ಕಟೀಲ್ ಕನಕ ಸಂಭ್ರಮ”ಗ್ ಮುಗಿತಲದ ಚುಕ್ಕೆ

“ಕಟೀಲ್ ಕನಕ ಸಂಭ್ರಮ”ಗ್ ಮುಗಿತಲದ ಚುಕ್ಕೆ

#

ಯಕ್ಷಗಾನ ವಿಶ್ವಮಾನ್ಯ ಕಲೆ : ನಳಿನ್ ಕುಮಾರ್ ಕಟೀಲ್

#

ಹಳೆಯಂಗಡಿ: ಯಕ್ಷಗಾನ ವಿಶ್ವ ಮಾನ್ಯ ಕಲೆ ಆದ್ ಪುಗರ್ತೆ ಪಡೆದ್ಂಡ್.ತುಳುನಾಡ್ ದ ಈ ಗಂಡುಕಲೆಕ್ಕ್ ಮಾತೆರ್ಲ ಪ್ರೋತ್ಸಾಹ ಮಲ್ತ್ ದ್ ಅವೆನ್ ಒರಿಪಾವೊಡು ಪಂದ್ ಮಾಜಿ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಪಂಡೆರ್.
ಆರ್ ಪಾವಂಜೆ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ದೇವಸ್ಥಾನದ ವಠಾರೊಡು ನ. 16 ಬೊಕ್ಕ ನ
17 ತಾರೀಕ್ ಗ್ ನಡತಿನ ಯಕ್ಷಗಾನದ ಚಾರ್ಲಿ ಚಾಪ್ಲಿನ್ ಪುಗರ್ತೆದ ಸೀತಾರಾಮ್ ಕುಮಾರ್ ಕಟೀಲ್ ಮೆರೆನ ಯಕ್ಷಯಾನದ 50 ನೇ ವರ್ಷದ ನೆಂಪುದ “ಕಟೀಲ್ ಕನಕ ಸಂಭ್ರಮ 2024” ಕಾರ್ಯಕ್ರಮದ ಮುಗಿತಲದ ಲೇಸ್ ಡ್ ಪಾತೆರಿಯೆರ್.

ಕುಡೊರಿ ಮಲ್ಲ ಬಿನ್ನೆರಾದ್ ಬತ್ತಿತ್ತಿನ ಕಲಾ ಪೋಷಕೆರ್ ಕೃಷ್ಣಪ್ರಸಾದ್ ಅಡ್ಯಂತಾಯೆರ್ ಪಾತೆರ್ದ್, ಯಕ್ಷಗಾನದ ಹಾಸ್ಯೊಗು ಪೊಸ ಭಾಷ್ಯ ಬರೆಯಿನ ಕಲಾವಿದೆ ಸೀತಾರಾಮ್ ಕಟೀಲ್ ಪಂದ್ ಪಂಡೆರ್.
ವೇದಿಕೆಡ್ ಬಿನ್ನೆರಾದ್ ಕಿಯಾನಿಕ್ಸ್ ಮಾಜಿ ಅಧ್ಯಕ್ಷೆರ್ ಹರಿಕೃಷ್ಣ ಬಂಟ್ವಾಳ್,
ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘದ ಅಧ್ಯಕ್ಷೆರ್ ಚಂದ್ರಶೇಖರ ನಾನಿಲ್, ಕಾರ್ಯದರ್ಶಿ ಭಾಸ್ಕರ ಸಾಲ್ಯಾನ್, ಉದ್ಯಮಿ ಬಾಬು ಗೋವಿಂದ ಪೂಜಾರಿ, ಕಾರ್ಯಕ್ರಮ ದ ರೂವಾರಿ ಸೀತಾರಾಮ್ ಕುಮಾರ್ ಕಟೀಲ್ ಇತ್ತೆರ್.
ಈ ಪೊರ್ತುಡು ಯಕ್ಷಕಲಾ ಪೋಷಕೆರೆಗ್ ಯಕ್ಷ ಕಿರೀಟ ಸಹಿತ ಯಕ್ಷ ರಾಜ್ಯೋತ್ಸವ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.
ಶರತ್ ಶೆಟ್ಟಿ ಕಿನ್ನಿಗೋಳಿ ಬೊಕ್ಕ ಪ್ರಕಾಶ್ ಆಚಾರ್ಯ ಕಿನ್ನಿಗೋಳಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.
ಕಮಲಶಿಲೆ ಮೇಳದ ವಿಶ್ವನಾಥ ಪೂಜಾರಿ ಬೊಕ್ಕ ಕೂಟದಕ್ಲೆರ್ದ್ ಸುಂದೋಪ ಸುಂದ ಬಡಗು ಯಕ್ಷಗಾನ ನಡತ್ಂಡ್. ಅವೆರ್ದ್ ಬೊಕ್ಕ ಯಕ್ಷಾರಾಧನ ನೂಪುರ ತಂಡದ ಸದಸ್ಯರೆರ್ದ್ ಸುದರ್ಶನ ವಿಜಯ ಯಕ್ಷಗಾನ ನಡತ್ಂಡ್.
ಐತಾರ ಬೊಲ್ಪುಗು ಗಣಪತಿ ಸ್ತುತಿ ಆದ್ ದ್ರಿಯಾ ಆಚಾರ್ಯ ಮಂಚಕಲ್ ಮೆರೆರ್ದ್ ನೃತ್ಯವೈಭವ, ಮಯೂರ ಪ್ರತಿಷ್ಠಾನದಕ್ಲೆರ್ದ್ ಪರಂಪರೆ ಸ್ತ್ರೀ ವೇಷ,ಕುಮಾರ ಸಾಂಸ್ಕೃತಿಕ ಪ್ರತಿಷ್ಠಾನರ್ದ್ ಶ್ಯಮಂತಕ ಮಣಿ ಬೊಕ್ಕ ಬೊಳಂತಿಮೊಗರು ತಂಡದಕ್ಲೆರ್ದ್ ವೀರ ವೈಷ್ಣವ ತಾಳಮದ್ದಳೆ ನಡತ್ಂಡ್. ಮಧ್ಯಾಹ್ನ ಆಳ್ವಾಸ್ ಧೀಂಕಿಟ ಕೂಟದಕ್ಲೆರ್ದ್ ನರ ಶಾರ್ದೂಲ ಯಕ್ಷಗಾನ ಪ್ರದರ್ಶನ ನಡತ್ ದಿತ್ತ್ಂಡ್.