ಢಢನಮ್ಮ ತುಳುವೆರ್ ಪರಸ್ಪರ ಕುಟುಂಬ ಸಂಸಾರೊನ್ ಒಟ್ಟು ಸೇರಾವುನ ತಿಂಗೊಲೇ ಆಟಿ ತಿಂಗೊಲು.ಅಪ್ಪೆ ತಾಂಕಿನ ಸಮಾಜ ನಮ್ಮ ತುಳುವೆರ್.ತುಳುವೆರೆನ ಕೂಡು ಬದುಕ್ ಸಂಸ್ಕಾರ ಈ ಸಮಾಜೊಗ್ ಒಂಜಿ ಎಡ್ಡೆ ಸಂದೇಶ ಕೊರ್ಪುಂಡ್.ಪಂಡುದ್ ನಿವ್ರತ್ತ ಪ್ರಾಂಶುಪಾಲೆರಾಯಿನ ವಿ.ಕೆ.ಯಾದವ್ ಪಂಡೆರ್.ಆರು ತುಳುಕೂಟ ಉಡುಪಿ ಬೊಕ್ಕ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಒತ್ತು ಸೇರಿಗೆ ಡ್ ಉಡುಪಿದ ಜಗನ್ನಾಥ ಸಭಾಭವನಡ್ ನಡತಿನ ಆಟಿದ ತಿರ್ಲ್ -2026 ಕಜ್ಜೊಡ್ ಮಲ್ಲ ಬಿನ್ನೆರಾದ್ ಆಟಿದ ಮದಿಪು ಕೊರಿಯೆರ್.ನಮ್ಮ ಪೆರಿಯಕುಲು ಮರಿಯಾ ಲಗ್ ಬೋಡಾಪಿನ ತೆನಸುಲೆನ್ ತಯಾರ್ ಮಲ್ತ್ ದೀಯೊಂದಿತ್ತೆರ್.ಅಂಚೆನೇ ಆಟಿಡ್ ತನ್ನ ಸುತ್ತಮುತ್ತಲುಡ್ ತಿಕ್ಕೊಂದಿತ್ತಿನ ತಪ್ಪು ತರಕಾರಿಲೆಡ್ ಆರೋಗ್ಯ ವರ್ಧಕ ಬೊಕ್ಕ ರೋಗನಿರೋಧಕ ತೆನಸುಲೆನ್ ತಯಾರ್ ಮಲ್ತುದ್ ತಿನೊಂದಿತ್ತೆರ್.ಆಟಿಡ್ ಬಚ್ಚೆಲ್ ದೆಪ್ಪರೆಗ್ ಚೆನ್ನೆಮಣೆ ಗೊಬ್ಬೊಂದಿತ್ತೆರ್.ಆಟಿದ ಅಮಾಸೆದಾನಿ ಸಾರಬಗೆತ್ತ ಮರ್ದುದ ಅಂಶ ಉಪ್ಪುನ ಪಾಲೆದ ಕೆತ್ತೆದ ಕಷಾಯ ಪರ್ದ್ ಮೆಂತೆದ ಗಂಜಿ ವನಸ್ ಮಲ್ತೊಂದಿತ್ತೆರ್.ಇಂಚ ಬಂಗದ ದಿನೊಕ್ಲೆನ್ ನಮ್ಮ ಪೆರಿಯಕುಲು ತನ್ನ ಗೇನೊನ್ ಗಲಸೊಂದ್ ಬದುಕ್ ನಡಪಾವೊಂದಿತ್ತೆರ್ ಪಂಡುದ್ ಆರ್ ಪಂಡೆರ್.ಸಮಾಜಸೇವಕಿ ಅಮ್ರತಾ ಟಿ.ಶೆಟ್ಟಿ ತುಡರ್ ಅರ್ಲಾದ್ ಕಾರ್ಯಕ್ರಮಗ್ ಚಾಲನೆ ಕೊರ್ದು ಎಡ್ಡೆಪ್ಪು ಬಯಕಿಯೆರ್.
ಕಜ್ಜೊಡ್ ಗುರ್ಕಾರ್ಮೆಡಿತ್ತಿನ ತುಳುಕೂಟದ ಗುರ್ಕಾರೆರಾಯಿನ ಶ್ರೀ ಜಯಕರ ಶೆಟ್ಟಿ ಇಂದ್ರಾಳಿ ಪಾತೆರ್ದ್ ತುಳು ಬಾಸೆ, ಸಂಸ್ಕೃತಿ, ಸಂಪ್ರದಾಯೊಲೆನ್ ಒರಿಪಾದ್ ಬುಲೆಪಾವುನವ್ವ್ ತುಳುವೆರಾಯಿನ ನಮ್ಮ ಕರ್ತವ್ಯ. ಆ ನಿಟ್ಟುಡ್ ತುಳುಕೂಟ ನಿರಂತರವಾದ್ ಬೇಲೆ ಮಲ್ತೊಂದುಂಡ್ ಪಂಡೆರ್
ಪೆದ್ಮೆದಿ ಮರ್ದ್ ಅಡ್ಪುನೇಟ್ ಬಿರ್ಸೆರಾಯಿನ ಲೀಲಾವತಿ ಬೊಕ್ಕ ಪುಷ್ಪಾ ಮೊಕ್ಲೆನ್ ತುಳುಕೂಟದ ವತಿಡ್ದ್ ಮಾನಾದಾಗೆ ಮಲ್ತೆರ್.
ಅಟಿದ ತಿರ್ಲ್ ದ ಸಂಚಾಲಕಿ ಶ್ರೀಮತಿ ವಂದನಾ ವಿಶ್ವನಾಥ್ ಬತ್ತಿ ಬಿನ್ನೆರೆನ್ ಎದ್ಕೊಂಡೆರು, ತುಳುಕೂಟದ ಒತ್ತು ಗುರ್ಕಾರೆರಾಯಿನ ಶ್ರೀ ದಿವಾಕರ್ ಸನಿಲ್ ಸೊಲ್ಮೆ ಸಂದಾಯ್ತ ಮಲ್ತೆರು.ಒತ್ತು ಗುರ್ಕಾರೆ ಭುವನ ಪ್ರಸಾದ್ ಹೆಗ್ಡೆ ಬೊಕ್ಕ ಶೋಭಾ ಶೆಟ್ಟಿ ಮತ್ತರ್ಮೆಡ್ ಉಪಸ್ಥಿತರಿತ್ತೆರು.ಮಾಧ್ಯಮ ಸಂಚಾಲಕಿ ಶ್ರೀಮತಿ ಯಶೋದಾ ಕೇಶವ್ ಕಜ್ಜೊದ ನಿರೂಪಣೆ ಮಲ್ತೆರು.ಒತ್ತು ಕಾರ್ಯಂತೆದಿ ಜ್ಯೋತಿ ಎಸ್.ದೇವಾಡಿಗ ಸುಗಿತೆರ್.ಸಭಾ ಕಜ್ಜೊ ಆಯಿಬೊಕ್ಕ ತುಳುಕೂಟದ ಪೊಂಜೊವುನಕುಲು ಇಲ್ಲಡೇ ತಯಾರ್ ಮಲ್ತ್ ಕನದಿನ 34 ಬಗೆತ್ತ ಅಟ್ಟಿಲ್ ನ್ ಬತ್ತಿ ಬಿನ್ನೆರೆಗ್ ಬಲಸಿಯೆರ್.
by 