ಪರ್ಯಾಯ ಶ್ರೀ ಪುತ್ತಿಗೆ, ಶ್ರೀ ಕ್ರಷ್ಣ ಮಠ ಉಡುಪಿದ ಆಶ್ರಯೊಡು ಸಾರ್ವಜನಿಕ ಶ್ರೀ ಶಾರದೋತ್ಸವದ ದಶಮಾನೋತ್ಸವದ ಅಂಗವಾದ್ ಉಡುಪಿ ದಸರಾ ಶ್ರೀ ಕ್ರಷ್ಣಮಠತ್ತ ರಾಜಾಂಗಣಡ್ ಸೆಪ್ಟೆಂಬರ್ 22 ಡ್ದ್ ಅಕ್ಟೋಬರ್ 2 ತಾರೀಕು ಮುಟ್ಟ ಗೌಜಿ ಡ್ ನಡಪರೆಗುಂಡ್ ಪಂಡುದ್ ಸಾರ್ವಜನಿಕ ಶಾರದೋತ್ಸವ ಸಮಿತಿದ ಅಧ್ಯಕ್ಷೆರಾಯಿನ ಶ್ರೀ ಬೈಕಾಡಿ ಸುಪ್ರಸಾದ್ ಶೆಟ್ಟಿ ಪಂಡೆರು.. ಉಡುಪಿ ಗೀತಾಮಂದಿರೊಡು ಪರಮಪೂಜ್ಯ ಶ್ರೀ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿಲೆನ ದಿವ್ಯ ಉಪಸ್ಥಿತಿಡ್ ನಡತಿನ ಉಡುಪಿ ದಸರಾದ ಪತ್ರಿಕಾಗೋಷ್ಠಿ ಡ್ ಆರು ಪಾತೆರಿಯೆರು.ಈ ಸರ್ತಿದ ದಸರಾ ಕಾರ್ಯಕ್ರಮ ಶ್ರೀ ಕ್ರಷ್ಣಮಠತ್ತ ರಾಜಾಂಗಣಡ್ ನಡಪರೆಗಿತ್ತುದ್, ನವದುರ್ಗೆಯೆರೆನ್ ಪ್ರತಿಷ್ಠಾಪನೆ ಮಲ್ತುದ್ ಗೌಜಿ ಡ್ ಐತಿಹಾಸಿಕ ಮೈಸೂರು ದಸರಾ, ಉಚ್ಚಿಲ ದಸರಾ,ಮಂಗಳೂರು ದಸರಾದಂಚ ಸಂಯೋಜನೆ ಆವೊಂದುಂಡ್.ದಿನೊಲಾ ಭಜನಾ ಕಾರ್ಯಕ್ರಮ, ದುರ್ಗಾ ಹೋಮ, ಅಕ್ಟೋಬರ್ 1 ಗ್ ಚಂಡಿಕಾ ಹೋಮ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮ ದಿನೊಲಾ ನಡಪರೆಗುಂಡ್.
ಸೆಪ್ಟೆಂಬರ್ 25 ತಾರೀಕು ದಾನಿ ಬಯ್ಯಗ್ 4 ಗಂಟೆಗ್ ತುಳುನಾಡುದ ರಾಣಿ ಅಬ್ಬಕ್ಕನ 500 ನೇ ಪುಟ್ಟು ಪರ್ಬದ ಪ್ರಯುಕ್ತ ಮಾತೃಸಂಗಮ ನಡಪರೆಗುಂಡ್.
ಸೆಪ್ಟೆಂಬರ್ 22 ಗ್ ಕಾಂಡೆ 9ಗಂಟೆಗ್ ನವದುರ್ಗೆಯೆರ್ ಬೊಕ್ಕ ಶಾರದಾ ಮಾತೆನ ವಿಗ್ರಹ ಪ್ರತಿಷ್ಠಾಪನೆ ಮಲ್ಪುಂಡ್.
ನವರಾತ್ರಿ ಉತ್ಸವಡ್ ಭಜನಾ ಕಾರ್ಯಕ್ರಮ,ಸಂಗೀತ, ನೃತ್ಯ ಸಿಂಚನ,ಯಕ್ಷಗಾನ,ಜನಪದ ಕಲರವ, ದಾಂಡಿಯಾ,ಕುಣಿತ,ರಂಗೋಲಿ ಸ್ಪರ್ಧೆ,ಚಿತ್ರಕಲಾ ಸ್ಪರ್ಧೆ, ಸಂಗೀತ ಸ್ಪರ್ಧೆ, ಮುದ್ದು ಶಾರದೆ ಸ್ಪರ್ಧೆ,ಭಾಷಣ ಸ್ಪರ್ಧೆ , ಕ್ವಿಜ್ ಸ್ಪರ್ಧೆ ನಡಪರೆಗುಂಡ್ ಪಂಡೆರು.
ಶಾರದಾ ಮಾತೆ ಬೊಕ್ಕ ನವದುರ್ಗೆಯೆರೆನ ವಿಗ್ರಹ ರಚನೆ ಕಾರ್ಯ ನಡತೊಂದಿತ್ತುದ್,ಕುದ್ರೋಳಿ ಬೊಕ್ಕ ಉಚ್ಚಿಲಡ್ ವಿಗ್ರಹ ರಚನೆ ಮಲ್ಪುನ ಕುಬೇರ ತಂಡದ ಕುಲೇ ಮುಲ್ಪಲಾ ತಯಾರ್ ಮಲ್ತೊಂದುಲ್ಲೆರ್ ಪಂಡೆರ್.ಭಕ್ತೆರೆನ ವಿಶೇಷ ಸಹಕಾರ ಬೋಡು ಪಂಡುದ್ ಈ ಸಂದರ್ಭಡ್ ಬಿನ್ನಪ ಮಲ್ತೆರ್.
ಅಕ್ಟೋಬರ್ 3 ತಾರೀಕು ಗ್ ರಾಜಾಂಗಣಡ್ದ್ ಮಲ್ಪೆ ಬೀಚ್ ಮುಟ್ಟ 30 ಗುಲಾ ಜಾಸ್ತಿ ಟಾಬ್ಲೋ ದೊಟ್ಟುಗ್ ಬ್ರಹತ್ ಮೆರವಣಿಗೆ ಡ್ ಪೋದು,ಕಡಲಬರಿಟ್ ಗಂಗಾರತಿ ಆಯಿಬೊಕ್ಕ ವಿಸರ್ಜನೆ ಆವರೆಗುಂಡ್ ಪಂಡೆರ್.
ಪತ್ರಿಕಾ ಗೋಷ್ಠಿಡ್ ಮುರಳೀತಂತ್ರಿ, ಪ್ರಸನ್ನ ಆಚಾರ್ಯ, ರಮೇಶ್ ಭಟ್ ,ಶಾರದೋತ್ಸವದ ಪ್ರಧಾನ ಕಾರ್ಯದರ್ಶಿ ರಾಧಾಕೃಷ್ಣ ಮೆಂಡನ್,ಮಹಿಳಾ ಸಂಚಾಲಕಿ ತಾರಾ ಉಮೇಶ್ ಆಚಾರ್ಯ, ಮಾತ್ರ ಸಂಗಮದ ಸಂಚಾಲಕೆರಾಯಿನ ವೀಣಾ ಎಸ್.ಶೆಟ್ಟಿ,ಪದ್ಮಾ ರತ್ನಾಕರ್ ಉಪಸ್ಥಿತರಿತ್ತೆರು..
by 