ವನಮಹೋತ್ಸವ

ಸಹಕಾರ ತತ್ವದಡಿ ಸೇವೆದೊಟ್ಟುಗ್ ಪರಿಸರ ಸಂರಕ್ಷಣೆದ ಕಾರ್ಯ ಶ್ಲಾಘನೀಯ : ಯಶ್ ಪಾಲ್ ಸುವರ್ಣ

ಮಲ್ಪೆ ಮೀನುಗಾರ ಮಹಿಳೆಯೆರೆನ  ಸಹಕಾರಿ ಸಂಘ ನಿ. ಮಲ್ಪೆ ದ  ವತಿಡ್ದ್  ಶ್ರೀಜ್ಞಾನ ಜ್ಯೋತಿ ಭಜನಾ ಮಂದಿರ ಮಲ್ಪೆದ  ಸಹಯೋಗಡ್  ಅಂತಾರಾಷ್ಟ್ರೀಯ ಸಹಕಾರ ವರ್ಷದ ಅಂಗವಾದ್  ಪಚ್ಚ ಪರಿಸರ ನಿರ್ಮಿಸಾವುನ ಕಾಯಕಲ್ಪದ ಆಶಯದೊಟ್ಟುಗ್ ಆಯೋಜನೆ ಮಲ್ದಿನ ವನಮಹೋತ್ಸವ ಕಾರ್ಯಕ್ರಮನ್  ಉಡುಪಿ ವಿಧಾನಸಭಾ ಕ್ಷೇತ್ರದ ಶಾಸಕೆರಾಯಿನ ಶ್ರೀ ಯಶ್ ಪಾಲ್ ಸುವರ್ಣ ಉದಿಪನ ಮಲ್ತೆರು.

ಈ ಸಂದರ್ಭಡ್  ಪಾತೆರಿನ ಆರ್   ಮಲ್ಪೆ ಮೀನುಗಾರ ಮಹಿಳೆಯೆರೆನ ಸಹಕಾರಿ ಸಂಘ ಸಹಕಾರಿ ತತ್ವದಡಿಟ್ ಮಹಿಳೆಯೆರೆಗ್ ಆರ್ಥಿಕ ಶಕ್ತಿ ದಿಂಜಾವುನೊಟ್ಟುಗ್  ವನ ಮಹೋತ್ಸವದಂಚಿನ  ಪರಿಸರ ಸಂರಕ್ಷಣೆದ ಕಾರ್ಯಕ್ರಮಲೆನ್  ಆಯೋಜನೆ ಮಲ್ಪುನವ್   ಶ್ಲಾಘನೀಯ., ಜ್ಞಾನ ಜ್ಯೋತಿ ಭಜನಾ ಮಂದಿರ ಸುವರ್ಣ ಮಹೋತ್ಸವ ಆಚರಣೆನ್  ಸಹಕಾರಿ ಸಂಘಲೆನ  ಸಹಭಾಗಿತ್ವಡ್  ಗಿಡ ನಡ್ಪುನ ಕಾರ್ಯಕ್ರಮಲೆನ್  ಮಲ್ಪುನ ಮೂಲಕ ಸಮಾಜಗ್ ಎಡ್ಡೆ ಸಂದೇಶ ಕೊರೊಂದುಂಡ್ ಪಂಡೆರು.

ಸಮಾರಂಭದ ಅಧ್ಯಕ್ಷತೆಡ್  ಸಂಘದ ಅಧ್ಯಕ್ಷೆರಾಯಿನ  ಶ್ರೀಮತಿ ಗೀತಾ ಕರ್ಕೇರ  ಇತ್ತೆರು. ಮಲ್ಲ ಬಿನ್ನೆರಾದ್  ಮಲ್ಪೆ ಮೀನುಗಾರರ ಸಂಘದ ಅಧ್ಯಕ್ಷೆ ರಾಯಿನ ಶ್ರೀ ದಯಾನಂದ ಸುವರ್ಣ, ಜ್ಞಾನ ಜ್ಯೋತಿ ಭಜನಾ ಮಂದಿರದ ಶ್ರೀ ಪಾಂಡುರಂಗ ಮಲ್ಪೆ, ಸಂಘದ ಉಪಾಧ್ಯಕ್ಷೆರಾಯಿನ  ಶ್ರೀಮತಿ ರಾಧಾ ಸುವರ್ಣ, ನಿರ್ದೇಶಕೆರಾಯಿನ  ಶ್ರೀಮತಿ ಪೂರ್ಣಿಮ ಪುತ್ರನ್, ಶ್ರೀಮತಿ ಯೋಗಿತಾ ಸುವರ್ಣ, ಕಾರ್ಯದರ್ಶಿ ಶ್ರೀಮತಿ ಮಂಗಳ ತಿಲಕ್ ಬೊಕ್ಕ ಮಹಿಳಾ ಸಂಘದ ಸದಸ್ಯೆರು ಉಪಸ್ಥಿತರಿತ್ತೆರು