ಆಚಕ ಮೇಚಕ ಸಂಚಕ ಸರಪಳಿ ( ಅಜ್ಜಿ ಕತೆತ ನೆಂಪು)

ಮುಗಲ್ ಕಬ್ಬೆ ಬೂರುಂಡೊ ಪನ್ಪಿನಲಕ ಪಿದಯಿಡ್ ಜೋರುದ ಬರ್ಸ. ತುಳುವೆರೆನ ಮರಿಯಲದ ಆದ್ರೆ, ಮಲ್ಲ ಪುರ್ಸೆ,,ಕಿನ್ನ ಪುರ್ಸೆ ‘ ರೆಡ್ ಅಲರ್ಟ್’ ಆದ್ ಬದಲಾತುಂಡ್ .ಅಂಚನೆ ಇಲ್ಲದ ಎದುರುದ ತೋಟೊಡು ಇಪ್ಪುನ ಪೆಲತ ಮರತ ಕಮ್ಮೆನ ಬರ್ಪಿನ ಪೆಲಕಾಯಿ ತಿಂಡ ಶೀತ ಜ್ವರ ಅಂಚನೆ ಬಂಜಿ ಬೇನೆ ಬರ್ಪುಂಡು ಪನ್ಪಿನಡೆಗ್ ಬದಲಾತುಂಡು.. ಕೊಯ್ಪಾದ್ ದೀತಿನ ಪೆಲಕಾಯಿದ ಕಮ್ಮೆನ ಮೂಂಕುದಡೆಗ್ ಬರೊಂದುಂಡು. .ಆಂಡ ತಿನ್ಪಿನಿ ಏರ್. ಮಲ್ಲ ಮಗೆ ಎಂಕು ಬೇಜಾರಾವರೆ ಬಲ್ಲಿ ಪಂಡ್ ಪಚ್ಚಿರ್ ತಿನುವೆ .ಆಯೆ ಪಾಪದಾಯೆ.. ಎಲ್ಯ ಮಗೆ ಆಯನ ಎದುರುಡೇ ಪೆಲಕಾಯಿ ಕುತ್ತದು ಬೋಡಾ ಕೇಂಡಲ ” ಎಬ್ಬೆ ಎಂಕು ಬೊಡ್ಚಿ ” ಪಂಡ್ ಸೊಡ್ಡು ಪೀಂಟಾವುನಾಯೆ. ಒಂತೆ ಕೆಂಗುಡೆ. ಕಂಡನಿಡ ಬೋಡಾ ಕೇಂಡ ಬೊಡ್ಚಿ ಪಂಡ್
” ಈಲ ತಿನೊಡ್ಚಿ.ಮರಿಯಲದ ಪೆಲಕಾಯಿ ತಿಂದುದು ಜೊರ ಬರು ” ಪನ್ಪಿನ ಎಚ್ಚರಿಕೆ ಕೊರುವೆರ್.ಆರೋಗ್ಯದ ಮಿತ್ ಬಾರೀ ಮೋಕೆದಾರ್ ಪನರೆ ಆವಂದ್.ಜೊರ ಬತ್ದ್ ಏನ್ ಬೂರೊಂಡೆಡ ಅಟಿಲ್ ಮಲ್ಪುನು ಏರ್ ಪನ್ಪಿನ ಪೋಡಿಗೆಲಾ ಉಪ್ಪು.. ದಾದನೇ ಇಪ್ಪಡ್. ಬಟ್ಟಲ್ ನಿಲಿಕೆ ಪೆಲಕಾಯಿದ ಪಚ್ಚಿರ್ ತಿನ್ಪಿನ ಕುಸಿ ಉಂಡತ್ತೆ ? ಅವ್ ತಿನ್ನಿನಾಯಗೇ ಗೊತ್ತು. ಅಂದ್ ಆ ಕುಸಿ ಸುತ್ತೊಂದು ಸುತ್ತೊಂದು ಯಾನ್ ಎಲ್ಯ ಉಪ್ಪುನ ಕಾಲೊಗು ಪೋದು ಉಂತುದು ಎನನ್ ತೂದು ತೆಲಿತುಂಡು.
ತಿನರೆ ಏನ ತಿಕುಂಡು ಪಂಡ್ ಕಾಪುನ ಎಂಕುಲು ನಾಲ್ ಜೋಕುಲು . ಅಜ್ಜಿ ಪೆಲಕಾಯಿ ಏಪ ಸೇಡ್ ಮಲ್ತ್ ಕೊರುವೆರ್ ಪಂಡ್ ಬಾಯಿಡ್ ನೀರ್ ಅರ್ಪಾವೊಂದು ಕಾತೊಂದುಲ್ಲ. ಅಟಿಲ ಕೋಣೆಡ್ ಏನನೋ ಬೇಲೆ ಮಲ್ತ್ ಬತ್ ದ್ ಕತ್ತಿ ಚೆಪ್ಪು ಕನತೆರ್ ಪಂಡ್ ದಾಂಡ ಇತ್ತೆ ಪೆಲಕಾಯಿ ತುಂಡು ಮಲ್ಪುವೆರ್ ಪಂಡ್ ದೇ ಅರ್ಥ. ರಾಕಿ ಪಾಡಂದೆ ಪಾಡ್ದಿನ ಪಚ್ಚದ ಸೀರೆನ್ ಒಯ್ತು ಕಟ್ ದ್ ಕುಲ್ಲುದು ತಾರಾಯಿದ ಎಣ್ಣೆನ್ ಕತ್ತಿಗ್ಲ ಕೈಕ್ ಲ ಪೂಜಿದ್ ಕೈತಲ್ ಕುಲ್ಲುದಿನ ರಡ್ ತಮ್ಮಲಾಡುಲು ಅಂಚನೆ ಅಮ್ಮನ ಕೈಕುಲ ಎಣ್ಣೆ ಪೂಜರೆ ಕೊರ್ದು ಎಂಕುಲು ನಾಲ್ ಪುಲ್ಲಿಯಾಡ್ಲೆನ ಕೈಕ್ ತಾನೆ ಪೂಜಿದ್ ಪೆಲಕಾಯಿ ಕುತ್ತುದು ಐತ ಮಯಣೊನು ಚೆಪ್ಪುದ ಕೂರುಡು ಪೂಜಿದ್ ದೆತ್ತುದು ಬದಿಟ್ ದೀದ್ ಸೇಡ್ ಮಲ್ತ್ ಕೊರಿಯೆರ್ಡ ಪರ್ಬ ಬೇತೆ ಇಜ್ಜಿ. ಆನಿ ಆಟಿಲ್ ಇಜ್ಜಿ ಪಂಡ್ ಬೇತೆನೇ ಪನೊಡ್ ಪಂಡ್ ಇಜ್ಜಿ. ಕೊರಿನ‌ ಸೇಡ್ ಡ್ ಇತ್ತಿನ ಪಚ್ಚಿರ್ ಮಾತ್ರ ಅತ್ ಐತ ಕಣಿರ್ ಲಾ ಬಂಜಿದುಲಯಿ ಪೊರ್ಲು ಢ್ ಪೋಪುಂಡು.ಐತ ಕಣಿರ್ ತಿನ್ನಗ ಅಜ್ಜಿನ ಕತೆ ಶುರು.ಆ ಕತೆನ್ ನಿಕುಲು ಕೇಂದು ಉಪ್ಪರೆಲಾ ಯಾವು.ಕೇನಂದೆ ಇಪ್ಪರೇಲಾ ಯಾವು.ಆಂಡ ಎಂಕು ಮಾತ್ರ ಅಜ್ಜಿ ತೀರ್ ಪೋದು ಇರ್ವತೈನ್ ಕರಿಂಡಲಾ ಪೆಲಕಾಯಿ ತೂವನಗ ಆರ್ ಪಂತಿನ ಕತೆನೆ ನೆಂಪಾವು. ಆರ್ ಪಂತಿನ ಕತೆ ಈತೆ ನೆನೆಪು.
ಒಂಜಿ ಚಣಿಲ್ ಇತ್ತುಂಡುಗೆ.ಅವ್ ಕಾಡುದ ಸಾದಿಡ್ ಪೋವೊಂದುಪ್ಪನಗ ಮರಟ್ ಪೆಲಕಾಯಿ ತೂಪುಂಡುಗೆ.ಬಾರೀ ಕುಸಿಯಾದ್ ಇಡೀ ಪೆಲಕಾಯಿನುಲಾ ಒಂಜಿಯೇ ತಿನ್ಪುಂಡುಗೆ.ಅಂಚಾವನಗ ಕಣಿರ್ ಕೂಲಿತ ಇಡೆಟ್ ತಿಕ್ ಬೂರಿನೇನ್ ಕೈಟ್ ಒಯ್ತು ಒಯ್ತು ತಿನ್ಪುಪುಂಡುಗೆ .ಅಂಚನೆ ಇಲ್ಲದ ನೆನೆಪಾದ್ ಬತ್ ದ್ ಬಾಕಿಲು ಬೊಟ್ಟುಂಡುಗೆ.ಬೊಟುದು ಐತ ಬುಡೆದಿಯಾಡ್ಲೆನ್ ಇಂಚ ಲೆಪ್ಪುಂಡುಗೆ.
“ಆಚಕ, ಮೇಚಕ,ಸಂಚಕ ಸರಪಳಿ
ಉದ್ದನ್ನ ಮಣೆ ಕನ
ಗಡ್ಡಂತ ಮಯಣ ಕಲೆ ”
ಪಂಡುಗೆ. ಪಾಪ ಅಕುಲು ಆ ಚಣಿಲ್ ದ ಗಡ್ಡೊಡು ಪತ್ ದಿನ ಮಯಣ ಅಂಚನೇ ಗಡ್ಡದ ನಡುಟು,ಕೂಲಿದ ನಡುಟು ತಿಕ್ಕು ಬೂರುದಿನ ಕಣಿರ್ ನ್ ಮೂಸು ಮೂಸುದು ತೂಯಗೆ ಪಂಡ್ ಮುಗಿಪುನ ಈ ಕತೆ ಏಪ ಪೆಲಕಾಯಿ ತುಂಡು ಮಲ್ಪುವೆರಾ ಅದಗ ಈ ಕತೆನ್ ಆರ್ ಪನೊಡು.ಎಂಕುಲು ಕೇನೊಡು.ಆಂಡಲ ಅರೆಗ್ ಲಾ ಬೆಸರ ಆವಂದ್.ಕೇನಿನ ಎಂಕಲೆಗ್ಲಾ ಆವಂದ್.
ಈ ಕತೆತ ಪಿರವುಡು ಚಣಿಲ್ ದ ಗಡ್ಡ ಅಂಚೆನೇ ಐಕ್ ಪತಿನ ಮಯಣೊದ ಕತೆನ್ ಕೇನೊಂದುಪ್ಪುನ ಜೋಕುಲೆಂಕುಲು ಆರ್ ಕೊರಿನ ಪೆಲಕಾಯಿದ ಸೇಡ್ ಅತ್ತಾವಂದೆ ಐತ ಕಣೀರ್ ಡ್ದ್ ಅರ್ಬೆ ನಾಡ್ ನಾಡ್ ಅಗ್ಗಿ ಅಗ್ಗಿದ್ ಕುಲೊಂಡ ಕಿದೆಟ್ ಇತ್ತಿನ ಕೈಕಂಜಿಲ್ ರಚ್ಚದ ಮಿತ್ದ ಮುಳ್ಳುನೇ ತಿನೊಡು ಆತೆ. ಎಂಕುಲು ಐತ ಮುಳ್ಳುನು ಪಿನಿ‌ ತಿನಿಯರೆ ಆತುಂಡ ಅವೆನ್ಲಾ ತಿಂತುವನೋ ದಾನೆ. ಅವ್ವೇ ಪೆಲಕಾಯಿ ತಿಂದ್ ದ್ ಬಂಜರ ಆದ್ ಐಟ್ ತಿಕ್ಕಿನ ಕುಸಿ ಇತ್ತೆದ ಬಿರಿಯಾನಿಡ್ಲ ಇನಿ ಮುಟ್ಟ ತಿಕ್ಕಂದ್. ಅಂದ್ ಪೆಲಕಾಯಿ ನ್ ಕುತ್ತುದು ಸೇಡ್ ಮಲ್ತ್ ಕೊರಿನ ಅಜ್ಜಿನ ಮೋಕೆ ಆರ್ ಇಜ್ಜಿಡಲ ಪೆಲಕಾಯಿ ತೂದು ನೆಂಪುಗು ಬತ್ಂಡಲ ಆ ಕಾಲ ತಿರ್ಗ್ದ್ ಬರಂದ್.ಆಂಡಲ ಜನೊಕುಲು ಬದಲಾಯೆರ್ ಡಲಾ ಪೆಲಕಾಯಿ ಬದಲಾವಂದ್. ನಿಕುಲು ದಾದ ಪನ್ಪರ್?

???? ವಾಸಂತಿ ಅಂಬಲಪಾಡಿ