ಆಳ್ವಾಸ್ ಕಾಲೇಜಿಡ್ ತುಳುಕ್ ಮಾನ್ಯತೆ

ಆಳ್ವಾಸ್ ವೈದ್ಯಕೀಯ ಕಾಲೇಜಿಗ್  ತುಳು ಅಲ್ಪಸಂಖ್ಯಾತ ಮಾನ್ಯತೆ: 150 ಎಮ್‌ಬಿಬಿಎಸ್ ಸೀಟುದ ಪೈಕಿ ತುಳು ಭಾಷಿಕ ಅಲ್ಪಸಂಖ್ಯಾತರೆಗ್ 54 ಸೀಟುಲು

ಮೂಡುಬಿದಿರೆ: ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಂಗಸಂಸ್ಥೆಯಾಯಿನ  ಆಳ್ವಾಸ್ ಇನ್‌ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸಸ್ ಆ್ಯಂಡ್ ರಿಸರ್ಚ್ ಸೆಂಟರ್‌ಗ್  ತುಳು ಅಲ್ಪಸಂಖ್ಯಾತ ಶಿಕ್ಷಣ ಸಂಸ್ಥೆದ  ಕೋಟಾದಡಿ ಅನುಮೋದನೆ ತಿಕ್ಕುದುಂಡ್.. 2026-27ನೇ ಶೈಕ್ಷಣಿಕ ವರ್ಷಗ್  ಒಟ್ಟು 150 ಎಮ್‌ಬಿಬಿಎಸ್ ಸೀಟುಲೆಗ್  ಮಂಜೂರಾತಿ ತಿಕ್ಕುದಿತ್ತುದ್ , ಈ ಪೈಕಿ 54 ಸೀಟುಲು ತುಳು ಭಾಷಿಕ ಅಲ್ಪಸಂಖ್ಯಾತ ವಿದ್ಯಾರ್ಥಿಲೆಗ್ ಲಭ್ಯವಿಪ್ಪುಂಡ್..

ತುಳು ಸಮುದಾಯದ ವಿದ್ಯಾರ್ಥಿಲೆಗ್ ವೈದ್ಯಕೀಯ ಶಿಕ್ಷಣಡ್ ಹೆಚ್ಚಿಗೆ ಅವಕಾಶ ಕಲ್ಪಿಸಾವುನ ನಿಟ್ಟುಡ್ ಈ ಬೆಳವಣಿಗೆ ಮಹತ್ವ ಪಡೆದುಂಡ್.. ವಿಶೇಷವಾದ್ ಕರಾವಳಿ ಕರ್ನಾಟಕದ ತುಳು ಭಾಷಿಕ ವೈದ್ಯಕೀಯ ಶಿಕ್ಷಣದ ಆಕಾಂಕ್ಷಿಲೆಗ್ ತನ್ನನೇ ನೆಲಟ್  ವೈದ್ಯಕೀಯ ಶಿಕ್ಷಣ ಪಡೆಯರೆಗ್ ಉಂದು ಒಂಜಿ ಎಡ್ಡೆ ಅವಕಾಶವಾದುಂಡ್. ವೈದ್ಯಕೀಯ ಶಿಕ್ಷಣದ ಗುಣಮಟ್ಟದೊಟ್ಟುಗ್ ಪ್ರಾಯೋಗಿಕ ಬೊಕ್ಕ ಕ್ಲಿನಿಕಲ್ ತರಬೇತಿಗ್ ಅಗತ್ಯವಿಪ್ಪುನ ಮೂಲಸೌಕರ್ಯ ಸಂಸ್ಥೆಡ್ ಉಂಡು. ಆಳ್ವಾಸ್ ವೈದ್ಯಕೀಯ ವ್ಯವಸ್ಥೆದಡಿಟ್  650 ಹಾಸಿಗೆದ ಸುಸಜ್ಜಿತ ಆಸ್ಪತ್ರೆ ಕಾರ್ಯನಿರ್ವಹಣೆ ಮಲ್ತೊಂದಿತ್ತುದ್, ಎಮ್‌ಬಿಬಿಎಸ್‌ ವಿದ್ಯಾರ್ಥಿಲೆಗ್ ಬೇತೆ ಬೇತೆ ವೈದ್ಯಕೀಯ ವಿಭಾಗಲೆಡ್ ಪ್ರಾಯೋಗಿಕ ಅನುಭವ ಬೊಕ್ಕ ಕ್ಲಿನಿಕಲ್ ತರಬೇತಿ ಪಡೆಯರೆಗ್ ಉಂದು ನೆರವಾಪುಂಡ್.. ವಿದ್ಯಾರ್ಥಿಲೆನ ವಸತಿ ಅಗತ್ಯೊನ್ ಗಮನೊಡ್ ದೀಯೊಂದ್  ಬಾಲಕೆರು ಬೊಕ್ಕ ಬಾಲಕಿಯೆರೆಗ್ ಪ್ರತ್ಯೇಕ ಹಾಸ್ಟೆಲ್‌ ಸೌಲಭ್ಯನ್  ಕಲ್ಪಿಸಾದುಂಡ್.

ಆಕಾಂಕ್ಷಿಲೆಗ್  ಅವಕಾಶ

ವೈದ್ಯಕೀಯ ಶಿಕ್ಷಣದ ಕನ  ತೂವೊಂದುಪ್ಪುನ ತುಳು ಭಾಷಿಕ ಅಲ್ಪಸಂಖ್ಯಾತ ಸಮುದಾಯದ ಅರ್ಹ ವಿದ್ಯಾರ್ಥಿಲು ಈ ಅವಕಾಶೊನ್  ಸದುಪಯೋಗಪಡಿಸಾವೊನೊಲಿ. ಪ್ರವೇಶಗ್ ಸಂಬಂಧ ಪಟ್ಟಿನ ಅರ್ಹತೆ, ಅಗತ್ಯ ದಾಖಲೆಲು ಬೊಕ್ಕ ಪ್ರವೇಶ ಪ್ರಕ್ರಿಯೆದ ಬಗೆಟ್  ಅಭ್ಯರ್ಥಿಲು ಅಧಿಕೃತ ಮಾಹಿತಿನ್  ಪರಿಶೀಲನೆ ಮಲ್ತುದ್ , ನಿಗದಿತ ನಿಯಮಾನುಸಾರ ಅರ್ಜಿ ಸಲ್ಲಿಸಾವೊಲಿ.