ವರಮಹಾಲಕ್ಷ್ಮೀ ವ್ರತ” ಸಂಪೊತ್ತುದ ರಾಣಿಗ್ ಪೂಜೆ”..

ವರಮಹಾಲಕ್ಷ್ಮಿ ವ್ರತ
ಸಂಪೊತ್ತುದ ರಾಣಿಗ್ ಪೂಜೆ "ಲಕ್ಷಯತಿ ಪಶ್ಯತಿ ಭಕ್ತಜನಾನ್ ಇತಿ ಲಕ್ಷ್ಮೀ"

ಉಂದು ’ಲಕ್ಷ್ಮೀ’ ಶಬ್ದೊದ ವಿವರಣೆ.ಲಕ್ಷ್ಮೀನ್ –
ಲಚ್ಚಿಮಿನ್ ಪೂಜೆ ಮಲ್ಪನ – ನಂಬೊಂದು ಉಪ್ಪುನಾಕಲೆನ್ ದಯಾದಿಟ್ಟಿಡ್ ತೂಪಿನಾಲೇ ಲಚ್ಚಿಮಿ. “ಸಿರಿ” ಪಂಡ ಲಚ್ಚಿಮಿನ ಅಡ್ಡ ಪುದಾರ್. ಪ್ರಕಾಸ,ಪೊರ್ಲು,ಎಡ್ಡೆ ಪುದಾರ್,
ಮಿನ್ಕುನ ಗುಣ,ಎಡ್ಡೆ ಬುದ್ಧಿ,ಮೋನೆ ಭಾಗ್ಯ,
ಬೆಳಗುನು,ಎಡ್ಡೆ್ದಿಗೆ,ಪುಗಾರ್ತೆ,ಸರ್ವಲಾ ಒದಗುನ ಯೋಗ,ಕಂತಂದಿ ಬಾಗ್ಯ ಇಂಚ ಮಸ್ತ್ ಅರ್ಥೊಳು ’ಶ್ರೀ’ ಅತ್ತಡ ‘ಸಿರಿ’ ಶಬ್ದೊಗು ಉಂಡು.
ಸಿರಿ – ಶ್ರೀ ಪಂಡ ಸಂಪೊತ್ತು ; ಉಂದು ಸಾಮಾನ್ಯ ಅರ್ಥ. ಆಂಡ ‘ಅಯಿಸ್ರ'( ಐಶ್ವರ್ಯ) ರೂಡಿಡ್ ಉಪ್ಪುನ ಗ್ರಹಿಕೆ. “ಈಶ್ಚರಸ್ಯ ಭಾವಃ ಐಶ್ವರ್ಯಂ”. ದೇವೆರ್ನ ಗುಣ ವಿಶೇಷನೇ ’ಶ್ರೀ’ ಪನ್ಪಿನ ಅನುಗ್ರಹೊ.
‌ ಮೇಗಿಲೋಕದ ಸುವಸ್ತುಲು ಸನ್ಯಾಸಿ ಶಾಪೊಡು
ಕಡಲ್ ಪಾಲಾದ್ ಪೋಂಡ್,ಆ ವಸ್ತುಲೆನ್ ಪಿರ
ಪಡೆತೊನರೆ ಕಡಲ್ ನ್ ತುಲುಪುನಗ ಲಕ್ಷ್ಮೀ – ಲಚ್ಚಿಮಿ ಕಡಲ್ ಡ್ದ್ ಲಕ್ ದ್ ಬತ್ತೆರ್.ಕಡಲ್ ದ ಮಗಲಾದ್ ಬತ್ತಿನ ಲಚ್ಚಿಮಿ ನಾರಾಯಣ ದೇವೆರೆನ್ ಮದಿಮೆ ಆಯೆರ್, ತಾನ್ ಮಹಾಲಚ್ಚಿಮೆ ಆಯೆರ್.
ನಾರಾಯಣ ದೇವೆರ್ ’ಲಕ್ಷ್ಮೀನಾರಾಯಣೆ’ – ಲಚ್ಚಿಮಿನಾರಾಯಣೆ ಆಯೆರ್.
ಜಗತ್ತ್ ದ ಸರ್ವ ಸಿಷ್ಟಿನ್ ತಾಂಕುನ(ಸ್ಥಿತಿಕರ್ತೆ) ಆಯಿನ ನಾರಾಯಣ ದೇವೆರ್ ಸಂಪೊತ್ತುದು ದೇವೆರಾಯಿನ ಲಚ್ಚಿಮಿ – ಲಕ್ಷ್ಮೀಗೆ ಕಂಡನೆ ಆಯಿಬೊಕ್ಕ ಭಾಗ್ಯವಂತೆ ಆಯೆರ್.ನಂಬಿನ ಭಕ್ತೆರ್ ಸಂಪೊತ್ತುನು ನಟೊನುವೆರಾ ಅವ್ವೆನ್ ಅನುಗ್ರಹಿಪರೆ ಸಮರ್ಥೆರಾಯೆರ್. ಶ್ರೀಮನ್ನಾರಾಯಣ ದೇವರ್ ಕಾರಣವಾದ್ ’ಲಕ್ಷ್ಮೀ’ – ಲಚ್ಚಿಮಿ ಗೌರವ ಪಡೆಯೆರ್ . ಶ್ರೀಮನ್ನಾರಾಯಣ ದೇವೆರ್ ಲಚಿಮಿಗ್ ತನ್ನ ತಿಗಲೆಡೆ ಮಣೆ ಕೊರಿಯೆರ್.ಇಂಚ ಭಾಗ್ಯವತಿಯಾಯಿನ ಲಚ್ಚಿಮಿ – ಲಕ್ಷ್ಮೀನ್ ಪೂಜೆ ಮಲ್ತಡ ಅಲಿಯಂದಿ ಸಂಪೊತ್ತು ಪಡೆವೊಲಿ.ಸರ್ವ ಭೋಗಭಾಗ್ಯೊದ ಸುಖ ಪಡೆವೊಲಿ.ನಾರಾಯಣ ದೇವೆರ್ನ ಎಡ್ಡೆಪ್ಪು ಪಟೆವೊಲಿ.
ಇಂಚಿನ ಸಂತೊಸು,ಸಂಪೊತ್ತು ಅನುಗ್ರಹಿಪುನ ಲಚ್ಚಿಮಿನ್ ಪೂಜಿಪುನ ವಿಶೇಷ ದಿನ ಶ್ರಾವಣ ತಿಂಗೊಲ್ದ ಪುಣ್ಣಮೆದ ಎದುರುದ ರಡ್ಡನೇ ಶುಕ್ರವಾರ. ಆ ದಿನತಾನಿ ಲಕ್ಷ್ಮೀ – ಲಚ್ಚಿಮಿ ಭಕ್ತರ್ ಭಕ್ತಿಡ್ ಕೇಂಡಿನೆನ್ ಕೊರ್ಪೆರ್ ಅತ್ತಡ ಅನುಗ್ರಹಿಪುವೆರ್ ಪನ್ಪಿನ ನಂಬೊಲಿಗೆಡ್ “ವರಮಹಾಲಕ್ಷ್ಮೀ” ಪಂಡ್ ದ್ ಗ್ರಹಿತೊಂದು ಪೂಜೆ ಕರಿಪುನವು ನಡತ್ ಬತ್ತಿನವು. ಕಟ್ಟ್-ಕಟ್ಲೆ,ರೀತಿ – ನೀತಿ,ಕ್ರಮೊಕು ಬದ್ಧೆರಾದ್ ‘ನೋಂಪು’ದ ಲೆಕ್ಕ
ಧಾರ್ಮಿಕ ಪ್ರತಿಜ್ಞೆ – ಶ್ರದ್ಧೆಡ್ ಪೂಜೆ ಮಲ್ಪುನು,ಅದಗ ಈ ವಿಧಿವಿಧಾನದ ಪೂಜೆ ‘ವ್ರತ’ ಆಪುಂಡು.ಅವ್ವೆ “ವರಮಹಾಲಕ್ಷ್ಮೀ ವ್ರತ”.ನೇಮನಿಷ್ಠೆ ಮುಖ್ಯವಾಯಿನ ಪೂಜೆ ಅತ್ತಡ ನಂಬೊಲಿಗೆಡ್ ನಡತೊನುನನೇ ವ್ರತ.
ನಾರಾಯಣ-ವಿಷ್ಣು ಸೂರ್ಯೆ ಆನಗ ಲಕ್ಷ್ಮೀ ತಾಮರೆಡ್ ಪುಟ್ಟುವೆರ್. ಪರಶುರಾಮೆ ಆನಗ
ಲಚ್ಚಿಮಿ ಭೂದೇವಿ ಆಪೆರ್. ನಾರಾಯಣ ದೇವೆರ್ ರಾಮೆ ಆದ್ ಅವತರಿಪುನಗ ಸೀತಾದೇವಿಯಾದ್ ಜೊತೆ ಆಪೆರ್. ಕೃಷ್ಣೆ ಆದ್ ಪುಟುದು ಬನ್ನಗ ಲಚ್ಚಿಮಿ ರುಕ್ಮಿಣಿ ಆದ್ ಸೇರೊಂಡೆರ್. ಇಂಚ ಲಕ್ಷ್ಮೀ – ಲಚ್ಚಿಮಿ ನಾರಾಯಣ ದೇವೆರೆನ ಬೆರಿ ಪತೊಂದೆ ಬರ್ಪೆರ್.
ಒರ ಲಕ್ಷ್ಮೀ – ಲಚ್ಚಿಮಿ ದೇವೆರೆಡ ಕೋಪೊಡು ವೈಕುಂಠೊನು ಬುಡ್ದು ಭೂಮಿಗ್ ಜತ್ತ್ ದ್ ಬರ್ಪೆರ್. ಇಂಚ ಕೋಪೊಡು ಭೂಮಿಗ್ ಜತ್ತ್ ದ್ ಬತ್ತಿನ ಲಚ್ಚಿಮಿನ್ ಪಡೆವರೆ ನಾರಾಯಣ ದೇವೆರ್ ಗೋವಿಂದೆ – ಶ್ರೀನಿವಾಸೆ ಆದ್ ಲಚ್ಚಿಮಿನ್ ಬೆರಿಪತೊಂದು ಬತ್ತ್ ದ್ ಪದ್ಮಾವತಿಯಾದ್ ಭೂಮಿಡ್ ಇತ್ತಿನ ಲಕ್ಷ್ಮೀನ್ ಸೇರುವೆರ್, ತಾನ್
ಶ್ರೀಪತಿ ಆಪೆರ್, ಅವ್ವೇ ಸಪ್ತಗಿರಿ ’ತಿರುಪತಿ’- ಶ್ರೀಪತಿ, ಭೂವೈಕುಂಠ.(ಶ್ರೀ = ಲಕ್ಷ್ಮೀ)
ಬಂಗಾರ್ದ ರೂಪದ ಶ್ರೀ ಮಹಾಲಕ್ಷ್ಮೀ ಏಪೊಲಾ ಬಂಗಾರ್ ಕೊರೊಂದು ಭಕ್ತೆರೆನ್ ಅನುಗ್ರಹಿಪಡ್ ಪನ್ಪಿನವು ‘ಲಕ್ಷ್ಮೀ ಸ್ತುತಿ’ ಪಂಡ್ ದೇ ಪ್ರಸಿದ್ಧವಾಯಿನ ’ಶ್ರೀಸೂಕ್ತದ’ ಆಶಯ. ಈ ಶ್ರೀಸೂಕ್ತ ನಾರಾಯಣ ದೇವೆರ್ನ ಒಟ್ಟಡೇ ಸದಾಕಾಲ ಇಪ್ಪುನ ಶ್ರೀ ಮಹಾಲಕ್ಷ್ಮೀನ ಬೇತೆ ಬೇತೆ ಅವತಾರೊದ, ರೂಪುಲೆನ್ ವರ್ಣಿಪುಂಡು.
ಲಕ್ಷ್ಮೀ – ಲಚ್ಚಿಮಿ ನಾಲ್ ಕೈತಾರ್. ಮಿತ್ತ್ ದ ರಡ್ಡ್ ಕೈಕುಲೆಡ್ವ ತಾಮರೆದ – ಕಮಲದ ಪೂಕುಲೆನ್ ಪತೊಂದಿನಾರ್.ತಿರ್ತ್ ದ ರಡ್ಡ್ ಕೈಕುಲೆಡ್ ’ವರದ’ , ’ಅಭಯ’ ಮುದ್ರೆನ್ ತೋಜಾವೆರ್. ತಾಮರೆದ ಲೆಕ್ಕಂದಿನ ಮೋನೆದ ತಾಮರೆಡ್ – ಕಮಲೊಡು ಕುಲ್ಲುದಿನಾರ್.ಎಡ್ಮ ರೂಪದ ಲಚ್ಚಿಮೆಯಾದ್ ಎಡ್ಮ ಬಗೆತ ಐಶ್ವರ್ಯ ಅತ್ತಡ ಅಯಿಸ್ರೊಲೆನ್ ಕೊರ್ಪಿನಾರ್ ,ಅಂಚಾದೆ ಲಕ್ಷ್ಮೀ – ಲಚ್ಚಿಮೆ ಮಸ್ತ್ ಜನಮನ್ನಣೆ,ಮಲ್ಲಮಾನ್ಯತೆ ಪಡೆಯಿನಾರ್.
ನಾಗರ ಪಂಚೆಮಿ ಬನ್ನಗ ನಾಗಗ್ ತನು‌ಮಯಿಪುವ, ಆಟಿದ ಪುಣ್ಣಮೆ ಬನ್ನಗ ತಡ್ಯಪುಡ್ಯಾಡುವ,ಆಟಿದ ಅಮಾಸೆಗ್ ಮರ್ದ್ ಪರ್ಪ, ಅಟ್ಟೆಮಿವಾನಿ ಅರ್ಘ್ಯೆ ಮಯಿಪುವ, ಚೌತಿದಾನಿ ಗಣಪತಿ ಗೂರುವ,ಪರ್ಬದಾನಿ ಬಲೀಂದ್ರನ್ ಎದ್ಕೊನುವ,ಸಾರಮಾನಿ ದೈವೊಲೆನ್ ಕಾಲಾದಿಗ್ ಸರಿಯಾದ್ ಬೋಗ ಕೊರ್ಪ…ಇಂಚ ನಂಕ್ ಒಂಜೊಂಜಿ ಸಂದರ್ಭೊಡು,ಒಂಜೊಂಜಿ ಬಯಕೆ ತೀರ್ತೊನರೆ ಒಂಜೊಂಜಿ ದೇವೆರ್.
ವರಮಹಾಲಕ್ಷ್ಮೀ ವ್ರತತ ದಿನ ಬನ್ನಗ ಲಚ್ಚಿಮಿನ ಪೂಜೆ.ಸರ್ವೇರ್ಲ ಬಯಕುನ ಭಾಗ್ಯ ಕೊರ್ಪಿನ ದೇವೆರೆನ ಪೂಜೆ,ವರಮಹಾಲಕ್ಷ್ಮೀ ವ್ರತ ನಮ್ಮತುಳುವೆರ್ನ ಎಡ್ಡೆಮೆಲ್ಲಿ ಅತ್ತ್.ಆಂಡ ಇನಿ ಮಸ್ತ್ ಜನ ನಂಬುನ ಎಡ್ಡೆ ಸಂದರ್ಭ ಆದ್ ಲಚ್ಚಿಮಿನ ಪೂಜೆ ಊರೊರ್ಮೆ ನಡತೊಂದು ಉಂಡು.ಪಣ್ಜೋವು ಪಾಲ್ ಪಡೆವುನ ಎಡ್ಡೆಮೆಲ್ಲಿ ವರಮಹಾಲಕ್ಷ್ಮೀ ವ್ರತ.
ವೈದಿಕ ವಿಧಾನೊಡು ಪೂಜೆ ನಡಪುಂಡು.
ಮಂಡಲ‌ ಬೆರೆಪೆರ್,ಕಲ್ಪೋಕ್ತ ವಿಧಾನೊಡು‌ ಲಕ್ಷ್ಮೀಗ್ ಪದಿನಾಜಿ ಬಗೆತ ಪೂಜೆ ಮಲ್ಪುವೆರ್, ಲಚ್ಚಿಮಿಗ್ ಪ್ರಿಯವಾಯಿನ ಪೂ ಅರ್ಚನೆ ಮಲ್ಪುವೆರ್, ಕತೆ ಓದುವೆರ್,ಅಕೇರಿಗ್ ಆರತಿ ದೆರ್ಪುವೆರ್. ಪ್ರಸಾದ ವಿತರಿಪುವೆರ್.
ದೇವಸ್ಥಾನೊಲೆಡ್,ಮಂದಿರೊಲೆಡ್,ಭಜನಾ ಮಂದಿರೊಲೆಡ್,ಪತ್ತ್ ಜನ ಸೇರ್ನ ಎಡ್ಡೆ ಜಾಗೆಡ್ ವರಮಹಾಲಕ್ಷ್ಮೀ ವ್ರತ ಪೂಜೆ ಸಾಮೂಹಿಕವಾದ್ ಗೌಜಿಡ್ ನಡಪುಂಡು.
• ಕೆ.ಎಲ್.ಕೆ.
~~~~