ರಾಜ್ಯದ ಪ್ರತಿಷ್ಠಿತ ಸಹಕಾರ ಸಂಸ್ಥೆ ಆಯಿನ ಉಡುಪಿದ ಬಡಗಬೆಟ್ಟು ಕ್ರೆಡಿಟ್ ಕೋ-ಆಪರೇಟಿವ್ ಸೊಸೈಟಿ 2024-25ನೇ ಸಾಲುಡ್ ರೂ. 2,935 ಕೋಟಿ ವರ್ಷದ ವಹಿವಾಟು ಮಲ್ತುದ್ ರೂ.19.37 ಕೋಟಿ ಲಾಭ ಮಲ್ದುಂಡ್ ಪಂಡುದ್ ಸಂಘದ ಅಧ್ಯಕ್ಷೆರಾಯಿನ ಶ್ರೀ ಜಯಕರ ಶೆಟ್ಟಿ ಇಂದ್ರಾಳಿ ಮೇರು ಪತ್ರಿಕಾಗೋಷ್ಠಿಡ್ ತೆರಿಪಾದೆರ್. ವರದಿ ವರ್ಷಾಂತ್ಯಗ್ ಸಂಘ ಒಟ್ಟು ರೂ. 573 ಕೋಟಿ ಠೇವಣಿ ಸಂಗ್ರಹ ಮಲ್ದಿತ್ತುದ್ ಕರಿನ ಸಾಲುಡ್ದ್ ಶೇ. 12.45 ಏರ್ದುಂಡ್. ಸದಸ್ಯೆರೆಗ್ ಗ್ರಹನಿರ್ಮಾಣ, ವಾಹನ ಖರೀದಿ, ಜಾಗೆ ಖರೀದಿ, ಬೊಕ್ಕ ಅಭಿವ್ರದ್ಧಿದ ಬಗೆಟ್ ವಾಣಿಜ್ಯ ಸಂಕೀರ್ಣ ಬೊಕ್ಕ ವಸತಿ ಸಮುಚ್ಚಯ ನಿರ್ಮಾಣದ ಬಗೆಟ್ ಸ್ವ ಉದ್ಯೋಗಗಾದ್, ವಿದ್ಯಾಭ್ಯಾಸ, ಮದಿಮೆ, ಬೊಕ್ಕ ಬಂಗಾರ್ದ ಈಡುದ ಮಿತ್ತ್ ಸೂಕ್ತ ದಾಖಲೆನ್ ದೆತೊಂದ್ ಸಾಲ ಕೊರೊಂದಿತ್ತುದ್ ವರದಿ ವರ್ಷಾಂತ್ಯಡ್ 477 ಕೋ. ರೂ ಸದಸ್ಯೆರೆನ ಪಿದಾಯಿದ ಸಾಲ ಬಾಕಿ ಇತ್ತುದ್ ಕರಿನ ಸಾಲುಡ್ದ್ ಶೇ. 18.62 ಏರಿಕೆ ತೋಜಿದುಂಡ್. 95.18 ಕೋಟಿ ನಿಧಿ, 229.73 ಕೋಟಿ ರೂ. ಹೂಡಿಕೆಲು ಇತ್ತುದ್, ರೂ. 673.20 ಕೋಟಿ ರೂ. ಬೆನ್ಪಿನ ಬಂಡವಾಳ ಉಂಡು. ಸಂಘಗ್ ತನ್ನ ಕಾರ್ಯಕ್ಷೇತ್ರಡ್ 11 ಶಾಖೆಲು ಇತ್ತುದ್ ಈ ಪೈಕಿ 8 ಶಾಖೆಲು ಸಂಘದ ಸ್ವಂತ ನಿವೇಶನಡ್ ಉಂಡು. 12ನೇ ಶಾಖೆಯಾದ್ ಕುಂದಾಪುರದ ಹ್ರದಯಭಾಗಡ್ ಸ್ವಂತ ಕಛೇರಿ ಖರೀದಿ ಮಲ್ದಿತ್ತುದ್ ಸದ್ಯಡೇ ಗ್ರಾಹಕೆರೆನ ಸೇವೆಗ್ ಲಭ್ಯ ಉಂಡು.
ಮೂಜಿ ಸರ್ತಿ ರಾಷ್ಟ್ರ ಪ್ರಶಸ್ತಿ 9 ಸರ್ತಿ ರಾಜ್ಯಮಟ್ಟದ ಪ್ರಶಸ್ತಿ, 18 ಸರ್ತಿ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲಾ ಮಟ್ಟದ ಪ್ರಶಸ್ತಿನ್ ಪಡೆತುದು ಯಶಸ್ವಿ ಕ್ರೆಡಿಟ್ ಸೊಸೈಟಿ ಆದ್ ಸಂಘ ಗುರುತಿಸಾವೊಂದುಂಡ್. ಕೇವಲ ವ್ಯವಹಾರ ಮಲ್ತುದ್ ಲಾಭ ಗಳಿಸಾವುನ ದೃಷ್ಟಿನ ಮಾತ್ರ ದೀಯೊ ನಂದೇ , ಸಾಮಾಜಿಕ ಕಳಕಳಿದ ಕಾರ್ಯಕ್ರಮಲೆನ್ ನಿರಂತರವಾದ್ ಮಲ್ತೊಂದು ವಾರ್ಷಿಕ ಸುಮಾರು ರೂಪಾಯಿ 20 ಲಕ್ಷ ದಾತು ಶಿಕ್ಷಣದ ಬಗ್ಗೆ ಆರೋಗ್ಯದ ಬಗ್ಗೆ ಸಾಮಾಜಿಕ ಕಾರ್ಯಕ್ರಮಗ್ ತೊಡಗಿಸಾವೊಂದು ಬರೊಂದುಂಡ್.
ಡಿಜಿಟಲೀಕರಣದ ಪಜ್ಜೆಯಾದ್ ಅಭಿವೃದ್ಧಿ ಮಂದಿನ ಚೇತನ ಮೊಬೈಲ್ ಆಪ್ ಮೂಲಕ ಗ್ರಾಹಕೆರು ಅಕುಲುಪ್ಪುನಲ್ಪನೇ ತಮ್ಮ ಖಾತೆಡ್ದ್ IMPS/NEFT/RTGS ಮೂಲಕ ಕಾಸ್ ನ್ ವರ್ಗಾವಣೆ,ಆರ್ ಡಿ ಬಕ ಸಾಲ ಖಾತೆಲೆಗ್ ಕಾಸ್ ವರ್ಗಾವಣೆ ಮಲ್ಪುನವ್, ಸಂಘದ ಪೊಸ ಯೋಜನೆದ ಬಗೆಟ್ ಮಾಹಿತಿಲೆನ್ ಪಡೆತೊನೊಲಿ. ಸದ್ರಿ ಆಪ್ ಬಗೆಟ್ ಬಳಕೆದಾರೆರೆಡ್ಥ್ ಎಡ್ಡೆ ಸ್ಪಂದನೆ ತಿಕ್ಕೊಂದುಂಡ್. ಗೂಗಲ್ ಪ್ಲೇ ಸ್ಟೋರ್ ಡ್ ಲಭ್ಯ ಉಪ್ಪುನ ಈ ಆಪ್ ದ ಪ್ರಯೋಜನ ಪಡೆಪಿನ ಬಗೆಟ್ ಹೆಚ್ಚಿಗೆ ಮಾಹಿತಿಗಾದ್ ನಿಕಲ್ನ ಊರುಡುಪ್ಪುನ ಶಾಖೆಡ್ ವಿಚಾರಣೆ ಮಲ್ಪೊಲಿ ಪಂಡುದ್ ತೆರಿಪಾಯೆರ್.
ಆಧುನಿಕತೆಗ್ ಸಾಕ್ಷಿಯಾದ್ ದಿನನಿತ್ಯೊದ ಠೇವಣಿ ಸಂಗ್ರಹಣೆನ್ ಮೊಬೈಲ್ ಆಪ್ ಮೂಲಕ ನಡಪಾವೊಂದುಂಡ್. ಸಂಘದ ಮಾತಾ ಶಾಖೆಲೆಡ್ ಗ್ರಾಹಕೆರೆಗ್ ಬೇತೆ ಬೇತೆ ರೀತಿದ ಸೇವೆ ಕೊರ್ಪಿನ ಸಲುವಾದ್ ಇತ್ತೆನೇ ಸೇಫ್ ಲಾಕರ್ ಸೌಲಭ್ಯ, ಇ-ಸ್ಟಾಂಪಿಂಗ್, ಪಾನ್ ಕಾರ್ಡ್, NEFT/RTGS ಸೇವಾ ಸೌಲಭ್ಯ, ಮನಿ ಟ್ರಾನ್ಸ ಫರ್ ಸೌಲಭ್ಯ, ಲಂಬಾರ್ಡ್ ಆರೋಗ್ಯ ಕಾರ್ಡ್, ಮಣಿಪಾಲ ಆರೋಗ್ಯ ಕಾರ್ಡ್, ಆರೋಗ್ಯ ವಿಮೆ, ಸಾಮಾನ್ಯ ವಿಮೆ, 0 ಬ್ಯಾಲೆನ್ಸ್ ವಿದ್ಯಾನಿಧಿ ಖಾತೆ, ಮಿಸ್ಡ್ ಕಾಲ್ ಸರ್ವಿಸ್, ಉಚಿತ ಎಸ್. ಎಮ್. ಎಸ್ ಸೌಲಭ್ಯ ಕೊರೊಂದಿತ್ತುದ್ ಸಂಘದ ಮಾತಾ ಮಾಹಿತಿ ಅಪ್ ಡೇಟ್ ಲೆಗ್ WWW.badagabettusociety.com ಜಾಲತಾಣೊಗ್ ಭೇಟಿ ಕೊರೊಲಿ ಪಂಡುದ್ ತೆರಿಪಾಯೆರ್.
ದುಂಬುದ ವರದಿ ವರ್ಷಡ್ ರೂ. 800ಕೋಟಿ ಠೇವಣಿ, ರೂ 700 ಕೋಟಿ ಪಿದಾಯಿಬಾಕಿ ಸಾಲ ಪಂಡ ಒಟ್ಟು 1,500 ಕೋಟಿ ರೂ. ವ್ಯವಹಾರ ಮಲ್ಪುನ ಗುರಿ ದೀಯೊಂದ್ ಉಡುಪಿದ ಹ್ರದಯಭಾಗೊಡ್ ಖರೀದಿ ಮಲ್ಥಿನ 1 ಎಕರೆ ಆಸ್ತಿಡ್ ಅಂದಾಜು ರೂ. 10 ಕೋಟಿ ವೆಚ್ಚಡ್ ಸಹಕಾರ ಸೌಧ ನಿರ್ಮಾಣದ ಯೋಜನೆನ್ ದೀಯೊಂದ. ಪ್ರತಿಯೊಂಜಿ ಶಾಖೆಡುಲಾ ಶಾಖಾ ಸಲಹಾ ಸಮಿತಿಲೆನ್ ರಚನೆ ಮಲ್ದಿತ್ತುದ್ ಆಯಾ ಸಮಿತಿ ಸದಸ್ಯೆರೆನ ಮೇಲ್ವಿಚಾರಣೆಡ್ ಪ್ರತಿಯೊಂಜಿ ಶಾಖೆಲೆಡ್ ಪೊಸ ಪೊಸ ಯೋಜನೆಲೆನ್ ಕಾರ್ಯಗತ ಮಲ್ಪುನ ಚಿಂತನೆ ದೀಯೊಂದುಂಡ್. ಪಂಡುದ್ ತೆರಿಪಾಯೆರ್.
ಪತ್ರಿಕಾಗೋಷ್ಠಿಡ್ ಸಂಘದ ಉಪಾಧ್ಯಕ್ಷೆರಾಯಿನ ಜಾರ್ಜ್ ಸಾಮ್ಯುಯೆಲ್, ಆಡಳಿತ ಮಂಡಳಿದ ಸದಸ್ಯೆರಾಯಿನ ಸಂಜೀವ ಕಾಂಚನ್, ಪುರುಷೋತ್ತಮ ಪಿ. ಶೆಟ್ಟಿ, ಉಮಾನಾಥ ಎಲ್., ವಿನಯ ಕುಮಾರ್ ಟಿ. ಎ., ಪದ್ಮನಾಭ ನಾಯಕ್, ಸ್ಯೆಯದ್ ಅಬ್ದುಲ್ ರಜಾಕ್, ಸದಾಶಿವ ನಾಯಕ್, ಮನೋಹರ ಎಸ್. ಶೆಟ್ಟಿ, ಸಾಧು ಸಾಲ್ಯಾನ್, ಜಯ ಶೆಟ್ಟಿ, ಗಾಯತ್ರಿ ಎಸ್. ಭಟ್, ಪ್ರಧಾನ ವ್ಯವಸ್ಥಾಪಕೆರಾಯಿನ ರಾಜೇಶ್ ವಿ. ಶೇರಿಗಾರ್, ಸಹಾಯಕ ಪ್ರಧಾನ ವ್ಯವಸ್ಥಾಪಕೆರಾಯಿನ ಪ್ರವೀಣ್ ಕುಮಾರ್ ಪತ್ರಿಕಾಗೋಷ್ಠಿಡ್ ಉಪಸ್ಥಿತರಿತ್ತೆರ್.
by 