ಸಮಾನತೆದ ಬೊಲ್ಪು ತೋಜಾಯಿನ ಮಹಾನ್ ಗುರು ಶ್ರೀ ನಾರಾಯಣ ಗುರು ಸ್ವಾಮಿ..

ನಾರಾಯಣ ಗುರು ಜಯಂತಿ: ಸಮಾನತೆದ ಬೊಲ್ಪು  ತೋಜಾಯಿನ  ಮಹಾನ್ ಸಮಾಜ ಸುಧಾರಕೆ ಶ್ರೀ ನಾರಾಯಣ ಗುರು ಸ್ವಾಮಿ.
ಜಾತಿ, ಮತ, ಧರ್ಮದ ಪುದರುಡ್  ಸಮಾಜಡ್  ಬೇರೂರ್ದಿನ ಅಸಮಾನತೆ, ಅಜ್ಞಾನ ಬೊಕ್ಕ ಶೋಷಣೆದ ವಿರುದ್ಧ  ಸೊರ ಲಕ್ಕಾದ್  ಮಾನವೀಯತೆ ಬೊಕ್ಕ ಸಮಾನತೆದ  ಸಂದೇಶೊನ್  ಸಾರಿನ  ಮಹಾನ್ ಸಮಾಜ ಸುಧಾರಕೆ ಶ್ರೀ ನಾರಾಯಣ ಗುರುಕುಲೆನ  ಜಯಂತಿನ್  ಭಕ್ತಿಭಾವ ಬೊಕ್ಕ ಗೌರವಡ್  ನಾಡುಡ್ ಆಚರಣೆ ಮಲ್ಪುವೆರ್..
ಶ್ರೀ ನಾರಾಯಣ ಗುರುಕುಲು  ಕೇರಳದ ಚೆಂಬಳಂತಿಡ್ ಪುಟ್ಟುದ್ , ಆಧ್ಯಾತ್ಮಿಕ ಚಿಂತನೆ ಬೊಕ್ಕ ಸಾಮಾಜಿಕ ಸುಧಾರಣೆದ  ಮೂಲಕ ಭಾರತೀಯ ಸಮಾಜದ ಮಿತ್ತ್  ಅಚ್ಚಳಿಯಂದಿನ ಪ್ರಭಾವ ಪಡೆಯಿನಾರ್. ಶಿಕ್ಷಣ, ಸಂಘಟನೆ ಬೊಕ್ಕ ಸ್ವಾಭಿಮಾನದ ಮೂಲಕ ಹಿಂದುಳಿದ ವರ್ಗದ ಬದುಕುಡ್  ಪೊಸ ಆಶಾಕಿರಣ ಪುಟ್ಟಾಯಿನಾರು.
“ಒಂಜೇ  ಜಾತಿ, ಒಂಜೇ ಮತ, ಒರಿಯೇ ದೇವೆರು ಮನುಷ್ಯಗ್” ಪನ್ಪಿನ ಅರೆನ  ಸಂದೇಶ ಇನಿಕುಲಾ ಸಮಾಜಗ್ ಸಾದಿಬೊಲ್ಪು ಆತುಂಡ್.. ಮನುಷ್ಯನ್ ಜಾತಿ ಅತ್ತುಂಡ ಧರ್ಮದ ಆಧಾರದ ಮಿತ್ತ್  ವಿಭಜನೆ ಮಲ್ಪಂದೆ ಮಾತೆರ್ಲ ಸಮಾನೆರು ಪನ್ಪಿನ  ಚಿಂತನೆಗ್ ಆರು ಹೆಚ್ಚಿನ ಮಹತ್ವ ಕೊರ್ತೆರು.
ಶಿಕ್ಷಣನೇ  ಸಾಮಾಜಿಕ ಪ್ರಗತಿದ ಪ್ರಮುಖ ಸಾಧನ ಪನ್ಪಿನವ್ವೆನ್ ತೆರಿದಿತ್ತಿನ  ನಾರಾಯಣ ಗುರುಕುಲು ಜನಕ್ಲೆಗ್ ಶಿಕ್ಷಣದ ಮಹತ್ವನ್  ತೆರಿಪಾದ್ ಕೊರಿನಾರು. ಮೂಢನಂಬಿಕೆ, ಅಸ್ಪೃಶ್ಯತೆ ಬೊಕ್ಕ ಸಾಮಾಜಿಕ ಅಸಮಾನತೆದ ವಿರುದ್ಧ ಹೋರಾಟ ಮಲ್ತುದ್ , ಸ್ವಚ್ಛತೆ, ಶಿಸ್ತು, ನೈತಿಕತೆ ಬೊಕ್ಕ ಸಹಬಾಳ್ವೆದ ಮಹತ್ವನ್  ತೆರಿಪಾಯೆರು.
ನಾರಾಯಣ ಗುರುಕುಲೆನ ಸಾಮಾಜಿಕ ಕ್ರಾಂತಿ ಕೇವಲ ಒಂಜಿ  ಸಮುದಾಯಗ್  ಸೀಮಿತ ಆದಿತ್ತುಜಿ.. ಅರೆನ  ಚಿಂತನೆಲು ಸಮಸ್ತ ಮಾನವಕುಲದ ಒಳಿತುನ್ ಬಯಕುದುಂಡ್. ಧರ್ಮದ ಸಾರ ಮಾನವೀಯತೆ ಪನ್ಪಿನವ್ವೆನ್ ತನ್ನ ಬದುಕುದ  ಮೂಲಕನೇ  ತೋಜಾದ್ ಕೊರ್ತೆರು.
ಇನಿತ  ಆಧುನಿಕ ಸಮಾಜಡುಲಾ  ಜಾತಿ, ಧರ್ಮ, ಭಾಷೆ ಬೊಕ್ಕ ಆರ್ಥಿಕ ಅಸಮಾನತೆದ ಸವಾಲುಲು ತೋಜೊಂದುಪ್ಪುನ ಸಂದರ್ಭಡ್  ನಾರಾಯಣ ಗುರುಕುಲೆನ ಆದರ್ಶೊಲು ನನಲಾತ್  ಪ್ರಸ್ತುತವಾದುಂಡ್.. ಅರೆನ ಜಯಂತಿ ಕೇವಲ ಆಚರಣೆಗ್ ಸೀಮಿತ ಆವಂದೆ, ಸಮಾನತೆ, ಶಿಕ್ಷಣ, ಸಹೋದರತ್ವ ಬೊಕ್ಕ ಮಾನವೀಯತೆನ್  ಜೀವನಡ್ ಅಳವಡಿಸಾವೊನೊಂಬಿನ  ಸಂಕಲ್ಪದ ದಿನ ಆವೊಡ್.
ಶ್ರೀ ನಾರಾಯಣ ಗುರುಕುಲೆನ ವಿಚಾರಧಾರೆ ಸಮಾಜಗ್  ಸದಾ ಪ್ರೇರಣೆಯಾವಡ್ , ಅರೆನ ಸಮಾನತೆದ ಸಂದೇಶ ಪ್ರತಿಯೊರಿನಲಾ  ಬದುಕುಡುಲಾ  ಬೊಲ್ಪು ಆವಡ್..