ಕಟ್ಟಿಗೆ ಮುಹೂರ್ತ

ರಜತಪೀಠ ಪಂಡುದೇ ಪ್ರಸಿದ್ಧಿಯಾಯಿನ ಉಡುಪಿಡ್ ನೆಲೆಯಾಧ್ ಅನುದಿನಲಾ ಭಕ್ತರೆನ್ ಅನುಗ್ರಹಿಸಾವುನ ಅನ್ನಬ್ರಹ್ಮ ಪಂಡುದೇ ಖ್ಯಾತಿ ಪಡೆಯಿನ ಶ್ರೀಕೃಷ್ಣ ಭಗವಂತನ ಪೂಜಾ ಕೈಂಕರ್ಯ ಮಲ್ಪರೆಗುಪ್ಪುನ ಬಾವೀ ಪರ್ಯಾಯ ಶ್ರೀತೀರೂರು ಮಠದ ಬೇತೆ ಬೇತೆ ಮೂಹೂರ್ತಲೆನ ಪೈಕಿ ಮೂಜನೇ ಮೂಹೂರ್ತ ಅವ್ವೇ ಕನಕುದ ಮೂಹೂರ್ತ. 2026 – 2028ದ ಶ್ರೀಮತದ ಪರ್ಯಾಯವಧಿಡ್ ಭಕ್ತರೆಗ್ ಅನ್ನ ದಾನಕ್ಕಾದ್ ಅರಿ ಮೂಹೂರ್ತ ನಡೆದುಂಡ್. ಅರಿ ಬೊಕ್ಕ ಬಾಕಿದ ಧಾನ್ಯಲೆನ್ ಕನಕುದ ಉರಿಟೇ ಬೇಯ್ಪಾದ್ ಭಗವಂತಗ್ ನೈವೇದ್ಯವಾದ್ ಸಮರ್ಪಣೆ ಮಲ್ಪುನವ್ ಮತದ ನಿಯಮ. ನೇಕ್ ಬೋಡಾಪಿನ ಕಟ್ಟಿಗೆ ಸಂಗ್ರಹಣೆದ ತಯಾರಿಯೇ ಕನಕ್ ಮುಹೂರ್ತ ಪಂಡುದ್ ಪುಗಾರ್ತೆನ್ ಪಡೆದುಂಡ್. ಆದ್ದರಿಂದ ಈ ನೈವೇದ್ಯನ್ ಭಗವಂತನ ಪ್ರಸಾದ ಪನ್ಪೆರ್. ಈ ಪ್ರಸಾದನ್ ಸ್ವೀಕಾರ ಮಲ್ತುಂಡ ಭಕ್ತರೆಗ್ ಪ್ರಸನ್ನತೆಧ ಅನುಭವ ಆಪುಂಡ್. ಧನ್ಯತಾ ಭಾವ, ಭಕ್ತಿ ಹೆಚ್ಚಾಪುಂಡ್ ಈ ನೈವೇದ್ಯನ್ ಸ್ವತಃ ಶ್ರೀಮನ್ಮಧ್ವಾಚಾರ್ಯೆರು ಶ್ರೀಕೃಷ್ಣನ ಗರ್ಭ ಗುಡಿಟ್ ಕುಲ್ಲುದ್ ಭಗವಂತಗ್ ಸಮರ್ಪಣೆ ಮಲ್ಪುವೆರ್. ಪನ್ಪಿನ ನಂಬಿಕೆ ಉಂಡು. ಅಂಚಾದ್ ಬಾಕಿದ ಮತೀಯೆರು ಅತ್ತುಂಡ ಸ್ವಯಂ ಪಾಕೀಯೆರು ಕೃಷ್ಣ ಮಠಕ್ ಬತ್ತಿನಪಗ ಈ ಪ್ರಸಾದೊನ್ ಸ್ವೀಕಾರ ಮಲ್ಪುವೆರ್. ಇಂಚಿನ ಪರಿಶುದ್ಧವಾಯಿನ ಆಹಾರನ್ ಭಕ್ತೆರೆಗ್ ಕೊರ್ರೆಗ್ ಅಯಿತ್ತ ತಯಾರಿಕೆಗಾದ್ ಕನಕುನ್ ದುಂಬೇ ಸಂಗ್ರಹ ಮಲ್ಪುನವ್ ಈ ಮುಹೂರ್ತದ ವಿಶೇಷತೆ. ಆ ಪ್ರಯುಕ್ತ ಈ ಬಾರಿದ ಕಟ್ಟಿಗೆ ಮುಹೂರ್ತ 13.07.2025 ರ ಐತಾರ ಕಾಂಡೆ 9.15 ಗ್ ಸಿಂಹ ಲಗ್ನಡ್ ನಡಪರೆಗುಂಡ್.

ಕನಕುನೇ ಆಷಾಡ ಮಾಸೊಡೇ ಸಂಗ್ರಹಿಸಾವುನ ನಿಯಮ ಉಂಡಕ. ಕಾರಣ ಅಪಗ ಮರಿಯಾಲ ಆಯಿನೆಡ್ದಾವರ ಕಡ್ತಿನ ಮರಗಿಡಕುಲಕ ಕುಡೊರ ಚಿಗುರುದ್ 16 ವರ್ಷಮುಟ್ಟ ಬುಲೆಯರೆಗ್ ಸಹಕಾರಿಯಾಪುಂಡ್. ತುದಿ ಜಾಸ್ತಿ ಉಪ್ಪುನ ಕರಿ (ಕರ್ಮಾರು) ಮರದ ಸುಮಾರು 25 ಲಾರಿದಾತ್ ಕನಕುನ್ ಸಂಗ್ರಹಿಸಿ ಅವ್ವೆನ್ ಮಧ್ವ ಸರೋವರದ ಈಶಾನ್ಯ ಮೂಲೆಡ್ ಸುಮಾರು 50 ಅಡಿ ಎತ್ರರ 25 ಅಡಿ ಅಗಲದ ಕಲಾತ್ಮಕವಾಯಿನ ರಥದ ಮಾದರಿಡ್ ಕನಕುನ್ ಅಟ್ಟಿ ಕಟ್ಟುವೆರ್. ತುದಿಟ್ ಶಿಖರ, ಪತಾಕೆಯನ್ನಿರಿಸಾದ್ ಸಿಂಗಾರ ಮಲ್ಪುವೆರು.

ಮಠದ ಪುರೋಹಿತೆರು ನಿಗದಿ ಮಲ್ತಿನ ದಿನತ್ತಾನಿ ಕನಕ್ ದೀಪುನ ಜಾಗೆಡ್ ನಡುಗಂಬನ್ ನಡ್ದ್ ಅಯಿತ್ತ ಸಮ್ಮುಖಡ್ ಪೂಜಾ ವಿಧಿವಿಧಾನಲೆನ್ ನೆರವೇರಿಸಾವೆರ್. ಕಾಂಡೆ 7.30 ಕ್ಕ್ ಶ್ರೀಶೀರೂರು ಮಠಟ್ ನವಗ್ರಹ ಇತ್ಯಾದಿ ಪ್ರಾರ್ಥನೆದೊಟ್ಟುಡ್ ವೇದಘೋಷ, ಕೊಂಬು, ಕಹಳೆ, ವಾದ್ಯ ಬಿರುದಾವಳಿದೊಟ್ಟುಡ್ ಮತದ ಪರಿಚಾರಕೆರು, ಭಕ್ತಾದಿಲು ಕಲ್ಸಂಕದ ಲಕ್ಷ್ಮೀ ತೋಟಡ್ದ್ ಕಟ್ಟಿಗೆನ್ ಪತೊಂದ್ ಮೆರವಣಿಗೆಡ್ ಸಾಗುವೆರ್. ಬೇತೆ ಬೇತೆ ಗಣ್ಯೆರು, ವಿದ್ವಾಂಸೆರು, ದಿವಾನೆರು, ಬೊಕ್ಕ ಭಕ್ತೆರೆನ ಸಹಿತವಾದ್ ಚಂದ್ರಮೌಳೀಶ್ವರ, ಶ್ರೀಆನಂತೇಶ್ವರ, ಶ್ರೀಕೃಷ್ಣ ಮುಖ್ಯಪ್ರಾಣ ಮಧ್ಯಗುರುಕುಲೆನ ಬೊಕ್ಕ ಗರುಡನ ಸನ್ನಿಧಿಡ್ ಪ್ರಾರ್ಥನೆ ಸಲ್ಲಿಸಿ ಅಲ್ಪಡ್ದ್ ನಿಗದಿಪಡಿಸಾಯಿನ ಜಾಗೆಡ್ ಪೂಜಾದಿಲೆನ್ ಸಲ್ಲಿಸಾದ್ ಪ್ರಾರ್ಥನೆ ಮಲ್ತುದ್ ಕಟ್ಟಿಗೆ ರಥ ನಿರ್ಮಾಣ ಕಾರ್ಯೊನ್ ಪ್ರಾರಂಭ ಮಲ್ಪುವೆರ್. ಉಡುಪಿದ ಈ ಧಾರ್ಮಿಕ ಪರಂಪರೆದ ಕಲಾ ಸಂಪ್ರದಾಯ ಶ್ರೀವಾದಿರಾಜರ ಕಾಲೊಡೇ ನಡತುದ್ ಬತ್ತಿನವ್ ವಿಶೇಷ. ಈ ಕನಕುದ ರಥ ನಿರ್ಮಾಣ ಕಾರ್ಯ ಸುಮಾರು ರೂ. 20 ಲಕ್ಷದ ಖರ್ಚಿಡ್ ನೆರವೇರವೇರುಂಡ್.

ಈ ಮುಹೂರ್ತಡ್ ಪಾಲ್ ಪಡೆಯುನ ಭಕ್ತ ಜನಕ್ಲೆಗ್ ಒವ್ವಾಂಡಲಾ ಅಗ್ನಿ ದೋಷವಿತ್ತುಂಡ ಪರಿಹಾರ ಆಪುಂಡ್ ಪನ್ಪಿನ ನಂಬಿಕೆ. ಪಂಡ ಯಜ್ಞ ಯಾಗಾದಿಲೆಡ್ ಆರ್ಪಣೆ ಮಲ್ತಿನ ಹವಿರ್ಭಾಗ ಅಗ್ನಿ ಮೂಲಕ ಭಗವಂತನ್ ತಲುಪೊಡಾಂಡ ಅಗ್ನಿ ಪ್ರಜ್ವಲನಗ್ ಕನಕ್ ಎಂಚ ಉಪಯೋಗ ಆಪುಂಡಾ ಅಂಚೆನೇ ಭಕ್ತಜನಕ್ಲೆನ ಜಕರಾಗ್ನಿ ತಂಪು ಮಲ್ಪುನ ಯಜ್ಞಡ್ ಆಹಾರ ಖಾದ್ಯಲೆನ್ ತಯಾರ್ ಮಲ್ಪರೆಗ ಈ ಕನಕ್ ಉಪಯೋಗ ಆಪುಂಡ್. ಈ ಕಟ್ಟುದ ಮೂಹೂರ್ತಡ್ ಪಾಲ್ ಪಡೆಯಿನ ಭಕ್ತೆರೆನ ಜಠರಾಗ್ನಿ ಸಮಸ್ಯೆ, ಅಗ್ನಿ ದೋಷ ಇತ್ತುಂಡ ಪರಿಹಾರ ಆಪುಂಡ್ ಪನ್ಪಿನ ನಂಬಿಕೆಲಾ ಉಂಡು. ಪಿದಾಯಿದ ಅಗ್ನಿದ ಆಹಾರ ಪದಾರ್ಥಲೆನ್ ಪಕ್ಕ ಮಲ್ತುಂಡ ದೇಹದುಲಾಯಿದ ಅಗ್ನಿ ತಿಂದಿನ ತೆನಸ್ ನ್ ಪಚನಗೊಳಿಸಾದ್ ಜೀರ್ಣ ಮಲ್ಪುಂಡ್. ಈ ಅಗ್ನಿ ಪನ್ಪಿನ ಭಗವಂತತೆ ರೂಪೊನ್ ಪ್ರಜ್ವಲನೆಗ್ ಸಹಕಾರಿಯಾಯಿನ ಈ ಕನಕ್ ಸಂಗ್ರಹಣೆದ ಮುಹೂರ್ತಡ್ ಭಕ್ತಾದಿಲು ಹೆಚ್ಚಿಗೆ ಸಂಖ್ಯೆಡ್ ಪಾಲ್ ಪಡೆದ್ ಭಗವಂತನ ಕೃಪೆಕ್ ಪಾತ್ರರಾವೊಡು ಪಂಡುದ್ ನಮ್ಮ ಆಶಯ.

ಯಶಪಾಲ್ ಸುವರ್ಣ, ಮೋಹನ್ ಭಟ್, ಉದಯ ಸರಳತ್ತಾಯ,