ಜೈ ತುಲುನಾಡ್ ಪಚ್ಚೆದೈಸಿರಿ

ಜೈ ತುಲುನಾಡ್ (ರಿ.) ಒಡಿಪು ಎಗ್ಗೆದ ಮುತಾಲಿಕೆಡ್ *ಪಚ್ಚೆದೈಸಿರ – ಇನಿತ ದೈ ಎಲ್ಲೆದ ಉಸುಲು* ಪನ್ಪಿ ದೈ ನಡ್ಪಿನ ಲೇಸ್ ತೇದಿ ಜೂನ್ 07 ಐತಾರದಾನಿ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಆದಿ ಉಡುಪಿಡ್ ನಡತ್ಂಡ್.

ಮಲ್ಲ ಬಿನ್ನೆರಾದ್ ಒಡಿಪು ವಲಯದ ಉಪ ಅರಣ್ಯಾಧಿಕಾರಿಯಾಯಿನ ಜುನೇದ್ ಅಕ್ತರ್, ಬಿ ಫಾರೆಸ್ಟರ್ ಆಯಿನ ಎಚ್ ದೇವರಾಜ್ ಪಾಣ, ಆದಿ ಉಡುಪಿ ಶಾಲೆದ ಸಂಚಾಲಕೆರ್ ಆಯಿನ ಗಣೇಶ್ ರಾವ್, ಜೈ ತುಲುನಾಡ್ (ರಿ.) ಕೇಂದ್ರ ಸಮಿತಿದ ಒತ್ತು ಪನವುದ ಪಾಲವೆರ್ ಆಯಿನ ನಾಗರಾಜ್ ಶೆಟ್ಟಿಗಾರ್ ಇಂದ್ರಾಳಿ, ಜೈ ತುಲುನಾಡ್ (ರಿ.) ಒಡಿಪು ಎಗ್ಗೆದ ಗುರ್ಕಾರ್ಲಾಯಿನ ಸಂತೋಷ್. ಎನ್. ಎಸ್ ಕಟಪಾಡಿ ದೈ ನಡ್ಡ್ ಲೇಸ್ ನ್ ಉದಿಪನ ಮಲ್ತೆರ್.

ಒಡಿಪು ವಲಯದ ಬಿ ಫಾರೆಸ್ಟರ್  ಆಯಿನ ಎಚ್ ದೇವರಾಜ್ ಪಾಣ ದುಂಬುದ ಕಾಲದ ತುಲುವ ಜನಕುಲು ಪ್ರಕೃತಿದೊಟ್ಟುಗು ಒಂಜಾದ್ ಬದುಕೊಂದಿತ್ತೆರ್ ಆಂಡ ಇತ್ತೆ ಅಭಿವೃದ್ಧಿದ ಪುದರ್ಡ್ ಪ್ರಕೃತಿ ನಾಶ ಆವೊಂದುಂಡು. ನಮ್ಮ ದುಂಬುದ ಪೀಳಿಗೆಗ್ ಅವೆನ್ ಒರಿಪಾವೊಡು, ಜೈ ತುಲುನಾಡ್ ಸಂಘಟನೆ ಇಂಚಿತ್ತಿನ ನನಾತ್ ಲೇಸ್ನ್ ಮಲ್ಪುಲೆಕ ಆವಡ್ ಪಂದ್ ತೆರಿಪಾಯೆರ್. ಆದಿಉಡುಪಿ  ಶಾಲೆದ ಸಂಚಾಲಕೆರ್ ಆಯಿನ ಗಣೇಶ್ ರಾವ್ ದೈ ನಡ್ದ್ಪಿನ ಮಾತೆರ್ನ ಹಕ್ಕು ಪನ್ಪಿ ಪೊರ್ಲುದ ಪಾತೆರ ಪಂಡೆರ್. ಲೇಸ್ದ ಗುರ್ಕಾರ್ಮೆನ್ ವಹಿಸೊಂದಿನ ಜೈ ತುಲುನಾಡ್ (ರಿ.) ಒಡಿಪು ಎಗ್ಗೆದ ಗುರ್ಕಾರ್ಲಾಯಿನ ಸಂತೋಷ್. ಎನ್. ಎಸ್ ಕಟಪಾಡಿ ಜೈ ತುಲುನಾಡ್ ಸಂಘಟನೆ ಕರಿನ ಪತ್ತ್ ವರ್ಸೊದಿಂಚಿ ತುಲು ಬಾಸೆ ತುಲು ಲಿಪಿತ ಒರಿಪುಗಾದ್ ಮಲ್ತೊಂದು ಬೈದಿನ ಬೇಲೆದ ಬಗೆಟ್ ಅಂಚನೆ ತುಳುವೆರ್ ಪಸಂದ್ರ ದಿನ ದಾಯೆಗ್ ಆಚರಿಪೊಡು ಪಂದ್ ತೆರಿಪಾಯೆರ್.

ಈ ಪೊರ್ತುಡು ಕೇಂದ್ರ ಸಮಿತಿದ ಒತ್ತು ಗುರ್ಕಾಲಾಯಿನ ಸುಶೀಲಾ ಜಯಕರ್,  ಜೈ ತುಲುನಾಡ್ (ರಿ.) ಒಡಿಪು ಎಗ್ಗೆದ ಕಾರ್ಯಕಾರಿ ಸಮಿತಿದ ಪದುಕೆರ್ ಬೊಕ ಪದುಕೆರ್ ಪಾಲ್ ಪಡೆದಿತ್ತೆರ್. ಒಡಿಪು ಎಗ್ಗೆದ ಕಾರ್ಯಂತೆರ್ ಆಯಿನ ಪ್ರಜ್ಞಾ ಶ್ರೀ ಲೇಸ್ ಸುದಾರಿಕೆ ಮಲ್ತೆರ್.