ಈ ಬದುಕ್ ನರಮಾನಿಗ್ ಏತೋ ಜನ್ಮದ ಪುಣ್ಯೊಡ್ ತಿಕ್ಕುನ ವರದಾನವಾದ್ ತಿಕ್ಕನವ್.ಮಾತಾ ಜೀವಿಲೆಡ್ದ್ ಶ್ರೇಷ್ಠವಾಯಿನವ್ ನರಮಾನಿ ಜನ್ಮ.ಅಂಚಾದ್ ಈ ಶ್ರೇಷ್ಠವಾಯಿನ ಜನ್ಮೊಗ್ ಬತ್ತಿಬೊಕ್ಕ ನರಮಾನಿ ತನ್ನ ಬದುಕುಡ್ ಏತ್ ಎಡ್ಡೆ ಕೆಲಸ ಮಲ್ಪುವೆನಾ ಆಯಗ್ ಕುಡೊಂಜಿ ಜನ್ಮೊಡುಲಾ ಶ್ರೇಷ್ಠವಾಯಿನ ನರಮಾನಿ ಜನ್ಮೊಡ್ ಪುಟ್ಟುದ್ ಬರ್ಪಿನ ಯೋಗಭಾಗ್ಯ ತಿಕ್ಕುಂಡ್ ಪಂಡುದ್ ತೆರಿನಕುಲು ಪನ್ಪೆರ್.
ಅಂಚಾದ್ ನಮ್ಮ ಬದುಕುಡ್ ನಮಕ್ ಜನ್ಮ ಕೊರಿನ ಅಪ್ಪೆ ಅಮ್ಮೆರೆನ್ ಪೊರ್ಲುಡೇ ತೂವೊಡ್.ಅಕುಲು ಎಂಚ ನಮ್ಮ ಜೋಕುಲ್ ಸಮಾಜೊಡ್ ಎಡ್ಡೆ ವ್ಯಕ್ತಿಯಾದ್ ಬದುಕೊಡ್ ಪಂಡುದ್ ಆಶಯೊಡ್ ತನ್ನ ಬದುಕುದ ಕಷ್ಟೊಲೆನ್ ಬದಿಕ್ ದೀದ್ ಜೋಕುಲೆನ ಎಡ್ಡೆಪ್ಪುಗ್ ಪೊರಂಬಾಟ ಮಲ್ಪುವೆರಾ ಅಂಚೆನೇ ಜೋಕುಲುಲಾ ಅಪ್ಪೆ ಅಮ್ಮನ ಋಣ ತೀರಿಸಾವೊಡಾಂಡ ಅಕ್ಲೆನ ಸೇವೆ ಮಲ್ಪೊಡಾಯಿನವ್ವ್ ಜೋಕ್ಲೆನ ಕರ್ತವ್ಯ ಆದಿಪ್ಪುಂಡ್.ಉಂದೆನ್ ಪ್ರತಿಯೊಂಜಿ ಜೋಕುಲಾ ತೆರಿದ್ ಅಪ್ಪೆ ಅಮ್ಮೆರೆನ್ ಪೊರ್ಲು ಡೇ ತೂವೊನೊಡ್.
ಈ ನಿಟ್ಟುಡ್ ಕೆಲವು ಜೋಕುಲ್ ಎಡ್ಡೆಡೇ ಅಪ್ಪೆ ಅಮ್ಮೆರೆನ ಸೇವೆ ಮಲ್ಪುವೆರ್.ಅಕಲೆಗ್ ಇಷ್ಟ ಆಪಿಲೆಕ್ಕ ಅಕ್ಲೆನ ಪುಟ್ಟು ದಿನೊನ್ ಆಚರಣೆ ಮಲ್ಪುನಕುಲು ಉಲ್ಲೆರ್.
ಇನಿ ಒಡಿಪುಡ್ ನಡತಿನ ಒಂಜಿ ವಿಶೇಷ ಸಂಗತಿ ದಾದ ಪಂಡ ತನ್ನ ಅಮ್ಮೆರೆನ ಪುಟ್ಟು ಪರ್ಬೊಗ್ ಮಗಳ್ ನೆತ್ತೆರ್ ದಾನ ಮಲ್ತುದ್ ಅಮ್ಮೆರೆಗ್ ಪುಟ್ಟು ಪರ್ಬೊಗ್ ಕೊಡುಗೆಯಾದ್ ಕೊರ್ತೊಲು.ಅಂಚಿತ್ತಿನ ಒರ್ತಿ ಶ್ರೇಷ್ಠವಾಯಿನ ಮಗಲ್ ಬೇತೆ ಏರ್ಲಾ ಅತ್ತ್,ಇಡೀ ಸಮಾಜಸೇವೆಡ್ ಪುಗರ್ತೆನ್ ಪಡೆಯಿನ ನಾಡೋಜ ಡಾ.ಜಿ.ಶಂಕರ್ ಮೆರೆನ ಮೋಕೆದ ಮಗಲಾಯಿನ ಶ್ಯಾಮಿಲಿ ನವೀನ್.
ಸಾಮಾಜಿಕ,ಧಾರ್ಮಿಕ ,ಶೈಕ್ಷಣಿಕ,ಆರೋಗ್ಯ ಕ್ಷೇತ್ರೊಗ್ ಮಹತ್ತರವಾಯಿನ ಕೊಡುಗೆ ಕೊರ್ತಿನ ಮೊಗವೀರ ಮುಂದಾಳು,ರಕ್ತದಾನ ಶಿಬಿರದ ಕ್ರಾಂತಿ ಪುರುಷೆರಾಯಿನ ನಾಡೋಜ ಡಾ|ಜಿ.ಶಂಕರ್ ಮೆರೆನ ಪುಟ್ಟು ಪರ್ಬದ ಅಂಗವಾದ್ ಬ್ರಹ್ಮಾವರದ ಶ್ಯಾಮಿಲಿ ಶನಾಯೊಡ್ ಆರೋಗ್ಯ ಇಲಾಖೆ ಕನರ್ಾಟಕ ಸರಕಾರದ ಸಹಕಾರೊಡ್ ಜಿ.ಶಂಕರ್ ಫ್ಯಾಮಿಲಿ ಟ್ರಸ್ಟ್(ರಿ.) ಅಂಬಲಪಾಡಿ,ಉಡುಪಿ,ಮೊಗವೀರ ಯುವಸಂಘಟನೆ(ರಿ.)ಉಡುಪಿ ಜಿಲ್ಲೆ ಬೊಕ್ಕ ಅಭಯಹಸ್ತ ಚಾರಿಟೇಬಲ್ ಟ್ರಸ್ಟ್ (ರಿ.)ಉಡುಪಿ ಮೊಕ್ಲೆನ ಆಯೋಜನೆಡ್,ಕೆ.ಎಮ್.ಸಿ.ರಕ್ತನಿಧಿ ವಿಭಾಗ ಮಣಿಪಾಲ ಬೊಕ್ಕ ರೆಡ್ ಕ್ರಾಸ್ ಸೊಸೈಟಿ,ಕುಂದಾಪುರದ ಸಹಭಾಗಿತ್ವೊಡ್ ನಡತಿನ ಕೋವಿಡ್ ಲಸಿಕಾಮೇಳ ಬೊಕ್ಕ ನೆತ್ತೆರ್ ದಾನ ಶಿಬಿರೊನ್ ಉದಿಪನ ಮಲ್ತಿನ ಶ್ಯಾಮಿಲಿ ನವೀನ್ ಮೇರು ತನ್ನ ಸ್ವ ಇಚ್ಚೆಡ್ ಅಮ್ಮೆರೆನ ಪುಟ್ಟು ಪರ್ಬೊಗ್ ಕೊಡುಗೆಯಾದ್ ನೆತ್ತೆರ್ ದಾನ ಮಲ್ತೆರ್.
ನಿರಂತರವಾದ್ ಸಮಾಜಸೇವೆಡ್ ತೊಡಗಿಸಾವೊಂದ್ ಬಡವೆರೆಗ್ ಆಶಾಕಿರಣವಾದ್,ಸಾಮಾಜಿಕ ಕಳಕಳಿ ದೀಯೊಂದ್ ಬದುಕುದ ಪ್ರತೀ ಕ್ಷಣಲಾ ಎಡ್ಡೆ ಬೇಲೆ ಮಲ್ತೊಂದ್ ಬರೊಂದಿತ್ತುದ್,ಉಡುಪಿದ ಭಾಗೊಡ್ ಸುಮಾರ್ 1ಲಕ್ಷೊಗುಲಾ ಜಾಸ್ತಿ ಯುನಿಟ್ ನೆತ್ತೆರ್ ದಾನದ ಶಿಬಿರೊನ್ ಆಯೋಜನೆ ಮಲ್ತುದ್ ಅವ್ವೇತೋ ಬಡರೋಗಿಲೆನ ಜೀವ ಒರಿಪಾದ್, ಉಡುಪಿ ಜಿಲ್ಲೆ ಇಡೀ ದೇಶೊಡೇ ನೆತ್ತೆರ್ ದಾನಿಲೆನ ಜಿಲ್ಲೆ ಪಂಡುದ್ ಪುಗಾತರ್ೆನ್ ಪಡೆಯರೆಗ್ ಕಾರಣಿಭೂತೆರಾಯಿನ ನಾಡೋಜ ಡಾ|ಜಿ.ಶಂಕರ್ ಮೇರು ತನ್ನ ಬದುಕುಡ್ ಮಾತ್ರ ಅತ್ತ್ ತನ್ನ ಕುಟುಂಬಲಾ ಸಮಾಜಸೇವೆಡ್ ಪಾಲ್ ಪಡೆಯುಲೆಕ್ಕ ಮಾರ್ಗದರ್ಶನ ಮಲ್ತುದೆರ್.ಅರೆನ ಬುಡೆದಿ ಶ್ರೀಮತಿ ಶಾಲಿನಿ ಶಂಕರ್ ಮೇರುಲಾ ಮೆರೆನ ಆದರ್ಶನ್ ತನ್ನ ಬದುಕುಡ್ ಅನುಸಾರಿವೊಂದುಲ್ಲೆರ್.
ಇತ್ತೆ ಅಕ್ಲೆನ ಮಗಲಾಯಿನ ಶ್ಯಾಮಿಲಿ ನವೀನ್ ಮೇರು ಅಪ್ಪೆ ಅಮ್ಮೆರೆನ ಆದರ್ಶನ್ ದುಂಬರಿತೊಂದ್ ಪೋವೊಂದುಪ್ಪುನವ್ ನಿಜವಾದುಲಾ ಲೋಕ ಮೆಚ್ಚುನ ಬೇಲೆ.ಇಂಚಿನ ಆದರ್ಶಪ್ರಿಯ ಜೋಕುಲು ಪ್ರತಿಯೊಂಜಿ ಅಪ್ಪೆ ಅಮ್ಮೆರೆಗುಲಾ ತಿಕ್ಕಡ್, ಮೊಕ್ಲೆನ ಕುಟುಂಬೊಗ್ ದೇವೆರೆನ ದಯೆ ಸದಾ ಉಪ್ಪಡ್ ಪಂಡುದ್ ಎಡ್ಡೆಪ್ಪುನ್ ಬಯಕುಗ.
by 