ನೀಲಾವರ ಗೋಶಾಲೆಡ್‌ ಗೊಬ್ಬರೊಡ್ ತಯಾರ್ ಅಯರೆಗುಂಡ್ ಕರೆಂಟ್.

ಕೇಂದ್ರ ಸರ್ಕಾರಡ್ದ್ ಅನುಷ್ಠಾನ

ಕೇಂದ್ರ ಸರ್ಕಾರದ ಇಂಧನ ಮಂತ್ರಾಲಯದ ವತಿಡ್ದ್ ರಾಜ್ಯೊಡೇ ಸುರುತ್ತ ಸರ್ತಿ ಉಡುಪಿ ಜಿಲ್ಲೆದ ನೀಲಾವರ ಗೋಶಾಲೆಡ್ ಗೊಬ್ಬರೊಡ್ ಬಯೋ ವಿದ್ಯುತ್ ಘಟಕ ತಾಪನೆ ಮಲ್ಪರೆಗ್ ತಯಾರಿ ಆವೊಂದುಂಡ್.

ಇಲಾಖೆದ ಸೂಚನೆದ ಪ್ರಕಾರ ಬಯೋ ಗ್ಯಾಸ್ ಬೊಕ್ಕ ಬಯೋ ವಿದ್ಯುತ್ ಸ್ಥಾವರದ ಅನುಷ್ಠಾನೊಡ್ ವಿಶೇಷ ಪರಿಣತಿ ಇತ್ತಿನ ಪಂಜಾಬ್ ರಿನೀವೇಬಲ್ ಎನರ್ಜಿ ಸಿಸ್ಟಮ್ ಪ್ರೈ ಲಿ . ನೆತ್ತ ತಜ್ಞೆರಾಯಿನ ಇಂಜಿನಿಯರ್ ಲೋಕೇಂದ್ರ ಜೋಶಿ ಬೊಕ್ಕ ರಾಜೇಶ್ ಅಯ್ಯಪ್ಪಸೂರ್ ಮೊಕುಲು ಮಂಗಳವಾರ ನೀಲಾವರ ಗೋಶಾಲೆಗ್ ಬತ್ತುದ್ ಸ್ಥಾವರೊನ್ ತಾಪನೆ ಮಲ್ಪುನ ಬಗ್ಗೆ ಯೋಜನೆ ಬೊಕ್ಕ ಅಂದಾಜು ಪಟ್ಟಿ ತಯಾರು ಮಲ್ಪುನ ಬಗ್ಗೆ ಸಮೀಕ್ಷೆ ಮಲ್ತೆರ್.

ಇಲಾಖೆದ ರಾಜ್ಯ ಮಂತ್ರಿ ಭಗವಂತ್ ಖೂಬಾ ಮೇರು ಇಂಚಪ್ಪೊಗ್ ಬೆಂಗಳೂರುಡ್ ಚಾತುರ್ಮಾಸ್ಯ ವ್ರತಟುಪ್ಪುನ ಶ್ರೀ ಪೇಜಾವರ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದರೆನ್ ಭೇಟಿ ಮಲ್ತಿನ ಸಂದರ್ಭ ಈ ಬಗ್ಗೆ ಸಮಾಲೇಚನೆ ಮಲ್ದಿತ್ತೆರ್. ‌ ಅಂಬಿನ್ ಗಲಸುದ್ ವಿದ್ಯುತ್ ತಯಾರಿ ಭವಿಷ್ಯದ ಭರವಸೆದ ಇಂಧನ ಮೂಲವಾದಿತ್ತುದ್ ,ಗೋರಕ್ಷಣೆಯ ಕಾರ್ಯೊಗ್ ಬಲಬತ್ತಿಲೆಕ್ಕಾಪುಂಡ್ . ಅತ್ತಾವಂದೆ ಪರಿಸರ ಸ್ನೇಹಿ ಆಯಿನೆಡ್ದಾವರ ಕೇಂದ್ರ ಸರ್ಕಾರ ಈ ಬಗ್ಗೆ ವಿಶೇಷ ಪ್ರೋತ್ಸಾಹ ಕೊರಿಯರೆಗ್ ತೀರ್ಮಾನ ಮಲ್ದುಂಡ್ ಪಂಡುದ್ ಖೂಬಾ ತೆರಿಪಾಯೆರ್. ಶ್ರೀಮಠದ ಗೋಶಾಲೆಡ್ ಇಲಾಖೆದ ವತಿಡ್ದ್ ಈ ಯೋಜನೆ ಕಾರ್ಯಾನುಷ್ಠಾನ. ಮಲ್ಪುಂಡ್ ಪಂಡುದ್ ತೆರಿಪಾಯೆರ್.

ನೀಲಾವರ ಗೋಶಾಲೆ ಬೊಕ್ಕ ಕೈತಲುದ ಗೋಶಾಲೆ ಬೊಕ್ಕ ಹೈನುಗಾರಿಕೆ ಮಲ್ಪುನಕ್ಲೆಡ ಈ ಘಟಕೊಗ್ ಬೋಡಾಯಿನ. ಗೋಮಯೊನ್ ಪಡೆಯರೆಗ್ ಅವಕಾಶ ಉಂಡು. ಮುಲ್ಪ ಇತ್ತೆ ಉಪ್ಪುನ ಪೆತ್ತೊಲೆನ ಸಂಖ್ಯೆ ಬೊಕ್ಕ ಭವಿಷ್ಯೊನ್ ಗಮನೊಡ್ ದೀಯೊಂದ್ ಕನಿಷ್ಠ 5000 ಪೆತ್ತೊಲೆನ ಗೊಬ್ಬರೊನ್ ಅಂದಾಜ್ ಮಲ್ತುದ್ ಯೋಜನೆ ತಯಾರ್ ಮಲ್ಪುಂಡ್. ಕನಿಷ್ಠ ಅಂದಾಜು ದಿನಕ್ 1200 ಯುನಿಟ್ ವಿದ್ಯುತ್ ಉತ್ಪಾದನೆ ಮಲ್ಪರೆಗ್ ಸಾಧ್ಯ ಇತ್ತುದ್ ಜಿಲ್ಲೆದ ಜನಕ್ಲೆನ ಉಪಯೋಗಕ್ಕಾದ್ ವಿದ್ಯುತ್ ನಿಗಮದೊಟ್ಟುಗ್ ಒಡಂಬಡಿಕೆ ಮಲ್ತೊಂದ್ ಮಾರಾಟ ಮಲ್ಪೊಲಿ. ಬೊಕ್ಕ ಉತ್ಪಾದನೆ ಆಪಿನ ಸ್ಲರಿ( ಸೆಗಣಿ ಮಿಶ್ರಿತ ನೀರು )ಅಂಬಿದ ನೀರು ಬೆನ್ನಿಗ್ ಸಹಕಾರಿಯಾದಿತ್ತುದ್ ಜಿಲ್ಲೆದ ರೈತರೆಗ್ ರಿಯಾಯಿತಿ ರೇಟ್ ಡ್ ಟ್ಯಾಂಕರ್ ಮುಖೇನ ಮಾರಾಟ ಮಲ್ತುಂಡ ಗೋಶಾಲೆಗೆ ಆದಾಯ ಬರ್ಪಿನ ಅವಕಾಶ ಉಂಡು.

ಈ ಸ್ಥಾವರ ತಾಪನೆಗ್ ಅಂದಾಜು ಹತ್ತು ಕೋಟಿ ರೂ ಖರ್ಚಾಪುಂಡ್.. ರಡ್ಡ್ ಮೂಜಿ ತಿಂಗೊಲ್ದ ಉಲಾಯಿ ಈ ಯೋಜನಾ ವರದಿನ್ ಇಲಾಖೆಗ್ ಕೊರ್ದ್ ತಾತ್ವಿಕ ಅನುಮೋದನೆ ಬೊಕ್ಕ ಯೋಜನಾ ಅನುದಾನೊನ್ ಪಡೆಯರೆಗ್ ಪ್ರಯತ್ನ ಮಲ್ಪುಂಡ್ ಪಂಡುದ್ ಲೋಕೇಂದ್ರ ಜೋಶಿ ತೆರಿಪಾದೆರ್.

ನಿಜವಾದುಲಾ ಈ ಸ್ಥಾವರ ಜಿಲ್ಲೆಗ್ ವರದಾನ ಆವರೆಗುಂಡ್ ಪಂಡುದ್ ರಾಜೇಶ್ ತೆರಿಪಾದೆರ್ .
ಗೋವರ್ಧನ ಗಿರಿ ಟ್ರಸ್ಟ್ ನ ಸದಸ್ಯೆರ್, ರಾಜ್ಯ ಪಶು ಸಂಗೋಪನಾ ಇಲಾಖೆದ ನಿವೃತ್ತ ಉಪನಿರ್ದೇಶಕೆರಾಯಿನ ಡಾ ಸರ್ವೋತ್ತಮ‌ ಉಡುಪರು ಬೊಕ್ಕ ಗೋಶಾಲೆದ ವ್ಯವಸ್ಥಾಪಕ ನರಸಿಂಹ ಭಟ್ ಈ ತಜ್ಞರೊಟ್ಟುಗಿತ್ತುದ್ ಗೋಶಾಲೆದ ಬಗ್ಗೆ ಸಮಗ್ರ ಮಾಹಿತಿ ಕೊರಿಯೆರ್ . ವಾಸುದೇವ ಭಟ್ ಪೆರಂಪಳ್ಳಿ ಈ ಒಟ್ಟು ಯೋಜನೆದ ಅನುಷ್ಠಾನೊಡ್ ಇಲಾಖೆದೊಟ್ಟುಗ್ ಸಂವಹನ ಮಲ್ತೊಂದುಲ್ಲೆರ್.

ಪೇಜಾವರ ಶ್ರೀ ಹರ್ಷ : ಈ ಸ್ಥಾವರ ಯೋಜನೆಗ್ ಕೇಂದ್ರ ಸರ್ಕಾರ ದುಂಬು ಬೈದಿನೇಕ್ ಪೇಜಾವರ ಶ್ರೀಕುಲೆಗ್ ಮಸ್ತ್ ಕುಷಿಯಾದಿತ್ತುದ್ ಪ್ರಧಾನಿ ನರೇಂದ್ರ ಮೋದಿ ಬೊಕ್ಕ ಸಚಿವೆ ಭಗವಂತ್ ಖೂಬಾ ಮೊಕ್ಲೆಗ್ ಅಭಿನಂದನೆ ತೆರಿಪಾದೆರ್. ನೆತ್ತ ಅನುಷ್ಠಾನೊಡ್ದ್ ಜಿಲ್ಲೆಡ್‌ ಗೋರಕ್ಷಣೆದ ಕೆಲಸೊಗ್ ವಿಶೇಷ ಪ್ರೋತ್ಸಾಹ ತಿಕ್ಕರೆಗಿತ್ತುದ್, ಐತ್ತ ಪ್ರಯೋಜನ ಜಿಲ್ಲೆದ ಜನಕ್ಲೆಗ್ ಸಿಕ್ಕುನವ್ ಬಾರೀ ಕುಷಿತ್ತ ವಿಚಾರ ಪಂಡೆರ್.