ಫೆ. 1 ಉಡುಪಿ ಅಂದು-ಇಂದು ಚಿತ್ರ ಸಂಪುಟ ಲೋಕಾರ್ಪಣೆ
ಉಡುಪಿ, ಮೂಜಿದಶಕದ ಉಡುಪಿದ ಪ್ರಗತಿದ ಬಗೆಟ್ ಚಿತ್ರದ ಮೂಲಕ ಸಾಕ್ಷೀಕರಣ ಮಲ್ಪುನ ವಿಶಿಷ್ಟ ಮಿನಿ ಕಾಫಿ ಟೇಬಲ್ ಬುಕ್ ಫೆ. 1 ಗ್ ಉಡುಪಿಡ್ ಲೋಕಾರ್ಪಣೆ ಆವರೆಗುಂಡ್ ಪಂಡುದು
ಕನ್ನಡ ಸಾಹಿತ್ಯ ಪರಿಷತ್ ಉಡುಪಿ ತಾಲೂಕು ಘಟಕದ ಅಧ್ಯಕ್ಷ ಶ್ರೀ ರವಿರಾಜ್ ಎಚ್. ಪಿ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್..
ಭೂತರಾಜ ಪ್ರಕಾಶನದ 4 ನೇ ಕೃತಿ ಉಂದಾದಿತ್ತುದ್ ಉಡುಪಿಯಳದ 30 ವರ್ಷದ ಬುಲೆಚ್ಚಿಲ್ ದ ಬಗೆಟ್ ಈ ಪುಸ್ತಕ ಬೊಲ್ಪು ಚೆಲ್ಲರೆಗುಂಡ್.
ಉದಯವಾಣಿ ಪತ್ರಿಕೆದ ಹಿರಿಯ ಪತ್ರಿಕಾ ಛಾಯಾಚಿತ್ರ ಕಲಾವಿದ ಆಸ್ಟ್ರೋ 30ವರ್ಷದ ಪರತ್ ಚಿತ್ರಲೆನ್ ಕೊರ್ತೆರ್.
ಉಡುಪಿ ಜಿಲ್ಲೆ ಆಪೀನೆಡ್ದ್ ದುಂಬು ಇತ್ತಿನ ಪರಿಸರ ಬೊಕ್ಕ ಅಭಿವೃದ್ಧಿ ಆರಿಬೊಕ್ಕ ಅವ್ವೇ ಜಾಗೆದ ಅಕ್ಕ ಪಕ್ಕಡ್ ಪುಸ್ತಕನ್ ಕಟ್ಟುದೆರ್ ಪಂಡುದು ಪ್ರಕಾಶಕೆರಾಯಿನ ಶ್ರೀಮತಿ ಪ್ರವೀಣಾ ಮೋಹನ್ ಮೇರು ಮಾಹಿತಿ ಕೊರ್ತೆರ್.
ಉಡುಪಿದ ಸ್ಥಿತಿಗತಿದ ಬಗ್ಗೆ ಪಿರಾಕುದ ಬೊಕ್ಕ ಇತ್ತೆದ ಬಗೆಟ್ ಸಚಿತ್ರ ಮಾಹಿತಿ ಕೊರ್ಪಿನ ಈ ಪುಸ್ತಕ ಭವಿಷ್ಯದ ಬುಲೆಚ್ಚಿಲ್ ದ ಬಗೆಟ್ ಎಚ್ಚರಿಕೆದ ಗಂಟೆನುಲಾ ಬೊಟ್ಟುಂಡ್.
ಉದಯವಾಣಿದ ವಿಶ್ರಾಂತ ಸಂಪಾದಕೆರಾಯಿನ ಶ್ರೀ ಗುರುರಾಜ್ ಮುನ್ನುಡಿ ಬರೆದಿತ್ತುದ್, ಫೋಟೋಗ್ರಫಿ ಸೊಸೈಟಿ ಆಫ್ ಇಂಡಿಯಾದ ಮಾಜಿ ಅಧ್ಯಕ್ಷ ಶ್ರೀ ನಾರಾಯಣ ಪಂಜೆ ಸಂದೇಶ ಕೊರ್ತೆರ್.
ಲೋಕಾರ್ಪಣೆ ಕಾರ್ಯಕ್ರಮ ಉಡುಪಿ ಶಾರದಾ ಕಲ್ಯಾಣ ಮಂಟಪದಲ್ಪ ಉಪ್ಪುನ ಐವೈಸಿ ಯಕ್ಷಗಾನ ಕಲಾರಂಗದ ಹವಾ ನಿಯಂತ್ರಿತ ಸಭಾಂಗಣಡ್ ಫೆ. 1 ಗ್ ಬಯ್ಯಗ್ 4.30ಗಂಟೆಗ್ ನಡಪರೆಗುಂಡ್.
ಮಣಿಪಾಲ ವಿವಿ ದ ಸಹ ಕುಲಾಧಿಪತಿ ಡಾ. ಎಚ್. ಎಸ್. ಬಲ್ಲಾಳ್ ಕೃತಿ ಬಿಡುಗಡೆ ಮಲ್ಪರೆಗುಲ್ಲೆರ್..
ಮಣಿಪಾಲ್ ಮೀಡಿಯಾ ನೆಟ್ ವರ್ಕ್ ದ ಕಾರ್ಯ ನಿರ್ವಾಹಕ ನಿರ್ದೇಶಕೆರಾಯಿನ ಶ್ರೀ ಸತೀಶ್ ಯು ಪೈ ಅಧ್ಯಕ್ಷತೆಡುಪ್ಪುವೆರ್.
ಶಾಸಕ ಯಶ್ ಪಾಲ ಸುವರ್ಣ, ಅದಾನಿ ಸಮೂಹದ ಕಾರ್ಯ ನಿರ್ವಾಹಕ ಅಧ್ಯಕ್ಷ ಶ್ರೀ ಕಿಶೋರ್ ಆಳ್ವ, ಹಿರಿಯ ಛಾಯಾಚಿತ್ರ ಕಲಾವಿದ ಯಜ್ಞ ಮಂಗಳೂರು ಶುಭ ಹಾರೈಸಾವರೆಗುಲ್ಲೆರ್.