ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಸ್ಥಾಪನಾ ದಿನಾಚರಣೆ

ಉಡುಪಿ, ಎ.12: ಪತ್ರಿಕೆಡ್  ಲೇಖನ ಬತ್ತುಂಡ ಸಮಸ್ಯೆ ಪರಿಹಾರ ಆಪುಂಡ್  ಪಂಡುದು ಹೆಚ್ಚಿನಕ್ಲೆನ ಭಾವನೆ. ಆಂಡ  ಲೇಖನಡ್ದ್ ಕೇವಲ ಜನಾಭಿಪ್ರಾಯ ಸಂಗ್ರಹ ಆಪುಂಡ್  ಅತ್ತಾವಂದೆ ಸಮಸ್ಯೆ ಪರಿಹಾರ ಆಪುಜಿ. ಆ ಜನಾಭಿಪ್ರಾಯ ನಮ್ಮ ವ್ಯವಸ್ಥೆಗ್  ತಲುಪುಂಡ  ಮಾತ್ರ ಸಮಸ್ಯೆ ಪರಿಹಾರ ಆವರೆಗ್  ಸಾಧ್ಯ ಪಂಡುದು ಉಡುಪಿ ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಅಧ್ಯಕ್ಷ ಡಾ.ರವೀಂದ್ರನಾಥ್ ಶ್ಯಾನುಭಾಗ್ ಪಂಡೆರ್.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಆಶ್ರಯಡ್  ಉಡುಪಿ ಗಿರಿಜಾ ಗ್ರೂಪ್ ಆಫ್ ಕನ್ಸರ್ನ್ ಬೊಕ್ಕ  ಉಡುಪಿ ಪತ್ರಿಕಾ ಭವನ ಸಮಿತಿದ ಸಹಯೋಗದೊಟ್ಟುಗ್ ಉಡುಪಿ ಪತ್ರಿಕಾ ಭವನಡ್  ಶುಕ್ರವಾರ ಆಯೋಜನೆ ಮಲ್ದಿನ  ಸಂಘದ ಸ್ಥಾಪನಾ ದಿನಾಚರಣೆನ್  ಉದ್ಘಾಟನೆ ಮಲ್ತುದ್  ಆರು ಪಾತೆರಿಯೆರು.

ಯಾನು ಪತ್ರಿಕೆಡ್  ಬರೆತಿನ  ಲೇಖನಲೆಗ್  ಜನಕ್ಲೆಡ್ದ್ ಎಡ್ಡೆ ಪ್ರತಿಕ್ರಿಯೆ ಸಿಕ್ಕೊಃದಿತ್ತುಂಡ್ ಆಂಡ ಈ ಬಗೆಟ್ ಸಂಬಂಧಪಟ್ಟ ಸಚಿವರೆನ್  ಪಾತೆರುಂಡಲಾ  ಸಮಸ್ಯೆಗ್ ಪರಿಹಾರ ಸಿಕ್ಕೊಂದಿಜ್ಜಿ. ಅಂಚಾದ್  ಪತ್ರಿಕೋದ್ಯಮಡ್ ಪೊಸ ಪ್ರಯೋಗನ್  ರೂಪಿಸಾದುಂಡ್. ಆ ಪ್ರಕಾರ  ಈ ಲೇಖನಗ್  ಸಂಬಂಧ ಪಟ್ಟುದ್  ಜನಕುಲು  ಸಂಬಂಧಪಟ್ಟಿನ  ಇಲಾಖೆಲೆಗ್  ಓಲೆ ಬರೆಯೆರು. ಕೂಡಲೇ ಎಚ್ಚರ ಆಯಿನ  ಅಧಿಕಾರಿಲು ಸಮಸ್ಯೆಲೆಗ್ ಸ್ಪಂದಿಸಾದ್  ಪರಿಹಾರ ಕನತುದ್ ಕೊರಿಯೆರು. ಇಂಚ ಯಾನು ಮಲ್ತಿನ  ಪ್ರಯೋಗಡಾದ್ ಕೆಲವು ಸಮಸ್ಯೆಲು ಪರಿಹಾರ ಆತುಂಡ್  ಪಂಡೆರು.

ಜನಕ್ಲೆಡ  ಜನಾಭಿಪ್ರಾಯ ರೂಪಿಸಾಂಡ  ಯಾವುಜಿ, ಆ ಜನಾಭಿಪ್ರಾಯ ಎರೆಗ್  ಎಃಚ ತಲುಪೊಡ್  ಅಂಚ ತಲುಪುಂಡ ಮಾತ್ರ ಸಮಸ್ಯೆ ಪರಿಹಾರ ಆಪುಂಡ್ ನೆಟ್ಟಾದ್ ಪ್ರಜಾಪ್ರಭುತ್ವಡ್  ಜನಾದೇಶನೇ ಮುಖ್ಯ ಪನ್ಪಿನವ್ವೆನ್ ಯಾನು ತೆರಿಯೊಂಡೆ. ಪತ್ರಿಕೋದ್ಯಮಡ್ ಈ ಪ್ರಯೋಗ ಯಶಸ್ವಿ ಆಂಡು  ಪಂಡುದು ಆರು ತೆರಿಪಾಯೆರು.

ಸಂಘದ ಸ್ಥಾಪಕ ಪ್ರಧಾನ ಕಾರ್ಯದರ್ಶಿ ಬೊಕ್ಕ ಕುಂದಪ್ರಭಾ ವಾರ ಪತ್ರಿಕೆದ  ಸಂಪಾದಕ ಯು.ಎಸ್.ಶೆಣೈ ಸ್ಥಾಪನಾ ದಿನದ ಬಗ್ಗೆ ಪಾತೆರ್ದ್, ಪತ್ರಕರ್ತರ ಸಂಘ ಸ್ಥಾಪನೆಡಾದ್  ಪತ್ರಕರ್ತೆರೆಡ  ಒಗ್ಗಟ್ಟು ಮೂಡಿಸಾವರೆಗ್ ಸಾಧ್ಯ ಆತುಂಡ್. ಒವ್ವೇ  ಸುದ್ದಿ ಮಲ್ಪನಗ ಅಯಿಕ್  ಸಂಬಂಧಿಸಿನ  ದಾಖಲೆ ಇತ್ತುಂಡ ಪತ್ರಕರ್ತೆರು ಎರೆಗುಲಾ ಪೋಡುನ ಅಗತ್ಯ ಇಜ್ಜಿ. ಪತ್ರಕರ್ತೆರು ಸುಳ್ಳು, ಪ್ರಚೋದನಕಾರಿ ಸುದ್ದಿದ  ಬಗ್ಗೆ ಎಚ್ಚರವಹಿಸಾದ್  ಸುದ್ದಿ ಮಲ್ಪೊಡ್ ಪಂಡುದು ಅಭಿಪ್ರಾಯ ಪಂಡೆರ್.
1998ಡ್ದ್  ಇದಮುಟ್ಟ  ಸೇವೆ ಸಲ್ಲಿಸಾಯಿನ ಸಂಘದ ಅಧ್ಯಕ್ಷೆರು  ಬೊಕ್ಕ  ಪ್ರಧಾನ ಕಾರ್ಯದರ್ಶಿಲೆನ ನಾಮಫಲಕನ್  ಅನಾವರಣ ಮಲ್ತಿನ  ಉಡುಪಿ ಗಿರಿಜಾ ಗ್ರೂಪ್ ಆಫ್ ಕನ್ಸರ್ನ್‌ನ ಆಡಳಿತ ನಿರ್ದೇಶಕ ರವೀಂದ್ರ ಕೆ.ಶೆಟ್ಟಿ ಪಾತೆರ್ದ್ , ನಮ ಮಲ್ಪುನ ಕೆಲಸಡ್  ನಿಷ್ಠೆ ಇತ್ತುಂಡ ಅಯಿಟ್  ಸಮಾಜಗ್ ಎಡ್ಡೆ  ಕೊಡುಗೆ ಕೊರ್ರೆಗ್ ಸಾಧ್ಯ. ನಿಜವಾಯಿನ  ಸಮಾಜ ಸೇವೆಡ್ ಸಿಕ್ಕುನ  ತೃಪ್ತಿ ಒಲ್ಪಲಾ  ಸಿಕ್ಕುಜಿ  ಪಂಡುದು ಪಂಡೆರು.

ಈ ಸಂದರ್ಭಡ್  ಸಂಘದ ಸ್ಥಾಪಕ ಸದಸ್ಯೆರಾಯಿನ  ಹಿರಿಯ ಪತ್ರಕರ್ತ ಸುಭಾಶ್ಚಂದ್ರ ವಾಗ್ಳೆರೆಗ್  ಸ್ಥಾಪನಾ ದಿನದ ಸನ್ಮಾನ  ಮಲ್ತೆರ್.  ಸಂಘದ ಜಿಲ್ಲಾಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ಅಧ್ಯಕ್ಷತೆಡಿತ್ತೆರು.

ಸಂಘದ ರಜತ ಮಹೋತ್ಸವ ಸಮಿತಿದ  ಸಂಚಾಲಕ ಮುಹಮ್ಮದ್ ಶರೀಫ್, ರಾಜ್ಯ ಸಮಿತಿ ಸದಸ್ಯ ಕಿರಣ್ ಮಂಜನ ಬೈಲು, ಪತ್ರಿಕಾ ಭವನ ಸಮಿತಿ ಸಂಚಾಲಕ ಅಜಿತ್ ಆರಾಡಿ ಉಪಸ್ಥಿತರಿತ್ತೆರು.

ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಪ್ರಾಸ್ತಾವಿಕವಾದ್  ಪಾತೆರ್ದ್  ಸ್ವಾಗತ ಮಲ್ತೆರು. ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ಸೊಲ್ಮೆ ಸಂದಾಯ್ತ ಮಲ್ತೆರು. ಪತ್ರಕರ್ತ ದೀಪಕ್ ಜೈನ್ ಕಾರ್ಯಕ್ರಮ ನಿರೂಪಣೆ ಮಲ್ತೆರು