ಇಂಚಪ್ಪೊಗ್ ಒಡಿಪು ಜಿಲ್ಲೆ ಸೇರಿನಂಚ ರಾಜ್ಯದ ಮಾತಾ ಕಡೆಟುಲಾ ಆತ್ಮಹತ್ಯೆದ ಪ್ರಕರಣೊಲ್ ಜಾಸ್ತಿ ಆವೊಂದುಂಡ್. ಉಂದು ಬಾರೀ ಬೇಜಾರುದ ಸಂಗತಿ.ಸಮಾಜದ ಮುಖ್ಯವಾಹಿನಿಡ್ ಉಪ್ಪುನಕುಲೇ ಹೆಚ್ಚಾದ್ ಜೀವದೆತ್ತೊಂಬಿನವ್ವೆನ್ ನಮ ಇಂಚಪ್ಪೊದ ಕೆಲವು ಪ್ರಕರಣೊಲೆಡ್ ತೂವೊಂದುಲ್ಲಾ.ಮಸ್ತ್ ಜನ ಮಾನಸಿಕವಾಯಿನ ಒತ್ತಡೊಡ್ ಜೀವದೆತ್ತೊನುಂದುಲ್ಲೆರ್.
ಜಾಸ್ತಿಯಾವೊಂದುಪ್ಪುನ ಈ ಪ್ರಕರಣೊಲೆನ್ ತಡೆಪುನ ಬಾರೀ ಅಗತ್ಯವಾದುಂಡ್.ಈ ನಿಟ್ಟುಡ್ ಮಾಧ್ಯಮದಕ್ಲೆನ ಪಾತ್ರಲಾ ಅಗತ್ಯವಾದುಂಡ್.ಜೀವದೆತ್ತೊಂದಿನ ವ್ಯಕ್ತಿಲೆನ ಬಗ್ಗೆ ವರದಿ ಮಲ್ಪನಗ ಬಾರೀ ಜಾಗ್ರತೆ ಮಲ್ಪೊಡ್.ಕೆಲವೊಂಜಿ ಪ್ರೆಸ್ ಕೌನ್ಸಿಲ್ ನಿಯಮೊಲೆನ್ ಪಾಲಿಸಾವುನ ಅಗತ್ಯ ಉಂಡು ಪಂಡುದ್ ಉಡುಪಿ ಬಾಳಿಗಾ ಸ್ಮಾರಕ ಆಸ್ಪತ್ರೆದ ನಿರ್ದೇಶಕೆರಾಯಿನ ಹಿರಿಯ ಮನೋವೈದ್ಯೆರ್ ಡಾ.ಪಿ.ವಿ.ಭಂಡಾರಿ ಪಂಡೆರ್.
ಆರು ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಸಹಯೋಗಡ್ ನಡತಿನ “ಆತ್ಮಹತ್ಯೆ ನಿಯಂತ್ರಣ:ಸಾಮಾಜಿ ಜವಾಬ್ದಾರಿ’ ವಿಷಯದ ಬಗ್ಗೆ ವಿಚಾರ ಸಂಕಿರಣೊಡ್ ಸಂಪನ್ಮೂಲ ವ್ಯಕ್ತಿಯಾದ್ ಪಾತೆರಿಯೆರ್. ಸಮಸ್ಯೆಲೆನ್ ಎದುರಿಸಾವರೆಗ್ ಆವಂದಿನಕುಲು ಜೀವದೆತ್ತೊಂಬಿನ ನಿರ್ದಾರೋಗ್ ಬರ್ಪೆರ್. ಜೀವದೆತ್ತೊಂಬಿನಕುಲ್ ಜೀವದೆತ್ತೊನೊಡ್ ದುಂಬು ದಾದಾಂಡಲಾ ಎಚ್ಚರಿಕೆ ಕೊರ್ಪೆರ್. ಅವ್ವೆನ್ ಅರ್ಥ ಮಲ್ತೊಂಡ ಅಕುಲ್ ಜೀವ ದೆತ್ತೊಂಬಿನವ್ವೆನ್ ತಡೆಪೊಲಿ.
ಮಾಧ್ಯಮೊಡ್ ಪ್ರಸಾರ ಮಲ್ಪನಗ ದಾಲಾಂಡಲಾ ಹೆಚ್ಚಿ ಕಮ್ಮಿ ಆಂಡುಡ ಅವ್ವೆನೇ ಅನುಸರಿಸಾದ್ ಅವ್ವೇ ಸಮಸ್ಯೆ ಇತ್ತಿನಕುಲು ಜೀವದೆತ್ತೊನೆರೆಗುಲಾ ಯಾವು.ಅಂಚಾದ್ ವರದಿ ಮಲ್ಪನಗ ಜಾಗೃತೆ ಮಲ್ಪೊಡ್.ವರದಿಡಾದ್ ಕುಡೊರಿಯನ ಮನಸ್ಸುಗ್ ಬೇಜಾರಾಪಿನ ಸುದ್ದಿನ್ ಪಾಡೊಡ್ಚಿ ಪಂಡುದ್ ಪಂಡೆರ್.
ಆತ್ಮಹತ್ಯೆ ನಿಯಂತ್ರಣೊಗ್ ಪತ್ರಕರ್ತೆರ್ ಜವಾಬ್ದಾರಿಯುತ ವರದಿ ಮಲ್ಪೊಡ್.ಜೀವದೆತ್ತೊಂದಿನ ಇಲ್ಲದಾಯಗ್ ಒವ್ವೇ ರೀತಿದ ತೊಂದರೆ ಕೊರ್ರೆಗ್ ಬಲ್ಲಿ.ಅಕಲ್ನ ಬೇನೆ ಬೇಸರುನ್ ತೆರಿಯೊಂದ್ ಸಮಾಜೊಡ್ದ್ ಅಕಲೆಗ್ ಸಮಸ್ಯೆ ಆವಂದಿಲೆಕ್ಕ ವರದಿ ಮಲ್ಪೊಡ್ ಪಂಡುದ್ ಪಂಡೆರ್.
ಮಣಿಪಾಲ ಇನ್ ಸ್ಟಿ ಟ್ಯೂಟ್ ಆಫ್ ಕಮ್ಯೂನಿಕೇಶನ್ ನೆತ್ತ ಮಾಧ್ಯಮ ಅಧ್ಯಯನ ಕೇಂದ್ರದ ಮುಖ್ಯಸ್ಥೆ ಬೊಕ್ಕ ಸಹಪ್ರಾಧ್ಯಾಪಕಿ ಡಾ.ಶುಭ ಎಹ್.ಎಸ್. ಪಾತೆರ್ದ್ ಮಾಧ್ಯಮ ಸಮಾಜದ ಕನ್ನಡಿ ಇತ್ತಿಲೆಕ್ಕ.ಆತ್ಮಹತ್ಯೆದ ವರದಿನ್ ಕ್ರೈಮ್ ವರದಿ ಮಲ್ಪಂದೆ ಅವ್ವೆನೇ ಆರೋಗ್ಯಯುತವಾಯಿನ ವರದಿ ಮಲ್ತುಂಡ ಸಮಾಜೊಗ್ ಉಪಯೋಗ ಆಪುಂಡ್ ಪಂಡೆರ್.ಸಮಾಜದ ಒವ್ವೇ ಸಮಸ್ಯೆಗ್ ದಿನತ್ತ 24ಗಂಟೆಲಾ ಪರಿಹಾರ ತಿಕ್ಕುಂಡ್ ಪಂಡುದ್ ವರದಿ ಮಲ್ಪೊಡ್ ಪಂಡೆರ್.
ಮಣಿಪಾಲ ರೋಟರಿ ಅಧ್ಯಕ್ಷೆ ರಾಯಿನ ಮನೋವೈದ್ಯೆ ಡಾ.ವಿರೂಪಾಕ್ಷ ದೇವರಮನೆ ಪ್ರಾಸ್ತವಿಕವಾದ್ ಪಾತೆರಿಯೆರ್.
.ವೇದಿಕೆಡ್ ಉಡುಪಿ ವಾತರ್ಾಧಿಕಾರಿ ಮಂಜುನಾಥ್,ಜಿಲ್ಲಾ ಕಾರ್ಯನಿ ರತ ಪತ್ರಕರ್ತೆರೆನ ಸಂಘದ ಅಧ್ಯಕ್ಷೆರಾಯಿನ ರಾಜೇಶ್ ಶೆಟ್ಟಿ ಅಲೆವೂರು,ಮಣಿಪಾಲ ರೋಟರಿ ಕ್ಲಬ್ ದ ಪ್ರಶಾಂತ್ ಹೆಗ್ಡೆ,ಶ್ರೀಪತಿ ನಾಗರಾಜ್ ಮೂರ್ತಿ ಉಪಸ್ಥಿತರಿತ್ತೆರ್.ಪತ್ರಕರ್ತ ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗತ ಮಲ್ತುದ್ ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ಸೊಲ್ಮೆ ಸಂದಾಯ್ತ ಮಲ್ತೆರ್.
by 