ಚಂದ್ರಯಾನ 3 ಯಶಸ್ಸುಗ್ ಇಸ್ರೋ ಅಧ್ಯಕ್ಷೆರೆಗ್ ಅಭಿನಂದನೆ ಮಲ್ತಿನ ಸಿದ್ಧರಾಮಯ್ಯ..

ಬೆಂಗಳೂರು ಆ 23 : ಚಂದ್ರಯಾನ 3 ಯಶಸ್ವಿ ಆಯಿನ ಹಿನ್ನೆಲೆಡ್ ಇಸ್ರೋ ಅಧ್ಯಕ್ಷ ಸೋಮನಾಥ್ ಅರೆಗ್ ದೂರವಾಣಿ ಮೂಲಕ ಮುಖ್ಯಮಂತ್ರಿ ಸಿದ್ದರಾಮಯ್ಯೆರು ಅಭಿನಂದನೆ ಮಲ್ತೆರು.

ಈ ಬಗೆಟ್ ಮುಖ್ಯಮಂತ್ರಿಲೆನ ಪ್ರತಿಕ್ರಿಯೆ…

ವಿಕ್ರಮ್ ಲ್ಯಾಂಡರ್ ಚಂದ್ರನ ಅಂಗಣೊಗ್ ಕಾರ್ ದೀಪಿನ ಮೂಲಕ ಭಾರತ ಐತಿಹಾಸಿಕ ಸಾಧನೆ ಮಲ್ದುಂಡ್. ಚಂದ್ರಯಾನ 3 ಯೋಜನೆ ಭಾರತದ ಕೆಲವು ವರ್ಷದ ಕನಸಾದಿತ್ತುಂಡ್.ಇಸ್ರೋ ವಿಜ್ಞಾನಿಲು ಭಾರತೀಯೆರೆನ ಕನಸುನ್ ನನಸು ಮಲ್ದೆರ್.

ಬಾಹ್ಯಾಕಾಶ ವಿಜ್ಞಾನಗ್ ಸುರುತ್ತ ದಿನೊಡಿಂಚಿಯೇ ಬೆರಿಬಲ ಬೊಕ್ಕ ನೆರವು ಕೊರ್ತಿನ ದೇಶದ ಸುರುತ್ತ ಪ್ರಧಾನಿ ಜವಾಹರಲಾಲ್ ನೆಹರೂ ಅರೆನ್ ನೆಂಪು ಮಲ್ತೊಂಬಿನವ್ ನಮ್ಮ ಕರ್ತವ್ಯ. ದೇಶದ ವಿಜ್ಞಾನಿಲೆನ ನಿರಂತರ ಪ್ರಯತ್ನ ಬೊಕ್ಕ ದಶಕೊಲೆನ ಪರಿಶ್ರಮ ಇನಿ ಫಲ ಕೊರ್ತುಂಡ್.

ಚಂದ್ರನ ದಕ್ಷಿಣ ದ್ರುವಟ್ ಚಂದ್ರಯಾನ 3 ಯಶಸ್ವಿಯಾದ್ ಜಪ್ಪುನ ಮೂಲಕ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ಅಪೂರ್ವವಾಯಿನ ಸಾಧನೆ ಮಲ್ದುಂಡ್. ಭಾರತೀಯರೆಗ್ ಮಾತೆರೆಗುಲಾ ಉಂದು ಪೆರ್ಮೆದ ಕ್ಷಣ. ಈ ಅಸಾಧಾರಣ ಸಾಧನೆ ಮಲ್ದಿನ ಪ್ರತಿಯೊಬ್ಬ ವಿಜ್ಞಾನಿಲೆಗುಲಾ ಅಭಿನಂದನೆಲೆನ್ ಸಲ್ಲಿಸಾವೊಂದುಲ್ಲೆ.

ಭಾರತ ಬಾಹ್ಯಾಕಾಶ ಕ್ಷೇತ್ರೊಡ್ ಜಗತ್ತುದ ಮುಂಚೂಣಿ ದೇಶೊಲೆನ ಸಾಲುಡ್ ಕುಡೊರ ನಿಚ್ಚಳವಾದ್ ಪ್ರಕಾಶಿಸುದುಂಡ್.

ಇಸ್ರೋ ಸಂಸ್ಥೆದ ದುಂಬುದ ದಿನೊತ್ತ ಮಾತಾ ಪ್ರಯತ್ನೊಲೆಗ್ ಎಡ್ಡೆಪ್ಪು ಬಯಕುವೆ ಪಂಡೆರ್..