ಸಿರಿ ತುಳುವ ಚಾವಡಿ ಪಟ್ಟ ಏರಾವುನ ಲೇಸ್

ಸಿರಿ ತುಳುವ ಚಾವಡಿ ಒಡಿಪುದ ಪಟ್ಟ ಏರಾವುನ್ ಬೊಕ್ಕ ಪೊಣ್ಣು ಪೊಂಜೊವುಲೆನ ಕೂಟ ಜುಲೈ 26 ತಾರೀಕುಗ್ ಕಕ್ಕುಂಜೆದ ಬ್ರಹ್ಮ ಶ್ರೀ ನಾರಾಯಣ ಗುರು ಮಂದಿರೊಡ್ ನಡತುಂಡ್.ಸಿರಿತುಳುವ ಚಾವಡಿದ ಮಾನಾದಿಗೆದ ಗುರ್ಕಾರೆರಾಯಿನ ಡಾ.ವೈ.ಎನ್.ಶೆಟ್ಟಿ ಕಜ್ಜೊದ ಗುರ್ಕಾರ್ಮೆಡಿತ್ತುದ್ ಲೇಸ್ ನ್  ಕಲಸಗ್ ಅರಿ ಪಾಡ್ದ್ ಉದಿಪನ ಮಲ್ತುದ್,ಶ್ರೀಕಾಂತ್ ಶೆಟ್ಟಿ ಕಾರ್ಕಳ ಮೆರೆಗ್ ತರೆಕ್  ಪೇಟಾ ದೀದ್ ಸಿರಿ ತುಳುವ ಚಾವಡಿದ ಪೊಸ ಗುರ್ಕಾರೆರಾದ್ ಪಟ್ಟ ಕಟ್ಟಿಯೆರ್.ಸಿರಿ ತುಳುವ ಚಾವಡಿದ ಪೊಸ ಪದುಕೆರೆಗ್ ಪೊಸ ಗುರ್ಕಾರೆರಾಯಿನ ಶ್ರೀಕಾಂತ್ ಶೆಟ್ಟಿ ಬಚ್ಚಿರೆ ಬಜ್ಜಯಿ ಕೊರ್ದು ಕೂಟೊಗ್ ಜೋಡಾವೊಂಡೆರ್ .ಈ ಪೊರ್ತುಡ್ ಸುರತ್ಕಲ್  ಗೋವಿಂದ ದಾಸ ಕಾಲೇಜಿದ ಗೇನದ ಗುರು ಶ್ರೀಮತಿ ಅಕ್ಷತಾ ಶೆಟ್ಟಿ ಮೇರ್ ಮಲ್ಲ ಬಿನ್ನೆರಾದ್ ಉಪಸ್ಥಿತರಿತ್ತುದ್ ಪೊಣ್ಣು ಪೊಂಜೊವುಲೆನ ಬಗೆಟ್ ಪಾತೆರಿಯೆರ್. ಸಿರಿ ತುಳುವ ಚಾವಡಿದ ಗೈಮೆದ ಗುರಿಕಾರೆರಾಯಿನ ಶ್ರೀ ಈಶ್ವರ್ ಶೆಟ್ಟಿ ಚಿಟ್ಪಾಡಿ ಚಾವಡಿ ನಡತ್ತ್ ಬತ್ತ್ ಸಾದಿದ ಬಗೆಟ್ ಸುರುತ ಪಾತೆರ ಪಾತೆರಿಯೆರ್.ಕೂಟದ ಪ್ರದಾನ ಸಂಚಾಲಕಿ ಮೂಡಬಿದ್ರೆ ಮಹಾವೀರ ಕಾಲೇಜಿದ ಉಪನ್ಯಾಸಕಿ ಶ್ರೀಮತಿ ಸುಜಾತಾ ಪೆರಿಂಜೆ ಬತ್ತಿ ಬಿನ್ನೆರೆನ್ ಎದ್ಕೊಂಡೆರು.ಯಶೋದ ಕೇಶವ್ ಕಜ್ಜೊದ ನಿರೂಪಣೆ ಮಲ್ತೆರು.ವೇದಿಕೆಡ್ ಬ್ರಹ್ಮಶ್ರೀ ನಾರಾಯಣ ಗುರು ಮಂದಿರದ ಗುರ್ಕಾರೆರಾಯಿನ ನರೇಶ್ ಪೂಜಾರಿ ಕಕ್ಕುಂಜೆ,ಕಾರ್ಯಂತೆರಾಯಿನ ಶ್ರೀ ಕೃಷ್ಣ ಶ್ರೀಧರ್,ಮಾನಾದಿಗೆದ ಗುರ್ಕಾರೆರಾಯಿನ ಶ್ರೀ ಪ್ರಭಾಕರ್ ಜಿ., ಮಹಿಳಾ ಸಮಿತಿದ ಅಧ್ಯಕ್ಷೆರಾಯಿನ ಶ್ರೀಮತಿ ಹೇಮಾವತಿ,ನಗರಸಭೆತ ಪಿರಾಕುದ ಪದುಕೆರಾಯಿನ ಶ್ರೀ ಬಾಲ ಕೃಷ್ಣ ಶೆಟ್ಟಿ,ಸಿರಿ ತುಳುವ ಚಾವಡಿದ ಒತ್ತು ಗುರ್ಕಾರೆರಾಯಿನ ಶ್ರೀ ಸುಬ್ರಹ್ಮಣ್ಯ ಶ್ರೀಯಾನ್ ಉಪಸ್ಥಿತರಿತ್ತೆರು.ಪ್ರಧಾನ ಕಾರ್ಯಂತೆರಾಯಿನ ಶ್ರೀ ಪ್ರಶಾಂತ್ ಶೆಟ್ಟಿ  ಗುತ್ತುಮನೆ ಅಕೇರಿಗ್ ಸೊಲ್ಮೆ ಸಂದಾಯ್ತ ಮಲ್ತೆರು.