ಪ್ರಕೃತಿಡ್ ಪುರುಷೆ ಪನ್ಪಿನವ್ ತತ್ವ ಆಂಡ ಸ್ತ್ರೀ ಪನ್ಪಿನವ್ ಶಕ್ತಿ

ಪ್ರಕೃತಿಡ್ ಪುರುಷೆ ಪನ್ಪಿನವ್ ತತ್ವ ಆಂಡ ಸ್ತ್ರೀ ಪನ್ಪಿನವ್ ಶಕ್ತಿ. ಒವ್ವೇ ತತ್ವಡ್ ಶಕ್ತಿ ಸ್ಥಾಪನೆ ಆಯಿನಪಗ ಆ ತತ್ವದ ಅಸ್ತಿತ್ವಗ್ ಪರಿಪೂರ್ಣತೆ ತಿಕ್ಕುಂಡ್. ಪ್ರತಿಯೊರಿ ಮನುಷ್ಯಡಲಾ ಸ್ತ್ರೀಶಕ್ತಿ feminism ಬೊಕ್ಕ ಪುರುಷ ತತ್ವ ಮಸ್ಕುಲಾನಿಸಂ ನ್ ತೂವೊಲಿ.ಬಾಲೆ ಬುಲ್ತಿನಪಗ ದೆರ್ತ್ ಮುದ್ದು ಮಲ್ಪುನ ಅಮ್ಮೆರೆಡ ಸ್ತ್ರೀ ಮಮತೆದ ಶಕ್ತಿನ್ ತೂಯಡ ಬಾಲೆ ತಪ್ಪು ಮಲ್ರಿನಪಗ ಜೋರು ಮಲ್ತುದ್ ಸರಿತಾದಿಗ್ ಕನಪಿನ ಅಪ್ಪೆಡ ಪುರುಷ ತತ್ವದ ಸ್ಥಿರತೆನ್ ತೂವೊಲಿ .ಇಂಚಾದ್ ಪ್ರಕೃತಿದ ಸ್ತ್ರೀ ಬೊಕ್ಕ ಪುರುಷ ತತ್ವ ಸಾಮರಸ್ಯ ಬೊಕ್ಕ ಸಮತೋಲನದ ಕೈಪಿಡಿತ್ತ ಸಂಪೂರ್ಣ ಮನುಕುಲದ ಅಸ್ತಿತ್ವ

ಆಂಡ ಆಹಾರ ನಿದ್ರಾ ಮೈತುನದೊಟ್ಟುಗ್ ವರವಾದ್ ತಿಕ್ಕಿನ ವಿವೇಕನ್ ಮನುಷ್ಯ ತನ್ನ ಉಲಾಯಿದ ಅಹಂಕಾರದೊಟ್ಟುಗ್ ಲೇಪನ ಮಲ್ತುದ್ ಪ್ರಕೃತಿಡ್ ಸಹಜವಾದ್ ದೈಹಿಕ ಶಕ್ತಿ ಪಡೆಯಿನ ಪುರುಷ ಸ್ತ್ರೀ ಶಕ್ತಿನ್ ಬದಿಕ್ ದೀಯೆ. ಪ್ರಕೃತಿ ತತ್ವ ಬೊಕ್ಕ ಶಕ್ತಿದ ನಡುತ್ತ ಸ್ಥಿರತೆನ್ ಕಳೆಯೊಂದ್ ಸಮಾಜಡ್ ಪುರುಷ ಪ್ರಧಾನ ಅಸ್ಥಿರ ಸಮಾಜ ಜನನ ಆಂಡ್. ಸಹನೆ ಮಾತೃತ್ವಭಾವ ವಾತ್ಸಲ್ಯ ತನ್ನ ತನ್ನ ಶಕ್ತಿನ್‌ ಸ್ತ್ರೀ ಮದತುದ್ ಪ್ರಕೃತಿ ಕೊರಿನ ವರೊನ್ ಶಪಿಸಾವುನ ಮಟ್ಟೊಗ್ ಶಕ್ತಿ ಹೀನ ಭಾವನ್ ಅನುಭವಿಸಾವೊಲು.

ಪರಿವರ್ತನೆ ಜಗದ ನಿಯಮ ಸಮಯದ ಚಕ್ರದ ಮಿತ್ತ್ ಸಮಾಜ ಮಂಥನ ನಡತಿನಪಗ ತನ್ನ ಬಲಹೀನ ಸ್ಥಿತಿಕ್ ತಾನೇ ಕಾರಣ ಸರಿ ತಪ್ಪುಲೆನ ಮಧ್ಯೆ ತಪ್ಪುನ್ ಪ್ರಶ್ನೆ ಮಲ್ಪಂದೆ ಇಪ್ಪುನವ್ ಸರಿಯಾಯಿನ ತಾದಿಡ್ ನಡಪರೆಗ್ ಧೈರ್ಯ ಮಲ್ಪಂದೇ ಇಪ್ಪುನವ್ವೇ ತನ್ನ ದೌರ್ಬಲ್ಯ ಪಂಡುದ್ ತೆರಿನ ಸ್ತ್ರೀ, ಸಾಮಾಜಿಕ ಸಭಾಂಗಣಡ್ ಉಂತರೆಗ್ ಶಿಕ್ಷಣ ಬೊಕ್ಕ ಸಾಂಸಾರಿಕ ಸಹಭಾಗಿತ್ವಡ್ ಶುಶ್ರೂಶೆದ ನಡುಟ್ ಸಮತೋಲನನ್ ತೂಯೊಲು.

ಇನಿ ಪೊಣ್ಣು ಸಬಲೀಕರಣದ ಪಥೊಟ್ ನಮ ಮಸ್ತ್ ದುಂಬು ಬೈದ.ಒವ್ವೇ ಕ್ಷೇತ್ರದ ತಾದಿ ತೋಜಿಂಡಲಾ ಸ್ತ್ರೀ ತನ್ನ ಪಜ್ಜೆ ಗುರುತುನ್ ಚಾಪಿಸಾವೊಂದ್ ದುಂಬು ಸಾಗೊಂದ್ ದುಂಬುದ ಪೀಳಿಗೆಗ್ ದಾರಿದೀಪವಾದ್ ಬುಳೆದು ಉಂತುದೊಲು.
2023 ಮಾರ್ಚ್ 8 ವಿಶ್ವ ಮಹಿಳಾ ದಿನಾಚರಣೆ ಈ ಪ್ರಸ್ತುತ ವರ್ಷದ ಧ್ಯೇಯ ಡಿಜಿಟ್ ಆಲ್… ಮಾತೆರೆಗುಲಾ ತಂತ್ರಜ್ಞಾನ .ವಿಶ್ವ ಸಂಸ್ಥೆದ ಪ್ರಕಾರ ವಿಶ್ವದ 22 ಪ್ರತಿಶತ ಮಹಿಳೆಯೆರು ಮಾತ್ರ ತಂತ್ರಜ್ಞಾನದ ಸಂಪೂರ್ಣ ಶಕ್ತಿದ ಬಳಕೆದ ಪ್ರಯೋಜನನ್ ಪಡೆಯೊಂದುಲ್ಲೆರ್.
ಇನಿ ಮಹಿಳೆ ರಂಗೋಲಿದ ಚುಕ್ಕೆಗೆರೆಡ್ದ್ ಪ್ರಾರಂಭ ಮಲ್ತುದ್ ರಾಷ್ಟ್ರಪತಿನ ಗದ್ದುಗೆದ ಗರತಿಯಾದ್ ಬುಳೆದು ಉಸುದೊಲು. ಅಲೆಡುಪ್ಪುನ ಲಲಿತ ಕಲೆತ್ತ ಪ್ರತಿಭೆಯಾವಡ್ , ರುಚಿಯಾಯಿನ ಅಟ್ಟಿಲುದ ಕೈಪಿಡಿಯಾವಡ್ ,ವ್ಯಕ್ತಿ ಸೌಂದರ್ಯದೊಟ್ಟುಗ್ ವ್ಯಕ್ತಿತ್ವ ಸೌಂದರ್ಯದ ರಹಸ್ಯ ಮಂತ್ರ ಆವಡ್ ಇಲ್ಲದ ಅಗಣಿತ ಕೆಲಸೊನ್ ಸುಗಮವಾದ್ ಸಾಗಿಸಾವುನ ಸರಳತೆಯಾವಡ್ ಗಣಿತ ಕ್ಷೇತ್ರದ ಮಾನವ ಕಂಪ್ಯೂಟರ್ ಪನ್ಪಿನ ಹೆಗ್ಗಳಿಕೆಯಾವಡ್ ,ಇಂಚ ಪ್ರತಿಯೊಂಜಿ ಶಕ್ತಿಗುಲಾ ತಂತ್ರಜ್ಞಾನದ ಇಂದ್ರಜಾಲದ ಸ್ಪರ್ಶ ಆಂಡ ಇಲ್ಲದ ನಾಲ್ ಗೋಡೆಲೆನ್ ಮೀರುದ್ ಸಮಾಜಡ್ ಸ್ಥಿರವಾದ್ ನಿಲೆಯಾದ್ ಜಗತ್ತ್ ದಾದ್ಯಂತ ಸರಿಸಾದ್ ಸಂಭ್ರಮಿಸುವುನೈಟ್ ಸಂಶಯ ಇಜ್ಜಿ. ನಮ್ಮ ಜೀವನದ ಅವಿಭಾಜ್ಯ ಅಂಗವಾದ್ ಮಾರ್ಪಾಡಾಪಿನ ತಂತ್ರಜ್ಞಾನದ ನಾಡಿಮಿಡಿತನ್ ಮಹಿಳೆ ಅರ್ಥ ಮಲ್ತೊಲ್ ಪಂಡುಂದಾಂಡ ಅಲೆನ ಬೆಳವಣಿಗೆಗೆ ಆಲೇ ಮಿತಿ.
ಎಂಚ ಬೊಲ್ಪುಗ್ ಕತ್ತಲೆ ವಿರುದ್ಧ ಆಂಡಲಾ ಅವಿಭಾಜ್ಯನಾ ಅಂಚೆನೇ ಜ್ಞಾನದ ಒಳಿತುದೊಟ್ಟುಗ್ ಕೆಡಕುಲಾ ಅವಿಭಾಜ್ಯ.ಇಲ್ಲದ ಅಂಗಣೊಡ್ದ್ ಮಂಗಳನಂಗಣ ಮುಟ್ಟ ಪಸರಿಸಾದಿನ ತಂತ್ರಜ್ಞಾನ ಸರಿಯಾಯಿನ ಹಿತವಾಯಿನ ಮಿತವಾಯಿನ ಬಳಕೆನ್ ತೆರಿಯೊಂದ್ ಅವ್ವೆನ್ ಅನುಸರಿಸಾವುಲೆಕ್ಕ ಮಲ್ಪುನ ಶಕ್ತಿ ಮಹಿಳೆಗತ್ತಾವಂದೆ ಬೇತೆ ಎರೆಗುಲಾ ಇಜ್ಜಿ .ತಂತ್ರಜ್ಞಾನದ ಶಕ್ತಿನ್ ತನ್ನ ಬೊಕ್ಕ ಸಮಾಜದ ಬೆಳವಣಿಗೆಡ್ ಹಿತವಾದ್ ಗಲಸೊಂದ್ ಪ್ರಕೃತಿ ಕೊರಿನ ಸ್ತ್ರೀಶಕ್ತಿನ್ ಸ್ಥಿರವಾದ್ ಬೆಳೆಸಾವೊಂದ್ ಪೊಂಜೊವುಲೆನ ಅಸ್ತಿತ್ವನ್ ಸಮಾಜ ಸಂಭ್ರಮಿಸಾಯಿನಪಗ ಮಾತ್ರ ನಿಜವಾಯಿನ ಮಹಿಳಾ ದಿನಾಚರಣೆ.

Dr.Cherishma shetty
B.A.M.S. MSc Yoga