ಸಾಮಾಜಿಕ ನೆರವುಗಾದ್ ಪುಟ್ಟುದ್ ಸಾಂಸ್ಖೃತಿಕ ಸಂಘಟನೆಯಾಯಿನ ಸುಮನಸಾ: ಜಯಕರ ಶೆಟ್ಟಿ
ತನ್ನೂರುಡ್ ಅವಘಡ ಆಯಿನಪಗ ಅಕ್ಲೆನ ನೆರವುಗ್ ಸಮಾನ ಮನಸ್ಕೆರು ಒಟ್ಟಾದ್ ಕಟ್ಟಿನ ಸಂಸ್ಥೆ ಸುಮನಸಾ ಇನಿ ಸಾಮಾಜಿಕ ಕಳಕಳಿನ್ ದುಂಬರಿತೊಂದ್ ಸಾಂಸ್ಕೃತಿಕ ಸಂಘಟನೆಯಾದ್ ಬುಳೆದುಂಡ್ ಪಂಡುದು ಜಿಲ್ಲಾ ಸಹಕಾರ ಯೂನಿಯನ್‌ ಅಧ್ಯಕ್ಷೆರಾಯಿನ ಜಯಕರ ಶೆಟ್ಟಿ ಇಂದ್ರಾಳಿ ಪಂಡೆರು.
ಸಾಂಸ್ಕೃತಿಕ ಸಂಘಟನೆ ಸುಮನಸಾ ಕೊಡವೂರು ವತಿಡ್ದ್ ಅಜ್ಜರಕಾಡು ಭುಜಂಗಪಾರ್ಕ್ ಡ್ ಆಯೋಜನೆ ಮಲ್ದಿನ ರಂಗಹಬ್ಬ-11 ನೆತ್ತ ಮೂಜನೇ ದಿನದ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಾದ್ ಆರು ಪಾತೆರಿಯೆರು.
ಕಿನ್ನ ಜೋಕುಲೆಡ್ದ್ ಹಿರಿಯರೆಮುಟ್ಟ ಬೇತೆ ಬೇತೆ ವಯೋಮಾನದಕುಲು 80 ಗ್ ಲಾ ಜಾಸ್ತಿ ಜನ ಈ ಸಂಸ್ಥೆಡುಲ್ಲೆರ್. ಈತ್ ಶಿಸ್ತುಬದ್ಧವಾಯಿನ ತಂಡ ಬೇತೆ ಇಜ್ಜಿ. ಈ ತಂಡದ ಶಿಸ್ತೇ ಬಾಕಿದಕ್ಲೆಗ್ ಮಾದರಿ ಪಂಡುದು ಪುಗಾರಿಯೆರ್.
ಕಲೆನ್ ಒರಿಪಾದ್ ಬುಲೆಪಾವುನ ಬೇಲೆನ್ ನಿರಂತರವಾದ್ ಮಲ್ತೊಂದ್ ಬರೊಂದುಪ್ಪುನ ಸುಮನಸಾ ತಂಡ ರಂಗಭೂಮಿದ ಸಾಧಕರೆನ್ ಗುರುತಿಸಾದ್ ಗೌರವಿಸಾವೊಂದ್ ಬೈದುಂಡ್. ಇನಿ ತುಳುಕೂಟದ ಕಾರ್ಯದರ್ಶಿ ಗಂಗಾಧರ ಕಿದಿಯೂರು ಅರೆಗ್ ರಂಗಸನ್ಮಾನ ಕೊರ್ತಿನ ತುಳುಕೂಟಗ್ ಕೊರಿನ ಗೌರವ ಪಂಡುದ್ ತೆರಿಪಾಯೆರು.
ರಂಗ ಸನ್ಮಾನ ಸ್ವೀಕಾರ ಮಲ್ತಿನ ಗಂಗಾಧರ ಕಿದಿಯೂರು ಪಾತೆರ್ದ್, ‘ತುಳುಕೂಟ ಉಡುಪಿ, ಬೈದ್ಯಶ್ರೀ ಸಂಶೋಧನಾ ಕೇಂದ್ರ ಈ ರಡ್ಡ್ ಸಂಘಟನೆಲು ಎನನ್ ಬುಲೆಪಾದುಂಡ್ ಸುಮನಸಾದ ಮಸ್ತ್ ಸದಸ್ಯೆರು ಎನ್ನ ನಾಟಕೊಲೆಡ್ ಪಾತ್ರ ಮಲ್ದೆರ್ ಪಂಡುದ್ ನೆಂಪು ಮಲ್ತೊಂಡೆರ್.
ಉಡುಪಿ ನಗರಸಭೆ ಪೌರಾಯುಕ್ತ ಡಾ. ಉದಯ ಶೆಟ್ಟಿ ಪಾತೆರ್ದ್ ‘ಕೊಡವೂರುಡ್ ಪುಟ್ಟುದ್ ಬುಲೆಯಿನ ಸುಮನಸಾ ಸಂಸ್ಥೆ ನಗರಸಭೆ ವ್ಯಾಪ್ತಿಡೇ ಇಪ್ಪುನವ್ ಎಂಕ್ಲೆಗ್ ಪೆರ್ಮೆ. ಕ್ರಿಯಾಶೀಲವಾದ್ ತೊಡಗಿಸಾವೊಂದಿನ ಈ ಸಂಸ್ಥೆ ಕರಿನ 11 ವರ್ಷಡಿಂಚಿ ಬೇತೆ ಬೇತೆವ ಕಲಾ ತಂಡೊಲೆನ್ ಇಡೆಗ್ ಲೆಪ್ಪುಡಾವುನ ಮುಖೇನ ಆ ತಂಡೊಲೆನ್ ಪ್ರೋತ್ಸಾಹಿಸಾವುಂಡ್. ಒಟ್ಟುಡ್ ಇದಮುಟ್ಟ ಪೊಸ ರಂಗ ಪ್ರಯೋಗಲೆನ್ ತೂಪಿನ ಅವಕಾಶನ್ ಒದಗಿಸಾದುಂಡ್’ ಪಂಡೆರು.
ಕೊಡವೂರು ಶಂಕರನಾರಾಯಣ ದೇವಸ್ಥಾನದ ವ್ಯವಸ್ಥಾಪನ ಸಮಿತಿ ಅಧ್ಯಕ್ಷ ಸಾಧು ಸಾಲ್ಯಾನ್‌, ಉದ್ಯಮಿ ಹರೀಶ್ಚಂದ್ರ ಕೊಡವೂರು, ಸುಮನಸಾ ಸಾಂಸ್ಕೃತಿಕ ಸಂಘಟನೆದ ಅಧ್ಯಕ್ಷ ಪ್ರಕಾಶ್‌ ಜಿ. ಕೊಡವೂರು, ಉಪಾಧ್ಯಕ್ಷ ವಿನಯ್‌ ಕಲ್ಮಾಡಿ ಉಪಸ್ಥಿತರಿತ್ತೆರ್.
ಯೋಗೀಶ್‌ ಕೊಳಲಗಿರಿ ಸ್ವಾಗತ ಮಲ್ತೆರ್. ಜೀವನ್‌ ಕುಮಾರ್‌ ಸೊಲ್ಮೆ ಸಂದಾಯ್ತ ಮಲ್ತೆರ್. ಪ್ರವೀಣ್‌ಚಂದ್ರ ತೋನ್ಸೆ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಸಭಾಕಜ್ಜೊಡ್ ಬೊಕ್ಕ ಮಂಗಳೂರು ರಂಗ ಪ್ರತಿಷ್ಠಾನಡ್ದ್ ‘ದಾಟ್ಸ್‌ ಆಲ್‌ ಯುವರ್‌ ಆನರ್‌’ ನಾಟಕ ಪ್ರದರ್ಶನ ಆಂಡ್.
by 