ತುಲು ಲಿಪಿ ತರಬೇತಿ

ಜೈ ತುಲುನಾಡ್ ಬೆಂಗಳೂರು ಕೂಟೊಡ್ದು ಬೆಂಗಳೂರು ಬಂಟರ ಸಂಘದ ಶಾಲೆಡ್ ತುಲು ಲಿಪಿ ಬೊಕ್ಕ ಭಾಷಾ ತರಗತಿ ಉದಿಪನ ಲೇಸ್.

ತೇದಿ 21.06.2026ನೇ ಐತಾರದಾನಿ ಜೈ ತುಲುನಾಡ್ ಬೆಂಗಳೂರು (ರಿ.) ಕೂಟದ ಮುತಾಲಿಕೆಡ್ ಬಂಟರ ಸಂಘ ಬೆಂಗಳೂರು (ರಿ.) ಮೊಕುಲೆನ ಸಹಕಾರೊಡು ಬೆಂಗಳೂರುದ ವಿಜಯನಗರೊಡುಪ್ಪುನ ಬಂಟರ ಸಂಘ ಆರ್.ಎನ್.ಎಸ್. ವಿದ್ಯಾನಿಕೇತನ ಶಾಲೆಡ್ “ಬಲೆ ತುಲುಲಿಪಿ ಕಲ್ಪುಗ” ಬೊಕ್ಕ “ಬಲೆ ತುಲು ಪಾತೆರ್ಗ” ಕಜ್ಜ ಕೊಟ್ಯ ನಡತ್ಂಡ್.
   ಬಿನ್ನೆರಾದ್ ಬಂಟರ ಸಂಘ ಬೆಂಗಳೂರು ನೆತ್ತ ಮಾನಾದಿಗೆದ ಕಾರ್ಯಂತೆರಾಯಿನ ಶ್ರೀ ವಿಜಯ್ ಜೆ.  ಶೆಟ್ಟಿ ಬೊಕ್ಕ ವರ್ನಿಲ ಪ್ರಿಂಟರ್ಸ್ ದ ದನಿಯಾಯಿನ ಪುಷ್ಪ ರಾಕೇಶ್ ಬಂಗೇರ ಪಾಲ್ ಪಡೆದಿತ್ತೆರ್. ಬಂಟರ ಸಂಘದ ಡಾ. ದೀಪಕ್ ಶೆಟ್ಟಿ ಬಾರ್ಕೂರು ತುಲು ಲಿಪಿ ಕಜ್ಜೊನು ಉದಿಪನ ಮಲ್ತೆರ್. ಲೇಸ್ ದ ಗುರ್ಕಾರ್ಮೆನ್ ಜೈ ತುಲುನಾಡ್ ಬೆಂಗಳೂರು ಕೂಟದ ಗುರ್ಕಾರ್ಲಾಯಿನ ವಿನಯ್ ಮಣಿಯಾನ ಒಯಿಸ್ ದಿತ್ತೆರ್. ಅಂಚೆನೆ ಒತ್ತು ಪಾಲ್ ಡ್ ಕೂಟದ ಮಾನಾದಿಗೆದ ಸಲಹೆಗಾರೆರಾಯಿನ ನಿಧೀಶ್ ಶೆಟ್ಟಿ ಅಂಚೆನೆ ತುಲು ಲಿಪಿ ನಿದಯಂತೆರಾಯಿನ ಅನುದೀಪ್ ಶೆಟ್ಟಿ ಇತ್ತೆರ್.
    ಉದಿಪನ ಮಲ್ತ್ ದ್ ಪಾತೆರ್ನ ಡಾ. ದೀಪಕ್ ಶೆಟ್ಟಿ, “ಜೈ ತುಲುನಾಡ್ ಬೆಂಗಳೂರು ಕೂಟ ಸುರೂತ ಸರ್ತಿಗ್ ಬೆಂಗಳೂರು ಡು ಮಲ್ದಿನ ಕಜ್ಜೊಡ್ದಿಂಚ ಯಾನ್ ಕೂಟದಕ್ಲೆನ ಒಟ್ಟುಗುಲ್ಲೆ, ನಮ್ಮ ತುಲುನಾಡ್ ದ ಬಾಸೆ ಸಂಸ್ಕೃತಿ ಒರಿವೊಡು ಅಂಚೆನೆ ಮಲ್ಲ ಇತಿಹಾಸ ಉಪ್ಪುನ ಲಿಪಿನ್ಲ ಒರಿತ್ ದ್ ನಮ ಮಾತ ಗಲಸೊಡು. ಈ ಕೂಟೊಗು ಯಾನ್ ಏಪಲ ಬೆರಿ ಬಲ ಆದ್ ಉಂತುವೆ ” ಪಂಡೆರ್.
    ಬಿನ್ನೆರಾದ್ ಬೈದಿನ ವಿಜಯ್ ಜೆ ಶೆಟ್ಟಿ ಪಾತೆರ್ದ್ “ಕೋಲ ಕಂಬುಲ ಅಂಕ ಆಯನ, ನಾಗಾರಾಧನೆ ಇಂಚಿನ ತುಲು ಸಂಸ್ಕಾರೊಲೆನ್ ತುಲು ಭಾಸೆ, ತುಲು ಲಿಪಿ ಒರಿಪಾವುಲೆಕನೆ ಒರಿಪಾವುನ ಅಗತ್ಯ ಉಂಡು” ಪಂಡೆರ್.
   ಲೇಸ್ ದ ಗುರ್ಕಾರ್ಲಾಯಿನ ವಿನಯ್  ಮಣಿಯಾನ ಬೊಕ್ಕ  ಜೈ ತುಲುನಾಡ್ ಬೆಂಗಳೂರು ಕೂಟದ ಗೌರವ ಸಲಹೆಗಾರೆರಾಯಿನ ನಿಧೀಶ್ ಶೆಟ್ಟಿ ಲೇಸ್ ದ ಬಗೆಟ್ ತುಲು ಲಿಪಿ ಕಜ್ಜೊಲೆನ ಬಗೆಟ್ ಅಂಚೆನೆ ಕೂಟ ಕಟ್ಟಿನ ಬಗೆಟ್ ತೆರಿಪಾಯೆರ್.
    ತುಲು ಭಾಷಾ ಸಮಿತಿದ ಬನಶ್ರೀ ಅವಿನಾಶ್ ಜೈ ತುಲುನಾಡ್ ಕೂಟದ ತುಲು ಲಿಪಿ ಬೆನ್ನಿ ದ ಇತಿಹಾಸದ ಬಗೆಟ್ ತೆರಿಪಾಯೆರ್.
   ಉಂದುವೇ ಪೊರ್ತುಡು ಸೇರ್ದಿಂಚಿ ಪದುಕೆರ್, ಕಲ್ಪಾರ್ತಿಲು(students), ಕಲ್ಪಾದಿಲೆನ(teachers) ಎದುರು ಬತ್ತಿ ಬಿನ್ನೆರ್ ತುಲು ಲಿಪಿತ ಕಮ್ಮೆನೊನು ಲೋಕೊರ್ಮೆ ಪಾರಾವುನ ಜೈ ತುಲುನಾಡ್ ಬೆಂಗಳೂರು ಎಗ್ಗೆದ ರಡ್ಡನೇ ಸರ್ತಿ ಅಚ್ಚಿ ಆವೊಂದುಪ್ಪುನ ಬೂಕು “ತುಲು ಬರವುದ ಐಸಿರ” ಬುಡುಗಡೆ ಮಲ್ತೆರ್
     ಲೇಸ್ ಗ್ ಬತ್ತಿಂಚಿ ಕಿನ್ಯ ಬಾಲೆಡ ತಡ್ಪೆಡ್ ಪಾಡಿಂಚಿ ಅರಿಟ್ ತುಲು ಲಿಪಿಟ್ ಬರೆಪಾದ್ ಅಂಚೆನೆ ಬತ್ತಿ ಬಿನ್ನೆರೆಡ ತುಲು ಲಿಪಿಟ್ ಪುದರ್ ಬರೆಪಾವುನ ಮುಖೇನ ಲಿಪಿ ಕಜ್ಜೊಗು ಚಾಲನೆ ಕೊರಿಯೆರ್.
    ಈ ಪೊರ್ತುಡು ಬೆಂಗಳೂರು ಬಂಟರ ಸಂಘದ ಗುರ್ಕಾರ್ಲಾಯಿನ ಸಿ.ಎ. ಅಶೋಕ್ ಶೆಟ್ಟಿ ಮೇರ್ ಭಾಷೆ ಬೊಕ್ಕ ಕಲ್ಪಾವುನ ಕಜ್ಜದಡೆ ಬತ್ತ್ ದ್ ಎಡ್ಡೆಪ್ಪುಲೆನ್ ಬಯಕ್ ದ್ ತಾನ್ ಲ ಒಂತೆ ಲಿಪಿ ಕಲ್ತ್ ದ್ ಮಾತೆರೆಗ್ಲ ಮಾದರಿ ಆಯೆರ್. ಉಂದುವೇ ಪೊರ್ತುಡು ಕೇಂದ್ರ ತುಲು ಲಿಪಿ ಸಮಿತಿ ನಿದಯಂತೆರಾಯಿನ  (incharge) ಧನಂಜಯ ಆಚಾರ್ಯ ರಡ್ಡ್ ಕಜ್ಜೊಲೆಗ್ ಬೆರಿತಾಂಗ್ ಆಯೆರ್.
     ತುಲು ಲಿಪಿತ ಕಲ್ಪಾದಿಲಾದ್ ರಕ್ಷಾ ಕುಲಾಲ್, ತೃಪ್ತಿ ಶೆಟ್ಟಿ, ಶಿವಾನಿ ಪೂಜಾರಿ, ಧನರಾಜ್ ಕುಲಾಲ್,ಶುಭಕರ್ ನಾಯ್ಕ್, ಅನುದೀಪ್ ಶೆಟ್ಟಿ ಪಾಲ್ ಪಡೆತೆರ್. ಅಂಚೆನೆ ತುಲು ಭಾಷೆದ ಕಲ್ಪಾದಿಲಾದ್ ಬನಶ್ರೀ ಅವಿನಾಶ್, ಗೀತಾ ಜಯಪ್ರಸಾದ್, ಅಶ್ವಿನಿ ಗಟ್ಟಿ , ಪ್ರಶಾಂತ್ ಎಸ್.ಪಿ. ಪಾಲ್ ಪಡೆಯೆರ್.
       ಒತ್ತು ಗುರ್ಕಾರ್ಲಾಯಿನ ಶರತ್ ಕೊಡವೂರು ರಡ್ಡನೇ ಸರ್ತಿ ಅಚ್ಚಿ ಆಯಿನ ತುಲು ಬರವುದ ಐಸಿರ ಬೂಕುದ ಬಗೆಟ್ ತೆರಿಪಾಯೆರ್.
     ಈ ಪೊರ್ತುಡು ಸಂಘಟನಾ ಕಾರ್ಯಂತೆರಾಯಿನ ಗುರು ದೇವಾಡಿಗ, ಒತ್ತು ಸಂಘಟನಾ ಕಾರ್ಯಂತೆರಾಯಿನ ನಿತೇಶ್ ಬಂಗೇರ, ಜೈ ತುಲುನಾಡ್ ಕೂಟದ ಸ್ಥಾಪಕ ಪದುಕೆರಾಯಿನ ಯತೀಶ್ ಮುಂಡೋಡಿ,ಕಾರ್ಯಕಾರಿ ಸಮಿತಿದ ಪದುಕೆರಾಯಿನ ಪ್ರಶಾಂತ್ ಎಂ., ಸುದರ್ಶನ್ ಆಚಾರ್ಯ, ಪ್ರಿಯಾ ಯತೀಶ್, ಧವಳ ಆಚಾರ್ಯ,ವಿಜಿ ಕಾಪಿಕಾಡ್, ಜಿತೇಶ್ ಕುಲಾಲ್ ತೋಕೂರು, ಶಶಾಂಕ್ ಆಚಾರ್ಯ ಅಂಚೆನೆ ಜೈ ತುಲುನಾಡ್ ಬೆಂಗಳೂರು ಸಾಹಿತ್ಯೊದೈಸಿರೊದ ನಿದಯಂತೆರ್ ಜಯಪ್ರಸಾದ್ ಕುಲಾಲ್, ಒತ್ತು ನಿದಯಂತೆರಾಯಿನ ನಲಿನಿ ಕುಲಾಲ್ ಮೊಕುಲು ಮಾತ ಪಾಲ್ ಪಡೆದಿತ್ತೆರ್.
     ಪ್ರಾಸ್ಥಾವಿಕ ಭಾಷಣೊನು ಒತ್ತು ಕಾರ್ಯಂತೆರಾಯಿನ ಪ್ರದೀಪ್ ಶೆಟ್ಟಿ  ಮಲ್ತೆರ್. ಒತ್ತು ಪಣವುದ ಪಾಲವೆರಾಯಿನ  ಅರ್ಚನಾ ರೈ ಎದ್ಕೊಂಡೆರ್, ಒತ್ತು ಕಾರ್ಯಂತೆರಾಯಿನ ಮೇಘನಾ ರಕ್ಷಿತ್ ಸೊಲ್ಮೆ ಸಂದೈತ ಮಲ್ತೆರ್. ಲೇಸ್ ಸುದಾರಿಕೆನ್ ಕೂಟದ ಕಾರ್ಯಂತೆರಾಯಿನ ಅಕ್ಷಯ್ ಆಚಾರ್ಯ ಮಲ್ತೆರ್.