ಬಂಗೊದ ಬದ್ಕ್

ಬಂಗೊದ ಬದ್ಕ್

ಆನಿ
ಮುಲಿತ್ತ ಮಾಡ್
ತೋರುನ ಇಲ್ಲ್
ಕಡೆಯರೆ ಕಲ್ಲ್
ಅಟ್ಟೊಡು
ತೋಪುದ ಸಾಲ್
ಇಲ್ಲ್ ಜಪ್ಪುನಗ
ಮಣ್ಣ್ ದ ಜಾಲ್..!

ಇನಿ

ಟೇರಿಸ್ ದ ಮಾಡ್
ರಡ್ಡ್ ಮಾಲಿಗೆದ ಇಲ್ಲ್
ಕಡೆಯರೆ ಮಿಕ್ಸರ್
ಇಲ್ಲ್ ಜಪ್ಪುನಗ
ಕಾಂಕ್ರಿಟ್ ದ ಜಾಲ್‌‌..!

ಆನಿ

ಏರ್ ಮೇಲ್….
ಏರ್ ಕೀಳ್…?
ತೆರಿದ್ ಜಿ ಆನಿ
ಬಡವು ಕಟ್ ದ್ಂಡ್
ಮಲ್ಲ ಅರ್ಕಲ್..!

ಇನಿ

ಕಾಸ್ದಾಯೆ ಮೇಲ್
ಬಡವೆ ಕೀಳ್..
ಬಡವು ಬಾಜೆಲ್ದ
ಎದುರು ಕಾಸ್ ಗಾತ್ಂಡ್
ಮಾಮಲ್ಲ ಗೇಲ್…!

ಆನಿ

ಸಂಸ್ಕೃತಿ ಒರಿದ್ಂಡ್
ಪರ್ಬ ಆತ್ಂಡ್…!
ಕೋಲ ನೇಮ
ಮದ್ಮೆ ಮದಿರೆಂಗಿ‌
ಕಟ್ಟ್ ಕಟ್ಟಲೆಡ್
ಪೊರ್ಲುಡೆ ನಡದ್ಂಡ್..!

ಇನಿ

ಸಂಸ್ಕೃತಿ ಬೂರ್ದುಂಡು
ಪರ್ಬ ಆವೊಂದುಂಡು..
ಕೋಲ ನೇಮ
ಮದ್ಮೆ ಮದಿರೆಂಗಿ
ಕಾಲೊಗು ತಕ್ಕ ಬದಲಾತ್ಂಡ್…!

ಆನಿ

ಅಷ್ಟೆಮಿ ಬೈದ್ಂಡ್
ಮೂಡೆ ಬೈದ್ಂಡ್
ಕೊಟ್ಟಿಗೆ ಬೈದ್ಂಡ್
ಸೇಮೆದಡ್ಡೆಗ್ ಮನೆಲ
ಒತುದುಂಡು‌‌.‌.‌!
ಮಾತಾ ಕಡೆಪಿಕಲ್ಲ್ ಡೇ
ಕಡೆದ್ಂಡ್..!

ಇನಿ

ಅಷ್ಟೆಮಿ‌ ಬೈದ್ಂಡ್..
ಮೂಡೆ ಕೊಟ್ಟಿಗೆ
ಸೇಮೆದಡ್ಡೆ ಗುಂಡ
ಹೋಟೇಲ್ಡ್ ಆರ್ಡರ್
ಮಲ್ತ್ಂಡ ತಿಕ್ಕುಂಡು‌‌….!
ಕಡೆಪಿಕಲ್ಲ್ ಕೋಡಿ
ಸೇರ್ದ್ಂಡ್…!

ಆನಿ

ಪುಂಡಿ ತೊಂದುರುಡು
ಗಟ್ಟಿ ತೊಂದುರುಡು
ಮೀನ್ ದ ಕಜಿಪು
ಬಿಸಲೆಡ್..
ರೊಟ್ಟಿ ಓಡುದ ಕಾವೊಲಿಡ್..
ಮೀಪಿನಿ ಬೆಂದಿರ್ಡ್..!
ಪೂರಲ ಆವೊಂದಿತ್ತ್ಂಡ್
ಗ್ಯಾಸ್ ಇಜ್ಜಾಂದಿನ ದಿಕ್ಕೆಲ್ಡ್..!

*ಇನಿ”

ಪುಂಡಿ ಮೊಬೈಲ್ಡ್
ಮೀನ್ ದ ಕಜಿಪು
ಸ್ಟೀಲ್ ದ ತೋಪುಡು….!
ಪೂರಲ ಗ್ಯಾಸ್ ಡ್
ಆಪಿನ ಬಾಜನೊಡು.‌.
ನಮ್ಮ ಬಂಜಿ ನಡಪ್ಪುನೇ
ಇನಿ ಗ್ಯಾಸ್ಟ್ರಿಕ್‌ ದ ಮಾತ್ರೆಡ್…!

ದುಂಬು ಎನ್ಪ ವರ್ಸೊರ್ದು
ಬೊಕ್ಕ ಅಜ್ಜೆರ್..!
ಇತ್ತೆ ಎನ್ಪ ವರ್ಸ
ಬದ್ಕುನ ಗ್ಯಾರಂಟಿಡ್
ಏರ್ಲ ಇಜ್ಜೆರ್…!

ಪುಟ್ಟು ಪರ್ಬೊಗುಲಾ
ಬೋಡು ಗಂಗಸರ..
ಮದಿರೆಂಗಿಗ್ ಲಾ
ಬೋಡು ಗಂಗಸರ‌…
ತಂಬಿಲೊಗುಲಾ ಬೋಡು
ಗಂಗಸರ..
ಉಲಯಿ ಲೆಪ್ಪುನೈಕ್ ಲಾ
ಬೋಡು ಗಂಗಸರ..
ಸಂಸ್ಕೃತಿ ಮಾಜಾಯಿ
ಬದ್ಕ್ ದುಲಯಿ
ಬದ್ಕೊಂದುಲ್ಲ ನಮ
ಅವ್ವೆ ಎಂಕ್ ಬೇಸರ…!

ಸುಕೇಶ್ ಶೆಟ್ಟಿ ಎಕ್ಕಾರ್✍️
ತುಲುವೆರೆ ಕಲ ಕುಡ್ಲ