದ ಕಸಾಯ ಬೊಕ್ಕ ಮೆತ್ತೆದ ಗಂಜಿ ನ್ ಮಿತ್ತಡಿ ದೀದ್ ಬೊಕ್ಕ ಮಾತೆರ್ಲ ಕಸಾಯ ಪರ್ಪಿನ ಕ್ರಮ ಉಂಡು. ಕಸಾಯ ಬೊಡ್ಚಿಂದ್ ಛದಿ ಕಟ್ಟುನ ಜೋಕುಲೆಗ್ ಬೆಲ್ಲ ಕೊರ್ದು ಮಂಗಟ್ಟದ್ ಕಸಾಯ ಪರ್ಪವುನ ಉಂದುಲ ಒಂಜಿ ಇಲ್ಲದ ಅಪ್ಪೆರ್ಲೆನ ಕ್ರಮ. ಆಟಿ ಅಮಾಸೆದಾನಿ ಬಲೆ ಪಡ್ದ್ ಮೀನ್ ಪತ್ತ್ ದ್ ಮಧ್ಯಹ್ನ ಕುಟುಮದಿಲ್ಲಡ್ , ಇಲ್ಲ ಇಲ್ಲಾಡ್ ಕರಿದ್ ಪೋತಿನ ಪೆರಿಯಕ್ಲೆಗ್ ನುಪ್ಪು, ತೊಪ್ಪು , ಮೀನ್ ಕಜಿಪ್, ತೇವು ಪದ್ಪೆ , ಪಚ್ಚಿರ್ ದ ಕಜಿಪು ಮಲ್ತ್ ಆಟಿದ ಅಗೆಲ್ ಬಲಸದ್ ಸಂಸರೋಗ್ ಕೈಕರ್ ಸುಖ ಕೊರ್ಲೆ ಕುಟುನೊನ್ ಕಾತೊಂದು ಬಲೆಂದ್ ಕೈ ಜೊಡದ್ ನಟ್ಟೋನುವ. ಆಟಿ ತಿಂಗೊಳು ಬಂಙ ದಿನಾ ಅದಿತ್ತ್ಂಡಲ ಬಂಙ ಪಂದ್ ನಮ್ಮ ಒವ್ವೆ ಸಂಸ್ಕ್ರತಿ ,ಆಚಾರ, ಕಟ್ಟ್ ಲೆನ್ ತುಳುವೆರ್ ಬುಡ್ದು ಪಡ್ದುಜ.ಆಟಿ ಡ್ ಬರ್ಪಿನ ಕುತ್ತೊಲೆನ್ ಕಳೆಪರೆ ಊರುಡು ಮಾರಿ ದೇರೊಂದು ಆಟಿ ಕಳಂಜೆ ಬರ್ಪಿನ ಪದ್ದತಿ ಇತ್ತ್ಂಡ್ . ಆಟಿ ಡ್ ಮುಪ್ಪ ದಿನ ಮಾಮಿನ ಇಲ್ಲಡ್, ಸೋಣ ಡ್ ಮುಪ್ಪ ದಿನ ಮಾಮಿ ಮಾಗಳೆ ಇಲ್ಲಡ್ ಕುಲ್ಲೊಂದು ಇತ್ತೆ ಗೆ ಕಳೆಂಜ .ಮೋನೆಗ್ ಮಂಜಲ್ದ ಅರೆದಲ, ಕೆಂಚಿ ಮೀಸೆ , ಕೈಟ್ ಮರತ ಪನ್ನೆತತ್ರ ಕೆಕ್ಕೀಳ್ ಗ್ ಕೇಪುಲ ಫೂ , ಕೆಂಪು ಅಂಗಿ ಸೊಂಟೊಗ್ ಮಂಡೆ ಗ್ ತಾರೆದ ತಿರಿ ತುರಿಯೊಂದು ಕಾರ್ ಗ್ ಗೆಜ್ಜೆ ಕಟ್ಟೋಂದು ತೆಂಬರೆದ ಪೆಟ್ಟ್ ಗ್ ನಲಿತೊಂದು ಆಟಿ ಕಳಂಜೆ ಇಲ್ಲ್ ಇಲ್ಲಗ್ ಬತ್ತ್ ದ್ ಮಾರಿ ದೇರೊಂದು ಪೋಪಿನ ಕ್ರಮ ಇತ್ತ್ಂಡ್. ಇಲ್ಲಾ ಗ್ ಬತ್ತಿನ ಕಳೆಂಜಗ್ ಬಚ್ಚಿರೆ ಬಜೈ ಅರಿ ,ತಾರಾಯಿ, ಮುಂಚಿ, ಪುಳಿ,ಉಪ್ಪು ಸೌತೆ ಉಂದು ಪೂರ ಕಾಣಿಕೆ ರೂಪೊಡು ಕೈಯೇರ್ ದ್ ಕೊರ್ಪೆ ರ್ ಕುರ್ದಿ ನೀರ್ ನ್ ಕಳೆಂಜ ನ ಕಾರ್ ಗ್ ಮೈತ್ ದ್ ಇಲ್ಲ ಗ್, ಊರು ಗ್ ಬೈದಿನ ಮಾರಿ ಸೀಕ್ಲೆನ್ ದೂರ ದೇರೊಂದು ಪೋಲ ಪಂದ್ ನಟ್ಟೊನುವೆರ್. ದೈವ ದೇವೆರ್ ಇಜ್ಜಾಂದಿ ಪೊರ್ತುಡು ದೈವ ರೂಪವಾದ್ ತಾಂತ್ರಿಕ ಸಗ್ತಿಡ್ ಊರು ಗ್ ಬೈದಿನ ಮಾರಿನ್ ಮೂಡಾಯಿ ಕೊನೋದು ಪಡೊಂದು ಇತ್ತೆ ಪಂದು ಹಿರಿಯಲ್ಲು ಪನೊಂದುಲ ಇತ್ತೆರ್. ಆಟಿ ದ ಆಕೇರಿಗ್ ಇಲ್ಲಡ್ ಆಟಿ ಪಿದಾಯಿ ಪಾಡುನ ಕ್ರಮ ಉಂಡು ದಾಯೆ ಪಂಡ ಅಪಾಗ ಪೂರ ಮುಳಿತ ಇಲ್ಲ್ ಲು ಇತ್ತಿನಿ ಆ ರಕ್ಕಸ ಬರ್ಸೊಗ್ ಇಲ್ಲದುಲಾಯಿ ದಾಲ ವಿಷ ಜಂತುಲು ಪೊಗ್ಗುದಿತ್ತಡ ಐಕ್
ಬೊಡಾದ್ ಇಲ್ಲದ ನಾಲ್ ಕೋಂಟುದ ಕಜವು ಅಟ್ಟದ ಮಿತ್ತ್ ದ ಕಜವು ಪೂರ ಪಿದಾಯಿ ಪಾಡ್ದ್ ಇಲ್ಲ್ ನಿರ್ಮಲ ಮಲ್ತ್ ದ್ ಆಟಿ ನ್ ಕರಿತ್ ದ ಎಂಕ್ಲು ಉಂದೆನ್ ಪೂರ ಕಣ್ಣ್ ಡ್ ತೂದ್ ಅನುಭವದ ಗಂಟ್ ನ್ ಸೆರಂಗ್ ಕಟ್ಟೊಂದು ಈ ಕಾಲಗ್ ಬತ್ತ್ ಮುಟುದ ಪನೊಂದು ಲೋಟೆ ಪತೊಂದು ಉಲಾಯಿ ಪೊಯೆರ್. ಈತ್ ಪೂರ ಅಮ್ಮನ ಬಾಯಿಡ್ ಕೇಂಡಿನ ಎಂಕ್ ಸೋದೆ ಅಂಡು ನಮ ಈ ಕಾಲದ ಜೋಕುಲ್ ಕೆಸರ್ ಒಂಜಿ ದಿನ, ಆಟಿನ್ ಒಂಜಿ ದಿನ ಮಲ್ಪುನ ಕಾರ್ಯ ಕ್ರಮನ್ ಮನೋರಂಜನೆ ದಿಟ್ಟಿ ತೂಪ ಗಮ್ಮತ್ ಡೆ ಪೋಪ ದುಂಬುದ ವಿಚಾರೊಲೆನ್ ಅಲ್ಪ ತೆರಿಯೋನರೆ ಅವಕಾಶ ಮಲ್ತ್ ಉಪ್ಪುವೆರ್ ಅಂಡಲಾ ನಮ ಐತ ಗೋಜುಗ್ ಪೋಪುಜ. ಅಂಚದ್ ತುಳುನಾಡ್ ನಮ ಪುಟ್ಟಿ ನ ಮಣ್ಣ್ ದ ಅವ್ವೆತೋ ವಿಚಾರ ತೆರಿಯಂದೆ ನಮಕ್ ನಮನೆ ದ್ರೋಹ ಮಲ್ತೊಂದುಲ್ಲ ಪಂದ್ ಮನಸ್ ಗ್ ತೇರಿಂಡ್

🖊️ ದಿವ್ಯ ಅಂಚನ್ ಪಕ್ಷಿಕೆರೆ
ತುಲುವೆರೆ ಕಲ