ಮಲಬಾರ್ ಗೋಲ್ಡ್ ಆ್ಯಂಡ್ ಡೈಮಂಡ್ಸ್ ಉಡುಪಿ ಸಂಸ್ಥೆಯ ಮಲಬಾರ್ ಚಾರಿಟೇಬಲ್ ಟ್ರಸ್ಟ್ ವತಿಡ್ದ್ ಉಡುಪಿ ಜಿಲ್ಲೆದ ಸುಮಾರು 40 ಸರ್ಕಾರಿ ಬೊಕ್ಕ ಅನುದಾನಿತ ಕಾಲೇಜುಲೆನ 266 ವಿದ್ಯಾರ್ಥಿನಿಯೆರೆಗ್ 15ಲಕ್ಷ ಮೊತ್ತದ ವಿದ್ಯಾರ್ಥಿ ವೇತನನ್ ಬನ್ನಂಜೆ ಶ್ರೀನಾರಾಯಣಗುರು ಸಭಾಭವನಡ್ ವಿತರಣೆ ಮಲ್ತೆರ್.
ಕಾರ್ಯಕ್ರಮನ್ ಉದಿಪನ ಮಲ್ತುದ್ ವಿದ್ಯಾರ್ಥಿವೇತನ ವಿತರಣೆ ಮಲ್ತಿನ ರಾಜ್ಯ ಹಿಂದುಳಿದ ವರ್ಗಗಳ ಆಯೋಗದ ಅಧ್ಯಕ್ಷ ಜಯ ಪ್ರಕಾಶ್ ಹೆಗ್ಡೆ ಪಾತೆರ್ದ್, ಮಲಬಾರ್ ಗೊಲ್ಡ್ ಅರ್ಹೆರೆಗ್ ಮಾತಾ ರೀತಿಡುಲಾ ಸಹಾಯ ಕೊರೊಂದುಂಡ್. ಇಲ್ಲ್ ನಿರ್ಮಾಣ, ರೋಗಿಲೆಗ್ ಧನಸಹಾಯ, ಕೋವಿಡ್ ಸಂದರ್ಭಡ್ ಕಿಟ್ ವಿತರಣೆ ಮೂಲಕ ಸಮಾಜಗ್ ಮಾನವೀಯ ನೆಲೆಟ್ ಸ್ಪಂದಿಸಾದುಂಡ್ ಪಂಡುದು ಪಂಡೆರು.
ಸಮಾಜಡುಪ್ಪುನ ಕಟ್ಟಕಡೆತ ವ್ಯಕ್ತಿನ ಬಗೆಟುಲಾ ನಮ ಯೋಚನೆ ಮಲ್ಪೊಡ್. ಮಲಬಾರ್ ಗೋಲ್ಡ್ ಕೊರಿನ ವಿದ್ಯಾರ್ಥಿವೇತನಡಾದ್ ಭವಿಷ್ಯಡ್ ಸಾಧನೆ ಮಲ್ತುದ್ ಉನ್ನತ ಹುದ್ದೆಲೆನ್ ಪಡೆಯುನ ವಿದ್ಯಾರ್ಥಿಲು ದುಂಬಗ್ ಸಮಾಜದ ಬಗೆಟುಲಾ ಚಿಂತನೆ ಮಲ್ಪೊಡ್. ಅದಗ ಉಂದೇ ರೀತಿದ ನೆರವುದ ನಿರೀಕ್ಷೆನ್ ಸಮಾಜಲಾ ನಿಕಲ್ಡ ಮಲ್ದಿಪ್ಪುಂಡ್ ಪಂಡೆರು.
ಜೋಕ್ಲೆಡುಪ್ಪುನ ಶಕ್ತಿ, ಕೌಶಲ್ಯ ಸಮಾನತೆನ್ ಮೂಡಿಸಾವುಜಿ. ನಮ ಮಾತೆರ್ಲ ಒಂಜಾದುಪ್ಪೊಡ್ ಪನ್ಪಿನ ಬದ್ಧತೆನೇ ಜೋಕ್ಲೆಡುಪ್ಪುನ ನಿಜವಾಯಿನ ಸಮಾನತೆ ಆದುಂಡ್. ಜಾತಿ ಧರ್ಮ ಮೀರಿನ ಸಂಬಂಧನೇ ಜೋಕ್ಲೆಡ ಶಾಶ್ವತವಾದುಪ್ಪುಂಡ್. ಆ ಸಂಬಂಧ ಸಮಾಜದ ದುಂಬುದ ಪೀಳಿಗೆಗುಲಾ ಒರಿಯಡ್ ಪಂಡುದು ಆರು ಹಾರೈಸಿಯೆರು.
ಈ ಸಂದರ್ಭಡ್ ಮಲಬಾರ್ ಚಾರಿಟೇಬಲ್ ಟ್ರಸ್ಟ್ ದ ಹಸಿವು ಮುಕ್ತ ಜಗತ್ತು ಕಾರ್ಯಕ್ರಮಗ್ ಚಾಲನೆ ಕೊರಿನ ಉಡುಪಿ ಜಿಲ್ಲಾಧಿಕಾರಿ ಡಾ.ಕೆ.ವಿದ್ಯಾ ಕುಮಾರಿ ಪಾತೆರ್ದ್, ಹಸಿವು ಮುಕ್ತ ಜಗತ್ತು ಬಾರೀ ಎಡ್ಡೆ ಕಾರ್ಯಕ್ರಮ ವಾದಿತ್ತುದ್, ಉಂದೇ ರೀತಿದ ಕಾರ್ಯಕ್ರಮ ನನಲಾತ್ ಸಂಸ್ಥೆಲು ಮಲ್ತುಂಡ ಇಡೀ ಜಗತ್ತುನ್ ಬಡಾವು ಮುಕ್ತ ಮಲ್ಪೊಲಿ ಪಂಡೆರು.
ಮುಖ್ಯ ಅತಿಥಿಲಾದ್ ಉಡುಪಿ ಪದವಿ ಪೂರ್ವ ಶಿಕ್ಷಣ ಇಲಾಖೆದ ಉಪನಿರ್ದೇಶಕ ಮಾರುತಿ, ನಿವೃತ್ತ ಪ್ರಾಂಶುಪಾಲ ಡಾ.ಜೆರಾಲ್ಡ್ ಪಿಂಟೋ, ಸಮಾಜ ಸೇವಕರಾದ ಫಾರೂಕ್ ಚಂದ್ರನಗರ, ನಿತ್ಯಾನಂದ ಒಳಕಾಡು, ಹಾಸ್ಯ ಭಾಷಣಗಾರ್ತಿ ಸಂಧ್ಯಾ ಶೆಣೈ, ಉಡುಪಿ ಜಿಲ್ಲಾ ಸೌಹಾರ್ದ ಸಹಕಾರಿ ಒಕ್ಕೂಟದ ಅಧ್ಯಕ್ಷ ಅಂಪಾರು ಜಗನ್ನಾಥ ಶೆಟ್ಟಿ ಪಾತೆರಿಯೆರು.
ವೇದಿಕೆಡ್ ಮಲಬಾರ್ ಗೋಲ್ಡ್ ಉಡುಪಿ ಶಾಖಾ ಮುಖ್ಯಸ್ಥ ಹಫೀಝ್ ರೆಹಮಾನ್, ಪ್ರಾದೇಶಿಕ ಸಿಎಸ್‌ಆರ್ ಉಸ್ತುವಾರಿ ಹೈದರ್ ಕೆ.ಎ., ಪ್ರಮುಖ ರಾದ ಪುರಂದರ ತಿಂಗಳಾಯ, ರಾಘವೇಂದ್ರ ನಾಯಕ್, ತಂಝೀಮ್ ಶಿರ್ವ ಮೊಕುಲು ಉಪಸ್ಥಿತರಿತ್ತೆರು. ಕಾರ್ಯಕ್ರಮನ್ ರಾಘವೇಂದ್ರ ಕಾರ್ವಾಲು ಸ್ವಾಗತ ಮಲ್ತುದ್, ವಿಘ್ನೇಶ್ ನಿರೂಪಣೆ ಮಲ್ತುದ್ ವಂದಿಸಾಯೆರು.
by 