ಯತ್ರ ನಾರ್ಯಸ್ತು ಪೂಜ್ಯಂತೇ
ರಮಂತೆ ತತ್ರ ದೇವತಃ
ಒಲ್ಪ ಪೊಣ್ಣಗ್ ಪೂಜ್ಯನೀಯ ಗೌರವ ತಿಕ್ಕುಂಡ ಅಲ್ಪ ದೇವತೆಲು ನಿಲೆ ಆಪೆರ್ ….
ಅಪ್ಪೆ ಆದ್ ಸಾಂಕುವೊಲು,ಪಲ್ದಿ ಆದ್ ಸರಿ, ತಪ್ಪು ತಿದ್ದುವೊಲು ಪೊಣ್ಣು, ಮೆಗ್ದಿಯಾದ್ ಕರುಣೆ ತೋಜಾವೊಲು ಪೊಣ್ಣು, ಬುಡೆದಿಯಾದ್ ಇಲ್ಲಗ್ ಬೊಲ್ಪು ಆಪೊಲು ಪೊಣ್ಣು, ಪೊಣ್ಣೇ ಬಾಳುದ ಕಣ್ಣು. ಪ್ರೇಮಮಯಿ, ತ್ಯಾಗಮಯಿ, ಕರುಣಾಮಯಿ ಪೊಣ್ಣು.
ಅಂಚಾದ್ ಪೊಣ್ಣುಲೆಗ್ ಗೌರವ ಕೊರ್ಪಿನ ಪ್ರತಿಯೊರಿನ ಆದ್ಯ ಕರ್ತವ್ಯ.
ಪ್ರತಿಯೊಂಜಿ ಕ್ಷೇತ್ರೊಡುಲಾ ತೊಡಗಿಸಾವೊಂದ್ ತನ್ನವೇ ಆಯಿನ ಸಾಧನೆನ್ ಜಗತ್ತುಗ್ ತೋಜಾವೊಲು..ಆನುಲೆಗ್ ಯಾನ್ ಒಯಿಟುಲಾ ಕಡಮೆ ಇಜ್ಜಿ ಪನ್ಪಿನವ್ವೆನ್ ತೋಜಾವೊಲು..ಇಲ್ಲದ ಅಂಗಣೊಡ್ದ್ ಜಗತ್ತ್ ದ ಅಂಗಣೊನ್ ಮುಟ್ಟುನ ಬೇಲೆ ಇನಿತ್ತ ದಿನೊಕ್ಲೆಡ್ ಸಾಧನೆ ಮಲ್ದಿನ ಪೊಣ್ಣುಲೆನ್ ನಮ ದಿನ ನಿತ್ಯ ತೂವೊಂದುಲ್ಲ..
ಕುಟುಂಬದ ನಿರ್ವಹಣೆ ದೊಟ್ಟುಗ್ ಪಿದಾಯಿ ಪೋದು ಬೇಲೆ ಮಲ್ತುದ್ ತನ್ನ ಇಲ್ಲಗ್ ಒವ್ವೇ ಆಪತ್ತು ಬರಂದಿಲೆಕ್ಕ ತನ್ನ ಜಬಾದಾರಿಕೆನ್ ಪೊರ್ಲುಡ್ ನಿರ್ವಹಣೆ ಮಲ್ಪುವೊಲು..ರಾಜಕೀಯ, ಸಾಮಾಜಿಕ, ಶೈಕ್ಷಣಿಕ, ಆರ್ಥಿಕ,ಇಂಚ ಮಾತಾ ಕ್ಷೇತ್ರೊಡುಲಾ ಸ್ಥಳೀಯ ಮಟ್ಟೊಡ್ದ್ ಸುರು ಮಲ್ತುದ್ ಕೇಂದ್ರ ಮುಟ್ಟ ಮುಟ್ಟುನ ಪೊಣ್ಣುಲೆನ್ ಇನಿ ಮಾತಾ ಕ್ಷೇತ್ರೊಡುಲಾ ತೂವೊಂದುಲ್ಲ..ಉಂದು ಪೆರ್ಮೆದ ಸಂಗತಿಯೇ ಸರಿ.ಈ ಪ್ರಕ್ರಿಯೆ ಇನಿ ಕೋಡೆಡತ್ತ್ ಬಹುಶಃ ತ್ರೇತ್ರಾಯುಗ,ದ್ವಾಪರಯುಗಡಿಂಚಿಲಾ ನಡತೊಂದ್ ಬೈದಿನವ್.ಆಂಡ ಬೇಜಾರುದ ಸಂಗತಿ ದಾದ ಪಂಡ ಪೊಣ್ಷುಲು ಒವ್ಬೇ ಕ್ಷೇತ್ರೊಡ್ ಏತೇ ಸಾಧನೆ ಮಲ್ಪಡ್ ಅಲೆನ ಮಿತ್ತ್ ಪೊಣ್ಣು ಪನ್ಪಿನ ಕೀಳರಿಮೆ ನನಲಾ ಪೋತುಜಿ. ಕೆಲವೊಂಜಿ ಕಡೆಟ್ ಕೀಳುಜನಕುಲು ಪೊಣ್ಣುಲೆನ್ ಅಸಹ್ಯವಾದ್ ಗಲಸುನ ರೀತಿ ರಿವಾಜುಲೆನ್ ತೂವನಗ ಪೊಣ್ಣುಲ್ ಈತುಲಾ ಸಸಾರನಾ ಪನ್ಪಿನ ಪ್ರಶ್ನೆ ನಮಕ್ ನಮನೇ ಕೇನೊಡಾಪುಂಡ್.ಆಂಡ ಐಕ್ ಸರಿಯಾಯಿನ ಉತ್ತರಲಾ ಇನಿ ಪೊಣ್ಣುಲೇ ಕೊರೊಂದುಪ್ಪುನವ್ ಲಾ ಒಂತೆ ಕುಷಿತ್ತ ಸಂಗತಿ.ದಾದನೇ ಆವಡ್ ಪುರುಷ ಪ್ರಧಾನ ಸಮಾಜೊಡ್ ಒಂಜಿ ಕಡೆಟ್ ಶೋಷಣೆ ನಡತೊಂದಿತ್ತುಂಡಲಾ ಕುಡೊಂಜಿ ಕಡೆಟ್ ಪೊಣ್ಣಗುಲಾ ಬಾನೆತ್ತರದ ಮಾನಾದಿಗೆ ತಿಕ್ಕೊಂದುಂಡು..ಉಂದು ಪೊಣ್ಣುಲೆನ ಬದುಕುದ ಬುಲೆಚ್ಚಿಲ್ ದ ಸಂಗತಿ..ದಾದನೇ ಆವಡ್ ಪೊಣ್ಣುಲ್ ಮಾತ್ರ ಏತೇ ಬಾನೆತ್ತರೊಗ್ ಪೋಯೆರುಡಲಾ ಸಂಸ್ಕಾರೊನ್ ಬುಡರೆಗ್ ಬಲ್ಲಿ..ಸಂಸ್ಕಾರ ಇಜ್ಜಿ ಪಂಡುಂದಾಂಡ ಆಲ್ ಪೊಣ್ಣ ಕುಲಕೇ ಕಪ್ಪು ಚುಕ್ಕಿ ಇತ್ತಿಲೆಕ್ಕ..ಸಮಾಜೊಡ್ ಏತೇ ಪುದರ್ ಇತ್ತುಂಡಲಾ ಸಮಾಜದೊಟ್ಟುಗ್ ತನ್ನ ಕುಟುಂಬದ ನಿರ್ವಹಣೆ ನ್ ಅಚ್ಚುಕಟ್ಟಾದ್ ಶಿಸ್ತುಬದ್ಧವಾದ್,ಸಂಸ್ಕಾರಯುತವಾದ್ ಎರೆಗುಲಾ ಸಸಾರ ಆವಂದಿಲೆಕ್ಕ ನಡಪಾವೊಂದ್ ಪೋಯಲು ಪಂಡುಂದಾಂಡ ಅಂಚಿನ ಪೊಣ್ಣುಲೆನ್ ಕೇವಲ ಸಾಮಾನ್ಯ ಪೊಣ್ಣು ಅತ್ತ್,ಅಲೆನ್ ಅಪ್ಪೆನ ಜಾಗೆಡ್ ,ದೇವಿನ ಜಾಗೆಡ್ ಪೂಜ್ಯನೀಯವಾದ್ ಮಾನಾದಿಗೆ ಕೊರುಂಡ ತಪ್ಪಾವಂದ್..
ಯಶೋದ ಕೇಶವ್
by 