ಪತ್ರಕರ್ತೆರೆಗ್ ಚುನಾವಣಾ ಕಾರ್ಯಾಗಾರ..

ವಿಧಾನಸಭಾ ಚುನಾವಣೆ: ಉಡುಪಿ ಜಿಲ್ಲೆದ ಮಾಧ್ಯಮದಕ್ಲೆಗ್ ಕಾರ್ಯಾಗಾರ

ಧಾರ್ಮಿಕ ಬೊಕ್ಕ ಸಾಮಾಜಿಕ ಕಾರ್ಯಕ್ರಮೊಲು ಮತ ಗಳಿಕೆ ಬೊಕ್ಕ ರಾಜಕೀಯ ಅಸ್ತ್ರ ಆವರೆಗ್ ಬಲ್ಲಿ. ಓಟುಗ್ 48 ಗಂಟೆ ದುಂಬೇ ಚುನಾವಣಾ ಜಾಹೀರಾತು ಪ್ರಕಟಿಸಾವರೆಗ್ ಪ್ರಾಮಾಣೀಕರಣ ಕಡ್ಡಾಯ ಆತುಂಡ್. ಸಾಮಾಜಿಕ ಜಾಲತಾಣೊಲೆನ ಬಗ್ಗೆ 24 ಗಂಟೆ ಕಾಲ ನಿಗಾ ದೀಪುಂಡ್. ಪಕ್ಷ ದಅಭ್ಯರ್ಥಿ ಬೊಕ್ಕ ಚುನಾವಣೆದ ಮಿತ್ತ್ ಪರಿಣಾಮ ಬೂರುನ ಅಂಶೊಲೆನ ಬಗ್ಗೆ ಪರಿಶೀಲನೆ ಮಲ್ಪುಂಡ್ ಪಂಡುದ್ ಉಡುಪಿ ಜಿಲ್ಲಾಧಿಕಾರಿ ಕೂರ್ಮಾರಾವ್ ಎಂ. ತೆರಿಪಾದೆರ್.

ಉಡುಪಿ ಜಿಲ್ಲಾಡಳಿತದ ಮಾಧ್ಯಮ ಪ್ರಾಮಾಣೀಕರಣ ಬೊಕ್ಕ ಕಣ್ಗಾವಲು ಸಮಿತಿ(ಎಂಸಿಎಂಸಿ) ವತಿಡ್ದ್ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಸಹಯೋಗಡ್ ಕರ್ನಾಟಕ ವಿಧಾನಸಭಾ ಸಾರ್ವತ್ರಿಕ ಚುನಾವಣೆಗ್ ಸಂಬಂಧಿಸಾದ್ ಉಡುಪಿ ಜಿಲ್ಲೆದ ಮಾಧ್ಯಮದಕ್ಲೆಗ್ ಗುರುವಾರ ಉಡುಪಿ ಪತ್ರಿಕಾ ಭವನಡ್ ಆಯೋಜನೆ ಮಲ್ದಿನ ಕಾರ್ಯಾಗಾರಡ್ ಭಾಗವಹಿಸಾದ್ ಆರು ಪಾತೆರಿಯೆರ್.

ಉಡುಪಿ ಜಿಲ್ಲಾ ಪೊಲೀಸ್ ಅಧೀಕ್ಷಕ ಅಕ್ಷಯ್ ಹಾಕೇ ಮಚ್ಚೀಂದ್ರ ಪಾತೆರ್ದ್ , ಚುನಾವಣೆಡ್ ಅಕ್ರಮ ತಡೆಪುನ ನಿಟ್ಟುಡ್ ಚೆಕ್ಫೋಸ್ಟ್ಗಳೆನ್ ನಿರ್ಮಾಣ ಮಲ್ದುಂಡ್. ಕೆಲವು ಕಡೆ ದಿಢೀರ್ ಕಾರ್ಯಾಚರಣೆಲೆನ್ ಮಲ್ತೊಂದುಂಡ್ ಏಕಕಾಲೊಡ್ ಜಿಲ್ಲೆಡುಪ್ಪುನ ಗೋಡಾನ್, ಕಟ್ಟಡೊಲೆಗ್ ದಾಳಿ ಮಲ್ತುದ್ ಮಲ್ಲ ಪ್ರಮಾಣಡ್ ವಸ್ತುಲೆನ್ ಸಂಗ್ರಹ ಮಲ್ದುಂಡಾ ಪಂಡುದ್ ಪರಿಶೀಲನೆ ಮಲ್ತುದುಂಡ್ ಪಂಡೆರು.

ಜಿಲ್ಲೆಡ್ ಇದಮುಟ್ಟ ದಾಖಲಾತಿ ಇಪ್ಪಂದಿನ 48.50ಲಕ್ಷ ರೂ. ನಗದು ಪಣವುನ್ ವಶ ಮಲ್ತುದುಂಡ್. ಅಬಕಾರಿ ಇಲಾಖೆದೊಟ್ಟುಗ್ ಸೇರ್ದ್ 6000ಲೀಟರ್ ಮದ್ಯ ವಶಪಡಿಸಾವೊಂದುಂಡ್. ಅಕ್ರಮ ಸಾಗಾಟ ಮಲ್ತೊಂದಿತ್ತಿನ ಅರಿ ನುಲಾ ವಶಕ್ ದೆತೊಂದ. ಈ ಕಾರ್ಯಾಚರಣೆ ದುಂಬರಿಯುಂಡ್ ಪಂಡುದು ಆರು ತೆರಿಪಾಯೆರ್.

ಅಂಚೆನೇ ಪೊಲೀಸ್ ಇಲಾಖೆ ಮುಖೇನ ಎಸ್ಪಿ ಕಚೇರಿಡ್ ಸ್ಥಾಪನೆ ಮಲ್ದಿನ ಸೆಲ್ ಡ್ ಸಾಮಾಜಿಕ ಜಾಲತಾಣೊಲೆಡ್ ಬರ್ಪಿನ ವಿಚಾರದ ಬಗ್ಗೆ ನಿಗಾ ದೀತುಂಡ್. ಅನುಮತಿ ಇತ್ತುಂಡಲಾ ಸಾಮಾಜಿಕ ಜಾಲತಾಣೊಲೆಡ್ ದಾದ ಬೋಡಾಂಡಲಾ ಬರೆಪಿಲೆಕ್ಕ ಇಜ್ಜಿ ಅಯಿಕ್ ಅಯಿತ್ತವೇ ಆಯಿನ ಕಾನೂನು ಚೌಕಟ್ಟು ಉಂಡು. ಬೊಕ್ಕ ಚುನಾವಣಾ ಆಯೋಗದ ನಿಯಮ ಉಂಡು. ಜಾತಿ, ಧರ್ಮ, ಸಮುದಾಯ, ಭಾಷೆ ಆಧಾರೊಡ್ ಓಟು ಕೇನರೆಗ್ ಅವಕಾಶ ಇಜ್ಜಿ ಪಂಡುದು ಆರು ಪಂಡೆರು.

ಉಡುಪಿ ಜಿಲ್ಲಾ ಪಂಚಾಯತ್ ಮುಖ್ಯಕಾರ್ಯನಿರ್ವಹಣಾಧಿಕಾರಿ ಪ್ರಸನ್ನ ಎಚ್.. ಸಂಪನ್ಮೂಲ ವ್ಯಕ್ತಿಯಾದ್ ಬತ್ತಿನ ಅಶೋಕ್ ಕಾಮತ್ ಮಾದರಿ ನೀತಿ ಸಂಹಿತೆ ಬಗ್ಗೆ ಮಾಹಿತಿ ಕೊರಿಯೆರು.

ವೇದಿಕೆಡ್ ಉಡುಪಿ ಜಿಲ್ಲಾ ಕಾರ್ಯ ನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು, ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ಉಪಸ್ಥಿತರಿತ್ತೆರು.

ಉಡುಪಿ ಜಿಲ್ಲಾ ವಾರ್ತಾಧಿಕಾರಿ ಮಂಜುನಾಥ್ ಸ್ವಾಗತ ಮಲ್ರುದ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ವಂದಿಸಾಯೆರ್.