ಕೃಷ್ಣೆ ಗೋಕುಲ ಬಾಲ್ಯದ ನೆಂಪು.

ಕೃಷ್ಣೆ – ಗೋಕುಲ :
ಬಾಲ್ಯೊದ ಪೊರ್ಲುದ ನೆಂಪುಲು
: ಈ ದೇಶದ ಜನ ಇನಿತ ದಿನೊಟುಲಾ ನಿಚ್ಚ ಪೂಜಿಪುನ 'ಕೃಷ್ಣೆ' ಪನ್ಪಿ ಲೀಲಾಮೂರ್ತಿ ಜನ್ಮಿತಿನಿ ಮಾತ್ರ ಪೋಡಿಗೆದ, ದಾದ ಆಪುಂಡ ಪನ್ಪಿ ಎಲ್ಲೆದ ನಿಕ್ಕಿ ದಾಂತಿನ ಒಂಜಿ ಏವುದೆಪ್ಪುದ ಪೊರ್ತುಡು.

ಆಂಡ ಕೃಷ್ಣೆ ಪುಟುದು ಬರ್ಪೆ, ಬರೊಡೆ ಪನ್ಪಿ ನಂಬೊಳಿಗೆ ಆಕಾಲದ ಸನ್ಯಾಸಿಳು,ಸಜ್ಜನೆರೆಗ್ ಇತ್ತ್ಂಡ್.ಕಾರಣ ದೇವೆರ್ ಅವತರಿಪರೆ ಬೋಡಾಯಿನ ಕಾಲ ಕೂಡ್ದ್ ಬತ್ತಿನ‌‌ ಪೊರ್ತು ಅವ್ವಾದಿತ್ತ್ಂಡ್. ಸನ್ಯಾಸಿಳು ಮಲ್ಪುನ ಪೂಜೆ,ತಪಸ್ಸ್ ದ ಪಲ ಎಡ್ಡೆಪ್ಪುದ ಬಯಕೆನೇ ಆದ್ ದೇವೆರ್ ಅವತರಿತೆರ್.
ದೇವೆರ್ ಅವತರಿತಿನಿ ಅಂದ್ ,ಆಂಡ ಕರ್ಪಿಲ್ಲ್ ದ ಕತ್ತಲೆಡ್. ಇಂಚ ದಾಯೆಗ್ …? ಆ ಕಾಲೊಡು ಧರ್ಮ ಕತ್ತಲೆಡ್ ಇತ್ತ್ಂಡ್,ಸತ್ಯ ಕರ್ಪಿಲ್ಲ್ ಡ್ ಕೈಕ್ ಕೋಲ ಪಾಡೊಂದು ಕಣ್ಣನೀರ್ ಗೆತ್ತೊಂದಿತ್ತ್ಂಡ್.
ಅಂಚಾದೆ ನಡುಇರ್ಲ್ ಡ್ ಜನ್ಮಿತಿನ ದೇವೆರ್ ಸುರೂಟು ತಾನ್ ಏರ್ಂದ್ ಪೆತ್ತಿ ಅಪ್ಪೆಗ್ – ಅಮ್ಮೆರೆಗ್ ತೋಜಾವೆ,ಅಕಲೆಗ್ ದೈರ್ಯ ಪನ್ಪೆ, ತನನ್ ಓಡೆಗ್ ಕೊಣೊದು ,ಏರೆಡ ಕೊರೊಡು ಪಂಡ್ ದ್ ಪಿರ ಪುಟಿ ಪೊರ್ತುದ ಬಾಲೆದ ಒರುವಾದ್ ಬದಲಾಪೆ.
ವಸುದೇವೆ ಬಾಲೆನ್ ಪತೊಂದು ಕರ್ಪಿಲ್ಲ್ ಡ್ದ್ ಪಿದಾಡ್ನಗ ಬಾಕಿಲ್ ತನ್ನಾತೆಗೆ ಜಪ್ಪುಂಡು,ಕಾವಲ್ ದಾಕುಲು ನಿದ್ರೆಡೇ ಉಪ್ಪುವೆರ್.ವಸುದೇವೆ ಸುದೆನ್ ದಾಂಟುನೆಂಚ ? ಯೋಚಿಪುನಗ ಗಾಲಿ ಬರ್ಸೊದ ಅಬ್ಬರೊಡು ತಮೆಲೊಂದು ಪೊವೊಂದಿಪ್ಪುನ ಸುದೆ ತೆಲಾದ್ ಸಾದಿ ತೋಜಾವುಂಡು.ದಾಂಟ್ ದ್ ಸುದೆತ ಆ ಬರಿಕ್ ಮುಟ್ಟುನಗ ವಸುದೇವಗ್ ಇಸ್ಮಯ ಆಪುಂಡು.ಯದು ಕುಲತ ಗುರುಕುಲು, ಗೋಕುಲದ ಜನ ಬಾಲೆನ್ ಗೆತೊನುವೆರ್ ಅಕುಲು ಕನತ್ತಿನ ಪೊಣ್ಣು ಬಾಲೆನ್ ವಸುದೇವಗ್ ಕೊರ್ಪೆರ್.ಇಂಚ ದೇವೆರ್,ಬಾಲೆ ದೇವೆರ್ ಕೈದಾಂಟ್ ದ್ ಜೋಕೆಡ್ ಗೋಕುಲ ಸೇರುವೆರ್.
ಕರ್ಪಿಲ್ಲ್ ಡ್ ಕಣ್ಣನೀರ್ ಡ್ ಕೈ ದೆಕ್ಕೊಂದುಪ್ಪುನ ಅಪ್ಪೆ ದೇವಕಿಗ್ ,ಅಮ್ಮೆ ವಸುದೇವಗ್ ಕಷ್ಟತಪ್ಪೂಜಿ.ಪುಟಿ ಬಾಲೆ ದೇವೆರಾಂಡಲಾ,ದೇವೆರೆನ್ ಪೆತ್ತಿನ ಅಪ್ಪೆಗ್ ಬಾಲೆನ್ ಕಳೆಒನಿನ ದುಖೊ ಒದಗುಂಡು.ಆಂಡ ದೇವೆರ್ ನಂದನ‌ ಇಲ್ಲಡ್ ಯಶೋದೆನ ಮೋಕೆಡ್ ಬುಲೆವೊಂದುಲ್ಲೆ ಪನ್ಪುನ ಸಮಾಧಾನ ಮಲ್ತೊನುವೆರ್ ವಸುದೇವ – ದೇವಕಿ.ಕಂಸನ ನೀಚ ಮನಸ್ಸ್ ಗ್ ದೇವೆರ್ ತತ್ತ್ ದ್ ಬದ್ ಕ್ಯೆರ್ ಆಂಡ ಬದಲ್ ಗ್ ಬತ್ತಿನ ಪೊಣ್ಣುಬಾಲೆನ್ ಕೆರ್ಯರೆ ಕಂಸ ತಯಾರಾನಗ ಬಾಲೆ ಕೈಜಾರ್ದ್ ಆಕಾಸೊಗು ಏರ್ದ್ ಕಂಸಲೆಕ್ಕತ್ತಿ ದುಷ್ಟೆ ಸೈಯ್ಯರೆ ದಿನ‌ ದೀದಾತ್ಂಡ್ ಪಂಡ್ ದ್ ಬಾಲೆ ಮಾಯಕ ಆಪುಂಡು.ಉಂದು ವಿಧಿ ಮಲ್ತಿನ ನಿರ್ಣಯೊ.
ದೇವೆರ್ ಪಂಡ ಧರ್ಮ.ದೇವೆರಡ ಧರ್ಮ ಉಂಡು.ಧರ್ಮ ಕರ್ತವ್ಯ ಆದ್ ಅವತರಿತ್ಂಡ್ ಅಂಚಾದ್ ದೇವೆರ್ನವು “ಧರ್ಮಾವತಾರ”. ಧರ್ಮನೇ ಆದಿತ್ತ್ಂಡಲಾ ಗುಟ್ಟುಡು ಮಧುರೆಡ್ದ್ ಗೋಕುಲೊಗು ಪೋವೊಡಾಂಡ್ ದಾಯೆಗ್ ? ಧರ್ಮ ಬಲಪೊಡು,ಗಟ್ಟಿಮುಟ್ಟಾವೊಡು,
ಅಂಚಾಂಡ ಮಾತ್ರ ದ್ವಾಪರ ಯುಗತ ಯುಗ ಧರ್ಮ‌ಪ್ರಕಾರ ನೆಗಪರೆ ಸಾಧ್ಯ.ಈ ಸತ್ಯ ದೇವೆರೆಗ್ ಗೊತ್ತಿತ್ತ್ಂಡ್.ಅಂಚಾದೆ ಬಾಲ್ಯೊಡ್ದೆ ದೇವೆರ್ನ ಇಸ್ಮಯ ಕಜ್ಜೊಲು ನಡಪುಂಡು.ಉಂದು ಅಪ್ಪೆ ಪೆತ್ತಿನ ಬಾಲೆನ ? ಅತ್ತ್ ದೇವೆರ್ನ ಅವತಾರನ ಪನ್ಪಿನ ಸವಾಲ್ ಗ್ ಉತ್ತರ ತಿಕ್ಕೂಜಿ ಕೃಷ್ಣನ ಬಾಲ್ಯೊದ ಲೀಲೆಡ್.
ಆಯೆ ಪಂಡ ಕರಿಯೆ – ಕೃಷ್ಣೆ(ಧರ್ಮ – ಕರ್ತವ್ಯ) ತೆಲಿತೆ,ಮಾತೆರೆನ್ ಲಾ ತೆಲಿಪಾಯೆ,ಕಬ್ಬೆ ಬೂರಿಯೆ,
ಪರಪರೆ ಸುರು ಪತಿಯೆ,ಕುಲ್ಲಿಯೆ ತಪ್ಪು ಪೆಜ್ಜೆ ದೀದ್ ನಡತೊಂದು ಮಲ್ಲ ಪೋಕುರಿದ ಬಾಲೆ ಆದ್ ಬುಲೆಯಿ.ಏತ್ ಪೋಕುರಿಯಾ ಆತೇ ಹಟಮಾರಿಯಾದ್ ಇತ್ತೆ.ಇಸತ ಮಿರೆ ಪತೊಂದು ಬತ್ತಿನ ಪೂತನಿನ್ ಕೆರ್ದ್ ಗೋಕುಲೊಡು‌ ಇಸ್ಮಯ ಉಂಡು ಮಲ್ಪುವೆ.
ಶ್ರೀರಾಮ ದೇವೆರ್ನ ಬಾಲ್ಯದ ಗೊಬ್ಬುಲು, ಪೋಕುರಿಲು ಬಾಲ್ಯದ ದಿನಕುಲೊಟ್ಟುಗೆ ಕರಿದ್ ಪೋಪುಂಡು,ಅವು ವೊವುಲ ಲೀಲೆ ಆಯಿನೇ ಇಜ್ಜಿ.
ಬುದ್ಧಲೆಕ್ಕತ್ತಿ ಬೇತೆ ಉದ್ದಾರಕೆರ್ನ ಗೌರವದ
ಬದ್ ಕ್ ದ ಎದುರುಡು ಅಕಲೆನ ಬಾಲ್ಯ ಗಮನೊಗು ಬರ್ಪುಜಿ. ಆಂಡ ಈ ಪೋಕುರಿ ಕೃಷ್ಣನ ಬಾಲ್ಯ ಆನಿಲಾ ಊರೊರ್ಮೆ ಪ್ರತಿ ಇಲ್ಲಡ್ ಲಾ
ಇತ್ತ್ಂಡ್,ಇನಿಗ್ ಲ್ ಬಾಲೆಲು ಇತ್ತಿನ‌ ಇಲ್ಲ್‌ ಈ ಕೃಷ್ಣನ ಪೋಕುರಿಲು ಮೆರೆವೊಂದುಂಡು.ಉಂದು‌ ಕೃಷ್ಣನ ಬಾಲ್ಯ.ಪ್ರತಿ‌ ಅಪ್ಪೇಲ್ಲು‌ ಅನುಭವಿಪುನ ಗಟ್ಟಿ ಆದ್ ಮನಸ್ ಡ್ ಉಂತುನ ಮೋಕೆದ ಗೇನ.
ವರ್ಣಿಪರೆ ಆವಂದಿನ ,ಆಂಡ ಅನುಭವಿತ್ ದ್ ಪಿಂದೊನೊಡಾಯಿನ ಸತ್ಯ.ಅಂಚಾದೆ ಜೋಕುಲು ಪಂಡ ಪೋಕಯರಿ,ಪೋಕುರಿ ಪಂಡ ನೆನಪಾಪಿನಿ ಕೃಷ್ಣೆ.
ಜೋಕುಲು ಬಾಲೆಲು ದಿಂಜಿದಿತ್ತಿ ಇಲ್ಲ್ ಪಂಡ ಪೆತ್ತ ಕೈಕಂಜಿ ನಿಲ್ಕೆ ಇಪ್ಪುನ ಕಿದೆ ಪಂಡ್ದ್ ‘ನಂದಗೋಕುಲ’ ಸಬ್ದೊಗ್ಗುನ ಅರ್ಥ. ಅಂಚೆನೆ ಪೋಕುರಿ ಜೋಕುಲು, ಉರ್ಕರ್ನ ಗೋ ಸಂಪೊತ್ತು, ಸಜ್ಜನೆರಾಯಿನ ಪಾಪದ ಜನ ಮಂದೆ ಗೋಪಾಲಕೆರ್ ಇಪ್ಪುನ ನಂದಗೋಪನ ಊರು ನಂದಗೋಕುಲೊಡು ‘ಕೃಷ್ಣ’ ಪನ್ಪಿನ ‘ಧರ್ಮ’ – ಕರ್ತವ್ಯೊ ಬರ್ಪಿನೇ ಒಂಜಿ ಇಸ್ಮಯ. ಬತ್ತಿನ ಧರ್ಮ ರೂಪುದ ಕೃಷ್ಣೆ ಅಂಬಿ – ಗೋ ಮೂತ್ರದ ಪರಿಮಳ, ಪೇರ್ – ಕೊಜಪು – ಬೊಲ್ಯನೈತತ ಸುವಾಸನೆ ಇಂಚ ಇತ್ತಿ ಒಂಜಿ ಪರಿಸರೊಟು ಕೃಷ್ಣೆ ಪನ್ಪಿ ಧರ್ಮದ ಬಾಲ್ಯ ಬುಲೆವೊಂದಿಪ್ಪುಂಡು. ಗೋಕುಲ‌ ಪೇರ್ ದಾತೆ ಬೊಲ್ದುದ ಸ್ವಚ್ಛ ಮನಸ್ಸ್ ದ ‘ಜನಪದೆರ್’ ಇಪ್ಪುನ ಜನಮಂದೆ ಉಪ್ಪುನ ಉಊರು . ಅಂಚಾದೆ ಸಹಜವಾದ್ ಕೃಷ್ಣನ ಮನಸ್ಸು ‘ಜನಪದರೆಡ್ದ್ ಪ್ರೇರಣೆ ಪಡೆದ್ ಆಯನ ಬಾಲ್ಯದ ಬದ್ ಕೇ ‘ಜಾನಪದ’ ಆಂಡ್.ಈ ಕೃಷ್ಣನ ಮನಸ್ಸ್ ದುಂಬುಗು “ಜಗನ್ನಾಥೆ” ಆವರೆ, ಆ ಪುಗಾರ್ತೆಗ್ ಕಾರಣ ಆವರೆ ತಯಾರಾಂಡ್.‌ಪೆತ್ತೊಲು,ಪೆತ್ತ ಮೇಪುನಾಕುಲು – ಪೆತ್ತ ತಂಕುನಾಕುಲು,ಆಕಲ್ನ ಪೋಂಜೊವುಲೆನ
ಒಡನಾಟೊಡು‌ ಸುದ್ದ ಆಚಾರ – ವಿಚಾರ,ಪ್ರಶ್ನಿಪಂದೆ ಹಿರಿಯೆರೆನ್ ಅನುಸರಿಪುನ ಒಂಜಿ ಕ್ರಮತ ಮನಸ್ಸ್ ಡ್ ಕೃಷ್ಣನ ಬಾಲ್ಯ ಬಲೊಟು ಬೊಲೆಂಡ್.
ಜೋಕುಲು‌ ಇತ್ತಿನಲ್ಪ ಗೊಬ್ಬು,ಪಾಠ, ಅರ್ತಿ ಕುಸಲ್ ಪೂರ ಇಪ್ಪುನವು.ಈ ಜೋಕುಲಾಟಿಕೆಗ್ ಗೋಕುಲ ಸಾಕ್ಷಿಯಾದ್ ಇತ್ತ್ಂಡ್.ಈ ಅರ್ತಿಕುಸಲ್ ಗ್ ಕೃಷ್ಣನ ಜೋಕುಲಾಟಿಗೆಲಾ ಸೇರ್ದ್ ಲಕ್ಕಾವುನಲಾ ಒಂಜಿ ಗೊಬ್ಬು ಆಪುಂಡು.
ಗೋಕುಲೊಡು ಪೇರ್,ಕೊಜಪು,ಬೊಲ್ಯನೈ ,ನೈ ಅತ್ತಾಂದೆ ಬೇತೆ ದಾದುಂಡು.ಅವು ಮಾತ್ರ ಮಾತ ಇಲ್ಲಲ್ ಇಪ್ಪುನ ಸಂಪೊತ್ತು.ಜೋಕುಲಾಟಿಕೆದ ಕಳವುಗು ಉಂದೇ ವಸ್ತುಳಾಂಡ್.ಲಕ್ಕಾನಗ ಕರ ದರಿಯಿನಲಾ ಉಂಡು,ಬೊಲ್ಯನೈ ಲಕ್ಕಾದ್ ತಾನ್ ತಿಂದ್ ದ್ ಬೊಕ್ಕೊರಿಯನ ಮಿತ್ತ್ ದೂರು ಪಾಡ್ಯರೆ ಆಯನ ಮೋನೆಗ್ ರೆಂಕಾವುನ‌ ಗೊಬ್ಬುಲಾ ಇತ್ತ್ಂಡ್.ಇಂದ್ ಪೂರ ರಾಮ – ಕೃಷ್ಣೆರ್ ಬೊಕ್ಕ ಅಕಲೆನ ಸೈನ್ಯದ ಕೆಲಸ ಪಂಡ್ ದ್ ತೆರಿದ್ಂಡಲಾದ
ಗೋಪಿಕೆರ್ನ ದೂರು ಯಶೋದಮ್ಮನ ಮುಟ್ಟ ಮಾತ್ರ ಪೋಪಿನತ್ತಾಂದೆ ವಾ ಇಲ್ಲದ ಗುರ್ಕಾರ್ಲೆನ ಮುಟ್ಟ ಪೋತಿನೇ ಇಜ್ಜಿ.ಯಶೋದೆನ ಇಲ್ಲಗ್ ಪೋಂಡ ಕೃಷ್ಣನ್ ಒರ ತೂವೊಲಿ ,ಗುರ್ಕಾರ್ಲೆಡ ಪಂಡ ಕೃಷ್ಣ ಕುಡ ಲಕ್ಕಾವರೆ ಬರಯೆ ಪನ್ಪಿನ ಆಲೋಚನೆಡ್ ಪನ್ತಿನೇ ಇಜ್ಜಿ.ಕೃಷ್ಣೆ ಲಕ್ಕಾವರೆ ಬರೊಡು ಮದೆಟ್ ಉಂತುದು ಆಯನೊರ ಅರಾದ್ ಪತ್ತೊಡು ಪನ್ಪಿನ ಆಸೆ ಗೋಪಿಕೆರ್ನ ಆದಿತ್ತ್ಂಡ್, ಇಂಚ ಎನ್ನೊಲಿಯಾ ದಾನ್ನ. ಕೃಷ್ಣ ಈ ಏರ್ ಪನ್ ಬಾಲೆ ಆದುಪ್ಪುನಗ ಪೂತನಿನ್ ಕೆರಿಯೆ,

ಪೆತ್ತ ಮೇತೊಂದು,ಕೊಲಲ್ ಉರ್ತೊಂದು, ಜೋಕುಲೆನ‌ ಒಟ್ಟುಗು ಗೊಬ್ಬೊಂದೇ ಕೆಲವು ರಕ್ಕಸೆರ್ನ್ ಕೆರಿಯೆ ಕೃಷ್ಣೆ. ಈ ಇಸ್ಮಯೊಲೆನ್ ತೂಯಿನ ಕೃಷ್ಣನ ಒತ್ತರ್ಮೆದ ವಿಜಯೆ ಒಂಜಿ‌ದಿನ ಕೇನುವೆ…ಕೃಷ್ಣ ಸತ್ಯ ಪನ್ ? ಈ ಏರ್ ? “ಈ ಎಂಚ ಎನ್ನುವನಾ ಅಂಚೆನೆ ಯಾನ್” .ಇಂಚ ಕೃಷ್ಣೆ ಉತ್ತರಿಪುವೆ ವಿಜಯಡ ಬೇತೆ ಪಾತೆರೊಂದು ಕೊಲಲ್ ಉರ್ತೊಂದು ಮರಕ್‌ಮಿತ್ತರುವೆ.
ಗೋಕುಲೊಡು ಬೋಡಾಯಿನ ಪೊಲಿ‌ದಿಂಜ್ ದಿತ್ತ್ಂಡಲಾ ಕಂಸನ ದಬ್ಬಾಳಿಕೆಡ್ ಸೋತುಪೋತುಂಡು‌ ಗೋಕುಲ.ಈ ಕಷ್ಟೊಡ್ದ್ ನಿವೃತ್ತಿ ಏಪ ? ಇಂಚ ಎನ್ನೊಂದಿನ ಗೋಪಾಲಕೆರ್ ಕೃಷ್ಣನ ಬಾಲ್ಯದ ಬೀರ ಬಿರ್ಸಾದಿಗೆನ್ ತೂದು ಈ ಪುಣ್ಯಾತ್ಮೆನೇ ನಮ್ಮ ಕಷ್ಟ ಪರಿಹಾರೊಗು ಬತ್ತಿನಾಯೆನಾ..? ಇಂಚ ಯೋಚಿತೊಂದಿತ್ತೆರ್. ಸನ್ಯಾಸಿನೆಲ,ಗುರು ಹಿರಿಯೆರ್ನ ದೈರದ ಪಾತೆರ ಪಲಿತ್ಂಡಾ ಪಂಡ್ದ್ ಕುಸಿಟ್ ಉಪ್ಪುವೆರ್ ಸಜ್ಜನೆರಾಯಿನ ಗೋಕುಲದ ಜನಮಂದೆ.
ಗೋಕುಲೊಡು ಕುಡ ಒರ ಮಣ್ಣ್ ದ ಪೊರ್ಲು ತೆಗ್ ಲುಂಡು,ಆತೆಗ್ ಲ್ ಬೇತೆ ಏರ್ಲ ಅತ್ತ್ ಆಲ್ ರಾಧೆ. ರಾಧೆ – ಕೃಷ್ಣ ,ಗೋಪಿಕೆರ್ – ಕೃಷ್ಣೆ ಈ ಜೋಡು ಗೊಬ್ಬುನ ರಾಸ ಕ್ರೀಡೆ ಗೋಕುಲೊಡು ಸವಾಲ್ ಆಪಿನೇ ಇಜ್ಜಿ. ರಾಧೆ – ಕೃಷ್ಣೆ ಈ ಸಂಬಂಧ ಪ್ರೀತಿದ ಪುದಾರ್ ಡ್ ಏಪೊಲ ಕಬಿತೆ ಆದ್ ಜನ ಒಪ್ಪುಲೆಕ್ಕ ಆಪುಂಡು.ಕೃಷ್ಣೆ ರಾಧೆನ ಮೋಕೆದ “ಕನ್ನೆನೇ” ಆದ್ ಒರಿವೆ.
ಗೋಕುಲೊಡು ಉಪ್ಪುನ ಗೋವರ್ಧನ ಗುಡ್ಡೆ ಬೀಜುನ ಗಾಲಿಗ್ ಬಲಿಪುನ ಮುಗಲ್ ತಡೆತ್ತ್ ದ್ ಬರ್ಸ ಬತ್ತಿಲೆಕ್ಕ ಮಲ್ಪುನೆನ್‌ ಕಣ್ಣಾರೆ‌ ತೂಪಿನ ಕೃಷ್ಣೆ ಗೋಕುಲದ‌ ಜನ ಈ ಎತ್ತರದ ಗುಡ್ಡೆನ್ ದಾಯೆಗ್ ಪೂಜೆ ಮಲ್ಪುಜೆರ್ ಬದಲ್ ಗ್ ಬರ್ಸ ಕೊರ್ಪೆ ಪಂಡ್ ದ್ ಇಂದ್ರಗ್ ಪೂಜೆ‌ ಮಲ್ಪುವೆರ್ .ಅರ್ಥ ದಾಂತಿ ಈ ಕಟ್ಟ್ ನಿ ಉಂತಾವೊಡು ಪಂಡ್ ದ್ ಒಂಜಿ ವರ್ಸ ಇಂದ್ರೋತ್ಸವ ಮಲ್ಪಂದೆ ಗೋವರ್ಧನೋತ್ಸವ ಮಲ್ಪರೆ ಅಟ್ಟಣೆ ಮಲ್ತ್ ದ್ ಒದಗ್ ಡ್ ಮಲ್ತ್ ಮುಗಿಪುವೆ. ಇಂದ್ರಗ್ ಕೋಪ ಬರ್ಪುಂಡು ಬರ್ಪ್ ಬರ್ಪಾವೆ,ಗೋಕುಲ ಮುರ್ಕುನೆಟ್ಟ ಬರ್ಸ ಬರ್ಪುಂಡು.ಗೋಕುಲದ ಜನಮಂದೆನ್ ಗೋವರ್ಧನ ಗುಡ್ಡೆ ಎತ್ತರದ ಜಾಗ್ ಗ್ ಲೆಪ್ಪುವೆ,ಗುಡ್ಡೆನ್ ಕಿಂಕಣ ಬಿರೆಲ್ ಡ್ ದೆರ್ತ್ ದ್ ಗೋವುಲೆನ್, ಗೋಪಾಲಕೆರೆನ್ ರಕ್ಷಿಪುವೆ.ಸೋತಿನ ಇಂದ್ರ ಬರ್ಸ ಉಂತಾವೆ ಏಳ್ ಇರ್ಲ್ ಕರಿದ್ ಪುಲ್ಯಾನಗ ಗೋಕುಲ ಸಮಸ್ಥಿತಿಟ್ ಇತ್ತ್ಂಡ್ ಆನಿ ಗೋಪಿಕೆರ್ ಕೃಷ್ಣನ್ “ಗೋವಿಂದೆ” ಪುದರ್ ದೀದ್ ಪದ ಪಂಡೊಂದು ಸುಗಿತೊಂದು ನಲಿಪುವೆರ್.
ಇಂಚ ಗೋಕುಲೊಡು ಬಾಲ್ಯದ ಪೂರಾ ಗೊಬ್ಬುಲೆನ್ ಗೊಬ್ಬುದು ಇತ್ತಿಲೆಕ್ಕನೆ ತಮ್ಮಲೆ ಕಂಸನ ಜನ ಬತ್ತ್ಂಡ್,ತಾನ್ “ಬಿರುತ ಪೂಜೆಗ್” ಪೋವೊಡು ಪಂಡೊಂದು ಪೂರ ಪ್ರೀತಿ,ವಿಶ್ವಾಸ,
ಬಾಂಧವ್ಯದ ಕಟ್ಟುಲೆನ್ ಕಡ್ತ್ ದ್ ಪಿದಾಡ್ದ್ ಪೋಪೆ.ಅಂಚಾಂಡ ಕೃಷ್ಣೆ ನನ್ನಿ ಇಜ್ಜಾಂದಿನಾಯೆನ ? ಅತ್ತ್ ಆಯೆ ಅವತರಿತ್ ನ ಉದ್ದೇಶೊ ಸಾಧಿಪರೆ ,
ಧರ್ಮ ರಕ್ಣಣೆಗ್ ಬೋಡಾದ್,ಈ ಬಂಧ ಪನ್ಪಿ ಕಟ್ಟುಲೆನ್ ಕಡ್ತೊನೊಡೇ.ಅಂಚ ಪೋಯೆ.ಆಯನ ಬಾಲ್ಯೊನು ತಾಂಕಿನ,ಬಾಲ್ಯೊಗು ತಾಂಗ್ ಆದಿತ್ತಿನ ಗೋಕುಲೊನು ಬೊಕ್ಕ ತಿರ್ಗ್ ದ್ ತೂಪುಜೆ.ಆಂಡ ಆಯನ ಕೊಲಲ್ ಮಾತ್ರ ಬುಡ್ದು ಪೋಪೆ.ನವಿಲ್ ಗರಿನೊಂಜಿ ಜುಟ್ಟುಡು,ಬೊಕ್ಕ‌ ಕಿರೀಟೊಡು ಗೋಕುಲದ ನೆಂಪುಗಾದ್‌ ದೀವೊನುವೆ. • ಕೆ.ಎಲ್.ಕುಂಡಂತಾಯ ~~~~~~~~~~~~~~~`` ‌‌ |