ಬೆಂಗ್ ದುಡಲ್ ಲೆಗ್ ಸಂಪು ಕೊರೊಂದು ಮಾಧ್ಯಮ ಕ್ಷೇತ್ರೊಡ್ ಪೊಸ ಚರಿತೆ ಬರೆಯಿ ಗಟ್ಟಿಗೆ.ಜಯಪ್ರಕಾಶ್ ಶೆಟ್ಟಿ ಉಪ್ಪಳ..

ಬೆಂಗ್‌ದುಡಲ್‌ಲೆಗ್ ಸಂಪು ಕೊರೊಂದು ಮಾಧ್ಯಮ ಕ್ಷೇತ್ರಡ್ ತನ್ನನೇ ಪೊಸ ಚರಿತೆ ಬರೆಯಿ ಗಟ್ಟಿಗೆ – ಜಯಪ್ರಕಾಶ್ ಶೆಟ್ಟಿ ಉಪ್ಪಳ

ಪ್ರತಿ ಮಲ್ಲ ಮಲ್ಲ ತಾದಿದ ಪಯಣೊಲಾ ತೊಟ್ಟುನು ಒಂಜಿ ಕಿನ್ಯ ಪಜ್ಜೆಡ್ದೇ. ಅಜ್ಜೆ ಅಜ್ಜೆ ಜೋಡಾವೊಂದು ದೀಪಿ ಗಟ್ಟಿ ಪಜ್ಜೆಲೆಡುಂಡು ನಮ್ಮ ಗೆಲ್ಮೆನೊದ ರಾಜಬೀದಿ. ಆಂಡ ಸುರುತ ಪಜ್ಜೆ ದೀಪುನ ದುಂಬು ಸರಿಯಾದ್ ಆಲೋಚನೆ ಮಲ್ತ್ ಕಾರ್ ದೀವೊಡು. ದುಂಬು ಪೋಪಿ ಪೊರ್ತು ಆ ತಾದಿಡ್ ಬರ್ಪಿ ಅಡ್ಡವಿಡ್ಡೂರಲೆನ್ ಗೆನ್ಪಂದೆ, ದಾದ ಆಂಡಲಾ ತಿರ್ಗ್ ತೂವಂದೆ ದುಂಬು ಪೋಯಿನಾಯೆನೇ ಗೆಲ್ಮೆ ಮಲೆತ್ತ ಕೊಡಿಟ್ ಬೊಲ್ಲಿ ದಾರಗೆಲೆಕೊ ಮೆನ್ಕುವೆ ಪನ್ಪಿನೆಕ್ ಸಾಕ್ಷಿಲಾದ್ ಸಾರಗಟ್ಲೆ ಸಾಧಕೆರ್ ನೆಗತ್ ತೋಜಿಪೆರ್. ಅಂಚಿನ ಬಿರ್ಸೆರೆ ನಡುಟು ಲಕ್ಕ್‌ದ್ ತೋಜುನ ಸಾಧಕೆರೆನೊರ್ಯನ್ ಪೊಲಬು ಮಲ್ಪೆರೆ ಪೋಪುನಾಂಡ ತನ್ನ ಬಿರ್ಸಾದಿಗೆ, ಸೊರೊಚಾತಿರ್ಪು ಬೊಕ್ಕ ಗಟ್ಟಿ ಉಂತುನ ಛಾತಿಡ್ ವಾರ್ತಾವಾಚನ, ಚರ್ಚಾಕೂಟ, ಸುಧಾರಿಕೆ, ಸಂದರ್ಶನ, ತುಲಿಪುಲೆನ ಸುರುತ ಪಜ್ಜೆಡ್ ತನ್ನನೇ ಆಯಿನ ಒಂಜಿ ಪೊಸತಿರಿ ಸಿಸ್ಟಿ ಮಲ್ತ್ ಪುಗರ್ತೆಡ್ ಮೆರೆವೊಂದುಪ್ಪುನಾರ್ ಜಯಪ್ರಕಾಶ್ ಶೆಟ್ಟಿ ಉಪ್ಪಳ.

ದೃಶ್ಯಮಾಧ್ಯಮ ಅತಂಡ ಲೋಕೊತೂಪರಿಕೆದ ಒರುವಾಯಿ ಟಿವಿಡ್ ಮಲ್ಲ ಮಿತ್ತರ್ಮೆಡ್ ಎಚ್ಚ ಸಮಯ ಒರಿಯುನು ಎಲ್ಯ ಸಂಗತಿ ದಾಲಾ ಅತ್ತ್. ಅಂಚಿನಲ್ಪ ಕಾಸ್ರೋಡುದಂಚಿನ ಕೇರಳ ಕರ್ನಾಟಕ ಗಡಿತ್ತ ಮಂಗಲ್ಪಾಡಿದಂಚಿನ ಎಲ್ಯ ಊರುದ ತುಳುವೆ ಒರಿ ಕನ್ನಡ ಮಾಧ್ಯಮ ಲೋಕೊಡು ಗಟ್ಟಿ ನಿಲೆ ಪತ್ತ್‌ದ್, ತನ್ನ ಪಜ್ಜೆದಚ್ಚಿ ಮೂಡಾವೊಡಾಂಡ ಅವೆನ್ನ ಪಿರವುದ ತಯಾರಿಲಾ ದಾಲಾ ಸುಲಭ ಅತ್ತ್. ಆತೆ ಅತ್ತಂದೆ ಆ ಕಲ್ಲ್ ಮುಳ್ಳ ತಾದಿಡ್ ನಡತ್ ಮಲ್ಲ ಮಲ್ಲ ಪ್ರಶಸ್ತಿಲೆನ್ ಪತ್ತುನ ಎತ್ತರಗ್ ಮುಟ್ಟ್‌ದೆರ್ ಪಂಡ ಅವು ಮಲ್ಲ ಸಾಧನೆನೇ ಸರಿ.

ಸಪ್ತಭಾಷಾಸಂಗಮದ ಗಡಿನಾಡ್ ಪನ್ಪವೊನ್ನ ಕಾಸ್ರೋಡು ಜಿಲ್ಲೆದ ಮಂಜೇಶ್ವರ ತಾಲೂಕುದ ಮಂಗಲ್ಪಾಡಿ ಗ್ರಾಮೊದ ಉಪ್ಪಳಡ್ ಪುಟ್ಟಿ ಜಯಪ್ರಕಾಶ್ ಶ್ರೀನಿವಾಸ ಶೆಟ್ಟಿ ಬೊಕ್ಕ ದೇವಕಿ ಶೆಟ್ಟಿ ದಂಪತಿಲೆನ ಪದ್ರಾಡ್ ಜೋಕ್ಲೆಡ್ ಅಕೇರಿದಾರ್. ಕಿನ್ಯೆಡೇ ಬಾರೀ ಚುರುಕುದ ಬಾಲೆಯಾದ್ ಇತ್ತಿನ ಜಯಪ್ರಕಾಶ್ ಶೆಟ್ರ್ ತನ್ನ ಪ್ರಾಥಮಿಕ ಶಿಕ್ಷಣನ್ ಮುಳಿಂಜಡ್ ಬೊಕ್ಕ ಬೆಂಗಳೂರು ಶೇಷಾದ್ರಿಪುರಂಡ್ ಕಲ್ತ್, ಪ್ರೌಢ ಶಿಕ್ಷಣನ್ ಸರಕಾರಿ ಪ್ರೌಢ ಶಾಲೆ ಉಪ್ಪಳಡ್ ಮುಗಿತ್ತ್ ಅಯಿಡ್ದ್ ಬೊಕ್ಕ ದೇರಳಕಟ್ಟೆದ ನಿಟ್ಟೆ ಯೂನಿವರ್ಸಿಟಿಡ್ ಡಿ.ಫಾರ್ಮಾ (ಡಿಪ್ಲೊಮಾ ಇನ್ ಫಾರ್ಮಸಿ) ಮಲ್ತ್ ಕುಡ್ಲಡ್ ಮೆಡಿಕಲ್ ರೆಪ್ ಆದ್ ಬೆಂದೆರ್.

ಫಾರ್ಮಾಸ್ಯೂಟಿಕಲ್ ಡಿಪ್ಲೊಮಾ ಆಯಿಬೊಕ್ಕ ಕುಡ್ಲಡ್ ಮೆಡಿಕಲ್ ರೆಪ್ ಆದ್ ಬೆಂದಿನಾರ್ ರಡ್ಡ್ ಒರ್ಸೊ ಕರಿದ್ 2000ನೇ ಇಸವಿಡ್ ಹೈದರಾಬಾದ್‌ಗ್ ಬೆನ್ಕೆದ ಬೆರಿಪತ್ತ್ ಪೋಯಿನಾರೆಗ್ ರಾಮೋಜಿ ಫಿಲ್ಮ್ ಸಿಟಿಟಿಪ್ಪುನ ಈಟಿವಿ ಕನ್ನಡಡ್ ಮಾಧ್ಯಮಿಕ ಸುಧಾರಿಕೆದ ಬೆನ್ಕೆಗ್ ತನನ್ ಒಡ್ಡೊಂಡೆರ್. ಪುಟ್ಟು ಪಜ್ಜೆಲೆನ್ ದೀವೊಂದಿತ್ತಿನ ಈಟಿವಿದ ಕಡೀರ ವಾರ್ತೆ ಓದುನಾರ್ ಆದ್ 2000 ಡಿಸೆಂಬರ್ 10 ತಾರೀಕ್ ಮದ್ಯಾನ 12 ಗಂಟೆದ ಬುಲೆಟ್ ನ್ಯೂಸ್ ಓದಿ ಪೆರ್ಮೆಲಾ ಜೆ.ಪಿ ಶೆಟ್ರೆನವು.

2006 ಏಪ್ರಿಲ್ 12ನಾನಿ ವರನಟ ಡಾ. ರಾಜ್‌ಕುಮಾರ್ ತೀರ್ನಾನಿ ಮದ್ಯಾನ 2 ಗಂಟೆಡ್ದ್ ನಡಿರ್ಲ್ 12 ಗಂಟೆಮುಟ್ಟ ಪುರ್ಸೊತು ದೆತೊನಂದೆ ವಾರ್ತೆ ಓದಿ ಪೆರ್ಮೆದೊಟ್ಟುಗು ಆರ್ನ ವೃತ್ತಿ ಬದ್ಕ್‌ಗ್ ಮಲ್ಲ ತಿರ್ಗಸ್ ಆಂಡ್. 2000ಡ್ದ್ 2008ಮುಟ್ಟ ಈಟಿವಿಡ್ ಬೆಂದಿನಾರ್ 2008ಡ್ ಸುವರ್ಣ ನ್ಯೂಸ್ ಸೇರೊನ್ನಗ ಆನಿದ ಸುವರ್ಣದ ಮುಖ್ಯಸ್ಥೆ ಆದಿತ್ತಿ ಇತ್ತೆದ ಪಬ್ಲಿಕ್ ಟಿವಿದ ರಂಗನಾಥೆರ್ ಪೊಲಿಟಿಕಲ್ ರಿಪೋರ್ಟರ್ ಆದ್ ಬೆನ್ಯೆರೆ ಕೇನೊಂಡೆರ್. ಅಂಚನೆ ದುಂಬು ಪೋಯಿ ಶೆಟ್ರ್ 2010ಡ್ ಬಿ.ಎಸ್.ವೈ ಮುಖ್ಯಮಂತ್ರಿ ಗದ್ದಿಗೆಡ್ದ್ ಜಪ್ಪುನ ಸ್ಥಿತಿಕ್ಕ್ ಬನ್ನಗ ಆರ್ನ ಸಂದರ್ಶನ ಮಲ್ತ್ ಆರ್ನ ಉಡಲ್ ತುಲಿತ್ತ್ ದೆತ್ತಿನ ರೀತಿ ರಾಷ್ಟ್ರೀಯ ಬೊಕ್ಕ ಅಂತಾರಾಷ್ಟ್ರೀಯ ಮಾಧ್ಯಮಡ್ಲಾ ಬಿತ್ತರ ಆತ್‌ನ್ನೇ ಅತ್ತಂದೆ ಸುವರ್ಣ ನ್ಯೂಸ್‌ಗ್ ಸುರುಕಾದ್ ನೂದೆಡ್ದ್ ಮಿತ್ತ್ ಟಿ.ಆರ್.ಪಿ ಕನತ್ ಕೊರ್ನ ಈ ಪ್ರೋಗ್ರಾಮ್‌ಗ್ ಹೈಕಮಾಂಡ್ ನಡ್ಗ್ಂಡ್. 2013ಡ್ ಸಮಯ ವಾಹಿನಿಗ್ ಪಜ್ಜೆ ದೀಯೆರ್. ಅಲ್ಪ ‘ಬಿಗ್ ತ್ರಿ’, ‘ಸಮಯ ಸಂಜೀವಿನಿ’ ‘ಸಾಲ ಮನ್ನಾ ಯೋಜನೆ’ ಮಲ್ತ್ 2017ಮುಟ್ಟ ಸಮಯ ವಾಹಿನಿಡ್ ಬೆಂದ್ ತಿರ್ಗ್‌ದ್ ಬತ್ತಿನಾರ್ ಗಟ್ಟಿ ಉಂತಿನಿ ಕುಡ ಸುವರ್ಣ ನ್ಯೂಸ್ ಚಾನೆಲ್‌ಡ್.

ಮಾಧ್ಯಮ ಲೋಕಡ್ ವಿಷ್ಣುವರ್ಧನ್‌ರೆನ್ ಅಕೇರಿದ ಸಂದರ್ಶನ ಮಲ್ತಿ ಪೆರ್ಮೆಲಾ ಜಯಪ್ರಕಾಶ್ ಶೆಟ್ರೆನವು. ಸುವರ್ಣಡ್ ‘ಬ್ರೇಕ್ ಫಾಸ್ಟ್’ ಪ್ರೋಗ್ರಾಮ್‌ದ ಒರುಟು ‘ನಾನು ಶೆಟ್ರು ಮತ್ತು ಭಟ್ರು’ ಪನ್ಪಿ ಪಾತೆರಡ್ ಪ್ರತಿಮಾ ಭಟ್ರ್ ಒತ್ತಟ್ಟ್ ಇತ್ತೆರ್. ‘ಪಂಚ್ ಪ್ರಶ್ನೆ’ ಪನ್ಪಿ ವಿಷಯದ ಒಟ್ಟುಗು ‘ಪಂಚಕಜ್ಜಾಯ’ ಪನ್ಪಿ ಸೂಪರ್ ಹಿಟ್ ಕಾರ್ಯಕ್ರಮ, ವಾರದ ಕಡೆಕ್ ‘ಟಾಪ್ ಟೆನ್ ಬುಕ್’, ‘ಕಟ್ಟೆಚ್ಚರ’ ಕಾರ್ಯಕ್ರಮ ಸುಧಾರಿಕೆ, 2013ಡ್ ‘ಸಿನೆಮಾ ಸೆಂಚುರಿ’ ಲೇಸ್, ಮುಖ್ಯಮಂತ್ರಿ ಆದ್ ಬತ್ತಿ ಸಿದ್ದರಾಮಯ್ಯೆರೆ ಸುರುತ ಸಂದರ್ಶನ ಮಲ್ತ್‌ನಾರ್. ‘ದೊಡ್ಡವರ ಅಖಾಡ’ ಕಾರ್ಯಕ್ರಮದ ಒರುಟು 30 ಜಿಲ್ಲೆ ಬೊಕ್ಕ 150 ವಿಧಾನಸಭಾ ಕ್ಷೇತ್ರ ಸುತ್ತಿನ ಕೀರ್ತಿಲಾ ಜಯಪ್ರಕಾಶ್ ಶೆಟ್ರೆನವು. ಸಾಮಾನ್ಯೆರೆ ಒಟ್ಟುಗು ಬಜೀ ಸಾಮಾನ್ಯೆರೆಲೆಕ ಇತ್ತೊಂದು, ಮಾತೆರೆನ ಮೆಚ್ಚುಗೆಡ್ ಮಾಧ್ಯಮ ಕ್ಷೇತ್ರಡ್ ಗಟ್ಟಿ ಪಜ್ಜೆ ಊರ್ನ ಜಯಪ್ರಕಾಶ್ ಶೆಟ್ಟಿ ಉಪ್ಪಳ ನಡತ್ ಬತ್ತಿ ಸಾದಿಡ್ ಇತ್ತಿ ಕಲ್ಲ್ ಮುಳ್ಳುಲೆ ಪೆಟ್ಟ್‌ದ ಬೇನೆನ್ ಪಟ್ಟೊನುನಾರ್ ಅತ್ತಂಡಲಾ ಆರ್ನ ಗೆಲ್ಮೆದ ಚರಿತೆ ಬುಡ್ಪನಗ ಆರ್ನ ಉಡಲ್‌ಡುಪ್ಪಿ ಕಷ್ಟದ ದಿನೊಕ್ಲೆ ದುನಿಪುಲಾ ಒರೋರ ಆಂಜಿದ್ ಮಾಜುಂಡು.

ಭಾರತಗ್ ಸ್ವಾತಂತ್ರ್ಯ ತಿಕಿನ ಬೆರಿಕ್ ಗ್ರಾಮ ಪಂಚಾಯತ್‌ಗ್ ಅವಿರೋಧವಾದ್ ಅಜಪ್ಪವೊಂದು ಒತ್ತುಗುರ್ಕಾರ್ರ್ ಆಯಿನ ಶ್ರೀನಿವಾಸ ಶೆಟ್ರೆನ ಪೊಲಬು ಸಮಾಜಸೇವೆಡ್ ಎಂಚ ಮೆನ್ಕೊಂದಿತ್ತ್ಂಡ್ ಪನ್ಪಿನೆಕ್ ಇನಿಕ್ಕ್‌ಲಾ ಜನೊಕುಲು ಆರೆನ್ ನೆಂಪು ಮಲ್ತೊನುನವು ಸಾಕ್ಷಿಯಾದುಂಡು. ಅಮ್ಮೆರೆನ ಉದಾರತೆ ಬೊಕ್ಕ ಸಮಾಜಸೇವೆನ್ ಮೈಕೊಗ್ಗವೊಂದು ಬತ್ತಿ ಜಯಪ್ರಕಾಶ್ ಶೆಟ್ರ್ ತನ್ನ ವೃತ್ತಿದ ಒಟ್ಟುಗು ಸಕಾಯದ ಕೈತಾಂಗ್ ಆದುಲ್ಲೆರ್. 2013ಡ್ ಸಮಯ ನ್ಯೂಸ್ ಚಾನೆಲ್ ಸೇರಿ ಪೊರ್ತು ಆ ಚಾನೆಲ್ ಮುಖ್ಯಸ್ಥೆರಾಯಿನ ವಿಜಯ ಟಾಟಾ ಕೊರ್ನ ಪೂರ್ಣ ಸ್ವಾತಂತ್ರ್ಯದ ಪ್ರಭಾವಡ್ ಮಾಧ್ಯಮ ಲೋಕೊಡು ಪುಟ್ಟಿನ ಪೊಸ ಒರುತ್ತ ಕಜ್ಜಕೂಟ ‘ಬಿಗ್ ತ್ರಿ’ ವಾರ್ತೆದ ತುಲಿಪುನು ಪೊಸ ಒರುಟು ಕೊನೊಪಿ ಈ ಕಾರ್ಯಕ್ರಮಟ್ 2013 ಡಿಸೆಂಬರ್ 13ನಾನಿ ಸುರುತ ಕಜ್ಜೊ ಆದ್ ಬೀದರ್ ಜಿಲ್ಲೆದ ಗೋಧಿ ಹಿಪ್ಪರಗಿದ ಗ್ರಾಮೀಣ ಸಮಸ್ಯೆದ ತುಲಿಪು ನಡತ್ಂಡ್. ಸುದೆ ಕಡತೊಂದು ಶಾಲೆಗ್ ಪೋಪಿ ಪೊಣ್ಣು ಜೋಕ್ಲೆಗ್ ಆಪಿ ಬಙದ ಸಂಗತಿನ್ ಅಲ್ಪದ ಶಾಸಕೆ ಆಯಿನ ಈಶ್ವರ್ ಖಂಡ್ರೆರೆನ್ ಚಾನೆಲ್‌ಡ್ ಕುಲ್ಲದ್ ಜಯಪ್ರಕಾಶ್ ಶೆಟ್ರ್ ಮಲ್ತಿ ವಾಕ್ಸಮರದ ಫಲವಾದ್ ಮನದಾನಿ ಜೋಕ್ಲೆಗ್ ಜೀಪುದ, ರಡ್ಡ್ ದಿನ ಬುಡ್ದ್ ಬಸ್‌ದ ವ್ಯವಸ್ಥೆ ಆಂಡ್. ಅತ್ತಂದೆ ಮೂಜಿ ಒರ್ಸೊಡು ಮಲ್ಲ ಅಣೆಕಟ್ಟಲಾ ಸುದೆತ್ತ ರಡ್ಡ್ ಮೆಯಿಕ್ ತಾದಿ ಆಂಡ್. ಆತೆ ಅತ್ತಂದೆ ಆ ಲೇಸ್ ಶೆಟ್ರೆನ ಪಾಲ್‌ಗ್ ಮಾಲಂದಿ ಮುಕ್ಕಾರಾಂಡ್.

ಬಳ್ಳಾರಿ ಜಿಲ್ಲೆಡ್ ಶೌಚಾಲಯದಾಂತಿನ ಪೊರ್ತು ಪೊಸತ್ ಕಟ್ಟೆರೆ ಜಾಗೆ ದಾಂತೆ ಪೋನಗ ಊರುದ ಒರಿ ತನ್ನ ಸ್ವಂತ ಜಾಗೆ ಕೊರ್ದ್ ಸಮಸ್ಯೆಗ್ ಮುಕ್ತಿ ತಿಕುಲೆಕ ಮಲ್ಪೆರೆಲಾ ಕಾರಣ ಬಿಗ್ ತ್ರಿ. ಏಳ್ ಒರ್ಸೊಡು 5000ಡ್ದು ಜಾಸ್ತಿ ಕಾರ್ಯಕ್ರಮ ಮಲ್ತ್ ಅಯಿಟ್ 90% ಬೇಲೆ ಕೈಕೂಡಾಯಿನ ಜಾಣ್ಮೆ ಜಯಪ್ರಕಾಶ್ ಶೆಟ್ರೆನ ಕೂಟೊದವು.

ಸಮಯ ವಾಹಿನಿಡ್ ಇಪ್ಪುನಗ ಸಾಲೊದ ಚೀಲೊಡು ಬೂರ್ದ್ ನರಳುನ ಕುಟುಮೊಲೆನ್ ಬಂಗಾರ್‌ದ ಸಾಲ, ಬ್ಯಾಂಕಿಂಗ್ ಸಾಲ, ಕೈಕಂಜಿಲೆಗ್ ಮಲ್ತಿ ಸಾಲದಂಚಿನ ಸಾಲೊದ ಸೂಲೊಡ್ದು ಪಿದಯಿ ಕನಯೆರೆ ಮಲ್ತಿ ‘ಸಾಲ ಮನ್ನಾ ಯೋಜನೆ’ಡ್ ಅಂಚಿನ ಕುಟುಮೊಲೆಗ್ ಉಂತಿ ನಿಲೆಟ್ 10000 ರೂಪಾಯಿ ಕೊರ್ಪಿ ಕಜ್ಜೊ ಮಲ್ತ್ ಅಯಿಕ್ಕಾದ್ ದಾನಿಲೆಡ 71 ಲಕ್ಷ ರೂಪಾಯಿ ಕಾಸ್‌ನ್ ಒಟ್ಟು ಮಲ್ತ್ ಕೊರ್ನವು ಮಾಧ್ಯಮ ಲೋಕೊಗೇ ಮಣಿಮುಕುಟೊ. ಅಂಚನೆ ‘ಸಮಯ ಸಂಜೀವಿನಿ’ ಪನ್ಪಿ ಲೇಸ್‌ದ ಒರುಟು ಕಿಡ್ನಿ, ಚಂಕ್/ತಂಕ್ (ಹೃದಯ) ಸಮ್ಮಂದಿ ಸೀಕ್‌ದಕ್ಲೆಗ್ ಕೈ ದೆರ್ತ್ ಕೊರ್ದ್ ಜೂವೊ ಒರಿತಿ ಪುಣ್ಯೊದ ಪುದೆಲಾ ಶೆಟ್ರೆ ಪುಗೆಲ್‌ದ ಶಲ್ಯೊ.

2017ಡ್ ಸುವರ್ಣ ನ್ಯೂಸ್‌ದ ಮುಖ್ಯಸ್ಥೆರಾದ್ ಬತ್ತಿಬರವು ಹೆಗಡೆರ್ ಬತ್ತಾನಗ ಆರೆನ ಲೆಪ್ಪುಗು ಪಿರ ಸುವರ್ಣ ನ್ಯೂಸ್ ಸೇರಿ ಜೆ.ಪಿ ಶೆಟ್ರ್ ಅಲ್ಪಲಾ ‘ಬಿಗ್ ತ್ರಿ’ ಕಜ್ಜಕೂಟೊ ದುಂಬು ಕೊನೊದು ಚಿತ್ರದುರ್ಗಡ್ ಮಾರಿಬೊಳ್ಳಡ್ ಇಲ್ಲ್ ಬದ್ಕ್ ಕಳೆವೊಂದಿ 15 ಕುಟುಮೊಗು ಎಂ.ಎಲ್.ಎ ಚಂದ್ರಪ್ಪೆರೆಡ ಪಾತೆರ್ಪದ್ ಆಜಿ ತಿಂಗೊಲುದುಲಯಿ ಇಲ್ಲ್ ಕೊರ್ಪಯೆರ್. ಮಾರಿಬರ್ಸೊಡು ಕೊಡಗುಡು ಆಯಿನ ಅನಾಹುತಗ್ ನಿಲೆ ಕಳೆವೊಂದಿನಕ್ಲೆಗ್ ಆಧಾರ ಆದ್ ಉಂತಿ ಸುವರ್ಣ ನ್ಯೂಸ್ ಕೂಟೊಡು 52 ಲಾರಿ ಅಂಚನೆ ಉತ್ತರ ಕರ್ನಾಟಕಡ್ ನೆರೆಹಾವಳಿಗ್ 65 ಲಾರಿ ಅಗತ್ಯ ಸೊತ್ತುಲೆನ್ ಎತ್ತವುನ ಪಿರವುಲಾ ಶೆಟ್ರೆನ ಬೆರಿಸಾಯೊ ಉಂಡು. ಬಿಗ್ ತ್ರಿ ಲೇಸ್‌ಡ್ ಬಾಲೆಗ್ ಕೃತಕ ಕೈ ಜೋಡಾಯೆರೆ 15 ಲಕ್ಷ ರೂಪಾಯಿ ಮಲ್ತ್ ಕೊರ್ನವುಲಾ ಮಲ್ಲ ಸಾಧನೆ.

ಕಲ್ವೆ ಒರಿ ತಾನ್ ಮಲ್ತಿನ ತಪ್ಪು ಪಂದ್ ಮನಸ್‌ಗಾನಗ ತಾನ್ ಕಂಡಿ ಬಂಗಾರ್‌ನ್ ಸಮ್ಮಂದಪಟ್ಟ್‌ನಕ್ಲೆಗ್ ಮುಟ್ಟಯೆರೆ ಜೆ.ಪಿ ಶೆಟ್ರೆನ್ ಸಂಪರ್ಕ ಮಲ್ತಿನೆನ್ ನೆಂಪು ಮಲ್ತೊನುನ ಜಯಪ್ರಕಾಶ್ ಶೆಟ್ರ್ ತನ್ಕುಲೆ ಊರುಗು ಸಂಕಷ್ಟ ಬನ್ನಗ ಬತ್ತ್ ಸಕಾಯ ಮಲ್ಪಿ ಪಂದ್ ಅಂಗೈ ಒಡ್ಡಿ ಜಿಲ್ಲಾಧಿಕಾರಿಲ್, ಎಸ್.ಪಿ, ಮಂತ್ರಿಲ್, ಶಾಸಕೆರೆನ್ಲಾ ನೆಂಪು ಮಲ್ತೊನುವೆರ್. ಉಂದು ಶೆಟ್ರೆನ ಮಿತ್ತ್ ಸಮಾಜ ದೀನ ನಂಬುಗೆ, ವಿಶ್ವಾಸೊಲೆಗ್ ಕೈಕನ್ನಟಿ.

ಬಲತ್ತ ಕೈಟ್ ಮಲ್ತಿ ದಾನೊ ಎಡತ್ತ ಕೈಕ್ ತೆರಿಯರ ಬಲ್ಲಿ ಪಂದೆನ್ನಿನ ಜೆ.ಪಿ ಶೆಟ್ರ್ ಪಾಪದ ಇಲ್ಲದ ಜೋಕ್ಲೆನ ಮದಿಮೆಗ್, ಓದುನ ಅಂಗಲ್ಪುದ ಜೋಕ್ಲೆಗ್, ಬಙ ಪಂದ್ ಬತ್ತಿನಕ್ಲೆಗ್, ಬೇತೆ ಬೇತೆ ಒರುಟು ತನಡ್ದ್ ಆಪುನ ಸಕಾಯೊ ಮಲ್ಪುನ ಒಟ್ಟುಗು ತನ್ನಕ್ಲೆನ ಕಡೆಡ್ದ್‌ಲಾ ಒಂಜಾತ್ ಕೈತಾಂಗ್ ಕೊರ್ಪವೊಂದು ಏತೋ ಜನೊಕು ಪುಲ್ಯನೆಂಪುದ ಪರೆಲಾದುಲ್ಲೆರ್.

ಪ್ರತಿಯೊರಿಲಾ ಒಂಜತ್ತ್ ಒಂಜಿ ಚಾತಿರ್ಪು ಪತೊಂದೆ ಭೂಮಿದ ಬೊಲ್ಪು ತೂದಿಪ್ಪುವೆರ್. ಕಲೆ, ಸಂಗೀತ, ಸಾಹಿತ್ಯ ಒಂಜೆಕ್ಕೊಂಜಿ ಒಟ್ಟು ಕೊರೊಂದಾ, ಅತಂಡ ಒತ್ತೆಯಾದಾ ಪ್ರತಿಯೊರಿಯನ ಉಲೈ ಜೂವಪ್ಪ ಉಪ್ಪುಂಡು. ಅವೆನ್ ಪಿದಯಿ ಕನಪುನ ಚಾತಿರ್ಪು ನಮಕ್ಕ್ ಬೋಡು. ಆ ಚಾತಿರ್ಪು ಜಯಪ್ರಕಾಶ್ ಶೆಟ್ರೆಗ್ ಎಲ್ಯೆಡ್ದೇ ಇತ್ತ್ಂಡ್. ‘ರಚನಾ ಉಪ್ಪಳ’ ಪನ್ಪಿ ಕ್ಲಬ್ ಕಟ್ಟೊಂದು ಪಾಸಡಿಲೆನ ಒಟ್ಟುಗು ಸೇರೊಂದು ತುಳು ಕನ್ನಡ ನಾಟಕ ಗೊಬ್ಬವುನ ಬೊಕ್ಕ ಗೊಬ್ಬುನ ಶೆಟ್ರ್ ನಾಟಕ, ಪ್ರಹಸನ ಬರೆಪುನೆಡ್ಲಾ ಬಿರ್ಸೆ. ಬೇತೆ ಬೇತೆ ಜನೊಕ್ಲೆನ ಸೊರೊ ಅನುಕರಣೆ ಮಲ್ಪಿ ಜೆ.ಪಿ ಒರಿ ಮಿಮಿಕ್ರಿ ಕಲಾವಿದೆ ಪಂದ್‌ಲಾ ಪನೊಲಿ. ಆತೆ ಅತ್ತ್ ಸಿನೇಮಾ, ಧಾರಾವಾಹಿ ಕ್ಷೇತ್ರಡ್ಲಾ ಪಜ್ಜೆ ಊರ್ದಿ ಜಯಪ್ರಕಾಶ್ ಶೆಟ್ರ್ ‘ಸಾಫ್ಟ್‌ವೇರ್ ಗಂಡ’ ಸಿನೇಮಾಡ್ ಮುಖ್ಯ ಭೂಮಿಕೆಡ್ ಅಂಚನೆ ಸುವರ್ಣವಾಹಿನಿದ ‘ನಿರ್ಭಯ’ ಧಾರಾವಾಹಿಡ್ ಡಿ.ಸಿ.ಪಿ ಆದ್ ತನ್ನ ಚಾತಿರ್ಪು ತೋಜಾದೆರ್. ಸೂಪರ್ ಮಿನಿಟ್, ಮಜಾ ಟಾಕೀಸ್‌ಡ್ ಬಿನ್ನೆರಾದ್ ಪಾಲ್ ಪಡೆತೆರ್.

ಈ.ಟಿ.ವಿ.ಡ್ ಇಪ್ಪುನಗ ಸುರುಮಲ್ತಿ ಸರ್ಕಾರ್ ಪನ್ಪಿ ರಾಜಕೀಯದ ಕೊಂಗಿ (ವಿಡಂಬನೆ) ಕಾರ್ಯಕ್ರಮ ಪುರ್ಸೊತುದ ರಡ್ಡ್ ನಿಮಿಷಡ್ ಬತ್ತ್ ಪೋವೊಂದು ಇತ್ತ್ಂಡಲಾ ಜನೊ ಐಕಾದೆ ಕಾತ್ ಕುಲೊಂದು ಇತ್ತೆರ್. ಬಂಗಾರಪ್ಪೆರ್, ಎಸ್.ಎಂ ಕೃಷ್ಣೆರ್, ಸದಾನಂದ ಗೌಡ್ರು, ಪಿ ಜಿ.ಆರ್ ಸಿಂಧ್ಯಾ, ಕುಮಾರಸ್ವಾಮಿ ತನ್ಕುಲೆನ್ ಕೊಂಗಿ ಮಲ್ತ್ಂಡಲಾ ಮೆಚ್ಚೊಂದಿತ್ತೆರ್. ಜನೊಕ್ಕು ತೆಲಿಕೆದೊನಸ್ ಬಲಸುನ ಒರುಟು ಸತ್ಯ ತೆರಿಪಾವುನ ಕೊಂಗಿದ ಕಂತಾಟ ಸಯಿಸೆರೆ ಆವಂದೆ ಮಾಧು ಸ್ವಾಮಿ ವಿಧಾನಸಭೆಟ್, ತೇಜಸ್ವಿ ಶ್ರೀ ರಮೇಶ್ ಸಂಸತ್ತ್‌ಡ್ ನೆತ್ತ ವಿಚಾರಡ್ ಪಾತೆರುನಾತ್ ಖಾರದ ಕಜ್ಜೊ ಉಂದು ಪನ್ಪುನೇಡ್ ರಡ್ಡ್ ಪಾತೆರ ಇಜ್ಜಿ.

ದಕ್ಷಿಣಭಾರತಡ್ ರಡ್ಡ್‌ನೇ ಸರ್ತಿ ‘ಎನ್ಬಾ ಅವಾರ್ಡ್’ ಪಡೆಯಿ ಸುರುತ ವಾರ್ತಾ ಸುಧಾರಿಕೆದಾರಾಯಿನ ಜಯಪ್ರಕಾಶ್ ಶೆಟ್ರ್ 2020ದ ಪ್ರೆಸ್ ಕ್ಲಬ್ ಒರ್ಸೊದ ವ್ಯಕ್ತಿ ಇನಾಮು ಪಡೆವೊಂದೆರ್. ‘ಝೀರೋ ಟು ಹೀರೋ’ ಪನ್ಪಿ ಸಮಾಜಮುಖಿಯಾದ್ ಶೂನ್ಯಡ್ದ್ ಸಾಧನೆದ ಮಲೆ ಏರ್ನಕ್ಲೆನ್ ಪೊಲಬು ಮಲ್ತ್ ಕೊರ್ಪುನ ಕಾರ್ಯಕ್ರಮದ ಸುಧಾರಿಕೆದ ಜಬದರಿಲಾ ಜೆ.ಪಿ ಶೆಟ್ರೆನ ಪುಗೆಲ್‌ಡುಂಡು.

ಬೊಡೆದಿ ರಕ್ಷಾ ಬೊಕ್ಕ ಮಗನೊಟ್ಟುಗು ಪೊರ್ಲುದ ಬದ್ಕ್ ನಡಪಾವೊಂದು ಪೋಪಿ ಜಯಪ್ರಕಾಶ್ ಶೆಟ್ರೆಗ್ ತನ್ನನೇ ಆಯಿನ ಚಾರಿಟೇಬಲ್ ಟ್ರಸ್ಟ್ ಮಲ್ಪುನ ಕನ ಉಂಡು. ಅತ್ತಂದೆ ತುಳುನಾಡ್ದಕ್ಲ್ ಐ.ಎ.ಎಸ್, ಐ.ಪಿ.ಎಸ್‌ದಂಚಿನ ಬೇಲೆಗ್ ಪೋಯೆರೆ ಮನಸ್ ಮಲ್ಪುಜೆರ್ ಪನ್ಪಿ ಬೆಂಗ್‌ದೊಟ್ಟುಗು ಅಯಿಕ್ ದಾಲಾ ಯೋಜನೆ ಪಾಡೊಡು ಪನ್ಪಿ ಅಂಗಲಾಪುಲಾ ಉಂಡು. ಸರಕಾರಿ ನಿಲೆಟ್ ತುಳುವ ಬಿರ್ದ್‌ದ ಬೀರೆರೆರಾಯಿನ ಅಬ್ಬಕ್ಕೆ, ಕೋಟಿಚೆನ್ನಯ, ಅಗೊಲಿ ಮಞಣ್ಣ, ಕೆ.ಎನ್ ಟೈಲರ್ ಪುದರ್‌ಡ್ ಆಡಳಿತಾತ್ಮಕ, ಸಾಂಸ್ಕೃತಿಕ-ಧಾರ್ಮಿಕ, ಕ್ರೀಡೆ, ಸಿನೆಮಾ- ರಂಗಭೂಮಿದ ಸಾಧನೆಗಾದ್ ಇನಾಮುಲೆನ್ ಪಟ್ಟುಲೆಕಾವೊಡು ಪನ್ಪಿ ಬಯಕೆಲಾ ಉಂಡು. ತುಳುವ ಸೀಮೆಡ್ದ್ ಪೋದು ಕನ್ನಡ ಮಾಧ್ಯಮಡ್ ದುಡಿ ಬೊಟ್ಟುನ ಬೆಂಗ್‌ದುಡಲ್‌ಲೆನ ದನಿಯಾಯಿ ಜಯಪ್ರಕಾಶ್ ಶೆಟ್ಟಿ ಉಪ್ಪಳರೆನ ಕನ ನಿಜ ಆದ್ ನನಲಾತ್ ಮಾನಾದಿಗೆ ಮಟ್ಟೆಲ್ ಸೇರಡ್. ಆರೆಡ್ದ್ ನನಲಾತ್ ಎಡ್ಡೆ ಕಜ್ಜೊಲು ಕೈ ಕೂಡಡ್ ಪನ್ಪಿ ದುನಿಪು ಎಂಕ್ಲೆನವು.

ಬರವು -ಶ್ರೀಶಾವಾಸವಿ ತುಳುನಾಡ್
ಸಕಾಯ . ಸತೀಶ ಶೆಟ್ಟಿ ಚೇರ್ಕಾಡಿ ದೊಡ್ಡಮನೆ