ಸಿನಿಮಾ, ಧಾರಾವಾಹಿಲೆಡ್ದ್ ರಂಗಭೂಮಿಯೇ ಮಲ್ಲ: ಪರಮಾನಂದ ಸಾಲಿಯಾನ್‌

ಸಿನಿಮಾ, ಧಾರಾವಾಹಿಲೆಡ್ದ್ ರಂಗಭೂಮಿಯೇ ಮಲ್ಲ: ಪರಮಾನಂದ ಸಾಲಿಯಾನ್‌

ಸಿನಿಮಾ, ಧಾರವಾಹಿಲು ತೂವರೆಗ್ ಪೊರ್ಲು. ಆಂಡ ಅಲ್ಪ ಏತ್ ಕಟ್‌, ರೀಟೇಕ್‌ ಲು ಇಪ್ಪುಂಡ್ ಪಂಡುದ್ ತೂಪಿನಕ್ಲೆಗ್ ಗೊತ್ತುಪ್ಪುಜಿ. ಈ ರೀತಿದ ಕಟ್‌, ರೀಟೇಕ್‌ ಉಪ್ಪಂದೆ ರಂಗೊಡ್ ಪ್ರದರ್ಶನ ಆಪುಂಡ್. ಅಂಚಾದ್ ರಂಗಭೂಮಿ ಮಲ್ಲ ಪಂಡುದು ರಂಗಕರ್ಮಿ ಪರಮಾನಂದ ಸಾಲಿಯಾನ್‌ ಪಂಡೆರು.

ಸಾಂಸ್ಕೃತಿಕ ಸಂಘಟನೆ ಸುಮನಸಾ ಕೊಡವೂರು ವತಿಡ್ದ್ ಅಜ್ಜರಕಾಡು ಭುಜಂಗಪಾರ್ಕ್‍ನಡ್ ಆಯೋಜನೆ ಮಲ್ದಿನ ರಂಗಹಬ್ಬ-11 ನೆತ್ತ ಏಳನೇ ದಿನದ ಕಾರ್ಯಕ್ರಮಡ್ ಶನಿವಾರ ಆರು ಪಾತೆರಿಯೆರು.

ದುಂಬು ರಂಗಭೂಮಿಡ್ ಆತೊಂಜಿ ಪ್ರಯೋಗಲು ಇತ್ತುಜಿ. ಹಾಸ್ಯ ನಾಟಕಗ್ ದುರಂತ ಪದ, ದುರಂತ ನಾಟಕಗ್ ಹಾಸ್ಯ ಪದ್ಯ ಬರೆದು ಮಲ್ತೊಂದಿತ್ತೆರ್. ಇನಿ ರಂಗಭೂಮಿ ಮಸ್ತ್ ಎತ್ತೊರಗ್ ಪೋತುಂಡ್. ಮಸ್ತ್ ರಂಗತಂತ್ರ ಉಂಡು. ರಂಗಭೂಮಿಡ್ ನಿರ್ದೇಶಕರೆಡ್ದ್ ತರಬೇತಿ ಪಡೆತುದ್ ಒರ ರಂಗೊಗ್ ಪೋಯಿನೆಡ್ ಬೊಕ್ಕ ಏರ್ಲಾ ಸಹಾಯಗ್ ಬರ್ಪುಜೆರ್. ಸ್ವಂತ ಪ್ರತಿಭೆ, ಪರಿಶ್ರಮಡಾದ್ ಕಲೆ ಪ್ರದರ್ಶನ ಮಲ್ಪೊಡಾಪುಂಡ್ ಪಂಡೆರ್.

ಸುಮನಸಾ ದಾದನೇ ಮಲ್ಪಡ್ ಶಿಸ್ತುಬದ್ಧವಾದ್ ಮಲ್ಪುಂಡ್. ನವ್ಯ, ವಿಡಂಬನಾತ್ಮಕ ನಾಟಕೊಲೆಗ್ ಅಯಿತ್ತವೇ ಆಯಿನ ವೀಕ್ಷಕೆರು ಬೋಡು ಪನ್ಪಿನ ಪಾತೆರನ್ ಈ ತಂಡ ಸುಳ್ಳು ಮಲ್ದುಂಡ್. ಮುಲ್ಪ ಸಾಮಾನ್ಯ ಪ್ರೇಕ್ಷಕೆರೆನೇ ಒಯ್ತುದ್ ಬಿಗಿ ನಾಟಕೊಲೆನ್ ಪ್ರದರ್ಶನ ಮಲ್ಪುವೆರ್.ಪ್ರೇಕ್ಷಕೆರೆನ್ ಬುದ್ಧಿವಂತೆರಾದ್ ಮಲ್ತೊಂದುಲ್ಲೆರ್ ಪಂಡೆರ್.

ಉಪ್ಪೂರು ಬಿಲ್ಲವ ಸೇವಾ ಸಂಘದ ಅಧ್ಯಕ್ಷ ರಾಜು ಪೂಜಾರಿ ಪಾತೆರ್ದ್ , ‘21 ವರ್ಷ ಒಂಜಿ ಸಂಸ್ಥೆನ್ ನಡಪಾವುನ ಆತ್ ಸುಲಭ ಅತ್ತ್. ಈ ಕಾರ್ಯಕ್ರಮಗ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಬರೊಡ್. ಸ್ವಂತ ಕಟ್ಟಡ ಆವೊಡ್’ ಪಂಡುದು ಹಾರೈಸಿಯೆರ್.

ಯಕ್ಷಗುರು ದಿವಂಗತ ಯು. ದುಗ್ಗಪ್ಪ ಅರೆನ ಪುದರುಡ್ ಕೊರ್ಪಿನ ಯಕ್ಷಸುಮಾ ಪ್ರಶಸ್ತಿನ್ ಸ್ವೀಕಾರ ಮಲ್ತಿನ ಯಕ್ಷಕಲಾವಿದ ರಾಜೀವ್‌ ತೋನ್ಸೆ ಪಾತೆರ್ದ್, ಮನಸ್ಸು ಎಡ್ಡೆ ಇತ್ತುಂಡ ಎಡ್ಡೆ ಕಾರ್ಯ ಆಪುಂಡ್. ನಮ ಮಲ್ತಿನ ಕಾರ್ಯೊಡ್ ಯಶಸ್ಸು ಸಿಕ್ಕುಂಡ್. ನೇಕ್ ಸುಮನಸಾ ಸಾಕ್ಷಿ. ಕೆಲವು ಶಬ್ದ ಜಾಸ್ತಿ ಇಪ್ಪುಂಡ್ ಸುದ್ದಿ ಇಪ್ಪುಜಿ. ಸದ್ದು ಉಪ್ಪಂದೆ ಸುದ್ದಿ ಮಲ್ದಿನ ಸಂಸ್ಥೆ ಸುಮನಸಾ’ ಪಂಡುದು ಬಣ್ಣಿಸಾಯೆರ್.

ಒವ್ವೇ ಅರ್ಜಿ ಪಾಡಂದೆ ಗುರುತಿಸಾದ್ ಲೆತ್ತುದ್ ಕೊರ್ಪಿನ ಸನ್ಮಾನ ಮಲ್ಲ ಕಾರ್ಯ. ಉಂದು ಮದಪರೆಗಾಪುಜಿ, ಬಿಲೆ ಕಟ್ಟರೆಗಾಪುಜಿ ಪಂಡೆರು.

ಕಾರ್ಯಕ್ರಮದ ಅಧ್ಯಕ್ಷತೆಡಿತ್ತಿನ ತಿಂಗಳೆ ವಿಕ್ರಮಾರ್ಜುನ ಹೆಗ್ಡೆ ಪಾತೆರ್ದ್ , ‘ಸಾಂಸ್ಕೃತಿಕ ಲೋಕೊಡ್ ಸುಮನಸಾ ಮಸ್ತ್ ಪ್ರಸಿದ್ಧವಾಯಿನ ಪುದರು. ಅಕಲ್ನ ಚಟುವಟಿಕೆ, ಸಾಮಾಜಿಕ ಕಳಕಳಿ, ಸಾಮಾಜಿಕ ದೃಷ್ಟಿಕೋನ ಮಾತಲಾ ಒಂಜಿ ಕೈ ಮಿತ್ತ್ ಪನ್ಪಿಲೆಕ್ಕ ಸುಮನಸಾ ಉಂಡು. ಒಂಜಿ ತಂಡ ಕಟ್ಟುಂಡ ಇಂಚ ಉಪ್ಪೊಡ್ ಪಂಡುದ್ ಮಾತೆರ್ಲಾ ಬಯಕುಲೆಕ್ಕ ಉಂಡು ಪಂಡೆರು.

ಪ್ರಚಾರಗ್ ಒತ್ತು ಕೊರಂದೆ ಗುಣಮಟ್ಟದ ನಾಟಕೊಲೆನ್ ತೋಜಾವುನ ಕೆಲಸೊನ್ ಮಲ್ಪುಂಡ್ ಪನ್ಪಿನ ಪೆರ್ಮೆ ಈ ತಂಡೊಗ್ ಉಂಡು ಪಂಡುದು ಶ್ಲಾಘಿಸಾಯೆರ್.

ಕಾಮಿಡಿ ಕಿಲಾಡಿಲು ಕಾರ್ಯಕ್ರಮಡ್ ಮಿಂಚೊದುಪ್ಪುನ ಸುಮನಸಾ ಸದಸ್ಯ ರಾಧೇಶ್‌ ಶೇಣೈ ಅರೆನ್ ಅಭಿನಂದನೆ ಮಲ್ತೆರ್. ಸುಮನಸಾ ಸಂಚಾಲಕ ಭಾಸ್ಕರ ಪಾಲನ್, ಗೌರವಾಧ್ಯಕ್ಷ ಎಂ.ಎಸ್. ಭಟ್‌ ಉಪಸ್ಥಿತರಿತ್ತೆರ್. ಅಧ್ಯಕ್ಷ ಪ್ರಕಾಶ್‌ ಜಿ. ಕೊಡವೂರು ಸ್ವಾಗತ ಮಲ್ತುದ್. ಅಕ್ಷತ್‌ ಅಮೀನ್‌ ವಂದಿಸಾಯೆರ್. ಯೋಗೀಶ್‌ ಕೊಳಲಗಿರಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಬೊಕ್ಕ ಸುರಭಿ ಬೈಂದೂರು ಕಲಾವಿದೆರು ‘ಚೋಮನ ದುಡಿ’ ನಾಟಕ ಪ್ರಸ್ತುತ ಮಲ್ತೆರ್.