ಮದೆ ಆವೊಂದುಂಡಾ ಆನಿ ಕಾಲೊದ ಪಂಚೆಮಿ.

ಮದೆ ಆವೊಂದು ಉಂಡಾ ಆನಿ ಕಾಲೊದ ನಾಗರಪಂಚೆಮಿ

ನಾಗರ ಪಂಚಮಿದಾನಿ ನಾಗ ದೇವೆರೆಗ್ ಪೂಜೆ ಮಲ್ಪುನ , ತನು ಪಾಡುನ ಪರ್ಬ, ತುಲುನಾಡ್‌ಡ್ ಈ ನಾಗದೇವೆರ್ ಮಸ್ತ್ ನಂಬಿಕೆದ ದೇವೆರ್. ಒಂಜೊಂಜಿ ಕುಟೊಂಬಗ್ ಒಂಜೊಂಜೆ ಬನ ಉಪ್ಪುಂಡು. ನಾಗರ ಪಂಚಮಿದಾನಿ ಮಾತೆರ್ಲ ಸೇರ್‌ದ್ ತನು ಪಾಡುವೆರ್. ಬೈಲ್‌ ಪುಂಚೋಗು ಪೇರ್ ಪಾಡ್ದ್ ಪೂಜೆ ಮಲ್ಪುವೆರ್. ಉಂದು ಮಾತಾ ತುಳುವೆರೆಗ್ ವಿಶೇಷವಾಯಿನ ಪರ್ಬ.

ನಾಗರ ಪಂಚೆಮಿ ತುಳುನಾಡ್ಡ ಸುರುತ ಪರ್ಬ, ಫಲವಂತಿಕೆದ ಪರ್ಬೊಲ ಅಂದ್. ಇನಿತಲೆಕ ಪರ್ಬೊ ದುಂಬು ಸಾರ್ವಜನಿಕವಾದ್ ನಡತೊಂದಿಜ್ಜಾಂಡ್. ತುಳುವೆರ್ ಮೂರ್ತಿ ಪೂಜೆ ಮಲ್ತೊಂದಿಜ್ಜಾoಡ್ ಅಪಗ ಅಲ್ಪದ ಇಲ್ಲಾ, ಜಾಲಾ, ಇಜ್ಜಿಂಡ ಇಲ್ಲ ಕೈತಲುಪ್ಪುನ ಬನೊಟಾ, ಇಜ್ಜಿಂಡ ಕಂಡದ ಕೋಡಿದ್ ಉಪ್ಪುನ ಬನತ ನಾಗನ ಕಲ್ಲ್ ಗ್ ಪೇರ್ ಮೈತೊಂತೆರ್. ಅಪಗದ ಕಾಲೊಡು ನಾಗಾರಾಧನೆ ಪಂಡ ಪರಿಶುದ್ಧವಾಯಿನ ಮಣ್ಣ್ ಡ್ ಮಲ್ತಿನ ಮಣ್ಣ್ ದ ಕರಟ್ ನಾಗನ ಪ್ರತಿಕೃತಿನ್ ಬುಡ್ಪಾದ್ , ನಾಗಮುರಿ ಪನ್ಪಿ ಈ ಕರನ್ ದೀದ್ ತುಳುವೆರ್ ನಾಗ ತಂಬಿಲ ಮಲ್ತೊಂದು ಇತ್ತೆರ್ . ತಂಬಿಲ ಮಲ್ತ್‌ದ್ ಕರಟ್ ಶುದ್ದವಾಯಿನ ನೀರ್ ಜಿಂಜಾದ್ ಅರೆಗಾಲದ ದೊಂಬುದ ಪೆಟ್ಟ್ ಗ್
ಉಚ್ಚುಲೆಗ್ ಬಾಜೆಲಾದ್ ಕಂಗಾಲಾವಂದಿಲೆಕ್ಕ ಜಾಗ್ರತೆ ಮಲ್ತೊಂದು ಇತ್ತೆರ್ ಇಂಚ
ನೀರ್ ದಿಂಜಾದ್ ದೀತಿ ಕರರ್ದ್ ಪ್ರಾಣಿ, ಪಕ್ಕಿಲು, ಪ್ರಕೃತಿ ತಂಪು ಇತ್ತೊಂದಿತ್ತ್ಂಡ್.

ಕಾಲ ಕಳೆವೊಂದು ಪೋಯಿಲೆಕ್ಕ
ಫಲವಂತಿಕೆದ ದುಂಬು ತುಳುನಾಡ್‌ದ ಜಲಸಂಸ್ಕೃತಿ ದೂರಾದ್, ಮೂರ್ತಿ ವೈದಿಕತೆ ನಮ್ಮಡೆ ಬನ್ನಗೆ ನಾಗ ದೇವೆರೆ ಈ ಸೇವೆನ್ ನಾಗರ ಇಜ್ಜಿಂಡ ಪಂಚೆಮಿಯಾದ್ ಪರ್ಬೊದ ಆಚರಣೆಗ್ ಕನತೆರ್, ವೈದಿಕತೆ ಸುರುವಾಂಡ್ ಅವೆರ್ದ್ ಬೊಕ್ಕ ನಾಗೆ ಮಸ್ತ್ ಶುದ್ದವಾಯಿನ ದೇವೆರ್ ಅವೈದಿಕೆರ್ ನಾಗನ ಮೂರ್ತಿದ ಮುಟ್ಟ ಸುಳಿಯೆರೆ ಸಮೇತ ಆವಂದ್ ಪನ್ನಿ ಪಾತೆರೊಗು ಪೋಡಿದ್ ದೂರ ಉಂತುವೆರ್. ಪುಂಚದ ಪುರ್ಸದಂದ್ ದುಂಬುದ ಕಾಲೊಡು ಪುಂಚದ ಮಣ್ಣನ್ ಕಣ್ಣಗ್ ಒತ್ತೊಂದು ಮುಂಡೊಗು ಪುರ್ಸದ ಪಾಡೊಂದು ಬಂಜಿಗೊಂತೆ ದೆತೊಂದು ಇತ್ತ. ಅಂಡ ಏಪ ವೈದಿಕ ಸಂಸ್ಕೃತಿ ನಮ್ಮಡೆ ಬತ್ತುಂಡೋ ಅವೆರ್ದ್ ಬೊಕ್ಕ ಪುಂಚದ ಪುರ್ಸಾದದ ಬದಲ್‌ಗ್ ಮಂಜಲ್ ಪೊಡಿ ಪುರ್ಸಾದ ಆದ್ ತಿಕ್ಕೆರೆ ಸುರು ಅಂಡ್.ನಾಗಬನ ಸಿಮೆಂಟ್ದ ಕಟ್ಟೆ ಅಂಡ್. ಬನೊಟು ಇತ್ತಿ ಮರಕುಲು ಪ್ರಾಣಿ, ಪಕ್ಕಿಲೆಗ್ ಆಸರೆಯಾದ್ ಉಪ್ಪೆರೆ ಅಂಚನೆ ಕಾಲ ಕಾಲೊಗು ಬರ್ಸ ಬರಿಯೆರೆ ಬೋಡಾದ್ ದುಂಬುದಕುಲು ಇಂಚಿತ್ತಿ ನಾಗ ಬನೋಕ್ಲೆನ್ ಒರಿತೊಂದು ಬೈದೆರ್.ಆಂಡ ನಮ್ಮ ಇನಿ ಬನೋಕ್ಲೆನ್ ಕಡ್ತದ್ ಸಿಮೆಂಟ್‌ ನಾಗನ ಕಟ್ಟೆಲೆನ್ ಮಲ್ತೊಂದು ಉಲ್ಲಾ . ಸಿಮೆಂಟ್ದ ಬೆಚ್ಚಗ್ ಉಚ್ಚುಲು ಖಂಡಿತ ಬದುಕುಜಿ. ಕಾಡ ಬರಿಟ್ ಪಂಚವರ್ಣದ ಶುದ್ಧಬಗ್ಗೂಡು ಕಾಲಸರ್ಪನ ಮಂಡಲ ಬರೆದ್ ನಡತೊಂದಿತ್ತಿನ ನಾಗ ದರ್ಶನದ ನಲಿಕೆದ ಸೇವೆನೆ ಕಾಡ್ಯನಾಟ, ಪುಂಚದ ಮಣ್ಣೆ ಪುರ್ಸಾದೊ. ಅಂಡ ತುಲುವೆರೆ ಕಾಡ್ಯನಾಟ ಮಾತ ಇನಿ ಅಧುನಿಕತೆದ ಬುಳೆಚ್ಚಿಲ್‌ಗ್ ತಿಕ್ಕಿದ್ ನಾಗಮಂಡಲ ಪನ್ಪಿ ರೂಪ ಪಡೆದ್ ಬೇತೆಕುಲೆನ ಜೋಳಿಗೆ ದಿಂಜಾಪಿನ ಸೊತ್ತಾದುಂಡು.ಆಂಡ ವೈದಿಕೆರ್ ಪೊಯೆರಾವಂದಿನ, ದೂರ ದೀತಿನ ಮೇರೆ ಮೊಗೇರೆ ಪನ್ಪಿ ಜಾತಿದಕುಲು ಇತ್ತೆಲ ಕೆಲವು ಕಡೆಟ್ ನಾಗಮುರಿ ದೀದ್ ಅವೈದಿಕ ತಂಬಿಲ ಬೊಕ್ಕ ಕಾಡ್ಯನಾಟದಂಚಿನ ಮೂಲ ಸಂಪ್ರದಾಯೊನು ಒರಿಪಾವೊಂದು ನಡಪಾವೊಂದು ಬರೊಂದುಲ್ಲೆರ್. ನಾಗಗ್ ಕೇದಗೆ, ಸಂಪಿಗೆ, ರೆಂಜೆ, ಪಿಂಗಾರ ಇಂಚಿನ ಪೂಕುಲು ಮಸ್ತ್ ಇಷ್ಟ. ಇತ್ತೆ ಅಂಚಿನ ಪೂಕುಲೆನ್ ಬಡುದು ಪೇಂಟೆದ ಪೂಕುಲೆನ್ ಪಾಡೊಂದು ಉಲ್ಲಾ ಓಲೋಲು ಪುಂಚ ತೋಜಿಂಡಾ ಅವೆಕ್ ಪೇರ್ ಮೈಪುನತ್ತ್ , ದೈವ, ದೇವಸ್ಥಾನದ ಬರಿಟ್ ನಾಗನ ಪುಂಚ ಇತ್ತಂಡ ಅವೆಕ್ ಪೇರ್ ಮೈಪೊಲಿ ಪೇರ್ ಮೈಪುನಗಲಾ ಲೀಟರ್ಗಟ್ಟೆ ಪೇರ್ ಮೈಪುನತ್. ಒಂಜಿ ರಡ್ಡ ಚಮಚ ದಾತ್ ಮೈಪೊಡು. ತುಡರ್ ಅರ್ಲಾದ್ ಊದುಬತ್ತಿ ತೋಜಾದ್ ಅವೆರ್ದ್ ಬೊಕ್ಕ ಆರತಿ ಮಲ್ಪೊಡು . ಅಂಚ ಮಲ್ತಿ ಬೊಕ್ಕ ಅಡೆಗ್ ಪೂ ಬಿರ್ಕೆರೆ ಬಲ್ಲಿ. ಅವತ ಬದಲಾದ್ ಅರಿ ಇಜ್ಜಿಂಡ ಬಾರ್ ಬಿರ್ಕೊಲಿ. ಬಾರ್ ಬಿರ್ಕುಂಡ ಫಲ ಜಾಸ್ತಿ. ದಾಯೆ ಪಂಡ ನಾಗೆ ಫಲವಂತಿಗೆದ ಶಕ್ತಿ. ಭೂಮಿದ ಫಲವಂತಿಕೆನ್ ರಕ್ಷಣೆ ಮಲ್ಲುನ್ನೇ ನಾಗೆ. ಅಂಚಾದ್ ನಾಗ ಬೆಮ್ಮೆರೆ ಈ ತುಳುನಾಡ್ ಡ್ ಬರಗಾಲ ಬರಂದ್. ಆಂಡ ಸೃಷ್ಟಿಕರ್ತೆ ಬ್ರಹ್ಮನೆ ಬೇತೆ ನಾಗಬೇರ್ಮೆರೆ ಬೇತೆ. ಉದಲ್ ದ ಪುಂಚ ನಾಗಗ್ ಬಾರೀ ಇಷ್ಟ, ಅಂಚಾದ್ ನಾಗೆ ಆವಟೆ ಬದುಕುನಿ. ನಾಗನ ಕಟ್ಟೆ ಅಶ್ವತ್ಥ ಮರತಡಿಟ್ ಇತ್ತಂಡ ಐಕ್ ಬಾರೀ ಮಹತ್ವ ಉಂಡು. ದಾಯೆ ಪಂಡ ಬ್ರಹ್ಮ, ವಿಷ್ಣು, ಈಸರ ದೇವೆರ್ ಈ ಮರಟುಪ್ಪುವೆರ್ಗೆ. ಅಂಚಾದ್ ಈ ಮರತಡಿಟ್ ಇತ್ತೆ ನಾಗನ ಕಲ್ಲ್ ಗ್ ಪೆತ್ತದ ಪೇರ್ ಮೈತಂಡ ಬಾರೀ ಎಡ್ಡೆ ದಾಯೆ ಪೆತ್ತದನೆ ಪೇರ್ ಮೈಪೊಡು, ಐಕ್ಲಾ ಒಂಜಿ ಕಾರಣ ಉಂಡು. ಪೆತ್ತದ ಸರ್ರೊಡು ಮುಪ್ಪತ್ತ ಮೂಜಿ ಕೋಟಿ ದೇವತೆಲು ಉಲ್ಲೆರ್ಗೆ. ಅಂಚಾದ್ ಪೆತ್ತದ ಪೇರ್ ಅಮುರ್ತಗ್ ಸಮಾನ ಅದುಂಡು…

-ಶ್ರೀನಿಧಿ ಶೆಟ್ಟಿ