ಮೇ15ಗ್ ಉಡುಪಿ ಶ್ರೀ ಕೃಷ್ಣ ಮಠದ ರಾಜಾಂಗಣಡ್ ಉಡುಪಿದ ಪ್ರಸಿದ್ಧ ಗಾಂಧಿ ಆಸ್ಪತ್ರೆ ಮುಪ್ಪ ವರ್ಷದ ಸಂವತ್ಸರಗ್ ಪಾದಾರ್ಪಣೆ ಮಲ್ಪುನ ಸುಸಂದರ್ಭಡ್ ಬೊಕ್ಕ ಪಂಚಮಿ ಟ್ರಸ್ಟ್, ಪಂಚಲಹರಿ ಪೌ೦ಡೇಶನ್ ಪ್ರಾಯೋಜಕತ್ವಡ್ ಖ್ಯಾತ ಬಾಲಕಿ ಗಂಗಾ ಶಶಿಧರನ್ ಗುರುವಾಯೂರು ಬೊಕ್ಕ ಅರೆನ ಗುರು ಅನುರೂಪ್ ಗುರುವಾಯೂರು ತಂಡದಕ್ಲೆಡ್ದ್ ವಯೊಲಿನ್ ವಾದನ ನಡಪರೆಗುಂಡ್.
ತ್ರಿಶೂರ್ ದ ಪತ್ತು ವರ್ಷದ ಕಿನ್ನ ಬಾಲೆ ಗಂಗಾ ಶಶಿಧರನ್ ವಯೊಲಿನ್ ವಾದನದ ಮೂಲಕ ನಾಡುದ ಸಮಸ್ತರೆನ ಗಮನ ಒಯ್ತುದೊಲು. ಸತತ ಪರಿಶ್ರಮದ ಮೂಲಕ ಎಲ್ಯ ಪ್ರಾಯೊಡೇ ಅದ್ಭುತವಾಯಿನ ವಯೊಲಿನ್ ನುಡಿಸಾವುನ ಮೂಲಕ ಸಂಗೀತ ಪ್ರಿಯೆರೆನ ಉಡಲ್ ಗೆಂದುದೊಲು .
ಗುರುವಾಯೂರು ದೇವಸ್ಥಾನದ ವೇದಿಕೆಡ್ ವಯೊಲಿನ್ ಕಛೇರಿ ನಡಪನಗ ಒಂಜರೆ ವರ್ಷದ ಗಂಗಾ ಅಪ್ಪೆನೊಟ್ಟುಗ್ ವೀಕ್ಷಕೆರೆಡ್ ಒರ್ತಿಯಾದಿತ್ತೊಲು. ಕಛೇರಿ ಮುಗಿಯಮುಟ್ಟಲಾ ಲಕ್ಕೊಂದಿತ್ತುಜೊಲು. ವಯಲಿನ್ ಡ್ ಆತೊಂಜಿ ಆಸಕ್ತಿ ಇತ್ತಿನ ಆ ಒಂಜರೆ ವರ್ಷದ ಬಾಲೆಗ್ ಇತ್ತೆ ಪತ್ತು ವರ್ಷ.
ಇತ್ತೆ ಅವ್ವೇ ವೇದಿಕೆಡ್ ವಯೊಲಿನ್ ಡ್ ಜಾದೂ ಪ್ರದರ್ಶನ ಮಲ್ತುದ್ ತಾರೆಯಾಯಿನ ಕಥೆ ಅವಿಸ್ಮರಣೀಯ. ಪಿಟೀಲು ಅತ್ತುಂಡ ವಯೊಲಿನ್ ಭಾರತೀಯ ಬೊಕ್ಕ ಪಾಶ್ಚಾತ್ಯ ಸಂಗೀತ ಪರಿಕರಡ್ ಜನಪ್ರಿಯವಾಯಿನ ತಂತಿ ವಾದ್ಯ.
ದಕ್ಷಿಣ ಆಫ್ರಿಕಾ, ಸ್ವಿಟ್ಜರ್ಲೆಂಡ್, ದೆಹಲಿ ಬೊಕ್ಕ ಬೆಂಗಳೂರಿಗ್ ಆಹ್ವಾನದೊಟೊಟುಗ್ ಕೇರಳ ಬೊಕ್ಕ ಹೈದರಾ ಬಾದ್ ಡ್ ಇಂಚ ಮಸ್ತ್ ಕಡೆಟ್ ಸಂಗೀತ ಕಚೇರಿಲೆನ್ ನಡಪಾದೆರ್.. ಕರಿನ ನವೆಂಬರ್ಡ್ ಗುರುವಾಯೂರು ದೇವಸ್ಥಾನ ಡ್ ನಡತಿನ ಜುಗಲ್ಬಂದಿ, ಸಾಮಾಜಿಕ ಜಾಲತಾಣಡ್ ಸಖತ್ ವೈರಲ್ ಆಯಿನೆಡ್ ಬೊಕ್ಕ ಗಂಗಾ ಸ್ಟಾರ್ ವಾದಕಿ ಆತೆರು. ಡಿಸೆಂಬರ್ಡ್ ವೈಕಂ ಮಹಾದೇವ ದೇವಸ್ಥಾನಡ್ ವೈಕಥಾಷ್ಟಮಿದ ಸಂಗೀತ ಕಾರ್ಯಕ್ರಮಲಾ ವೈರಲ್ ಆತುಂಡ್. ಖಾಸಗಿ ವಾಹಿನಿದ ಕಾರ್ಯಕ್ರಮಡುಲಾ ಅತಿಥಿಯಾದ್ ಪಾಲ್ ಪಡೆದೆರು.
ಅಯಿರೂರು ಎಯುಪಿಎಸ್ ದ ಐನೇ ತರಗತಿದ ವಿದ್ಯಾರ್ಥಿನಿ ಗಂಗಾ ನೃತ್ಯಲಾ ಕಲ್ತೊಂದುಲ್ಲೆರ್. ಅಮ್ಮ ಕೃಷ್ಣವೇಣಿ ಲಾ ವಯೊಲಿನ್ ಬಾರಿಸಾವೆರು. ಪೊಪ್ಪ ಶಶಿಧರನ್ ದುಬೈಡ್ ಕೆಲಸ ಮಲ್ತೊಂದುಲ್ಲೆರ್. ನಾಲರೆ ವರ್ಷಡ್ ವಯೊಲಿನ್ ಕಲ್ಪರೆಗ್ ಸುರು ಮಲ್ತುದ್, ಏಳನೇ ವರ್ಷಡ್ ವೇದಿಕೆಡ್ ಪ್ರದರ್ಶನ ಕೊರ್ತೆರ್.
ಗಂಗಾ ಆಕಾಶವಾಣಿ ಎ ಗ್ರೇಡ್ ಕಲಾವಿದ ಸಿ.ಎಸ್ ಅನುರೂಪ್ ಅರೆನೊಟ್ಟುಗ್ ತರಬೇತಿ ಮಲ್ತೊಂದುಲ್ಲೆರ್.. ಸುರುತ ಸರ್ತಿ ಪಿಟೀಲು ನುಡಿಸಾವನಗ ಕೈಕ್ ಗಾಯವಾಯಿನಪಗ ಪೊಡೊಡ್ಚಿ ಪಂಡುದು ಶಿಕ್ಷಕೆರು ಪಂಡಿನಪಗ ಪೊಡುಜಿ , ಕಲ್ಪುವೆ ಪಂತೆರುಗೆ.
ಇತ್ತೆ ಉಡುಪಿಡ್ ಅರೆನ ವಯೊಲಿನ್ ವಾದನ ಕಾರ್ಯಕ್ರಮ ಮೇ 15 ಗ್ ಬಯ್ಯಗ್ ರಾಜಾಂಗಣಡ್ ನಡಪರೆಗಿತ್ತುದ್ ಸಾರ್ವಜನಿಕೆರೆಗ್ ಮುಕ್ತ ಅವಕಾಶ ಉಂಡು ಪಂಡುದು ಗಾಂಧಿ ಆಸ್ಪತ್ರೆದ ಆಡಳಿತ ನಿರ್ದೇಶಕ ಎಂ. ಹರಿಶ್ಚಂದ್ರ ಪ್ರಕಟಣೆಡ್ ತೆರಿಪಾದೆರ್.
by 