ಪತ್ರಕರ್ತ ಸಂಘದ ಕ್ರೀಡೋತ್ಸವ

’

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ನಿರೆಲುಡ್ ಬೊಳ್ಳಿ ಪರ್ಬದ ಪ್ರಯುಕ್ತ ‘ರಜತ ಕ್ರೀಡಾ ಸಂಭ್ರಮ’ ವಾರ್ಷಿಕ ಕ್ರೀಡಾಕೂಟೊನ್  ಅ.22ಗ್ ಅಜ್ಜರಕಾಡು ಡುಪ್ಪುನ ಉಡುಪಿ ಜಿಲ್ಲಾ ಕ್ರೀಡಾಂಗಣ ಆಯೋಜನೆ ಮಲ್ದುಂಡ್ ಪಂಡುದು ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ತೆರಿಪಾದೆರ್.

ಉಡುಪಿ ಪತ್ರಿಕಾ ಭವನಡ್  ಬುಧವಾರ ನಡತಿನ ಸುದ್ದಿಗೋಷ್ಠಿಡ್  ಪಾತೆರಿನ ಆರು, ಸಂಘ ಬೊಳ್ಳಿ ಪರ್ಬದ ಹಿನ್ನೆಲೆಡ್  ಈ ಸರ್ತಿದ ಕ್ರೀಡಾಕೂಟೊನ್  ಅದ್ದೂರಿ ಬೊಕ್ಕ ವಿಶಿಷ್ಟ ರೀತಿಡ್  ನಡಪಾವರೆಗ್  ತೀರ್ಮಾನ ಮಲ್ದುಂಡ್. ಕಾಂಡೆ 9ಗಂಟೆಗ್  ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ಸಂಘದ ಧ್ವಜಾರೋಹಣ ಮಲ್ಪುವೆರು. ಈ ಸಂದರ್ಭಡ್ ಕ್ರೀಡಾ ಕೂಟಗ್  ಉಡುಪಿ ಜಿಲ್ಲಾ ಕ್ರೀಡಾ ಬೊಕ್ಕ ಯುವ ಸಬಲೀಕರಣ ಇಲಾಖೆದ  ಸಹಾಯಕ ನಿರ್ದೇಶಕ ಡಾ.ರೋಶನ್ ಕುಮಾರ್ ಶೆಟ್ಟಿ ಚಾಲನೆ ಕೊರ್ಪೆರು.

ಕಾಂಡೆ 10.30ಗಂಟೆಗ್ ಕ್ರೀಡಾಕೂಟನ್  ಮಣಿಪಾಲ ಮಾಹೆದ ಸಹ ಕುಲಾಧಿಪತಿ ಡಾ.ಎಚ್.ಎಸ್.ಬಲ್ಲಾಳ್ ಉದಿಪನ ಮಲ್ಪರೆಗುಲ್ಲೆರು. ಈ ಪೊರ್ತುಡ್  ಪತ್ರಕರ್ತೆರಾಯಿನ  ದೀಪಕ್ ಜೈನ್ ಮುತಾಲಿಕೆಡ್  ಬೇತೆ ಬೇತೆ  ತಾಲೂಕು ಸಂಘಲೆನ  ಸದಸ್ಯರೆಡ್ದ್ ಪಥ ಸಂಚಲನ ನಡಪರೆಗಿತ್ತುದ್, ಉಡುಪಿ ಜಿಲ್ಲಾಧಿಕಾರಿ ಡಾ.ವಿದ್ಯಾ ಕುಮಾರಿ ಗೌರವ ವಂದನೆ ಸ್ವೀಕಾರ ಮಲ್ಪುವೆರ್. ಪತ್ರಕರ್ತ ರಾಜು ಖಾರ್ವಿ ಮುತಾಲಿಕೆಡ್  ಪ್ರಜ್ವಲ್ ಅಮೀನ್ ಬೊಕ್ಕ ಅನಿಲ್ ಕೈರಂಗಳ ಕ್ರೀಡಾ ಜ್ಯೋತಿ ಅರ್ಲಾದ್, ಕ್ರೀಡಾಜ್ಯೋತಿನ್ ಉಡುಪಿ ಜಿಲ್ಲಾ ಅಥ್ಲೆಟಿಕ್ಸ್ ಅಸೋಸಿಯೇಶನ್ ಅಧ್ಯಕ್ಷ ಹರಿಪ್ರಸಾದ್ ರೈ ಹಸ್ತಾಂತರ ಮಲ್ಪುವೆರ್. ಸಂಘದ ಅಧ್ಯಕ್ಷೆರಾಯಿನ ರಾಜೇಶ್ ಶೆಟ್ಟಿ ಅಲೆವೂರು ಗುರ್ಕಾರ್ಮೆಡಿಪ್ಪುವೆರ್.

ಮಲ್ಲ ಬಿನ್ನೆರಾದ್ ಮಣಿಪಾಲ ಕಸ್ತೂರ್ಬಾ ಆಸ್ಪತ್ರೆದ ವೈದ್ಯಕೀಯ ನಿರ್ದೇಶಕ ಡಾ.ಅವಿನಾಶ್ ಶೆಟ್ಟಿ ಉದ್ಯಾವರ ಕುತ್ಪಾಡಿ ಯಶಸ್ವಿ ಫಿಶ್‌ಮಿಲ್ ನಿರ್ದೇಶಕೆರಾಯಿನ ಉದಯ ಕುಮಾರ್, ಉಡುಪಿ ನಗರಸಭೆ ಪೌರಾಯುಕ್ತೆರಾಯಿನ  ರಾಯಪ್ಪ ಪಾಲ್ ಪಡೆಯರೆಗುಲ್ಲೆರ್. ಸಂಘದ ರಜತ ಮಹೋತ್ಸವ ಸಮಿತಿದ  ಸಂಚಾಲಕ ಶರೀಫ್ ಕಾರ್ಕಳ, ಸಂಘದ ರಾಜ್ಯ ಸಮಿತಿ ಸದಸ್ಯ ಕಿರಣ್ ಮಂಜನಬೈಲು, ರಾಷ್ಟ್ರೀಯ ಸಮಿತಿ ಸದಸ್ಯ ಅರುಣ್ ಕುಮಾರ್ ಶಿರೂರು ಗೌರವ ಉಪಸ್ಥಿತಿಡುಪ್ಪುವೆರು.

ಕ್ರೀಡಾಕೂಟಡ್  ಓಟ, ಉದ್ದ ಜಿಗಿತ, ರಿಲೇ, ಹಗ್ಗಜಗ್ಗಾಟ, ಮಡಕೆ ಉಡೆಪಿನ  ಸ್ಪರ್ಧೆ, ಸ್ಪೋ ಬೈಕ್ ರೇಸ್, ಈಜು ಸೇರಿನಂಚ  ಬೇತೆ ಬೇತೆ  ಮನರಂಜನಾ ಸ್ಪರ್ಧೆಲೆನ್ ಏರ್ಪಾಡ್ ಮಲ್ದುಂಡ್. 40ವರ್ಷ ತಿರ್ತುದಕ್ಲೆಗ್, 40ವರ್ಷ ಮಿತ್ತುದಕ್ಲೆಗ್ ಬೊಕ್ಕ  50ವರ್ಷ ಮಿತ್ತುದಕ್ಲೆಗ್ ಒಟ್ಟು ಮೂಜಿ  ವಿಭಾಗಡ್  ಸ್ಪರ್ಧೆಲು  ನಡಪರೆಗುಂಡ್.

ಪಂತೊಡ್  ಗೆಂದಿನಕ್ಲೆಗ್  ವಿಶಿಷ್ಟ ರೀತಿಡ್ ತಯಾರ್ ಮಲ್ದಿನ ವೇದಿಕೆಡ್  ಪದಕ ಕೊರ್ಪಿನ  ಮುಖೇನ ಗೌರವ ಕೊರ್ಪುಂಡ್. ಅಂಚೆನೇ ನವೆಂಬರ್ ತಿಂಗೊಲುಡ್  ನಡಪುನ ರಜತ ಮಹೋತ್ಸವ ಸಂಭ್ರಮದ ಸಮಾರೋಪ ಸಮಾರಂಭಡ್  ವಿಜೇತೆರೆಗ್  ಇನಾಮು  ಕೊರ್ಪುಂಡ್  ಪಂಡುದು ಆರು ಮಾಹಿತಿ ಕೊರಿಯೆರು.

ಸುದ್ದಿಗೋಷ್ಠಿಡ್  ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ, ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ, ರಾಜ್ಯ ಸಮಿತಿ ಸಮಿತಿ ಸದಸ್ಯ ಕಿರಣ್ ಮಂಜನಬೈಲು ಉಪಸ್ಥಿತರಿತ್ತೆರು.