ಬದುಕುದ ಮೂಲೆ ಮೂಲೆಡುಲಾ ಅವಲೋಕನ: ಸಿರಿ ಪಂಡ…

ಅಂತರಾಷ್ಟ್ರೀಯ ಮಹಿಳಾ ದಿನ ಮಾತೆರುಗುಲಾ ಮಹಿಳಾ ದಿನದ ಶುಭಾಶಯೊಲು.

ಭಗವಂತನ ಸೃಷ್ಟಿದ ಅತ್ಯದ್ಭುತ ರಚನೆಡ್ ಒಂಜಾಯಿನ ಪೊಣ್ಣು ಜೀವನದ ಮೂಲ. ಸೃಷ್ಟಿದ ಕಾರ್ಯೊಲೆಡ್ ಬಾರೀ ಮುಖ್ಯ ಪಾತ್ರ. ಒವ್ವೇ ಜೀವಂತ ಪ್ರಾಣಿ ಉಪ್ಪಡ್ ಮನುಷ್ಯೆ ಪಶು ಪಕ್ಷಿ ಜನ್ಮ ಕೊರ್ಪಿನಾಲ್ ಮಾತ್ರ ಅಪ್ಪೆನೇ. ಅಂಚಾದ್ ಸೃಷ್ಟಿದ ಅವಿಚ್ಛಿನ್ನ ಅಂಗ ಅಂಗನೆ. ಸೃಜನಾತ್ಮಕತೆದ ಸಾಗರ ಪೊಣ್ಣು.

ಪೊಣ್ಣು ಜೋಕುಲು ಶಕ್ತಿದ ಸ್ವರೂಪ ಅಕ್ಲೆಡ ಅಗಾಧವಾಯಿನ ಶಕ್ತಿದ ಗುಣೊಕುಲೆನ ತೂವೊಲಿ. ದೈಹಿಕ ರಚನೆ ಆನುಲೆಡ್ದ್ ಭಿನ್ನವಾದುಪ್ಪುಂಡ್. ಆಲು ಅಶಕ್ತೆಲು ಪಂಡುದ್ ತೋಜಿಂಡಲಾ ಭಗವಂತೆ ಅಲೆನ ಮನಸ್ಸುನ್ ಮಸ್ತ್ ಸದೃಢವಾದ್ ಮಲ್ರುದೆ. ಒಂಜೇ ಕ್ಷಣೊಟ್ ಕಣ್ಣುಡ್ ನೀರು ಬತ್ತುಂಡಲಾ ಕುಡೊಂಜಿ ಕ್ಷಣೊಟ್ ಎಚ್ಚರಿಗೆ ಮಲ್ತೊಂದ್ ಕರ್ತವ್ಯ ನಿರ್ವಹಣೆ ಮಲ್ಪುವೊಲು.

ಮಗಳಾದ್ ಅಪ್ಪೆ -ಅಮ್ಮೆರೆನ ಗೌರವೊನ್ ಕಾಪುನೊಟ್ಟುಗ್ ಮಗನ ಜಾಗೆಡ್ ಉಂತುವೊಲು. ಮಾಮಿಲ್ಲಡ್ ಇತ್ತುಂಡಲಾ ಅಪ್ಪೆ ಅಮ್ಮೆನ ಕಷ್ಟದ ಪೊರ್ತುಡ್ ಸಹಕಾರಿಯಾಪೊಲು. ಮೆಗ್ದಿ -ಪಲಿಯಾದ್ ಸಹೋದದರಿಗಾದ್ ತ್ಯಾಗ ಮಲ್ಪುವೊಲು. ರಡ್ಡನೇತ ಅಪ್ಪೆಯಾದ್ ಕಾಪುವೊಲು. ಬುಡೆದಿಯಾದ್ ಬತ್ತುದ್ ದೋಸ್ತಿಯಾದ್,, ಸಹಧರ್ಮಿಣಿಯಾದ್ ಕಷ್ಟ ಸುಖೊಟ್ ಪಾಲ್ ದೆತೊನುವೊಲು.

ಇಂಚ ಬೇತೆ ಬೇತೆ ರೀತಿಡ್ ಇಲ್ಲದ ಸಂಸಾರದ ಕಣ್ಣಾದ್ ಬದುಕುನ ಪೊಣ್ಣು. ಪೊಣ್ಣು ಉಪ್ಪಂದಿನ ಇಲ್ಲ್ ಅವ್ವ್ ಇಲ್ಲೇ ಅತ್ತ್.

ಪೊಣ್ಣು ಪಂಡ ಮಮತೆದ ಮಡಿಲು

ಪೊಣ್ಣು ಪಂಡ ಪ್ರೀತಿದ ಹೊನಲು

ಪೊಣ್ಣು ಪಂಡ ಚೈತನ್ಯದ ಚಿಲುಮೆ

ಪೊಣ್ಣು ಪಂಡ. ತಾಳ್ಮೆದ ಕುಲುಮೆ

ಪೊಣ್ಣು ಸ್ಪೂರ್ತಿದ ಕಡಲು

ಪೊಣ್ಣು ಜೀವಂತಿಕೆದ ಮುಗಿಲು

ಪೊಣ್ಣು ಸುಂದರ ಚುಂಬಕ ಶಕ್ತಿ

ಪೊಣ್ಣು ಅದ್ಭುತ ಪ್ರೇರಕ ಶಕ್ತಿ

ಜಿ ಎಸ್‌ ಶಿವ ರುದ್ರಪ್ಪೆರ್ ಪನ್ಪಿಲೆಕ್ಕ ಪೊಣ್ಣು ಪಂಡ ಆತೇ ಯಾವಾ….. ಆಲೊರ್ತೀ ಅದ್ಭುತ ಕೋಶ ಲಲನೆ , ಮಾನಿನಿ , ಮಹಿಳೆ ಅಂಗನೆ ಸ್ತ್ರೀ, ಪೊಣ್ಣು ಒಂಜೊಂಜಿ ಸಂದರ್ಭಗ್ ಲಾ ಒಂಜೊಂಜಿ ರೀತಿಯಾದುಪ್ಪುವೊಲು ಪಂಡುದ್ ಕವಿಕುಲು ಜ್ಞಾನಿಲು ಪುಗಾರೊಂದ್ ಬೈದೆರ್ .ಸಾಮಾನ್ಯವಾದ್ ಲೋಕೊಡ್ ಪೊಣ್ಣು ನಿಗೂಢ ಪನ್ಬಿನ ಪಾತೆರ ಉಂಡು. ಆಂಡ ಪೊಣ್ಣು ಪೆಲಕಾಯಿದಲೆಕ್ಕ ಗಂಟು ಗಂಟಾದ್ ತೋಜಿಯೊಲುಡಲಾ ಉಡಲುಡ್ ಪ್ರೀತಿ ಸ್ನೇಹ ಮಮತೆ ಕರುಣೆ ಇಂಚಿತ್ತಿನ ಮೆದು ಭಾವನೆನ್ ದೀಯೊಂದಿನಾಲೇ ಪೊಣ್ಣು .ಇಲ್ಲ್ ಮನಸ್ಸುನ್ ಸ್ವರ್ಗ ಮಲ್ಪುನಾಲೇ ಪೊಣ್ಣು ಆಲೇ ಸಿರಿ….

ಒಟ್ಟಾದ್ ಪನೊಡಾಂಡ ಸಿರಿ ಪಂಡ ಆಯಿನಾತ್ ಎಡ್ಡೆ ಗುಣೊಕುಲೆನ್ , ಬೆಟ್ಟದಾತ್ ಭಾವನೆಲೆನ್ , ಶಕ್ತಿನ್, ಆಸೆಲೆನ್ ತುಂಬೊಂದಿನ ಅದ್ಭುತ ಜೀವ…

✍????ಕೆ. ನವೀನ್ ಐತಾಳ್