ದುರ್ಗ ದುರ್ಗನೆ ಅಪ್ಪೆ ದುರ್ಗೆನೆ

*ದುರ್ಗ ದುರ್ಗನೆ, ಅಪ್ಪೆ ದುರ್ಗೆನೆ*

ಮಿತ್ತ ಬಾನೊದ ದೊರಿಪಿ ಬರ್ಸೋ
ತಿರ್ತ ತೋಡುಡು ಪರಿಪಿ ನೀರ್
ಏರೆಗೇರೆಗ್ ಏಪೊಗೇಪೊಗು ಏರ್ ತೆರಿದುಲ್ಲಾ?
ದುರ್ಗ ದುರ್ಗನೆ, ಅಪ್ಪೆ ದುರ್ಗೆನೆ ಕೊರ್ದು ಕಾಪುವೆರ್

ಪಂಚ ವರ್ಣೊದ ಪುಡೆಮಿ ಮಣ್ಣ್
ಪಾಂತೆ ಪೂಕುಲು ಸಾರೊ ಬಣ್ಣೊ
ಏರೆನಾಟೊದ ಚೌಕಿದುಲಯಿ ಏಸ ಪಾಡೊಂಡು?
ದುರ್ಗ ದುರ್ಗನೆ, ಅಪ್ಪೆ ದುರ್ಗೆನೆ ಬಣ್ಣ ಕಲಪುವೆರ್

ಕಂಜಿ ಕೆರ್ಂದೆಲ್ ಎಂಚ ನಾಡುಂಡು
ಪುಚ್ಚೆ ಉರ್ಚಿದ್ ಮಣ್ಣ್ ಮುಚ್ಚುಂಡು
ಏರ್ ಕಲ್ಪದೆರೇರ್ ತೆರಿಪದೆರೇರ್ ವಾ ಕಾಲ?
ದುರ್ಗ ದುರ್ಗನೆ, ಅಪ್ಪೆ ದುರ್ಗೆನೆ ನೆತ್ತಿ ಪೂಜಿಬೆರ್

ಚೀಪೆ ಪುಳಿ ಕಾರ ವಾ… ಕಣೆರ್ ಕಯ್ಪೆ
ಉಪ್ಪು ಉಂಡು ಆ ಕಡಲ ಕರೆಟೆ
ಜೂವೊ ಸಂಕುಲನೊರಿಪಿನಂಚೊ ಏರೆ ಸಂಕಲ್ಪೊ?
ದುರ್ಗ ದುರ್ಗನೆ, ಅಪ್ಪೆ ದುರ್ಗೆನೆ ನುಪ್ಪುಗೊದಗುವೆರ್

ಒಜ್ಜಿ ಒಜ್ಜಿದೇ ಕಲ್ತ ಅಚ್ಚರ
ಬಚ್ಚಿ ಬಚ್ಚಿದೇ ಮಿತ್ತ ಅಂತರ
ಅಂಚ ಆವೊಡು ಇಂಚ ಇಪ್ಪೊಡು  ಆವ ಎನ್ನಿಲೆಕಾ?
ದುರ್ಗ ದುರ್ಗನೆ, ಅಪ್ಪೆ ದುರ್ಗೆನೆ ಪಡಿನ್ ಪಟ್ಟ್‌ಬೆರ್
*//*
*ಅಶೋಕ ಎನ್ ಕಡೇಶಿವಾಲಯ*
ತುಲುವೆರೆ ಕಲ (ರಿ)