ದಕ್ಷಿಣದ ಗಾಣಗೋಪುರ ಪಂಡುದೇ ಪುಗಾರ್ತೆನ್ ಪಡೆದಿನ ಒಡಿಯೂರು ಕ್ಷೇತ್ರದ ಪರಮಪೂಜ್ಯ ಶ್ರೀ ಶ್ರೀ ಗುರುದೇವಾನಂದ ಸ್ವಾಮೀಜಿ ತುಳುಬಾಸೆಗ್ ಅನನ್ಯ ಕೊಡುಗೆ ಕೊರ್ತಿನಾರ್.ತುಳುಬಾಸೆದ ಬುಲೆಚ್ಚಿಲ್ ಗಾದ್ ತುಳುಟ್ ಭಜನೆ ರಚನೆ ಮಲ್ತುದ್ ಐಕ್ ತುಳುಟೇ ತಾನೇ ಸ್ವತಃ ಸೊರೊ ಕೊರ್ತೆರ್.ಹೆಚ್ಚಾದ್ ಕಾರ್ಯಕ್ರಮೊಲೆಡ್ ವೇದಿಕೆಡ್ ತುಳುಟೇ ಪಾತೆರುದ್ ತುಳುಬಾಸೆಗ್ ಬಲ ದಿಂಜಾದಿನಾರ್.ಅವಧೂತನ ಅಂತರಂಗ ಪನ್ಪಿನ ವಿಚಾರೊನ್ ತುಳುಟೇ ಬರೆದ್ ದಿನೋಲಾ ಲೋಕಾರ್ಪಣೆ ಮಲ್ತೊಂದುಲ್ಲೆರ್.ಆತೇ ಅತ್ತಾವಂದೆ ಹನುಮಾನ್ ಚಾಲೀಸನ್ ತುಳುಲಿಪಿಟ್ ಬರೆದ್ ಅವ್ವೆನ್ ಷಷ್ಠ್ಯಬ್ದ ಸಂಭ್ರಮದ ಕಾರ್ಯಕ್ರಮೊಲೆಡ್ ಸಭೆಟ್ ತುಲುಟ್ ಪಠಣ ಮಲ್ದೆರ್.
ಇಂಚ ತುಳುಬಾಸೆಗ್ ಅನನ್ಯ ಕೊಡುಗೆ ಕೊರ್ತಿನ ಪರಮಪೂಜ್ಯೆರ್ ತುಳುಲಿಪಿನ್ ತಾನೇ ಸ್ವತಃ ಕಲ್ತುದ್ “ಅವಧೂತೋಪನಿಷತ್” ನ್ ತುಳು ಲಿಪಿಟ್ ಬರೆದ್ ಲೋಕಾರ್ಪಣೆ ಮಲ್ದೆರ್.ಒಡಿಯೂರು ಕ್ಷೇತ್ರದ ರಾಜಾಂಗಣ ಉದಿಪನದ ಸಭಾಕಜ್ಜೊಡ್ ಈ ತುಳುಲಿಪಿಟ್ ಬರೆತಿನ ಬೂಕುನು ಧರ್ಮಸ್ಥಳದ ಧರ್ಮಾಧಿಕಾರಿ ಶ್ರೀ ಶ್ರೀ ಪರಮಪೂಜ್ಯ ವೀರೇಂದ್ರ ಹೆಗ್ಗಡೆರ್ ಬುಡುಗಡೆ ಮಲ್ತೆರ್.
ಅವಧೂತೋಪನಿಷತ್ ನೂತ್ತೆಡುಂಬ(108) ಉಪನಿಷತ್ತುಲೆಡ್ ಸೇರಿನವ್ವ್.ಕ್ರಷ್ಣಯಜುರ್ವೇದಗ್ ಸಂಬಂಧಪಟ್ಟಿನ ಈ ಉಪನಿಷತ್ತುಡ್ “ಸಹನಾವವತು” ಪನ್ಪಿನ ಶಾಂತಿ ಮಂತ್ರ ಉಂಡು.ಈ ಉಪನಿಷತ್ತುಗ್ ಉಪನಿಷದ್ಬ್ರಹ್ಮಯೋಗಿಲೆನ ಭಾಷ್ಯ ಉಂಡು.ಸಾಂಕ್ರತಿಮಹರ್ಷಿ ಬೊಕ್ಕ ಭಗವಾನ್ ದತ್ತಾತ್ರೇಯ ಸಂಭಾಷಣೆದ ರೂಪೊಡುಪ್ಪುನ ಅವಧೂತೋಪನಿಷತ್ ಡ್ ಪ್ರಶ್ನೋತ್ತರ ಉಂಡು.ಮುಪ್ಪತೈನ್ ಮಂತ್ರೊಲೆಡ್ ಉಂಡು.ಈ ಉಪನಿಷತ್ತ್ ಡ್ ಅವಧೂತನ ಸ್ವರೂಪ,ಸ್ಥಿತಿ,ಲಕ್ಷಣ ಬೊಕ್ಕ ಸಂಸ್ಕರಣದ ವಿಚಾರೊಲ್ ಪ್ರಸ್ತುತವಾದುಂಡ್.
by 