ಅಪ್ಪೆ ಬಾಸೆಗ್ ಮಾನಾದಿಗೆ ತಿಕ್ಕೊಡ್: ತುಲುನಾಡೊರ್ಮೆ ದೈವ-ದೇವೆರೆಡ ಸುಗಿಪು..

ಪಂಚವರ್ಣದ ನಾಗನಡೆತ ಮಣ್ಣ್ ಈ ನಮ್ಮ ತುಲುನಾಡ್.ಮೂಲೊಡ್ದಿಂಚಿಲಾ ತುಲುವೆರ್ ತುಲುನಾಡುಡ್ ಒವ್ವೇ ಆಪತ್ತ್ ಬತ್ತುಂಡಲಾ ಸುರುಕಾದ್ ತಂಕುಲು ನಂಬಿನಂಚಿನ ಶಕ್ತಿಲು ನಮನ್ ಕೈ ಬುಡಯೆರ್ ಪನ್ಪಿನ ಬಲವಾಯಿನ ನಂಬೊಲಿಗೆ ತುಲುವೆರೆಗ್ ಆ ನಿಟ್ಟುಡ್ ಕರಿನ ಕೆಲವು ವರ್ಸೊಡಿಂಚಿ ಪಂಚದ್ರಾವಿಡ ಬಾಸೆಲೆಡ್ ಒಂಜಾಯಿನ ತುಲುಬಾಸೆಗ್ ಸರ್ಕಾರೊಡ್ ಅಧಿಕ್ರತವಾದ್ ಮಾನಾದಿಗೆ ತಿಕ್ಕಂದಿನವ್ ಬಾರೀ ಬೇಜರುದ ಸಂಗತಿಯಾದಿತ್ತುದ್,ಪ್ರತೀ ಸರ್ತಿಲಾ “ತಾಂತ್ರಿಕ ದೋಷ ಪಂಡುದ್ ತುಲುವೆರೆನ್ ಮಂಗೆ ಮಲ್ತೊಂದೇ ಬರೊಂದುಂಡ್.ವಾ ರೀತಿದ ಪೊರಂಬಾಟ ಮಲ್ತುಂಡಲಾ ತುಲುಬಾಸೆಗ್ ಮಾನಾದಿಗೆ ತಿಕ್ಕಿನೇ ಇಜ್ಜಿ.ಅಂಚಾದ್ ಮಾತಾ ರೀತಿದ ಪೊರಂಬಾಟ ಮುಗಿತ್ತುದ್ ಇತ್ತೆ ತುಲುವೆರ್ ತಾನ್ ನಂಬಿನಂಚಿನ ದೈವ-ದೇವೆರೆಡನೇ ಸುಗಿತ್ತುದ್ ಅಪ್ಪೆ ಬಾಸೆಗ್ ಮಾನಾದಿಗೆ ಕೊರ್ಪಾಲೆ,ನ್ಯಾಯ ಒದಗಾಲೆ ಪಂಡುದ್ ಭಕ್ತಿಡ್ ನಟ್ಟೊನರೆಗ್ ಪಿದಾಡ್ದೆರ್.

ಕರ್ನಾಟಕ ತುಲುಸಾಹಿತ್ಯ ಅಕಾಡೆಮಿ ಸೇರಿನಂಚ,ಜೈ ತುಲುನಾಡ್ ಸಂಘಟನೆ (ರಿ) ,ಬೇತೆ ಬೇತೆ ತುಲುಸಂಘಟಕೆರ್ ಇನಿತ ದಿನ ತುಲುನಾಡೊರ್ಮೆ ದೈವ-ದೇವಸ್ಥಾನೊಲೆಡ್ ಸೇರ್ದ್ ಸುಗಿತೆರ್.

ತುಲುನಾಡುದ ರಾಜಧಾನಿ ಬಾರ್ಕೂರುದ ಶ್ರೀ ಪಂಚಲಿಂಗೇಶ್ವರ ದೇವಸ್ಥಾನಡ್ ಕರ್ನಾಟಕ ತುಲುಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಆಳುಪ ರಾಜವಂಶಸ್ಥೆ ಶ್ರೀ ಆಕಾಶ್ ರಾಜ್ ಜೈನ್ ಮೆರೆನೊಟ್ಟುಗ್ ಜೈ ತುಲುನಾಡ್ ಸಂಘಟನೆದ ಪದುಕೆರ್ ಸೇರ್ದ್ ಭಕ್ತಿಡ್ ಸುಗಿತೆರ್..

ತುಲುವೆರೆ ಪಕ್ಷದ ಗುರ್ಕಾರ್ಲು ಶೈಲೇಶ್ ಆರ್.ಜೆ. ಕುಟುಂಬದೊಟ್ಟುಡ್ ಗುಳಿಗ ದೈವಡ ಅಂಚೆನೇ ಶ್ರೀ ಲೋಕನಾಥೇಶ್ವರ ದೇವಸ್ಥಾನ ಬದ್ಯಾರ್,ಶಿರ್ಲಾಲ್ ಮುಲ್ಪ ಭಕ್ತಿದ ಸುಗಿಪು ಮಲ್ತೆರ್.

ಪುಂಡರೀಕ ಶ್ರೀ ವಿಷ್ಣುಮೂರ್ತಿ ದೇವಲ್ಯೊ ಬೇಲಾಡಿಡ್ ಜೈ ತುಲುನಾಡ್ ಸಂಘಟನೆದ ಜವನೆರ್ ಭಕ್ತಿಡ್ ಸುಗಿತೆರ್.