ಸೆ.19 ಗ್ ಬಸ್ರೂರು ಡ್ ತುಳುವೇಶ್ವರಗ್ ಜ್ಯೋತಿರ್ಲಿಂಗ ತೀರ್ಥಾಭಿಷೇಕ.

ಸೆಪ್ಟೆಂಬರ್ 19ಗ್  ಬಸ್ರೂರುಡ್  ಶ್ರೀ ತುಳುವೇಶ್ವರಗ್ ದ್ವಾದಶ ಜ್ಯೋತಿರ್ಲಿಂಗ ತೀರ್ಥಾಭಿಷೇಕ

ಬಸ್ರೂರು: ಬಸ್ರೂರು ಶ್ರೀ ತುಳುವೇಶ್ವರ ದೇವಸ್ಥಾನದ ತುಳುವೇಶ್ವರಿ ಮೂಲದೇವಿನ  ಅಷ್ಟಮಂಗಲ ಪ್ರಶ್ನೆ ಚಿಂತನೆದ ಅಂಗವಾದ್  ಸೆಪ್ಟೆಂಬರ್ 19 ಬೊಕ್ಕ 20ತಾರೀಕುಗ್ ಧಾರ್ಮಿಕ ಕಾರ್ಯಕ್ರಮೊಲು ನಡಪರೆಗುಂಡ್.. ನೆತ್ತ ಅಂಗವಾದ್ ಸೆಪ್ಟೆಂಬರ್ 19ಗ್  ಕಾಂಡೆ 9ಡ್ದ್  10 ಗಂಟೆಮುಟ್ಟ  ಶ್ರೀ ತುಳುವೇಶ್ವರಗ್  ದ್ವಾದಶ ಜ್ಯೋತಿರ್ಲಿಂಗದ ಪವಿತ್ರ ತೀರ್ಥಜಲಡ್ದ್ ವಿಶೇಷ ತೀರ್ಥಾಭಿಷೇಕ ನಡಪರೆಗುಂಡ್..

ತುಳುವರ್ಲ್ಡ್ ಫೌಂಡೇಶನ್ ಸದಸ್ಯೆರಾಯಿನ ನಿತಿನ್ ಪೂಜಾರಿ, ಅಜಯ್ ದೇವಾಡಿಗ, ರಿತೇಶ್ ಬೊಕ್ಕ ಬಸಂತ್ ನಾಲ್ವೆರು ಯುವಕೆರು ಸುಮಾರು 48 ದಿನ  ಕಾಲ ತನ್ನನೇ ವಾಹನಡ್ ದ್ವಾದಶ ಜ್ಯೋತಿರ್ಲಿಂಗ ಕ್ಷೇತ್ರಗಳ ಯಾತ್ರೆ ಮಲ್ತುದ್, ಮಾತಾ ಜ್ಯೋತಿರ್ಲಿಂಗದ ದರ್ಶನ ಪಡೆತುದು ಪವಿತ್ರ ತೀರ್ಥಜಲೊನ್ ಸಂಗ್ರಹ ಮಲ್ತುದ್ ಬಸ್ರೂರುಗ್  ಕನತುದೆರ್.. ಈ ತೀರ್ಥಜಲೊನ್ ಶ್ರೀ ತುಳುವೇಶ್ವರಗ್ ಅಭಿಷೇಕದ ಮೂಲಕ ಸಮರ್ಪಣೆ ಮಲ್ಪುಂಡ್..

ವಿಶೇಷ ತೀರ್ಥಾಭಿಷೇಕನ್  ನೀಲೇಶ್ವರದ ತಂತ್ರಿಲಾಯಿನ ಅರವತ್ತ್ ಬ್ರಹ್ಮಶ್ರೀ ಪದ್ಮನಾಭ ತಂತ್ರಿಲು ನೆರವೇರಿಸಾವರೆಗುಲ್ಲೆರ್. ತೀರ್ಥಾಭಿಷೇಕಡ್ ಬೊಕ್ಕ ತುಳುವೇಶ್ವರಿ ಮೂಲದೇವಿನ ಅಷ್ಟಮಂಗಲ ಪ್ರಶ್ನೆ ಚಿಂತನೆ ನಡಪರೆಗುಂಡ್.

“ಶ್ರೀ ತುಳುವೇಶ್ವರನ ದರ್ಶನ ಮಲ್ತುಂಡ ದ್ವಾದಶ ಜ್ಯೋತಿರ್ಲಿಂಗದ  ದರ್ಶನದ ಫಲ ತಿಕ್ಕುಂಡ್ ಪನ್ಪಿನ  ಭಕ್ತಿದ ನಂಬಿಕೆದ  ಹಿನ್ನೆಲೆಡ್  ಈ ವಿಶೇಷ ತೀರ್ಥಾಭಿಷೇಕನ್ ಆಯೋಜನೆ ಮಲ್ದುಂಡ್.. ಒಂಜೇ  ಸಾನಿಧ್ಯಡ್ ದ್ವಾದಶ ಜ್ಯೋತಿರ್ಲಿಂಗದ  ಪವಿತ್ರ ತೀರ್ಥಸಂಗಮ ನಡತೊಂದುಪ್ಪುನ್ ಕಾರ್ಯಕ್ರಮದ ವಿಶೇಷತೆಯಾದುಂಡ್..

ಈ  ಸಂದರ್ಭಡ್ ತುಳುನಾಡುದ ಭಾಷೆ, ಸಂಸ್ಕೃತಿ ಬೊಕ್ಕ ಧಾರ್ಮಿಕ ಪರಂಪರೆದ  ಬೆಳವಣಿಗೆಲಾ  ಮಹತ್ವ ಪಡೆದುಂಡ್. ಸೆಪ್ಟೆಂಬರ್ 18ಗ್  ಮಂಗಳೂರುಡ್ ನಡಪರೆಗುಪ್ಪುನ ಸಚಿವ ಸಂಪುಟ ಸಭೆ, ಅಂಜಾರು ರಾಮಣ್ಣ ಹೆಗ್ಡೆ ಬೊಕ್ಕ ಎಸ್.ಯು. ಪಣಿಯಾಡಿ ಅರೆನ  ತುಳುವ ಚಳುವಳಿದ ಶತಮಾನೋತ್ಸವ, ಸೆಪ್ಟೆಂಬರ್ 23ಡ್ದ್  ನಡಪರೆಗುಪ್ಪುನ ತುಳುವ ಮಹಾಸಭೆತ್ತ  99ನೇ ವರ್ಷಾಚರಣೆ ಬೊಕ್ಕ 19 ರಾಷ್ಟ್ರಲೆಡ್  ತುಳುವ ಮಹಾಸಭೆತ್ತ ಕಾರ್ಯವ್ಯಾಪ್ತಿ ವಿಸ್ತರಿಸಾದಿನ  ತುಳು ನುಡಿ ಬೊಕ್ಕ ಸಂಸ್ಕೃತಿದ ಪುನರ್‌ವೈಭವದ ವ್ಯಾಪ್ತಿನ್ ತೋಜಾವುಂಡ್. ಈ ಹಿನ್ನೆಲೆಡ್ ಬಸ್ರೂರು ಶ್ರೀ ತುಳುವೇಶ್ವರ–ತುಳುವೇಶ್ವರಿ ಸಾನಿಧ್ಯದ ಮಹತ್ವಲಾ  ಕುಡಲಾತ್ ಗಮನ ಸೆಳೆಯುಂಡ್.

ಸಮಸ್ತ ತುಳುನಾಡುದ ಜನಕುಲು ಬೊಕ್ಕ ಶ್ರೀ ತುಳುವೇಶ್ವರ–ತುಳುವೇಶ್ವರಿ ಭಕ್ತೆರು ಸೆಪ್ಟೆಂಬರ್ 19ಗ್ ಬಸ್ರೂರುಗ್  ಬತ್ತುದ್  ದ್ವಾದಶ ಜ್ಯೋತಿರ್ಲಿಂಗ ತೀರ್ಥಾಭಿಷೇಕಡ್  ಬೊಕ್ಕ ನಡಪುನ ಅಷ್ಟಮಂಗಲ ಪ್ರಶ್ನೆ ಚಿಂತನೆಡ್  ಪಾಲ್ ಪಡೆಯೊಡ್ ಪಂಡುದ್  ತುಳುವರ್ಲ್ಡ್ ಫೌಂಡೇಶನ್ ನಿರ್ದೇಶಕ ಡಾ. ರಾಜೇಶ್ ಕೃಷ್ಣ ಆಳ್ವ ಮನವಿ ಮಲ್ದೆರ್..