ರಜತ ಕ್ರೀಡಾ ಸಂಭ್ರಮ

ನಿರ್ಭಿತವಾಯಿನ ಪತ್ರಿಕೋದ್ಯಮ ಇನಿಕ್ ಅತೀ ಅಗತ್ಯ: ಡಾ.ವಿದ್ಯಾ ಕುಮಾರಿ

ಉಡುಪಿ ಪತ್ರಕರ್ತರ ಸಂಘದ ವಾರ್ಷಿಕ ಕ್ರೀಡಾಕೂಟ ‘ರಜತ ಕ್ರೀಡಾ ಸಂಭ್ರಮ’

ಉಡುಪಿ, ಅ.22: ಇನಿ  ಪತ್ರಿಕೆ ಉದ್ಯಮವಾದ್  ಬುಲೆದುಂಡ್ ಸುದ್ದಿನ್  ಸ್ಮರ್ಧಾತ್ಮಕವಾದ್ ಕೊರ್ಪಿನ ಒತ್ತಡ ಇಪ್ಪುಂಡ್. ಸಂಗ್ರಹ ಮಲ್ತಿನ  ಸುದ್ದಿನ್ ಮಾಹಿತಿ ರೂಪೊಡ್  ಪಿದಾಯಿ ಪಾಡುನ  ಅಗತ್ಯ. ಒತ್ತಡದ ನಡುಟುಲಾ ಪತ್ರಕರ್ತೆರು ಕ್ರೀಡಾ ಚಟುವಟಿಕೆಡುಲಾ ಪಾಲ್ ಪಡೆಪಿನವ್  ಸ್ವಾಸ್ಥ ಆರೋಗ್ಯ ಕಾಪರೆಗ್ ಸಾಧ್ಯ. ನಿರ್ಭಿತವಾದಳಯಿನ  ಪತ್ರಿಕೋದ್ಯಮ ಇನಿತ ಅತೀ ಅಗತ್ಯವಾದುಂಡ್ ಪಂಡುದ್ ಉಡುಪಿ ಜಿಲ್ಲಾಧಿಕಾರಿ ಡಾ.ವಿದ್ಯಾ ಕುಮಾರಿ ಪಂಡೆರ್.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಆಶ್ರಯಡ್ ರಜತ ಮಹೋತ್ಸವದ ಪ್ರಯುಕ್ತ ಅಜ್ಜರಕಾಡುಡುಪ್ಪುನ ಉಡುಪಿ ಜಿಲ್ಲಾ ಕ್ರೀಡಾಂಗಣಡ್ ನಡತಿನ ‘ರಜತ ಕ್ರೀಡಾ ಸಂಭ್ರಮ’ ವಾರ್ಷಿಕ ಕ್ರೀಡಾ ಕೂಟನ್ ಉದಿಪನ ಮಲ್ತುದ್, ಪಥ ಸಂಚಲನದ ಗೌರವ ವಂದನೆ ಸ್ವೀಕಾರ ಮಲ್ತುದ್ ಆರು ಪಾತೆರಿಯೆರು.

ಮಣಿಪಾಲ ಕಸ್ತೂರ್ಬಾ ಆಸ್ಪತ್ರೆದ  ವೈದ್ಯಕೀಯ ನಿರ್ದೇಶಕ ಡಾ.ಅವಿನಾಶ್ ಶೆಟ್ಟಿ ಪಾತೆರ್ದ್, ಪತ್ರಿಕೋದ್ಯಮ ಪ್ರಭಾವಿ ಮಾಧ್ಯಮವಾದಿತ್ತುದ್, ಜನಕುಲು ಪತ್ರಿಕೆ ಓದುನ ಹವ್ಯಾಸ ಬುಲೆಪಾವೊನೊಡು. ಪತ್ರಕರ್ತೆರು ದಿನದ 30 ನಿಮಿಷ ಕ್ರೀಡಾ ಚಟುವಟಿಕೆಗ್  ಕೊರೊಡು ಪಂಡೆರ್. ಉಂದೆಟಾದ್ ಆರೋಗ್ಯವಂತೆರಾದುಪ್ಪರೆಗ್  ಸಾಧ್ಯ ಪಂಡೆರು.

ಅಧ್ಯಕ್ಷತೆ ಡಿತ್ತಿನ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ಧ್ವಜಾರೋಹಣ ಮಲ್ತೆರು. ರಜತ ಮಹೋತ್ಸವ ಸಮಿತಿದ ಜತೆ ಕಾರ್ಯದರ್ಶಿ ದೀಪಕ್ ಜೈನ್ ನೇತೃತ್ವಡ್ ಬೇತೆ ಬೇತೆ ತಾಲೂಕು ಸಂಘದ ಸದಸ್ಯರೆಡ್ದ್  ಪಥ ಸಂಚಲನ ನಡತುಂಡ್. ರಜತ ಮಹೋತ್ಸವ ಸಮಿತಿದ  ಕ್ರೀಡಾ ಸಂಚಾಲಕ ರಾಜು ಖಾರ್ವಿ ನೇತೃತ್ವಡ್ ಕ್ರೀಡಾ ಜ್ಯೋತಿ ಬೆಳಗುಂಡ್. ಕ್ರೀಡಾಜ್ಯೋತಿನ್ಉಡುಪಿ ಜಿಲ್ಲಾ ಅಥ್ಲೆಟಿಕ್ಸ್ ಅಸೋಸಿಯೇಶನ್ ಅಧ್ಯಕ್ಷ ಹರಿಪ್ರಸಾದ್ ರೈ ಹಸ್ತಾಂತರ ಮಲ್ತೆರು.

ಮುಖ್ಯ ಅತಿಥಿಲಾದ್ ಉಡುಪಿ ನಗರಸಭೆ ಪೌರಾಯುಕ್ತ ರಾಯಪ್ಪ, ಉದ್ಯಮಿ ಆನಂದ ಪಿ. ಸುವರ್ಣ ಮಲ್ಪೆ, ಮಣಿಪಾಲ ಮಾಹೆದ ಕ್ರೀಡಾ ಕಾರ್ಯದರ್ಶಿ ವಿನೋದ್ ನಾಯಕ್ ಪಾಲ್ ಪಡೆಯೆರ್. ಕ್ರೀಡಾಕೂಟಗ್ ಉಡುಪಿ ಕ್ರೀಡಾ ಬೊಕ್ಕ ಯುವ ಸಬಲೀಕರಣ ಇಲಾಖೆದ ಸಹಾಯಕ ನಿರ್ದೇಶಕ ಡಾ.ರೋಶನ್ ಕುಮಾರ್ ಶೆಟ್ಟಿ ಚಾಲನೆ ಕೊರಿಯೆರು.

ಸಂಘದ ರಜತ ಮಹೋತ್ಸವ ಸಮಿತಿದ ಸಂಚಾಲಕ ಶರೀಫ್ ಕಾರ್ಕಳ, ಪ್ರಾಸ್ತಾವಿಕ  ಪಾತೆರಿಯೆರು. ಸಂಘದ ರಾಜ್ಯ ಸಮಿತಿ ಸದಸ್ಯ ಕಿರಣ್ ಮಂಜನಬೈಲು, ರಾಷ್ಟ್ರೀಯ ಸಮಿತಿ ಸದಸ್ಯ ಅರುಣ್ ಕುಮಾರ್ ಶಿರೂರು ಉಪಸ್ಥಿತರಿತ್ತೆರು.

ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗತ ಮಲ್ತೆರು. ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ವಂದಿಸಾಯೆರ್.. ಪತ್ರಕರ್ತ ಕೆ.ಸಿ.ರಾಜೇಶ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಕ್ರೀಡಾಕೂಟಡ್ ಓಟ, ರಿಲೇ, ಹಗ್ಗಜಗ್ಗಾಟ, ಮಡಕೆ ಒಡೆಪುನ  ಸೇರಿ ನಂಚ ಬೇತೆ ಬೇತೆ ಮನರಂಜನಾ ಸ್ಪರ್ಧೆಲು ನಡತುಂಡ್.