ಬೈದ್ಯ-ರೋಗಿ ಸಂಬಂಧ:ಅಗತ್ಯ ಸುಧಾರಿಕೆಲು ಆವೊಡ್..ಡಾ.ಆಕಾಶ್ ರಾಜ್

ಡಾ.ಆಕಾಶ್ ರಾಜ್ ಜೈನ್.ಸಂತೆಕಟ್ಟೆ,ಉಡುಪಿ.

ಬೈದ್ಯ-ರೋಗಿ ಸಂಬಂಧ: ಅಗತ್ಯ ಸುಧಾರಿಕೆಲು ಆವೊಡ್.

ನೈತಿಕತೆದ ನಿಲೆಟ್ ನಡತೊಂದಿತ್ತಿನ ವ್ಯವಹಾರೊಲು ಕ್ರಮೇಣ ವರ್ಸೊಲು ಕರಿಲೆಕ್ಕನೆ‌ ಪಕ್ಕಾ ವ್ಯವಹಾರೊಲಾದ್ ಬದಲಾವೊಂದುಂಡ್.ಪ್ರತಿ ಒಂಜಿ ವ್ಯವಹಾರ ಕ್ಷೇತ್ರೊಡುಲಾ ಲಾಭ ನಷ್ಟೊದ ಲೆಕ್ಕಾಚಾರ ಪಣವುದ ನಿಲೆಟ್ ಅತ್ತಂದೆ ನೈತಿಕತೆ /ಉದಾರತೆ ಇನಿ ತೋಜೊಂದಿಜ್ಜಿ.ಸರಕಾರೊಗ್ ಲಕ್ಷಾಂತರ ಕೋಟಿ ಆದಾಯ ಕನತುದ್ ಕೊರ್ಪಿನ ವಿಭಾಗ. ಅಂಚಾದ್ ವೈದ್ಯಕೀಯ ಉಪಚಾರಲು ಬೊಕ್ಕ ಮರ್ದ್ ಲು ಬಾರೀ ಪಿರಿಯ.ಒಂಜಿ ಅನುಕೂಲಸ್ಥ ಕುಟುಂಬನ್ ಸಾದಿಗ್ ಕನತುದ್ ಪಾಡಿಯರೆಗ್ ಒಂಜಿ ಸೀಖ್ ಯಾವುಂಡ್.ಏತೋ ಕುಟುಂಬಲ್ ಇನಿ ಇಲ್ಲಡ್ ಎರೆಗಾಂಡ ಒರಿಯಗ್ ಬತ್ತಿನ ಸೀಕ್ ದ ಕಾರಣಡ್ ಬಡಪತ್ತ್ ಗ್ ಜಾರ್ದ್ ಪೋತ.ಅಂಚಾದ್ ಇನಿ ವೈದ್ಯಕೀಯ ಕ್ಷೇತ್ರ ಪನ್ಪುನ ಜನಕ್ಲೆನ ಮನಸ್ಸುಡ್ ಸೇವೆ ಪನ್ಪಿನವ್ವೆಡ್ದುಲಾ ಒಂಜಿ ಬ್ಯಾರ ಆಯಿಲೆಕ್ಕ ಜನಕ್ಲೆನ ಮನಸ್ಸುಗ್ ತೋಜೊಂದುಂಡ್.ಅವ್ವೆತ ಪರಿಣಾಮನೇ ಬೈದ್ಯೆರ್ ಬೊಕ್ಕ ಸೀಖ್ ದಕ್ಲೆನ ಸಂಬಂಧಲೆಡ್ ಅಪನಂಬಿಕೆ ಸಂಶಯದ ಪ್ರಕರಣೊಲು ಅಲ್ಪಲ್ಪ ತೋಜುದ್ ಬರೊಂದುಂಡ್.ಅಂಚೆನೇ “ವೈದ್ಯೋ ನಾರಾಯಣ ಹರಿ” ಪನ್ಪಿನ ಪಾತೆರಲ ಇನಿಕ್ ಜನ ಮನಸ್ಸುಗ್ ಹೆಚ್ಚ ತಟ್ಟೊಂದಿಜ್ಜಿ.

ಸಮ್ರದ್ಧ,ಸಶಕ್ತ,ಸದ್ರಢ ಸಮಾಜ ನಿರ್ಮಾಣಗ್ ವೈದ್ಯರೋಗಿ ಸಂಬಂದೊಲು ಸುಧಾರಿಕೆ ಆವೊಡ್.ರಡ್ಡ್ ಭಾಗಡುಲಾ ಕೆಲವ್ ಚಿಂತನೆಲು ಆವೊಡಾಯಿನ ಅವಶ್ಯಕತೆ ಉಂಡು.
ಇನಿ ಹೆಚ್ಚಾದ್ ಜನಕ್ಲೆಗ್ ಅಕುಲು ಒರ ಒಂಜಿ ಆಸ್ಪತ್ರೆಗ್ ಪೋಯೆರ್ ಪಂಡ ಅಕಲೆಗ್ ದಾದ ಆವೊಂದುಂಡ್ ದಾದ ಮಂತೊಂದುಲ್ಲೆರ್,ದುಂಬು ದಾದ ಪನ್ಪಿನ ಸ್ಪಷ್ಟತೆ ಇಪ್ಪುಜಿ.ಆಸ್ಪತ್ರೆ ಸೇರಿನಕಲೆನ ಕುಟುಂಬದಕುಲು ಅಕುಲ್- ಮೊಕುಲೆಡ ಅತ್ತುಂಡ ಗುರ್ತದ ಬೇತೆ ಬೈದ್ಯೆರೆಡ ಆ ರೋಗಿನ ಸೀಕ್ ದ ಬಗ್ಗೆ ಬೇತೆ ಬೇತೆ ಪ್ರಶ್ನೆಲೆನ್ ಕೇಂಡುದ್ ತೆರಿಯುವೆರ್.ಉಪಾಚಾರ ಮಲ್ಪುನ್ ಬೈದ್ಯೆರ್ ದಾದ ಮಂತೊಂದುಲ್ಲೆರ್ ಪಂಡುದ್ ,ರೋಗಿಲೆಗ್ ,ಅಕ್ಲೆನ ಕುಟುಂಬದಕ್ಲೆಗ್ ಸರಿಯಾದ್ ಅರ್ಥ ಆದುಪ್ಪುಜಿ.ಮಲ್ಲ ಆಸ್ಪತ್ರೆಡ್ ಉಂದು ಜಾಸ್ತಿ ತೋಜೊಂದುಂಡ್.
ನೆಕ್ ಕಾರಣ ಬೈದ್ಯೆರೆಗ್ ಒತ್ತಡದ ಜೀವನ.ಅಂಚಾದ್ ಬೈದ್ಯೆರ್ ನಕುಲು ಸೀಕ್ ದ ವಿಚಾರೊನ್ ಸರಿಯಾದ್ ಕುಲ್ಲುದ್ ರೋಗಿಲೆನ ಕುಟುಂಬದಕ್ಲೆಗ್ ವಿಮರ್ಶೆ ಮಲ್ತುದ್ ತೆರಿಪಾವುಜೆರ್.ಏತೋ ಸರಿ ಬೈದ್ಯೆರ್ ಪಂಡಿನ ಅರ್ಧರ್ಧ ವಿಚಾರೊಲು ರೋಗಿನ ಇಲ್ಲದಕ್ಲೆಗ್ ಸರಿಯಾದ್ ಅರ್ಥ ಆಪುಜಿ.ಉಂದು ತಪ್ಪು , ಉಂದು ಬೈದ್ಯೆರೆನ ಮಿತ್ತ್ ರೋಗಿಲೆಗ್ ಅಪನಂಬಿಕೆಗ್ ಸಾದಿ ಮಂತ್ ದ್ ಕೊರ್ಪುಂಡ್.ದುಂಬಗ್ ಸರಿಯಾಯಿನ ಕಾರಣಲ್ ಇತ್ತುದುಲಾ ರೋಗಿಗ್ ದಾಲ ತೊಂದರೆ ಆಂಡ ಅತ್ತುಂಡ ಸೀಕ್ ದಕ್ಲೆನ ಕುಟುಂಬದಕ್ಲೆನ ನಿರೀಕ್ಷೆದಾತ್ ಸೀಕ್ ಗುಣ ಆಯಿಜಿ ಪಂಡುಂದಾಂಡ, ಅತ್ತುಂಡ ಸೀಕ್ ದ ಉಪಾಚಾರಡಾದ್ ದಾಲ ಅಡ್ಡ ಪರಿಣಾಮಲ್ ಆಂಡ..ಬೈದ್ಯೆರೆನ ಮಿತ್ತ್ ಕೋಪ,ಅಪನಂಬಿಕೆ, ಗಲಾಟೆಲ್,ದೌರ್ಜನಲು ಆಪಿನ ಸಾಧ್ಯತೆಲ್ ಹೆಚ್ಚ.ಅಂಚಾದ್ ವೈದ್ಯಲೋಕ ಉಂದೆನ್ ಅರ್ಥ ಮಂತೊಂದ್ ಸರಿಯಾಯಿನ ವಿಚಾರ – ವಿನಿಮಯ ಮನ್ಪುನ ಬಾರೀ ಅಗತ್ಯವಾದ್ ಆವೊಡಾಯಿನ ಬೇಲೆ.
ಈ ಸ್ಪಷ್ಟತೆ ಸೀಕ್ ದ ವಿಚಾರೊಡ್ ಮಾತ್ರ ಅತ್ತ್,ಉಪಾಚಾರೊಗ್ ಸಂದುನ ಖರ್ಚ್ ದ ವಿಚಾರೊಡುಲಾ ಆವೊಡ್.ಆ ವಿಚಾರೊಡ್ ಆಸ್ಪತ್ರೆದ ಸಿಬ್ಬಂದಿಲು ತೆಲಿಕೆ ಮೋನೆಡ್ ರೋಗಿಲೆಗ್ ಸ್ಪಷ್ಟವಾಯಿನ ವಿವರಣೆ ಕೊರ್ಪಿನಲಾ ಇನಿತ ಅಗತ್ಯ.
ನನ ಸೀಕ್ ದಕುಲ್ ಏಪಗುಲಾ ಬೈದ್ಯೆರ್ ಅಕಲೆಗ್ ಸೀಕ್ ದ ಬಗ್ಗೆ ಇತ್ತಿನ ಪೂರಾ ಸಂಶಯೊಲೆನ್ ಅವ್ವೆಕ್ ಬೋಡಾಯಿನ ಉಪಾಚಾರದ ವಿಷಯಲೆನ್ ಬೊಕ್ಕ ಉಪಾಚಾರಡಾದ್ ದಾದ ಅಡ್ಡ ಪರಿಣಾಮ ಆವು ಪನ್ಪಿನವ್ವೆನ್ ಬೊಕ್ಕ ಉಪಾಚಾರಡ್ ಏತ್ ರಿಸ್ಕ್ ಉಂಡು ಪನ್ಪಿನವ್ವೆನ್ ಸ್ಪಷ್ಟವಾದ್ ಬೈದ್ಯೆರೆಡ ಕುಲ್ಲುದ್ ವಿಚಾರಿಸಾದ್ ತೆರಿಯೊನೊಡ್.ಗೊಂದಲ ಇತ್ತುಂಡ, ಅತ್ತುಂಡ ಸರಿಯಾದ್ ಅರ್ಥ ಆಯಿಜಿ ಪಂಡ ಉಪಾಚಾರೊಗ್ ದುಂಬೇ ಕುಟುಂಬದ ಅತ್ತುಂಡ ಫ್ಯಾಮಿಲಿ ಡಾಕ್ಟ್ರೆನ ಮೂಲಕ ಸ್ಪಷ್ಟವಾದ್ ತೆರಿಯೊನೊಡ್. ದುಂಬಗ್ ಒವ್ವೇ ಸಮಸ್ಯೆ ಆವಂದಿಲೆಕ್ಕ ಸುರುಕ್ಕೆ ಜಾಗ್ರತೆ ಮಲ್ಪೊಡ್.

ನನೊಂಜಿ ವಿಚಾರ ನೆಂಪುಡು ಇಪ್ಪೊಡಾಯಿನ- ಬೈದ್ಯೆರುನಕುಲಾ ನರಮಾನಿಲ್.ಕಿನ್ನ ಕಿನ್ನ ವಿಚಾರೊಲೆಗ್ ಆಕ್ಷೇಪ ಮಲ್ಪುನ್,ಉಪಾಚಾರ ಮಲ್ಪನಗ ನಡುಕ್ ಬತ್ತುದ್ ತಂಕುಲೆಗ್ ಬೋಡಾಯಿಲೆಕ್ಕ ಮಲ್ಪುನ್ ,ತನ್ನ ಮನಸ್ಸುಡ್ ದಾದ ಯೋಚನೆ ಬರೊಂದುಂಡ್ ಅಂಚೆನೇ ಬೈದ್ಯೆರ್ ಅಭಿಪ್ರಾಯ ಕೊರೊಡ್.ಇಜ್ಜಾಂಡ ಆರ್ ಸರಿಯಾದ್ ತೂಯಿಜೆರ್ ಪನ್ಪಿನ ಅಭಿಪ್ರಾಯೊಗ್ ಬರ್ಪುನ್ ಉಂದು ಪೂರಾ ಮಲ್ಪರೆಗ್ ಬಲ್ಲಿ.ಬೈದ್ಯೆರೆನ ಗೇನೊಗ್ ಗೌರವ ಕೊರೊಡ್.ಅವ್ವೆನ್ ಸರಿಯಾದ್ ಅನುಸರಿಸಾವೊಡ್.ಒಂಜಿ ವೇಳೆ ಒರಿ ವೈದ್ಯೆರ್ ಪಂಡಿನ

ಮನಸ್ಸುಗ್ ಸರಿ ತೋಜುಜಿ ಪಂಡ ಅರ್ಧ ಮನಸ್ಸುಡ್ ಅರೆಡ ಉಪಾಚಾರ ಮನ್ಪಾವರೆಗ್ ಬಲ್ಲಿ.ಅವ್ ದುಂಬಗ್ ಸಮಸ್ಯೆ ಆಪುಂಡ್.”ಒಲ್ಲದ ಗಂಡನಿಗೆ ಮೊಸರಲ್ಲಿ ಕಲ್ಲು” ಪಂಡಿಲೆಕ್ಕನೆ ಆಪುಂಡ್.ವೈದ್ಯೆರೆನ ಬಗ್ಗೆ ಸಂಪೂರ್ಣ ವಿಶ್ವಾಸ ಇಜ್ಜಿ ಪಂಡ ಖಂಡಿತಾ ಅರೆನಡೆಗ್ ಪೋವರೆಗ್ ಬಲ್ಲಿ.ತತ್ತುದ ಪೋಂಡಲಾ ಬೊಕ್ಕ ಬೇತೆ ಬೈದ್ಯೆರೆನ್ ತೂಪಿನ ಎಡ್ಡೆ.ಬೈದ್ಯೆರೆನಡೆಗ್ ಆಸ್ಪತ್ರೆಗ್ ಪೋವನಗ 4 ಜನತ್ತ ಅಭಿಪ್ರಾಯ ದೆತೊಂದೆ ಪೋಪಿನ ಎಡ್ಡೆ.
ಕಡೆಕ್ಕಾದ್ ಉಪಾಚಾರ ಆಯಿಬೊಕ್ಕ ನಮ್ಮ ನಿರೀಕ್ಷೆಗ್ ಸರಿಯಾದ್ ಫಲ ಬತ್ತಿಜಿಡ,ಅತ್ತುಂಡ ದಾದಾಂಡಲಾ ಮನಸ್ಸುಗ್ ಬೇನೆ ಆಪಿಲಕ್ಕ ಅನಾಹುತ ಆಂಡ ಮನಸ್ಸುದ ಹಿಡಿತ ತತ್ತುದ್ ಬೈದ್ಯೆರೆಗ್/ ಆಸ್ಪತ್ರೆಗ್ ಹಾನಿ ಮನ್ಪುನ ವಿಚಾರಲಾ ತಪ್ಪು.ಅವ್ ಸಾಮಾಜಿಕ ಮಾಧ್ಯಮಡ್ ಅಪಪ್ರಚಾರ ವೈಯಕ್ತಿಕ ಅಪಪ್ರಚಾರ ಮನ್ಪುನಲಾ ಆದುಪ್ಪು.ಅವ್ ತಪ್ಪು ಉಂದು ಕಾನೂನು ಪ್ರಕಾರ ತಪ್ಪು.ಬೊಕ್ಕ ಅಯಿಕ್ ಉಗ್ರ ಶಿಕ್ಷೆಲಾ ಉಂಡು.ಅವ್ ಅತ್ತಾವಂದೆ ಗಲಾಟೆ ಅಪಪ್ರಚಾರ ಮಂತುದ್ ಸಾಮಾಜಿಕ ಸ್ವಾಸ್ಥ್ಯ ಹಾಳಾಪುಂಡ್.ಗಲಾಟೆ ಅಪಪ್ರಚಾರಗ್ ಬೈದ್ಯೆರ್ ನಕುಲು ಪೋಡಿಯೆರೆಡ ರಿಸ್ಕ್ ಇತ್ತಿನಂಚಿನ (critical) ಸೀಕ್ ಲೆನ್ ತೂವರೆಗ್ ಬೈದ್ಯೆರ್ ನಕುಲು ಪಿರ ಜಾರುವೆರ್.ತುರ್ತುಡ್ ಬೈದ್ಯೆರ್ ನಕುಲು ಇಂಚ ಪಿರ ಜಾರಿಯೆರಡಾ ಏತೋ ಪ್ರಾಣ ಹಾನಿ ಆಪುಂಡ್.ಉಂದೆಡ್ದ್ ಸಮಾಜೊಗ್ ನಷ್ಟ.ಗಲಾಟೆ ಅಪಪ್ರಚಾರೊಗ್ ಪೋಡಿನ ಬೈದ್ಯೆರ್ ನಕುಲು ಕಿನ್ನ ರಿಸ್ಕ್ ತೋಜಿಂಡಲಾ ಆ ಉಪಾಚಾರ ಮಲ್ಪರೆಗ್ ಆಪುಜಿ ಪಂಡುದ್ ಮಲ್ಲ ಆಸ್ಪತ್ರೆಗ್ ಪೋಲೆ ಪಂಡುದ್ ಕಡಪಾವೆರ್.ಮಲ್ಲ ಆಸ್ಪತ್ರೆಡ್ ಒಂತೆಲಾ ರಿಸ್ಕ್ ಬೊಡ್ಚಿ ಪಂಡುದ್ ಕಿನ್ನ ಕಿನ್ನ ಸೀಕುಗುಲಾ ಲ್ಯಾಬ್ ಟೆಸ್ಟ್ (x-ray) ಮನ್ಪುವೆರ್.ಕಡೇಕ್ ನಷ್ಟ ಎರೆಗ್?
ಒಟ್ಟಾರೆ ಎಡ್ಡೆ ಸಮಾಜೊಗ್ ಬೈದ್ಯೆರ್-ಸೀಕ್ ದಕ್ಲೆನ ನಡುಟ್ ಎಡ್ಡೆ ಸಂಬಂಧ ಬಾರೀ ಅಗತ್ಯ.ಸಮಾಜದ ಯೋಚನಾ ಮಾರ್ಗ ಸುಧಾರಿಕೆ ಆವೊಡಾಯಿನಲಾ ಅಗತ್ಯ.ಸಮಾಜದ ಯೋಚನೆ ಮಿತ್ತ್ ದ ಮಟ್ಟಡ್ ಆನಗ ದುಂಬೊಂಜಿ ಕಾಲಡ್ ಒಲ್ಪಾಂಡ ಸರ್ಕಾರ ಅಭಿವೃದ್ಧಿ ಆಯಿನ ದೇಶೊಲೆಡ್ ಇತ್ತಿಲೆಕ್ಕ ಉಚಿತ- ಆರೋಗ್ಯ-ಉಪಚಾರ ಗ್ಯಾರಂಟಿ ಕೊರ್ಪಿನ ದಿನ ಬರು ಅತ್ತೇ….
ಡಾ| ಆಕಾಶ್ ರಾಜ್ ಜೈನ್
ಸಂತೆಕಟ್ಟೆ,ಉಡುಪಿ.