ಪಂಚದ್ರಾವಿಡ ಬಾಸೆಲೆಡ್ ಒಂಜಾಯಿನ ತುಳು ಬಾಸೆಗ್ ಸರಕಾರದ ಮಾನ್ಯತೆ ತಿಕ್ಕುದಿಜಿ ಪನ್ಪಿನ ಬೇಜಾರುದ ಸಂಗತಿಯಾಂಡಲಾ ತುಳುಬಾಸೆದ ಬುಲೆಚ್ಚಿಲ್ ಗಾದ್ ತುಳುವೆರ್ ನಿರಂತರವಾದ್ ಪೊರಂಬಾಟ ಮಲ್ತೊಂದುಪ್ಪುನವ್ ಖುಷಿತ್ತ ಸಂಗತಿ. ಆ ನಿಟ್ಟುಡ್ ಶಾಲೆಡುಲಾ ಜೋಕ್ಲೆಗ್ ತುಳುಟ್ ಪಾಠ ಕಲ್ಪಾವೊಡ್ ಪನ್ಪಿನ ನಿಟ್ಟುಡ್ ತುಳುವೆರೆನ ಒತ್ತಾಯಗ್, ತುಳುಅಕಾಡೆಮಿದ ಪ್ರಯತ್ನಡಾದ್ 2010 ನೇ ಇಸವಿಡ್ ಸರಕಾರ ಶಾಲೆಡ್ ತುಳು ಕಲ್ಪರೆಗ್ ಆದೇಶ ಕೊರ್ತುಂಡ್. ಸರಕಾರದ ಆದೇಶ ತಿಕ್ಕುಂಡಲಾ ಶಾಲೆಡ್ ತುಳು ಕಲ್ಪರೆಗ್ ಜೋಕುಲು ತಯಾರಾದಿತ್ತುಜ.ತುಳುಟ್ ಕಲ್ತುಂಡ ಭವಿಷ್ಯಡ್ ಉದ್ಯೋಗ ತಿಕ್ಕರೆಗ್ ಕಷ್ಟ ಆವ್ ಪನ್ಪಿನ ಪೋಡಿಗೆ ಜೋಕ್ಲೆಗಿತ್ತುಂಡ್. ಆಂಡ 2014 ಡ್ ಕುಡ್ಲ ಉರ್ವಡುಪ್ಪುನ ಪೊಂಪೈ ಪ್ರೌಢಶಾಲೆಡ್ 10 ನೇ ಕ್ಲಾಸ್ ಡ್ ತುಳುಟ್ ಪರೀಕ್ಷೆ ಬರೆಯಿನ 18 ಜೋಕುಲು ಪಾಸಾದ್ ತುಳು ಬಾಸೆಲಾ ಬೇತೆ ಬಾಸೆಗ್ ಕಡಮೆ ಇಜ್ಜಿ ಪಂಡುದ್ ತುಳುನಾಡುಗೇ ಮಲ್ಲ ಕೊಡುಗೆ ಕೊರಿಯೆರ್.
ಅಂಚ ಸುರುವಾಯಿನ ಶಾಲೆಡ್ ಮೂಜನೇ ಬಾಸೆ ತುಳುಕ್ ಮಾನಾದಿಗೆ ತಿಕ್ಕೊಂದ್ ಬತ್ತುಂಡ್. ಅಲ್ಪ ಕುಡ್ಲಡ್ ತುಳುಟ್ ಪರೀಕ್ಷೆ ಬರೆಯಿನ ಉಮೇದು ತೂದ್ ಉಡುಪಿಡ್ಲಾ ಶಾಲೆಲೆಡ್ ತುಳು ಕಲ್ಪರೆಗ್ ಒಲವು ತೋಜಾಯೆರ್. ಸುರುಕ್ಕಾದ್ ಉಡುಪಿದ ಬಾಲಕಿಯರ ಪದವಿ ಪೂರ್ವ ಕಾಲೇಜಿಡ್ ವಿಶ್ವನಾಥ ಬಾಯರಿ ಸರ್ ನ ಮುತಾಲಿಕೆಡ್ ಶಾಲೆಡ್ 2014 ಡ್ ಮೂಜನೇ ಬಾಸೆಯಾದ್ ತುಳುಟ್ ಕಲ್ತುದ್ ಜೋಕುಲು ಪರೀಕ್ಷೆ ಬರೆಯಿನಿ ಮಾತ್ರ ಅತ್ತ್,10 ನೇಟ್ ಏತ್ ಜೋಕುಲು ಪರೀಕ್ಷೆ ಬರೆತೆರಾ ಆತ್ ಜೋಕುಲಾ ನೂದೆಕ್ ನೂದ್ ಪಾಸಾದ್ ತುಳುವೆರೆನ ಉಡಲ್ ಗೆಂದುದೆರ್.
ಈ ಸರ್ತಿಲಾ ಬಾಲಕಿಯರ ಪದವಿ ಪೂರ್ವ ಕಾಲೇಜಿದ ಪ್ರೌಢಶಾಲೆದ 10 ನೇ ಕ್ಲಾಸ್ ಡ್ 16 ಜೋಕುಲು ತುಳುಟ್ ಪರೀಕ್ಷೆ ಬರೆದ್ ಮಾತಾ ಜೋಕುಲಾ ಪಾಸಾತೆರ್. ಅತ್ತಾವಂದೆ 11 ಜೋಕುಲು ವಿಶೇಷ ಅಂಕೊನ್ ಪಡೆದ್ ಪಾಸಾತೆರ್.ಸುಚಿತ್ರ ಮೇಡಮ್ ಜೋಕುಲೆಗ್ ತುಳು ಪಾಠ ಕಲ್ಪಾವೊಂದುಲ್ಲೆರ್. ಶಾಲೆ ಜೋಕುಲಾಯಿನ ತೇಜಸ್ವಿನಿ,ಆರ್. ಸಿಯಾ, ಸಿಯಾ, ಲಾವಣ್ಯ, ನೈಮಿಷ, ನೇಸರ, ಸಾನಿಧ್ಯ, ಸಂಜನ, ಮನಸ್ವಿ, ಸಾನಿಯ, ಭೂಮಿಕಾ ಮೊಕುಲು ವಿಶೇಷ ಅಂಕ ಪಡೆತುದ್ ಪಾಸಾಯಿನ ಜೋಕುಲು.
ಬೇಜಾರುದ ಸಂಗತಿ ದಾದ ಪಂಡ ಕರಿನ ಕೆಲವು ವರ್ಷಡಿಂಚಿ ಈ ಶಾಲೆಡ್ ಜೋಕುಲೆಗ್ ತುಳುಟ್ ಕಲ್ಪಾದ್ ಅಕ್ಲೆನ ಎಡ್ಡೆ ಅಂಕ ಬರ್ಪಿಲೆಕ್ಕ ಪ್ರಯತ್ನ ಬರ್ಪಿನ ಸುಚಿತ್ರಾ ಮೇಡಮ್ ಮೆರೆಗ್ ಸರಕಾರದ ಒವ್ವೇ ಸಂಬಳ ಬರೊಂದಿಜ್ಜಿ. ಶಾಲೆದ ಮುಖ್ಯಸ್ಥೆರಾದಿತ್ತುದ್ ಇತ್ತೆ ನಿವೃತ್ತಿ ಪಡೆಯಿನ ವಿಶ್ವನಾಥ ಬಾಯರಿ ಸರ್ ನ ಮುತಾಲಿಕೆಡ್ ಸಮಾಜದ ದಾನಿಲು ವಿಶೇಷವಾದ್ ಉಡುಪಿ ತುಳುಕೂಟದ ಗುರ್ಕಾರೆರಾಯಿನ ಶ್ರೀ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಮೆರೆನ ಮುತುವರ್ಜಿಡ್ ಈ ಟೀಚರೆಗ್ ತಿಂಗೊಲುಗ್ ಗೌರವಧನ ಪಂಡುದ್ ಕೊರೊಂದುಲ್ಲೆರ್. ಆಂಡ ಸರಕಾರ ಇದಮುಟ್ಟಲಾ ಒವ್ವೇ ಸಂಬಳ ಕೊರಂದೆ ತುಳುಬಾಸೆಡ್ ಕಲ್ಪಾವರೆಗ್ ಟೀಚರ್ ನಕುಲು ದುಂಬು ಬರೊಂದಿಜ್ಜೆರ್.
ಅಂಚಾದ್ ಸರಕಾರ ನನಾಂಡಲಾ ಈ ಬಗೆಟ್ ಗಮನ ಕೊರೊಡು, ಅತ್ತಾವಂದೆ ತುಳುಬಾಸೆಡ್ ಜೋಕ್ಲೆಗ್ ಶಾಲೆಡ್ ಕಲ್ಪಾವರೆಗ್ ಸೂಕ್ತವಾಯಿನ ಕಲ್ಪಾದಿಲೆನ ನೇಮಕ ಮಲ್ಪೊಡ್. ಅತ್ತಾವಂದೆ ಇತ್ತೆ 10 ನೇ ಮುಟ್ಟ ಇತ್ತಿನವ್ವೆನ್ ಪಿಯುಸಿ ಡುಲಾ ಜೋಕುಲೆಗ್ ತುಳುಟ್ ಕಲ್ಪರೆಗ್ ಅವಕಾಶ ಮಲ್ತುದ್ ಕೊರೊಡು. ಉಂದೆಕ್ ಜಿಲ್ಲೆದ ಮಾತಾ ಶಾಸಕೆರ್ ನಕುಲು ಒಂತೆ ಗಮನ ಕೊರೊಡ್ ಪಂಡುದ್ ಮಾತಾ ತುಳುವೆರೆನ ಪರವಾದ್ ತುಳುನಾಡಧ್ವನಿ ಪತ್ರಿಕೆ ಬಿನ್ನಪ ಮಲ್ತೊಂದುಂಡ್.
by 