25 ಗಂಟೆ ನಿರಂತರ ದಾಸ ಕೀರ್ತನೆ

25 ಗಂಟೆ ನಿರಂತರ ದಾಸಕೀರ್ತನೆ ಗಾಯನ

ವಿಶ್ವದಾಖಲೆ ಮಲ್ತಿನ ವಿದುಷಿ ಸಂಗೀತ ಬಾಲಚಂದ್ರರೆಗ್ ‘ಗೀತಾ ಗಂಗೋತ್ರಿ’ ಮಾನಾದಿಗೆ

ಉಡುಪಿ, ಆಗಸ್ಟ್ 24:

ಉಡುಪಿದ ಶ್ರೀಕೃಷ್ಣನ ದಿವ್ಯ ಸನ್ನಿಧಿಡ್  ಸತತ 25 ಗಂಟೆ ಕಾಲ ನಿರಂತರವಾದ್  ದಾಸೆರೆನ ಕೀರ್ತನೆಲೆನ್  ಗಾಯನ ಮಲ್ಪುನ ಮೂಲಕ ಸಂಗೀತ ವಿದುಷಿ ಸಂಗೀತ ಬಾಲಚಂದ್ರ ಮೇರ್ ವಿಶ್ವದಾಖಲೆ ನಿರ್ಮಾಣ ಮಲ್ದೆರ್.. ಶ್ರೀಕೃಷ್ಣನ ಸನ್ನಿಧಿಡ್ ಹರಿನಾಮ ಸಂಕೀರ್ತನೆದ ಮೂಲಕ ಮೂಡ್ದ್ ಬತ್ತಿನ ಈ ಅಪೂರ್ವ ಸಂಗೀತ ಸಾಧನೆ ಉಡುಪಿದ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಇತಿಹಾಸಡ್ ಪೊಸ ಅಧ್ಯಾಯನ್ ದಾಖಲೆ ಮಲ್ದುಂಡ್.

ಐತಾರ ಕಾಂಡೆ  6.30ಕ್  ಶ್ರೀ ಪುತ್ತಿಗೆ ಮಠದ ಭಗವದ್ಗೀತಾ ಮಂದಿರದ ಶ್ರೀಪುತ್ತಿಗೆ ನೃಸಿಂಹ ಸಭಾಭವನಡ್ ಆರಂಭ ಆಯಿನ ಸಂಗೀತ ಬಾಲಚಂದ್ರ ಅರೆನ ನಿರಂತರ ದಾಸವಾಣಿ ಗಾಯನ ಸೋಮವಾರ ಕಾಂಡೆ ಸುಮಾರು 7.40ಗ್ ಮಂಗಳ ಆಂಡ್.. ಅಕೇರಿಗ್  ‘ಕೃಷ್ಣ ಏನ ಬಾರದೆ’  ದಾಸರ ಪದೊನ್ ಭಕ್ತಿಭಾವಡ್  ಪಂಡಿನ ಆರು ತನ್ನ 25 ಗಂಟೆದ ಕಂಠಸಿರಿನ್ ಉಡುಪಿದ ಶ್ರೀಕೃಷ್ಣ–ಮುಖ್ಯಪ್ರಾಣ ದೇವೆರೆಗ್  ಸಮರ್ಪಣೆ ಮಲ್ತುದ್ ಧನ್ಯೆರಾಯೆರು.

ಕೇವಲ ದಾಸರ ಪದೊಕುಲು  ಬೊಕ್ಕ ಕೀರ್ತನೆದ ಮೂಲಕ ಸತತ 25 ಗಂಟೆ ಕಾಲ ಹರಿನಾಮ ಸ್ಮರಣೆ ಮಲ್ದಿನವ್ ಈ ಸಾಧನೆದ ವಿಶೇಷತೆ. ಪಕ್ಕವಾದ್ಯ ಕಲಾವಿದೆರೆನ ಸುಶ್ರಾವ್ಯ ಸಹಕಾರದೊಟ್ಟುಗ್  ಒಂಜೇತ ಪಿರ ಕುಡೊಂಜಿ  ದಾಸಕೀರ್ತನೆಲೆನ್  ಪ್ರಸ್ತುತ ಮಲ್ತಿನ ಸಂಗೀತ ಬಾಲಚಂದ್ರ ಆರು ತನ್ನ  ಸಂಗೀತ ಸಾಧನೆನ್  ಭಗವಂತಗ್  ಅರ್ಪಣೆ ಮಲ್ತುದ್   ವಿಶ್ವದಾಖಲೆಗ್ ಪಾತ್ರರಾತೆರು.

ಈ ಐತಿಹಾಸಿಕ ಸಾಧನೆನ್  ಅಧಿಕೃತವಾದ್  ದೃಢೀಕರಣ ಮಲ್ಪರೆಗ್ ಬೈದಿನ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್‌ ದ ಏಷ್ಯಾ ಹೆಡ್ ಡಾ. ಮನೀಷ್ ವಿಶ್ನೋಯಿ ಮೇರ್ ವಿಶ್ವದಾಖಲೆನ್  ಘೋಷಣೆ ಮಲ್ತುದ್ ಪ್ರಮಾಣಪತ್ರೊನ್ ಕೊರಿಯೆರು. ಬೊಕ್ಕ ಪೂಜ್ಯ ಶ್ರೀಪಾದೆರು ವಿಶ್ವದಾಖಲೆದ ಪ್ರಮಾಣಪತ್ರೊನ್ ವಿದುಷಿ ಸಂಗೀತ ಬಾಲಚಂದ್ರ ಅರೆಗ್ ಹಸ್ತಾಂತರ ಮಲ್ತುದ್ ಆಶೀರ್ವಾದ ಮಲ್ತೆರು.

ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾದ್  ಪರಮಪೂಜ್ಯ ಶ್ರೀ ಅದಮಾರು ಮಠಾಧೀಶೆರಾಯಿನ  ಶ್ರೀ ವಿಶ್ವಪ್ರಿಯ ತೀರ್ಥ ಶ್ರೀಪಾದೆರು ಕಾಂಡೆನೇ  ತನ್ನ  ಪೂಜಾನುಷ್ಠಾನಲೆನ್  ಪೂರೈಸಾದ್ ಗೀತಾ ಮಂದಿರಗ್ ಬೈದೆರು. ಸಂಗೀತ ಬಾಲಚಂದ್ರ ಅರೆನ  ದಾಸವಾಣಿ ಗಾಯನೊನ್  ಕೇಂಡಿನ ಶ್ರೀಪಾದೆರು, ವಿಶ್ವದಾಖಲೆದ ಅಂತಿಮ ಕೀರ್ತನೆಯಾಯಿನ ‘ಕೃಷ್ಣ ಏನ ಬಾರದೆ’ ಪದೊನ್ ಕೇಂಡುದ್  ಕಲಾವಿದೆನ್ ಪ್ರೋತ್ಸಾಹ ಮಲ್ತೆರ್ .

ಬೊಕ್ಕ ನಡತಿನ ಸರಳ ಸಮಾರಂಭಡ್  ಶ್ರೀ ವಿಶ್ವಪ್ರಿಯ ತೀರ್ಥ ಶ್ರೀಪಾದೆರು, ಪರಮಪೂಜ್ಯ ಪುತ್ತಿಗೆ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದೆರು ಸೂಚಿಸಾಯಿನ ‘ಗೀತಾ ಗಂಗೋತ್ರಿ’ ಪನ್ಪಿನ ವಿಶೇಷ ಬಿರುದುನ್  ವಿದುಷಿ ಸಂಗೀತ ಬಾಲಚಂದ್ರ ಅರೆಗ್  ಪ್ರದಾನ ಮಲ್ತುದ್ ಗೌರವ ಮಲ್ತೆರ್ .

ಆಶೀರ್ವಚನ ಮಲ್ತಿನ  ಶ್ರೀ ವಿಶ್ವಪ್ರಿಯ ತೀರ್ಥ ಶ್ರೀಪಾದೆರು, ‘ಗೀತಾ ಗಂಗೋತ್ರಿ’ ಪನ್ಪಿನ  ಬಿರುದು ಬಾರೀ ಅರ್ಥಪೂರ್ಣವಾದುಂಡ್  ಪಂಡುದು ಪಂಡೆರು. ಗೀತಾ, ಗಂಗೆ, ಗೋವಿಂದ ಬೊಕ್ಕ ಗೋವು — ನೆತ್ತ ಪವಿತ್ರ ಸ್ಮರಣೆ ಈ ಬಿರುದುಡ್  ಅಡಕವಾದುಂಡ್ . ಗಂಗೋತ್ರಿಡ್  ಗಂಗೆ ನಿರಂತರವಾದ್ ಪ್ರವಾಹ ಮಲ್ಪುಲೆಕ್ಕ ಸಂಗೀತ ಬಾಲಚಂದ್ರ ಅರೆನ  ಕಂಠಡ್ ದಾಸಸಾಹಿತ್ಯ ಬೊಕ್ಕ ಭಕ್ತಿಸಂಗೀತದ ಗಂಗೆ ನಿರಂತರವಾದ್  ಪರತುದ್ , ಜನಕ್ಲೆಡ ಭಕ್ತಿ ಬೊಕ್ಕ ಭಾವೊನ್ ಜಾಗೃತಗೊಳಿಸಾವಡ್  ಪಂಡುದು ಹಾರೈಸಿಯೆರು.

ಸಂಗೀತ ಬಾಲಚಂದ್ರ ಅರೆನ ಈ ಮಹತ್ತರ ಸಾಧನೆದ ಪಿರಾವುಡ್  ಅಪ್ಪೆ ಅಮ್ಮೆರೆನ ಪ್ರೋತ್ಸಾಹ ಬೊಕ್ಕ ಹಿರಿಯೆರೆನ ಆಶೀರ್ವಾದಲಾ  ಉಂಡು ಪಂಡುದು ಶ್ರೀಪಾದೆರು ಪಂಡೆರ್.. ಅರೆನ ಹಿರಿಯೆರಾಯಿನ ಸುಬ್ರಾಯ ಪುರಾಣಿಕೆರು ಬೊಕ್ಕ ಯಶೋದಮ್ಮ ಅರೆನ  ಆಶೀರ್ವಾದದ ಪರಂಪರೆಲಾ  ಈ ಸಾಧನೆಗ್ ಪ್ರೇರಣೆಯಾದುಂಡ್  ಪಂಡುದು , ಸಂಗೀತ ಬಾಲಚಂದ್ರ ಅರೆನ  ದುಂಬು ದ ಸಂಗೀತ ಜೀವನ ಕುಡಲಾತ್ ಯಶಸ್ವಿಯಾದ್ , ಸಂಪೂರ್ಣವಾದ್ ಶ್ರೀಕೃಷ್ಣನ ಸೇವೆಗ್ ಅರ್ಪಿತ ಆವಡ್  ಪಂಡುದು ಆಶೀರ್ವಾದ ಮಲ್ತೆರು.

ಈ ಸಂದರ್ಭಡ್  ವಿದುಷಿ ಸಂಗೀತ ಬಾಲಚಂದ್ರ ಅರೆಗ್ ಶಾಲು ಪಾಡ್ದ್ , ಕಿರೀಟ ಬೊಕ್ಕ ಹಾರ ಪಾಡ್ದ್  ವಿಶೇಷವಾದ್ ಅಭಿನಂದನೆ ಮಲ್ತೆರ್.. ಅರೆನ ಮಾತಾ–ಪಿತೃಲಾಯಿನ ಶ್ರೀಮತಿ ಗೀತಾ ಪುರಾಣಿಕ ಬೊಕ್ಕ ಶ್ರೀ ವೇದವ್ಯಾಸ ಪುರಾಣಿಕ ಅಕ್ಲೆನುಲಾ  ಶ್ರೀಪಾದೆರು ಗೌರವಿಸಾದ್  ಆಶೀರ್ವಾದ ಮಲ್ತೆರು. 25 ಗಂಟೆ ಕಾಲ ನಿರಂತರ ಗಾಯನಗ್  ಸಹಕಾರ ಕೊರಿನ ಪಕ್ಕವಾದ್ಯ ಕಲಾವಿದೆರೆನುಲಾ ಶಾಲು ಪಾಡ್ದ್  ಗೌರವ ಮಲ್ತೆರ್.

ವಿದುಷಿ ಸಂಗೀತ ಬಾಲಚಂದ್ರ ಅರೆನ ಸಾಧನೆಗ್ ಕೀಬೋರ್ಡ್‌ ಡ್ ಶ್ರೀ ಗುರುರಾಜ್, ಶ್ರೀ ಮೊಗಿ ಗುರುರಾಜ್ ಬೊಕ್ಕ ಶ್ರೀ ರಜ್ಯಾ ಕರಿವೆಲ್ಲೂರ್; ರಿದಮ್ ಪ್ಯಾಡ್‌ ಡ್ ಶ್ರೀ ಪ್ರಭಾಕರ ಅಮ್ಮಿಂಗೋಡ್ ಬೊಕ್ಕ ಶ್ರೀ ವಾಮನ ಕೆ.; ತಬಲಾಡ್  ಶ್ರೀ ದೀಕ್ಷಿತ್ ಕೊಡಂಚಾ ಬೊಕ್ಕ ಶ್ರೀ ದೀಪಕ್ ರಾಜ್ ಉಲ್ಲಾಸು; ಕೊಳಲು ವಾದನಡ್  ಶ್ರೀ ಸಂತೋಷ್ ವಿಟ್ಟಲ್ ಮೊಕುಲು ಸಹಕಾರ ಕೊರಿಯೆರು.

ಈ ಸಂದರ್ಭಡ್  ಶ್ರೀಮಠದ ದಿವಾನೆರಾಯಿನ ಶ್ರೀ ನಾಗರಾಜ ಆಚಾರ್ಯ, ಅಂತಾರಾಷ್ಟ್ರೀಯ ಕಾರ್ಯದರ್ಶಿ ಶ್ರೀ ಪ್ರಸನ್ನ ಆಚಾರ್ಯ ಸೇರಿನಂಚ ಗಣ್ಯೆರು ಉಪಸ್ಥಿತರಿತ್ತೆರು. ಶ್ರೀಮತಿ ವಿಜಯಾ ನಾಗರಾಜ ಆಚಾರ್ಯ ಬೊಕ್ಕ ಶ್ರೀಮತಿ ಲಕ್ಷ್ಮೀ ಪ್ರಸನ್ನ ಆಚಾರ್ಯ  ವಿದುಷಿನ್  ಗೌರವಿಸಾದ್  ಅಭಿನಂದನೆ ಮಲ್ತೆರು. ಪೂಜ್ಯ ಶ್ರೀ ವಿಶ್ವಪ್ರಿಯ ತೀರ್ಥ ಶ್ರೀಪಾದೆರೆನ್ ಶ್ರೀ ನಾಗರಾಜ ಆಚಾರ್ಯ ಬೊಕ್ಕ ಶ್ರೀ ಪ್ರಸನ್ನ ಆಚಾರ್ಯ  ವೇದಿಕೆಗ್  ಎದ್ಕೊಂಡೆರು.

ಭೀಮಾ ಜುವೆಲರ್ಸ್ ಪ್ರಾಯೋಜಕತ್ವಡ್  ನಡತಿನ ಈ ಐತಿಹಾಸಿಕ ಸಂಗೀತ ಕಾರ್ಯಕ್ರಮಗ್  ಅಪಾರ ಸಂಖ್ಯೆಡ್ ಸಂಗೀತಾಭಿಮಾನಿಲು ಶ್ರೀಕೃಷ್ಣ ಭಕ್ತೆರು ಬೊಕ್ಕ ಸಾರ್ವಜನಿಕೆರ್ ಸಾಕ್ಷಿಯಾಯೆರು.

ಶ್ರೀಕೃಷ್ಣನ ಸನ್ನಿಧಿಡ್  25 ಗಂಟೆ ಕಾಲ ನಿರಂತರವಾದ್ ದಾಸಸಾಹಿತ್ಯದ ಕೀರ್ತನೆಲೆನ್  ಪಂಡುದ್ ವಿಶ್ವದಾಖಲೆ ನಿರ್ಮಾಣ ಮಲ್ದಿನ‘ಗೀತಾ ಗಂಗೋತ್ರಿ’ ವಿದುಷಿ ಸಂಗೀತ ಬಾಲಚಂದ್ರ ಅರೆನ ಸಾಧನೆ ದಾಸಸಾಹಿತ್ಯ ಬೊಕ್ಕ ಭಕ್ತಿಸಂಗೀತದ ಇತಿಹಾಸಡ್  ಸ್ಮರಣೀಯ ಮೈಲಿಗಲ್ಲಾದ್ ಮೂಡುದ್ ಬತ್ತುಂಡ್.