ಸತ್ಯ,ನ್ಯಾಯ,ನೀತಿ,ಧರ್ಮ ಪನ್ಪಿನವ್ವ್ ಬದುಕುದ ನಾಲು ಚಕ್ರೊಲು.ನರಮಾನಿ ಏಪ ಉಂದೆನ್ ತನ್ನ ಬದುಕುಡ್ ಆಳವಾಡಿಸೊಂಬೆನಾ ಆಯನ ಬದುಕ್ ಸಾರ್ಥಕ ಆಪುಂಡ್.ಪೃಕೃತಿಡ್ ಬೀಜೊಂದುಪ್ಪುನ ಗಾಳಿ,ಪರಪ್ಪುನ ನೀರ್,ಲೋಕೊಗೇ ಬೊಲ್ಪು ಕೊರ್ಪಿನ ಸೂರ್ಯದೇವೆರ್ ಏಪೊಲಾ ತಾನ್ ಕೊರಿನವ್ವೆನ್ ಪನ್ಪುಜೆರ್.ನರಮಾನಿಲಾ ತನ್ನ ಬದುಕುಡ್ ದಾದಾಂಡಲಾ ಕೊರುಂಡ ಅವ್ವೆನ್ ಪಿರ ಪಡೆಯರೆಗ್ ಬಲ್ಲಿ.ನಮ ಸಂಪಾದನೆ ಮಲ್ತಿನೇಟ್ ಒಂತೆ ಪಾಲ್ ಸಮಾಜದ ಬಡವೆರೆಗ್ ಮೀಸಲಾದ್ ದೀಯಡ ಅವ್ವೆನ್ ದೇವೆರ್ ಮೆಚ್ಚಿದ್ ನಮ್ಮ ಬದುಕುಡ್ ಒವ್ವೇ ರೀತಿದ ವಿಘ್ನ ಬರಂದಿಲೆಕ್ಕ ಕಾಪುವೆರ್. ಈ ನಿಟ್ಟುಡ್ ಒಡಿಪು ಮಲಬಾರ್ ಗೋಲ್ಡ್ & ಡೈಮಂಡ್ಸ್ ದಕುಲು ಕೊರೊನಾಪೊರ್ತುಡ್ ಕಷ್ಟೊಡಿತ್ತಿನ ಬಡವೆರೆನ ಕಣ್ಣನೀರ್ ಒಚ್ಚುನ ಬೇಲೆ ಮಲ್ತುದ್ ಮಲಬಾರ್ ಸಂಸ್ಥೆ ಲೋಕೊಗೇ ಮಾದರಿಯಾತುಂಡ್.ಪಂಡುದ್ ಕರ್ನಾಟಕ ತುಳುಸಾಹಿತ್ಯ ಅಕಾಡೆಮಿದ ಗುರ್ಕಾರೆರಾಯಿನ ದಯಾನಂದ ಕತ್ತಲ್ ಸಾರ್ ಪಂಡೆರ್.
ಆರು ಸೋಮವಾರ ನಡತಿನ ಕೊರೊನಾ ಸಂಕಷ್ಟ ಪೊರ್ತುಡ್ ಸುಮಾರು 6000 ಗ್ ಲಾ ಜಾಸ್ತಿ ಫುಡ್ ಕಿಟ್ ಕೊರ್ದ್ ಬಡವೆರೆನ ಬಂಜಿದ ಬಡಾವು ತೆಕ್ಕಾವುನ ಬೇಲೆ ಮಲ್ತಿನ ಒಡಿಪು ಮಲಬಾರ್ ಗೋಲ್ಡ್ & ಡೈಮಂಡ್ಸ್ ಮೊಕ್ಲೆಗ್ ಕರ್ನಾಟಕ ತುಳುಸಾಹಿತ್ಯ ಅಕಾಡೆಮಿದ ವತಿಡ್ದ್ ಮಾನಾದಿಗೆದ ಓಲೆನ್ ಕೊರ್ಪಿನ ಸಭಾಕಜ್ಜೊಡ್ ಒಡಿಪು ಮಲಬಾರ್ ಸಂಸ್ಥೆದ ಮುಖ್ಯಸ್ಥೆರಾಯಿನ ಹಫೀಜ್ ರೆಹಮಾನ್ ಮೆರೆಗ್ ಮಾನಾದಿಗೆ ಮಲ್ತುದ್ ಪಾತೆರಿಯೆರ್.
ಕೊರೊನಾ ಸಂಕಷ್ಟದ ಪೊರ್ತುಡ್ ಬಡವೆರೆಗ್ ಭದ್ರತೆ ಕೊರ್ಪಿನ ಬೇಲೆನ್ ಮೊಕುಲು ಮಲ್ದಿನವ್ ನಿಜವಾದುಲಾ ಪೆರ್ಮೆದ ಸಂಗತಿ.ಇನಿ ಕೋಡೆಡ್ ವ್ಯವಹಾರೊಡ್ ತಂಕುಲೆಗ್ ಏತ್ ಬರ್ಪುಂಡುಂದೇ ಕಾತೊಂದುಪ್ಪುನ ಕಾಲಘಟ್ಟೊಡ್ ಕೊರೊನಾದ ಪೊರ್ತುಡ್ ತನ್ನ ಸಂಸ್ಥೆಗ್ ದಾಲ ವ್ಯವಹಾರ ಇತ್ತುಜಿಡಲಾ ಇಡೀ ಉಡುಪಿ ಜಿಲ್ಲೆದ ಮೂಲೆ ಮೂಲೆಗ್ ಪೋದು ಬಡವೆರೆಗ್ ಆಶಾಕಿರಣ ಆತೆರ್ ಪಂಡುದ್ ಅಕಲೆನ ಈ ಬೇಲೆನ್ ಮೆಚ್ಚಿದ್ ತುಳುಸಾಹಿತ್ಯ ಅಕಾಡೆಮಿಡ್ದ್ ಮಾನಾದಿಗೆದ ಓಲೆನ್ ಕೊರೊಂದುಲ್ಲ ಪಂಡೆರ್.
ವೇದಿಕೆಡ್ ಉಪಸ್ಥಿತರಿತ್ತಿನ ತುಳುಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ತುಳುನಾಡುದ ಗಾನಕೋಗಿಲೆ ಪಂಡುದೇ ಪುಗರ್ತೆ ಪಡೆಯಿನ ಕಲಾವತಿ ದಯಾನಂದ ಮೇರ್ ತನ್ನ ಸಿರಿಕಂಠೊಡ್ ಪೊರ್ಲುದ ಪದ ಪಂಡುದ್ ಕಜ್ಜೊಗ್ ರಂಗ್ ದಿಂಜಾಯೆರ್.
ವೇದಿಕೆಡ್ ಅಕಾಡೆಮಿದ ಪದುಕೆರ್ ಆಳುಪ ರಾಜವಂಶಸ್ಥೆರಾಯಿನ ಡಾ.ಆಕಾಶ್ ರಾಜ್ ಜೈನ್ ಪಾತೆರ್ದ್ ಮಲಬಾರ್ ಸಂಸ್ಥೆ ಮಲ್ಪುನಂಚಿನ ಸಮಾಜಸೇವೆ ಬಾರೀ ಅರ್ಥಪೂರ್ಣವಾಯಿನವ್ವ್.ನಿರಂತರವಾಯಿನ ಸೇವೆಗ್ ಅಕಾಡೆಮಿ ಇನಿ ಅಕ್ಲೆನ್ ಗುರುತಿಸಾವೊಂದುಂಡ್ ಪಂಡೆರ್.
ತುಳು ಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಉದಯವಾಣಿ ಪತ್ರಕರ್ತೆ ನರೇಂದ್ರ ಕೆರೆಕಾಡು ಬೊಕ್ಕ ಕಲಾಕುಂಭ ಸಾಂಸ್ಕೃತಿಕ ವೇದಿಕೆದ ಅಧ್ಯಕ್ಷೆರ್ ನಾಗೇಶ್ ಕುಲಾಲ್ ವೇದಿಕೆಡ್ ಉಪಸ್ಥಿತೆರಿತ್ತುದ್ ಮಲಬಾರ್ ಸಂಸ್ಥೆಗ್ ಅಭಿನಂದನೆ ಮಲ್ತೆರ್.
ತುಳುಸಾಹಿತ್ಯ ಅಕಾಡೆಮಿದ ಪದುಕೆರ್ ಒಡಿಪು ತುಳುಕೂಟದ ಸದಸ್ಯೆರಾಯಿನ ತಾರಾ ಉಮೇಶ್ ಆಚಾರ್ಯ ಮೇರು ಕಜ್ಜೊದ ಬಗ್ಗೆ ಪ್ರಾಸ್ತವಿಕ ಪಾತೆರ್ದ್ ಮಲಬಾರ್ ಸಂಸ್ಥೆದಕ್ಲೆಗ್ ಅಭಿನಂದನೆ ಮಲ್ತೆರ್.
ಮಲಬಾರ್ ಗೋಲ್ಡ್ & ಡೈಮಂಡ್ಸ್ ಉಡುಪಿದ ಸ್ಟೋರ್ ಮೆನೇಜರ್ ರಾಘವೇಂದ್ರ ನಾಯಕ್ ಬೊಕ್ಕ ಪುರಂದರ್ ತಿಂಗಳಾಯ,ಬೊಕ್ಕ ಮಲಬಾರ್ ಸಿಬ್ಬಂದಿಲು ಉಪಸ್ಥಿತರಿತ್ತೆರ್
by 