ಕೊಡಿನಾಲಾಯಿರ್ದ್ ತುಡಿಂತ್ ಪರಪುನ ತುಲುಬಾಸೆದ ಆರತಿ ಕಮ್ಮೆನೊನು ಸೊರಮಾಲೆಡ್ ತುರಿಯೊಂದ್ ಅಪ್ಪೆ ಬಾಸೆದರ್ಬುನ್ ಉಡಲಗರ್ಭೊಡ್ ಪೊದ್ಯೊಂದ್ ತುಳುಬಾಸೆದೊಸಯೊಗ್ ಪೊಸ ಕೊಡಿತತ್ತಿ ತುಳುವಪ್ಪೆ ಮಗೆ “ಸಚ್ಚೇಂದ್ರ ಅಂಬಾಗಿಲು”. ಮೇರ್ನ ಗೆಲ್ಮೆನದ ಸೊರತುಲಯಿದ ಇರ್ಮೆನೆದ ಉಲತಿರ್ಲ್ ,ಬರವುದಚ್ಚಿಡ್ ಪೆಜ್ಜಿದ್ ನಿಕ್ಲೆ ಗೇನೊದಚ್ಚಿಗ್ ಒದಗಾವುನ ಒಂಜೆಲ್ಯ ಬರವುದ ಬೆನ್ನಿ.
ಬರವು: ಚೇತನ್ ವರ್ಕಾಡಿ.
ತುಳುವನಾಡುದ ಬಡಕಾಯಿ ಜಾಗೆದ ಒಡಿಪುದೂರುಡು ರಮೇಶ್ ಸಾಲಿಯಾನ್ ಬೊಕ್ಕ ಲೀಲಾ ಮೊಕ್ಲೆನ ಪೇರ ಸಂಸಾರೊಡ್ ತೆಲಿಕೆದ ಪೊಸಪೊಲಿ ಎರ್ಕಾಯಿ ಕಡೀರ ಬಾಲೆನೇ ಸಚ್ಚೇಂದ್ರ ಅಂಬಾಗಿಲು.ಅಪ್ಪೆ ಅಮ್ಮೆರೆನ ಮೋಕೆ ಜಾಲ್ ಡ್ ಜೋಕೆದ ಬಾಲೆ ಆದ್ ಬಲತಿನ ಮೇರು ಬರವುದ ಕೊಟ್ಯಡ್ ಸುರುಕಾದ್ ಆದಿಉಡುಪಿ ಹಿರಿಯ ಪ್ರಾಥಮಿಕ ಸಾಲೆಡ್ ನಾಲನೆ ಮುಟ್ಟ ,ನಿಟ್ಟೂರು ಪ್ರೌಢ ಶಾಲೆಡ್ ಪತ್ತನೆತ ಒಂಜಿ ಗರು ಮುಗಿತುದ್ ದುಂಬುಗ್ ಟ್ರಿನಿಟಿ ಐ.ಟಿ.ಐ.ಕಾಲೇಜ್ ಉದ್ಯಾವರೊಡ್ ಎಮ್.ಆರ್.ಪಿ.ಸಿ.ಬೆನ್ನಿದ ಬರವು ಮುಗಿತೊಂದ್ ದುಂಬಗ್ ಕದ್ರಿ ಹಿಲ್ಸ್ ಐ.ಟಿ.ಐ.ಕುಡ್ಲ ಬೊಕ್ಕ ಕೆ.ಎಮ್.ಎಫ್.ಕುಲಶೇಖರೊಡ್ ಎನ್.ಎ.ಸಿ.ಬರವುದ ಬೆನ್ನಿನ್ ಪೊರ್ಲುಡೆ ಮುಗಿತೊಂದ್ ಬದುಕ್ ಬೆನ್ನಿದ ಸಾದಿಡ್ ಕರಿನಪತ್ತ್ ಒರ್ಸೊದಿಂಚಿ ತಾನ್ ಕಲ್ತಿ ಸಾಲೆನೇ ಆಯಿನಂಚಿನ ಟ್ರಿನಿಟಿ ಐ ಟಿ ಐ ಕಾಲೇಜಿಡ್ ಬರವು ಕಲ್ಪಾವುನ ಮಲ್ಲ ಗುರುವಾದ್ ದುಂಬರಿಯೊಂದುಲ್ಲೆರ್.ಅಪ್ಪೆ ,ಅಮ್ಮೆರ್ ತಂಗಡಿನೊಟ್ಟುಗ್ ಮೋಕೆದ ಕಾರಿದುಲಯಿ ಜೋಕೆ ತೂಕೊದ ಆನ್ ಮಗೆ ಆದ್ ನೆಗೆತ್ ತೋಜಿ ಸಚ್ಚೇಂದ್ರ ಅಂಬಾಗಿಲು ಮೇರ್ನ ಸೊರ ಸುಧಾರಿಕೆದ ಬೆನ್ನಿದ ಕಂಡಗೊರ ಕಣ್ಣ್ ಪಾರನಗ ಆ ಪೊರ್ಲುನವು ಇಂಚ ತೆರಿಪಾವುಂಡ್.ಮೈಕದುಲಾಯಿ ಪಾತೆರೊದುಸುಲು ಸೇರಿ ಜವನನ್ ಸುರುಕ್ ದೆರ್ತ್ ಪತ್ತಿನ ಪುಣ್ಯ ಚಾವಡಿಯೆ “ವೀರಾಂಜನೇಯ ಗುಡಿ” ಅಂಬಾಗಿಲು.ಹನುಮ ಜಯಂತಿದ ಮಿತ್ತರ್ಮೆದ ಲೇಸ್ ಡ್ ಗದ್ದಿಗೆಗ್ ಒಂಬುನಂಚಿನ ಸೊರಮಾಲೆನ್ ಬಿರ್ಕಿ ಬಾಲೆನ್ ಅಲ್ಪರ್ದೆ ತುಳುವಪ್ಪೆ ತರ್ಕ್ ದ್ ಪತ್ಯಲಾ ದಾನ್ನ ಇನಿಕಾನಗ ತುಳುಸೊರ ಸುಧಾರಿಕೆದಚ್ಚಿಡ್ ಸಾರೊರ್ದುಲಾ ಮಿತ್ತ್ ಲೇಸ್ ಸುಧಾರಿಕೆದ ಚಾವಡಿಗ್ ಉಸುಲುಸೊರ ದಿಂಜಾಯಿ ಮಾತೆರುಡಲ್ ಗೆಂದಿ ಮಲ್ಲಾದಿಗೆದಾಂತಿ ಮಲ್ಲ ಮನಸ್ಸ್ ದ ಗುರ್ಕಾರೆ ಮೇರ್.
ನಮ್ಮ ಕುಡ್ಲ ಚಾನೆಲ್ ಡ್ ಕಂಬಳಕ್ಕೆ ಕಂಟಕ ಪನ್ಪಿ ಇಸಯೊಡ್ ನಡತಿ ಚರ್ಚೆಡ್ ಪಾಲ್ ಪಟ್ಟ್ ದ್ ಕಂಬುಲದ ಕಲೆತ ಕಟ್ಟುನ್ ಬುಡ್ಪಾದ್ ತೋಜಾಯಿನಾರ್.ಒಡಿಪು,ಕುಡ್ಲ,ಚಿಕ್ಕಮಗಳೂರು,ಶಿವಮೊಗ್ಗ, ಇಂಚ ದೂರದೂರುಡ್ಲ ತನ್ನ ಪೊರ್ಲು ಸೊರೊನ್ ಕರ್ಲ ಕಡೆಕ್ ಮುಟ್ಟುಲೆಕ್ಕ ಬುಡ್ಪಾಯಿನಾರ್.ಒಂಜಾತ್ ಬರವುಗ್ ಸೊರದಿಂಜಾದ್ ತುಲುವನುರೆ ಕಡಲ ಎರ್ತೆನ್ ಅಂತರ್ಜಾಲೊದ ಮಾಮಲ್ಲ ಕಡಲುಗ್ ಜಪುಡಾವೊಂದ್ ಅಭಿಮಾನಿಲೆ ದಂಡ್ ನ್ ಅರ್ಕೆಲೊಟ್ಟು ಸೇರಾವೊಂದಿನಾರ್ ಸಚ್ಚೇಂದ್ರ ಅಂಬಾಗಿಲು.
ಮೈಕ ಪತ್ತುನೇತೊಟ್ಟುಗ್ ಮೈಕೈ ಪೊಡಿಮಲ್ತ್ ಗೊಬ್ಬುನ ಮಲ್ಲ ಗೊಬ್ಬು ತಾಲೀಮುಡ್ಲ ಒಡಿಪುದೂರುಡ್ ಪುದರ್ ಪುಗಾರ್ತೆ ಪಡೆವೊಂದ್ ಜನತಾ ವ್ಯಾಯಾಮ ಸಾಲೆ ಅಂಬಾಗಿಲು ನೇತ ಕಾರ್ಯಂತೆ ಆದ್ ಕರಿನ ಐನ್ ಒರ್ಸೊರ್ದಿಂಚಿ ಎಡ್ಡೆ ಬೆನ್ನಿ ಬೆನೊಂದುಲ್ಲೆರ್.ಒಂಜಾತ್ ಸಂಘ ಸಂಸ್ಥೆಡ್ ಪಾಲ್ ಪಡೆವೊಂದ್ ಗೇಲ್ ದ ಸಾದಿಗ್ ಕೈ ಜೋಡಾಯಿನಾರ್.ತನ್ನ ಬದುಕ್ ಸಾಧನೆದ ಪಜ್ಜೆಡ್ ತಿಕ್ಕಿನ ಮದೆಪಂದಿ ನೆಂಪು ಒವ್ವ್ ಕೇಂಡ ಇಂಚ ಪನ್ಪೆರಾರ್.ಪತ್ತನೇ ಸಾಲೆಡುಪ್ಪುನಗ ಶಾಲಾನಾಯಕೆ ಆದ್ ಮಾತೆರೆ ಓಟುಡ್ ಗೆಲ್ತ್ ಬತ್ತಿನ ಆ ನೆಂಪು ಸಂಪು ಒಂಜಾಂಡ ಬರವುದ ಸಾದಿಡ್ ನಡಪಿ ಪೊರ್ತುಡ್ 2009ಟ್ ಉಡುಪಿ ಮಂಗಳೂರು ವಿಭಾಗೊಡ್ ಸುರುತ ಸಾಲ್ ಡ್ ಗೆಲ್ತುದ್ ಕೊಲ್ಕತ್ತಡ್ ನಡಪುನ ಅಖಿಲ ಭಾರತ ವ್ರತ್ತಿ ಪರೀಕ್ಷೆಡ್ ತಾನ್ ಲಾ ಪಾಲ್ ಪಟ್ಟುನ ಮಲ್ಲ ಭಾಗ್ಯ ಒದಗುದ್ ಬತ್ತಿನವ್ ಏಪಲ ಮದಪಂದಿನವ್ ಪನ್ಪೆರ್.ತನ್ನ ಸೊರಮಾಲೆದ ಕಮ್ಮೆನದಿರ್ಮೊನುಗ್ ಮರ್ಲಾದ್ ಅರ್ಲುನ ತುಲುವ ಬಿರ್ಸಗ್ ಕೋಟಿಚೆನ್ನಯ ಫ್ರೆಂಡ್ಸ್ ,ಮಕ್ಕಿಮನೆ ಕಲಾವ್ರಂದ,ನಿಟ್ಟೂರು ಪ್ರೌಢಶಾಲೆ ಇಂಚ ಒಂಜಾತ್ ಮಲ್ಲ ಮಲ್ಲ ಪುದರಾಯಿ ಸಂಸ್ಥೆ ಮಾನಾದಿಗೆದ ತಮ್ಮನ ಬಲಸುದ್ ದುಂಬುದ ಸಾದಿಗ್ ಬೆರಿಬಲೊತ ಇಂಬುದ ಬೂಲ್ಯ ಪತ್ತುದೆರ್.ಎಂಕ್ ದಾಲ ತೆರಿಯಂದ್ ಪನ್ಪಿ ಪಾತೆರೊನೆ ಅರೆನ್ ಈತ್ ಮಿತ್ತರ ಮಿನ್ಕಾವೊಂದ್ ಪೋಂಡು ಪನ್ಪಿನವ್ ಸತ್ಯ.ಇಂಚಿತ್ತಿ ಪೊರ್ಲುಡಲ್ದ ಪಾತೆರೊದ ಬಿರ್ಸಗ್ ನನಾತ್ ಮಾನಾದಿಗೆದ ಕುರ್ಸುಡ್ ಕುಲ್ಲುನ ಯೋಗಭಾಗ್ಯ ದೇವೆರೊದಗಾವಡ್.ಪತ್ತೂರು ಪುಗರಡ್,ಕಡಲಾಯರೆಗ್ಲಾ ಪರಪಡ್,ಆಂಜನೇಯನ ಮಾಮಲ್ಲ ಭಕ್ತಗ್ ನನಾತ್ ಸಾಧನೆದ ಶಕ್ತಿದಿಂಜಡ್ ಪನ್ಪಿನವ್ವೆ ಮಾತೆರೆನ ಆಶಯ.
by 