ಕರಿನ ಪದಿನಾಲ್ ವರ್ಷಡಿಂಚಿ ಕೃಷ್ಣಾಷ್ಟಮಿ ಪ್ರಯುಕ್ತ ವಿಭಿನ್ನ ವೇಷೊಲೆನ್ ಪಾಡೊಂದ್ ಅನಾರೋಗ್ಯ ಪೀಡಿತ ಜೋಕ್ಲೆನ ಚಿಕಿತ್ಸೆಗ್ ಸಾಕಾರ ಕೊರೊಂದುಪ್ಪುನ ರವಿ ಕಟಪಾಡಿ ಮೇರು ಈ ಸರ್ತಿ ‘ಮರ್ಮೇನ್’ (Merman) ವೇಷ ಪಾಡೊಂದ್ ಜನಕ್ಲೆನ ಗಮನ ಸೆಳೆಯರೆಗುಲ್ಲೆರ್. ಪುರಾಣ ಕಥೆಟ್ ತೋಜಿದ್ ಬರ್ಪಿನ ಕಾಲ್ಪನಿಕ ಸಮುದ್ರ ಜೀವಿದ ರೂಪವಾಯಿನ ಮರ್ಮೇನ್ ವೇಷೊನ್ ಪಾಡ್ದ್ ಈ ಸರ್ತಿ ಸಾರ್ವಜನಿಕೆರೆನ ದುಂಬು ಬರ್ರೆಗುಪ್ಪುನ ರವಿ ಕಟಪಾಡಿ, ಮೆರೆನ ಮೂಲಕ ಒಟ್ಟಾಪಿನ ಪಣವುನ್ ಅನಾರೋಗ್ಯ ಪೀಡಿತ ಜೋಕ್ಲೆನ ಚಿಕಿತ್ಸೆಗ್ ಕೊರ್ರೆಗ್ ದುಂಬಾತೆರ್..ಕರಿನ ಪತ್ತು ವರ್ಷಡಿಂಚಿ ‘ರವಿ ಫ್ರೆಂಡ್ಸ್ ಕಟಪಾಡಿ’ ತಂಡದ ಮೂಲಕ ಒಟ್ಟು 1.85 ಕೋಟಿ ಪಣವು ಸಂಗ್ರಹ ಮಲ್ತುದ್ 204 ಅನಾರೋಗ್ಯ ಪೀಡಿತ ಜೋಕ್ ಲೆಗ್ ಹಸ್ತಾಂತರ ಮಲ್ದೆರ್.. ಈ ಸರ್ತಿ 15 ಲಕ್ಷ ಸಂಗ್ರಹ ಮಲ್ಪುನ ಯೋಜನೆ ದೀಯೊಂದೆರ್.
ಈ ಸರ್ತಿ ಸಂಗ್ರಹ ಆಪಿನ ಪಣವುನ್ ಹೃದಯ ಸಂಬಂಧಿ ಸಮಸ್ಯೆಡ್ ನೆಗರೊಂದುಪ್ಪುನ ಒಂಜಿ ಬಾಲೆ ಬೊಕ್ಕ ಕ್ಯಾನ್ಸರ್ ಡ್ ಬಳಲೊಂದುಪ್ಪುನ ಜೋಕ್ಲೆನ ಚಿಕಿತ್ಸೆಗ್ ವಿನಿಯೋಗ ಮಲ್ಪರೆಗ್ ನಿರ್ಧಾರ ಮಲ್ದುಂಡ್ ಪಂಡುದು ರವಿ ಕಟಪಾಡಿ ತೆರಿಪಾದೆರ್.
ಈ ಸರ್ತಿ ಯಾನು ಪಾಡುನ ವೇಷವು ಕಡೇತವ್,, ದುಂಬುದ ವರ್ಷಡಿಂಚಿ ಕೃಷ್ಣಾಷ್ಟಮಿ ಸಂದರ್ಭಡ್ ವೇಷ ಪಾಡುನವ್ವೆನ್ ಉಂತಾವೆ ಪಂಡುದ್ ರವಿ ಕಟಪಾಡಿ ತೆರಿಪಾದೆರ್. ವೇಷ ಪಾಡರೆಗ್ ನಿರಂತರವಾದ್ ರಾಸಾಯನಿಕ ವಸ್ತುಲೆನ್ ಬಳಸುನೆಡ್ಡಾವರ ಆರೋಗ್ಯ ಸಮಸ್ಯೆಲು ಎದುರಾವೊಂದುಂಡ್.. ಈ ಹಿನ್ನೆಲೆಡ್ ವೇಷ ಪಾಡುನ ಕಾರ್ಯೊಡ್ ಪಿರ ಜಾರುನ ನಿರ್ಧಾರ ದೆತೊಂದೆ ಪಂಡುದ್ ಆರು ಪಂಡೆರು.
ಆಂಡ ವೇಷ ಪಾಡುನ ಉಂತಾಂಡಲಾ ಪುಟಾಣಿ ಜೋಕ್ಲೆಗ್ ತನಡಾಪಿನ ಸಹಾಯೊನ್ ಮಲ್ಪುವೆ ಪಂಡುದ್ ರವಿ ಕಟಪಾಡಿ ಭರವಸೆ ಕೊರ್ತೆರ್.
ಸುದ್ದಿಗೋಷ್ಠಿಡ್ ಮಹೇಶ್ ಶೆಣೈ, ಹರ್ಷ, ಶ್ರವಣ್ , ಆಶಿಕ್ ಉಪಸ್ಥಿತರಿತ್ತೆರು.
by 