ಸಂವಾದ ಕಾರ್ಯಕ್ರಮ.

ದೇಶೊಡ್ ಆತ್ಮಹತ್ಯೆ ಪ್ರಕರಣೊಲು ಜಾಸ್ತಿ ಆವೊಂದಿತ್ತುಂಡಲಾ ಸರಕಾರ ಇದಮುಟ್ಟ ಆತ್ಮಹತ್ಯೆ ತಡೆಪರೆಗ್ ರಾಷ್ಟ್ರೀಯ ನೀತಿನ್ ಜಾರಿ ಕನವಂದಿನವ್ ಬೇಜಾರುದ ಸಂಗತಿ. ಆತ್ಮಹತ್ಯೆಗ್ ಕಾರಣ ಆಪಿನ ಮಾನಸಿಕ ಕಾಯಿಲೆ ಬೊಕ್ಕ ಮದ್ಯ ವ್ಯಸನಗ್ ಸಂಬಂಧಿಸಾದ್ ಮಾತಾ ಜಿಲ್ಲೆಡುಲಾ ಸರಿಯಾಯಿನ ಚಿಕಿತ್ಸೆ ತಿಕ್ಕೊಡ್. ಈ ನಿಟ್ಟುಡ್ ಸರಕಾರ ಕಾರ್ಯ ಪ್ರವೃತ್ತರಾವೊಡ್ . ಅಪಗಾಂಡ ಆತ್ಮಹತ್ಯೆನ್ ತಡೆಪರೆಗ್ ಸಾಧ್ಯ ಆಪುಂಡ್ ಪಂಡುದು ಹಿರಿಯ ಮನೋವೈದ್ಯ ಡಾ.ಪಿ.ವಿ.ಭಂಡಾರಿ ಪಂಡೆರ್.
ಭಾರತೀಯ ಮನೋವೈದ್ಯರ ಸೊಸೈಟಿ ಕರ್ನಾಟಕ ಶಾಖೆ ಬೊಕ್ಕ ಉಡುಪಿ & ಮಂಗಳೂರು ಮನೋವೈದ್ಯರ ಸೊಸೈಟಿ ವತಿಡ್ದ್ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಸಹಯೋಗದೊಟ್ಟುಗ್ ಆತ್ಮಹತ್ಯೆ ತಿಳುವಳಿಕೆ ಬಗ್ಗೆ ಜಿಲ್ಲೆದ ಪತ್ರಕರ್ತರೆಗ್ ಶುಕ್ರವಾರ ಬ್ರಹ್ಮಗಿರಿತ್ತ ಐಎಂಎ ಭವನಡ್ ಆಯೋಜನೆ ಮಲ್ದಿನ ಕಾರ್ಯಾಗಾರಡ್ ‘ಆತ್ಮಹತ್ಯೆ: ಮಾನಸಿಕ ಅಂಶೊಲ್ ವಿಷಯದ ಬಗ್ಗೆ ಆರು ಪಾತೆರಿಯೆರ್.
ಭಾರತಡ್ ಪ್ರತಿ ವರ್ಷ 28ಲಕ್ಷ ಜನ ಆತ್ಮಹತ್ಯೆಗ್ ಪ್ರಯತ್ನ ಮಲ್ಪುವೆರ್. ಇನಿ ಸರಕಾರಿ ಶಾಲೆಲು ಶೇ.100 ಫಲಿತಾಂಶದ ಪಿರಾವುಡ್ ಪೋವೊಂದುಂಡ್. ನೆಟ್ಟಾದ್ ಜೋಕ್ಲೆನ ಮಿತ್ತ್ ಒತ್ತಡ ಜಾಸ್ತಿ ಆವೊಂದುಂಡ್. ಸ್ಪರ್ಧೆ, ಹೋಲಿಕೆ, ಹೆಚ್ಚ ನಿರೀಕ್ಷೆ, ಪರೀಕ್ಷೆ ಅನುರ್ತ್ತೀಣ ಸೇರಿನಂಚ ವಯೋ ಸಹಜ ಸಮಸ್ಯೆಲೆಡಾದ್ ಪ್ರತಿದಿನ 28 ಜೋಕುಲು ಆತ್ಮಹತ್ಯೆ ಮಲ್ತೊಂದುಲ್ಲೆರ್. ದುರ್ಬಲ ವ್ಯಕ್ತಿತ್ವದಕುಲು ಮಾತ್ರ ಆತ್ಮಹತ್ಯೆ ಮಲ್ತೊಂಬೆರ್ ಪನ್ಪಿನವ್ ಶುದ್ಧ ಸುಳ್ಳು ಪಂಡೆರ್.
ಕಾರ್ಯಾಗಾರನ್ ಉದಿಪನ ಮಲ್ತಿನ ಭಾರತೀಯ ಮನೋವೈದ್ಯೆರೆನ ಸೊಸೈಟಿ ಕರ್ನಾಟಕ ಶಾಖೆ ಅಧ್ಯಕ್ಷ ಡಾ.ಪಿ.ಕೆ.ಕಿರಣ್ ಕುಮಾರ್ ಪಾತೆರ್ದ್ , ಇನಿ ಬಹುತೇಕ ಆತ್ಮಹತ್ಯೆಲೆಗ್ ಕಾರಣ ಖಿನ್ನತೆ. ಈ ಬಗ್ಗೆ ಮಾತೆರ್ಲಾ ಗಂಭೀರವಾದ್ ಚಿಂತನೆ ಮಲ್ಪೊಡಾತುಂಡ್. ವರ್ತನೆ, ಪಾತೆರೊಡ್ ಆತ್ಮಹತ್ಯೆ ಮಲ್ತೊಂಬಿನಕ್ಲೆನ್ ಗುರುತಿಸಾವೊಲಿ. ಅವೆನ್ ಅರ್ಥ ಮಲ್ತೊಂಡೆರೆಡ ಆತ್ಮಹತ್ಯೆನ್ ತಡೆಪೊಲಿ ಪಂಡುದು ಆರು ತೆರಿಪಾಯೆರು.
ವೇದಿಕೆಡ್ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು, ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ, ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ, ಜಿಲ್ಲಾ ಮನೋರೋಗ ತಜ್ಞ ಡಾ.ವಾಸುದೇವ ಉಪಸ್ಥಿತರಿತ್ತೆರ್.
ಕಾರ್ಯಕ್ರಮದ ಸಂಚಾಲಕ ಡಾ.ರವೀಂದ್ರ ಮುನೋಳಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ಉಡುಪಿ ಡಾ.ಎ.ವಿ.ಬಾಳಿಗ ಆಸ್ಪತ್ರೆೆಯ ಮನಶಾಸ್ತ್ರಜ್ಞ ನಾಗರಾಜ ಮೂರ್ತಿ ವಂದಿಸಾಯೆರ್. ಆಪ್ತ ಸಮಾಲೋಚಕಿ ಪದ್ಮ ರಾಘವೇಂದ್ರ, ಆಡಳಿತಾಧಿಕಾರಿ ಸೌಜನ್ಯ ಶೆಟ್ಟಿ ನಿರೂಪಣೆ ಮಲ್ತೆರ್.
ಬೊಕ್ಕ ನಡತಿನ ಕಾರ್ಯಾಗಾರಡ್ ‘ಆತ್ಮಹತ್ಯೆ: ಆರ್ಥಿಕ -ಸಾಮಾಜಿಕ ಅಂಶೊಲು ಬಗ್ಗೆ ಹಿರಿಯ ಪತ್ರಕರ್ತ ರಾಜರಾಮ್ ತಲ್ಲೂರು ಬೊಕ್ಕ ‘ಆತ್ಮಹತ್ಯೆ ಬೊಕ್ಕ ಮಾಧ್ಯಮ ವರದಿ’ ಬಗ್ಗೆ ಮನೋವೈದ್ಯ ಡಾ.ದೀಪಕ್ ಮಲ್ಯ ಪಾತೆರಿಯೆರ್.. ಬೊಕ್ಕ ಮಾಧ್ಯಮದಕ್ಲೆನೊಟ್ಟುಗ್ ಸಂವಾದ ಕಾರ್ಯಕ್ರಮ ನಡತುಂಡ್.