ಕಾರ್ಕಳಡ್ ವಿಶೇಷ ಮಹಿಳಾ ದಿನಾಚರಣೆ..

*ಕಾರ್ಕಳಡ್ ವಿಶೇಷ ಮಹಿಳಾ ದಿನಾಚರಣೆ *
ಅಮ್ಮ ಮಾಮಿ ಬುಡೆದಿಗೇ ಸಂಮಾನ !!
ಮಹಿಳಾ ದಿನಾಚರಣೆದ ದಿನ ಬೇತೆ ಬೇತೆ ಕಡೆಟ್ ಸಂಘ ಸಂಸ್ಥೆಲು ವೈವಿಧ್ಯಮಯ ಕಾರ್ಯಕ್ರಮೊಲೆನ್ ಆಯೋಜನೆ ಮಲ್ಪುವೆರ್. ಬೊಕ್ಕ ವಿವಿಧ ಕ್ಷೇತ್ರೊಲೆಡ್ ಸಾಧನೆ ಮಲ್ತಿನ ಮಹಿಳೆಯೆರೆನ್ ಸನ್ಮಾನ ಮಲ್ಪುನವ್ವೇ ಅಯಿತ್ತ ಭಾಗವಾದ್ ನಡತೇ ನಡಪುಂಡ್ .
ಆಂಡ ಮುಲ್ಪ ಒರಿ ತನ್ನ ಅಮ್ಮ‌,ಪೊಣ್ಣು ಕೊರಿನ ಮಾಮ ಮಾಮಿ ಬೊಕ್ಕ ತನ್ನ ಬುಡೆದಿನೇ ಸನ್ಮಾನ ಮಲ್ತುದ್ ಮಹಿಳಾ ದಿನಾಚರಣೆನ್ ವಿಶಿಷ್ಟವಾದ್ ಆಚರಣೆ ಮಲ್ದೆ.

ಕಾರ್ಕಳದ ಕೃಷಿಕೆರೂ , ಜಿಲ್ಲಾ ಭಾರತೀಯ ಕಿಸಾನ್ ಸಂಘದ ಪ್ರಧಾನ ಕಾರ್ಯದರ್ಶಿಲು, ಸಾವಯವ ಕೃಷಿ ಪರಿವಾರದ ಸಕ್ರಿಯ ಸದಸ್ಯೆರೂ , ಕಾಟ್ಯರಿಂಗ್ ಉದ್ಯಮಿ ಆದುಪ್ಪುನ ಇರ್ವತ್ತೂರು ಶ್ರೀನಿವಾಸ ಭಟ್ಟೆರು ಇಂಚ ಒಂಜಿ ಅರ್ಥಪೂರ್ಣ ಕಾರ್ಯಕ್ರಮ ಮಲ್ದೆರ್ . ಬುಧವಾರ ತನ್ನ ವೈವಾಹಿಕ ಜೀವನದ 25 ನೇ ವರ್ಷ ಆಯಿನೆಡ್ದಾವರ ಇರ್ವತ್ತೂರುದ ತನ್ನ ಇಲ್ಲಡ್ ಧಾರ್ಮಿಕ ಕಾರ್ಯಕ್ರಮಲೆನ್ ಆಯೋಜನೆ ಮಲ್ದಿನ ಪೊರ್ತುಡ್ ಅವ್ವೇ ಸಂದರ್ಭಡ್ ತಂಕ್ ಜನ್ಮ ಕೊರ್ದ್ ಬಾರೀ ಕಷ್ಟೊಡ್ ಸಾಂಕುದ್ ಬುಳೆಪಾದಿನಿ ಮಾತ್ರ ಅತ್ತಾವಂದೇ ಇನಿಕುಲಾ ಕೃಷಿ ಕಾರ್ಯ ಬೊಕ್ಕ ಇಲ್ಲದ ಮಾತಾ ಕೆಲಸ ಕಾರ್ಯೊಲೆಡ್ ಸಕ್ರಿಯರಾದ್ ನೆರವಾಪಿನ ಅಮ್ಮ ಪ್ರೇಮಾ ಭಟ್ , ಕೃಷಿ ಪಂಡ ಮೂಂಕು ಪೊಲಿಪುನ ಬೊಕ್ಕ ಕೃಷಿಕ ಯುವಕರೆಗ್ ಪೊಣ್ಣುಕೊರ್ರೆಗ್ ದುಂಬು ಪಿರ ತೂಪಿನ ಕಾಲಘಟ್ಟೊಡ್ ತಂಕ್ ಪ್ರೀತಿಡೇ ಮಗಳೆನ್ ಕೊರ್ದ್ ಕನ್ಯಾದಾನ ಮಲ್ತಿನ ಮಾಮಿ ತಮ್ಮಳೆ ಶೃಂಗೇರಿ ಸಮೀಪದ ಅಡ್ಡಗದ್ದೆ ನಿವಾಸಿಲಾಯಿನ ರಾಮಕೃಷ್ಣಯ್ಯ ಸುನಂದಾ ದಂಪತಿ , ಬೊಕ್ಕ ತನನ್ ವರಿಸಾದ್ ಇದಮುಟ್ಟದ 25 ವರ್ಷಡಿಂಚಿ ತನ್ನೊಟ್ಟುಗ್ ಬಾರೀ ಕಷ್ಟಕರವಾಯಿನ ಕೃಷಿಕ್ ಭರಪೂರ ನೆರವು , ಕ್ಯಾಟರಿಂಗ್ ಉದ್ಯಮಗ್ ಸಹಕಾರ , ತನ್ನ ಸಾಮಾಜಿಕ ಚಟುವಟಿಕೆಲೆಗ್ ಪ್ರೋತ್ಸಾಹ , ಜೋಕುಲೆಗ್ ಎಡ್ಡೆ ಸಂಸ್ಕಾರ , ಹಳ್ಳಿದಿಲ್ಲದ ಬದುಕುದ ಕಷ್ಟ ಸುಖೊಲೆನ್ ಸಮನಾದ್ ಸ್ವೀಕರಿಸಾದ್ ಪುಟ್ಟಿನ ಇಲ್ಲ್ , ಕಾರ್ ದೀಯಿನ ಇಲ್ಲದ ಕೀರ್ತಿ ಬೆಳಗೊಂದುಪ್ಪುನ ಪ್ರೀತಿದ ಬುಡೆದಿ ಸುಜಾತಾ ಭಟ್ ಅರೆನ್ ಬಂಧುಲೆನ ಉಪಸ್ಥಿತಿಡ್ ಸನ್ಮಾನ ಮಲ್ತುದ್ ಧನ್ಯತೆ ಅನುಭವಿಸಾಯೆರ್ . ನೆತ್ತ ಒಟ್ಟುಗ್ ಇಲ್ಲದ ಕುಲಪುರೋಹಿತೆರಾದ್ ಮಾತಾ ರೀತಿದ ಮಾರ್ಗದರ್ಶನ ಆಶೀರ್ವಾದ ಮಲ್ತೊಂದುಪ್ಪುನ ವೇದಮೂರ್ತಿ ರೆಂಜಾಳ ಗುರುರಾಜ ಉಪಾಧ್ಯಾಯರೆನ್ ಸನ್ಮಾನ ಮಲ್ತೆರ್.
ಉಂದೊಂಜಿ ಅರ್ಥಪೂರ್ಣ ಬೊಕ್ಕ ಮಾದರಿ ಕಾರ್ಯಕ್ರಮವಾದ್ ನಡದುಂಡ್ ‌. ಸಮಾಜದ ಒಲ್ಪನೋ ಇಪ್ಪುನ ಸಾಧಕ ಮಹಿಳೆಯರೆನ್ ಸನ್ಮಾನ ಮಲ್ಪುನ ಒಂಜಿ ಬಗೆಯಾಂಡ ತನ್ನ ಇಲ್ಲ್ ಬದುಕು ಉದ್ಯಮ ಕೃಷಿಕ್ ಮಾತಾ ಕಷ್ಟೊಲೆನ್ ಸಹಿಸೊಂದ್ ಶ್ರಮ ಶ್ರದ್ಧೆಡ್ ಜೀವನ ಮಲ್ತೊಂದುಪ್ಪುನ ಅಪ್ಪೆ , ಬುಡೆದಿ ,ಬೊಕ್ಕ ಕೃಷಿ ಬದುಕು ಬಾರೀ ಕಷ್ಟ ಪಂಡುದ್ ಗೊತ್ತಿತ್ತುಂಡಲಾ ರೈತ ಯುವಕಗ್ ಪೊಣ್ಣು ಕೊರಿನ‌ ಮಾಮಿ ಮಾಮನ್ ಸನ್ಮಾನ ಮಲ್ಪುನ ಪರಿಪಾಠ ಶ್ಲಾಘನೀಯ ಪಂಡುದೇ ಅಲ್ಪ ಇತ್ತಿನ ಬಂಧುಲು ಮೆಚ್ಚಿಯೆರ್. . ವಾಸುದೇವ ಭಟ್ ಪೆರಂಪಳ್ಳಿ ಕಾರ್ಯಕ್ರಮ ಸಂಯೋಜನೆ ಮಲ್ತುದ್ ಪ್ರಸ್ತಾವನೆ ಮಲ್ತೆರ್. ಶ್ರೀನಿವಾಸ ಭಟ್ ಧನ್ಯವಾದ ಕೊರಿಯೆರ್ . ಸಹೋದರೆರಾಯಿನ ಕೃಷ್ಣ ಭಟ್ ಬೊಕ್ಕ ವರದರಾಜ ಭಟ್ ಬೊಕ್ಕ ಜೋಕುಲು ಶ್ರೀಶ ಭಟ್ ಶ್ರೀನಿಧಿ ಭಟ್ ಸಹಕಾರ ಕೊರಿಯೆರ್. .