ಎಲ್ಯೆ ಶಾಲೆದ ಮಲ್ಲ ಮಾಸ್ಟ್ರ್ ದಿನಕರ್ ಶೆಟ್ರೆಗ್ “ಅತ್ಯುತ್ತಮ ಶಿಕ್ಷಕ” ಪ್ರಶಸ್ತಿ

ನಿಷ್ಠಾವಂತ ಸೇವೆ, ದಕ್ಷತೆ,ಜೋಕ್ಲೆನ್ ಬಾರೀ ಮೋಕೆಡ್ ತೂಪಿನವ್ವ್,ಶಾಲೆದೊಟ್ಟುಗ್ ತನ್ನ ಬದುಕುಡ್ ನಿರಂತರ ಸಮಾಜ ಸೇವೆನ್ ಮಲ್ತೊಂದ್ ಬರೊಂದುಪ್ಪುನ ಬಡಾನಿಡಿಯೂರು ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆದ ಮುಖ್ಯ ಶಿಕ್ಕಕೆರಾಯಿನ ಶ್ರೀ ದಿನಕರ ಶೆಟ್ಟಿ ಮೆರೆಗ್ “ಅತ್ಯುತ್ತಮ ಶಿಕ್ಷಕ” ಪ್ರಶಸ್ತಿ ಬೈದಿನವ್ ಬಡಾನಿಡಿಯೂರು ಗ್ರಾಮದಕಲೆಗ್ ಪೆರ್ಮೆದ ಸಂಗತಿ.

ಕಲ್ಯಾಣಪುರ ಕೆಳನೇಜಾರು ಮೂಡುತೋನ್ಸೆ ಗ್ರಾಮದ “ಕೂರಾಡಿಮನೆ” ದಿ|ಕ್ರಷ್ಣ ಶೆಟ್ಟಿ ಬೊಕ್ಕ ಶ್ರೀಮತಿ ಗುಲಾಬಿ ಶೆಟ್ಟಿ ಮೊಕ್ಲೆನ ಮಗೆ ಆಯಿನ ದಿನಕರ ಶೆಟ್ಟಿ ಮೇರ್ 1982 ಅಕ್ಟೋಬರ್ 25 ತಾರೀಕುದಾನಿ ಉದ್ಯಾವರ ವೆಸ್ಟ್ ಶಾಲೆಡ್ ಮಾಸ್ಟ್ರ್ ಆದ್ ಸೇರಿನಾರ್, ತನ್ನ ಬದುಕುದ ಉದ್ದಗುಲಾ ಶಿಕ್ಷಕ ವ್ರತ್ತಿಡೇ ಇತ್ತುದ್ ಶಾಲೆಡ್ ಜೋಕ್ಲೆಗ್ ಪಾಠ ಕಲ್ಪಾವುನ ಒಟ್ಟುಗೇ ಬದುಕುದ ಪಾಠಲಾ ಕಲ್ಪಾದ್ ಕೊರೊಂದುಲ್ಲೆರ್.
ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ದೊಡ್ಡಣಗುಡ್ಡೆ,ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಉಪ್ಪೂರು,ಸ.ಹಿ.ಪ್ರಾ.ಶಾಲೆ ಉಡುಪಿ ನಾರ್ತ್ , ಸ.ಹಿ.ಪ್ರಾ.ಶಾಲೆ ಕುಕ್ಕೆಹಳ್ಳಿ ಬೊಕ್ಕ 4.2.2011 ತಾರೀಕುದಾನಿ ಬಡಾನಿಡಿಯೂರು ಶಾಲೆಡ್ ಮುಖ್ಯ ಶಿಕ್ಷಕೆರಾದ್ ಸೇವೆ ಮಲ್ಪರೆಗ್ ಸುರು ಮಲ್ತೆರ್.
39 ವರ್ಷ ಸೇವೆ ಮಲ್ತೊಂದ್ ಬರೊಂದುಪ್ಪುನ ದಿನಕರ ಶೆಟ್ರು ಜನಪ್ರತಿನಿಧಿಲು ಬೊಕ್ಕ ಊರುದ ದಾನಿಲೆನ ನೆರವುಡ್ ಶಾಲೆಗ್ ಮೂಲಭೂತ ಸೌಕರ್ಯದ ವ್ಯವಸ್ಥೆ ಬೊಕ್ಕ ಶಾಲೆ ಜೋಕ್ಲೆಗ್ ಶಾಲೆಗ್ ಬರ್ರೆಗ್ ವಾಹನದ ವ್ಯವಸ್ಥೆನ್ ಮಲ್ತ್ ಕೊರ್ತೆರ್.

ಗ್ರಾಮದ ಒವ್ವೇ ಸಂಘ ಸಂಸ್ಥೆದಕುಲ್ ನಡಪಾವುನ ಕಜ್ಜೊಲೆಡ್ ತನ್ನ ಇಷ್ಟೊಡ್ ಪಾಲ್ ಪಡೆದ್ ಬೇಲೆ ಮಲ್ಪುನಾರ್ ಮೇರ್.ಊರುಡ್ ಏರೇ ಒವ್ವೇ ರೀತಿದ ಸಹಕಾರ ಕೇಂಡೆರೆಡ ಉಡಲ್ ದಿಂಜಿದ್ ಮಲ್ಪುನಾರ್ ಮೇರ್.ಶಾಲೆ ಜೋಕ್ಲೆಗ್ ಪಾಠ ಕಲ್ಪಾವುನೊಟ್ಟುಗ್ ತುಳು ಸಂಸ್ಕ್ರತಿ,ಸಂಪ್ರದಾಯದ ಬಗ್ಗೆ ತೆರಿಪಾವುನ ಬೇಲೆಲಾ ಮಲ್ತೊಂದುಲ್ಲೆರ್. ಶಾಲೆದ ವಾರ್ಷಿಕೋತ್ಸವ  ಪೊರ್ತುಡ್   ತಾನೇ ಸ್ವತಃ ಮುತುವರ್ಜಿ ದೆತೊಂದ್ ಕಜ್ಜೊನ್ ಪೊರ್ಲುಡೇ ಮಲ್ಪುವೆರ್.ಜೋಕ್ಲೆಗ್ ತಾನೇ ಡ್ಯಾನ್ಸ್ ಕಲ್ಪಾದ್ ಕೊರ್ಪೆರ್.ಊರುದ ದೇವಸ್ಥಾನ ಸನ್ಯಾಸಿಮಠ ದುರ್ಗಾ ಪರರ್ಮೇಶ್ವರಿ ದೇವಸ್ಥಾನೊಡ್ ಪ್ರತೀವರ್ಷ ನಡಪುನ ಮಾರ್ಣಮಿ ಉಚ್ಚಯದ ಸಾಂಸ್ಕ್ರತಿಕ ಕಜ್ಜೊಡ್ ತನ್ನ ಶಾಲೆದ ಜೋಕ್ಲೆಡ ಸಾಂಸ್ಕ್ರತಿಕ ಕಾರ್ಯಕ್ರಮೊನ್ ಮಲ್ಪುವೆರ್. ಸಾಂಸ್ಕ್ರತಿಕ ಕಜ್ಜೊಲ್ ಉಡುಪಿಡ್ ಒಲ್ಪನೇ ನಡಪಡ್ ಅಲ್ಪ ನಡಪುನಂಚಿನ ಪಂತೊಲೆಡ್ ತನ್ನ ಶಾಲೆದ ಜೋಕ್ಲೆನ್ ಪಾಲ್ ಪಡೆಯೆರೆಗ್ ತಾನೇ ತಯಾರ್ ಮಲ್ಪುವೆರ್.ಜೋಕ್ಲೆನ್ ತನ್ನ ಖರ್ಚಿಡೆ ದೂರದ ಊರುಗ್ ಲೆಸೊಂದ್ ಪೋಪೆರ್.ಶಾಲೆದ ಜೋಕ್ಲೆಗ್ ಉಷಾರಿಜ್ಜಿಡಲಾ ಅಕ್ಲೆಗ್ ತಾನೇ ಮರ್ದ್ ಕನತ್ ಕೊರ್ದ್ ಅಕ್ಲೆನ ಆರೋಗ್ಯದ ಬಗ್ಗೆ ಎಡ್ಡೆ ಕಾಳಜಿ ದೆತೊನುವೆರ್.

ಮೆರೆನ ಸೇವೆನ್ ಮೆಚ್ಚಿದ್ 2001ಡ್ ಜನ ಮೆಚ್ಚಿನ ಶಿಕ್ಷಕ ಪ್ರಶಸ್ತಿ, 2008ಡ್ ಜೇಸಿಸ್ ಕಲ್ಯಾಣಪುರ ಮೊಕ್ಲೆಡ್ದ್ ಉತ್ತಮ ಶಿಕ್ಷಕ ಪ್ರಶಸ್ತಿ,2012ಡ್ ಕರಾವಳಿ ಯುವಕ ಮಂಡಲ ಬಡಾನಿಡಿಯೂರು ಉತ್ತಮ ಶಿಕ್ಷಕ ಪ್ರಶಸ್ತಿ,2013ಡ್ ರೋಟರಿ ಕ್ಲಬ್ ದಕ್ಲೆನ ಉತ್ತಮ ಶಿಕ್ಷಕ ಪ್ರಶಸ್ತಿ,ಸಿಕ್ಕುದುಂಡ್.

ಮೆರೆನ ಶಿಕ್ಷಣ ವ್ರತ್ತಿದೊಟ್ಟುಗ್ ಸಾಮಾಜಿಕ ಕಳಕಳಿ ಅಂಚೆನೇ ಕಾರ್ಯಕ್ಷಮತೆನ್ ಮೆಚ್ಚಿದ್ ಈ ಸರ್ತಿದ ಉಡುಪಿ ಜಿಲ್ಲಾ “ಅತ್ಯುತ್ತಮ ಶಿಕ್ಷಕ” ಪ್ರಶಸ್ತಿ ಮೆರೆನ ಪಾಲ್ಗ್ ಬೈದಿನವ್ವ್ ನಿಜವಾದುಲಾ ಅರೆಗ್ ಸಂದೊಡಾಯಿನವ್ವ್.ನನಲಾತ್ ಪ್ರಶಸ್ತಿಲು ಮೆರೆನ ಪಾಲುಗ್ ಬರಡ್ ಪಂಡುದ್ ಬಯಕುಗ.

ದಿನಕರ ಶೆಟ್ಟಿ ಮೆರೆನ ಬುಡೆದಿ ಶ್ರೀಮತಿ ಜ್ಯೋತಿ ಶೆಟ್ಟಿ ಬೊಕ್ಕ ಕು.ದಿವ್ಯಾ ಶೆಟ್ಟಿ(ಅಂತಿಮ ಬಿ.ಇ. ನಿಟ್ಟೆ ಕಾಲೇಜು)