ಸಹಕಾರಿ ಕ್ಷೇತ್ರಡ್ ಮಹತ್ತರ ಬದಲಾವಣೆಯಾಪಿನ ಮೂಲಕ ದೇಶದ ಆರ್ಥಿಕತೆಗ್ ಸಹಕಾರಿ ಕ್ಷೇತ್ರಲಾ ಬಾರಿಮಲ್ಲ ಶಕ್ತಿನ್ ಕೊರ್ತುಂಡ್ ಪಂಡುದು ಶಾಸಕ ಯಶ್ ಪಾಲ್ ಎ.ಸುವರ್ಣ ಪಂಡೆರು. ಆರು ಕಡಿಯಾಳಿ ಖಾಸಗಿ ಹೋಟೆಲ್ ಡ್ ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಳಿ ನಿ. ಬೆಂಗಳೂರು, ಉಡುಪಿ ಜಿಲ್ಲಾ ಸಹಕಾರ ಯೂನಿಯನ್ ನಿ. ಉಡುಪಿ ಬೊಕ್ಕ ಉಡುಪಿ ಸಹಕಾರ ಇಲಾಖೆದ ಸಂಯುಕ್ತಾಶ್ರಯಡ್ ನಡತಿನ ಮೈಸೂರು ವಿಭಾಗದ ಮೀನುಗಾರರ ಸಹಕಾರ ಸಂಘದ ಪದಾಧಿಕಾರಿಲು ಬೊಕ್ಕ ಮುಖ್ಯ ಕಾರ್ಯನಿರ್ವಾಹಕರ ರಾಜ್ಯ ಮಟ್ಟದ ವಿಶೇಷ ತರಬೇತಿ ಕಾರ್ಯಕ್ರಮನ್ ಉದ್ಘಾಟನೆ ಮಲ್ತುದ್ ಪಾತೆರಿಯೆರು.ಮೀನುಗಾರಿಕೆಲಾ ಕೃಷಿತ್ತ ಒಂಜಿ ಭಾಗವಾದುಂಡ್. ಭೂಮಿಡ್ ರೈತೆರು ಕೃಷಿ ಬೆಳೆಯಿನಂಚ ಮೀನುಗಾರೆರುಲಾ ಸಮುದ್ರ, ತುದೆಟ್ ಜೀವದ ಹಂಗು ಬುಡುದು ನಡಪಾವುನ ಕಷ್ಟದ ಉದ್ಯಮವಾದುಂಡ್. ಅವ್ವೇ ರೀತಿ ಕೃಷಿಕೆರೆಗ್ ಸಿಕ್ಕುನ ಸೌಲಭ್ಯದಂಚ ಮೀನುಗಾರೆರೆಗುಲಾ ಸವಲತ್ತು ತಿಕ್ಕೊಡಾಯಿನ ಅನಿವಾರ್ಯತೆ ಉಂಡು ಪಂಡುದು ಶಾಸಕ ಯಶ್ ಪಾಲ್ ಅಭಿಪ್ರಾಯ ವ್ಯಕ್ತಪಡಿಸಾಯೆರು.
ಮೀನುಗಾರಿಕೆಗ್ ಸಂಬಂಧಪಟ್ಟಿನ ನಿಯಮಲು ಒಂಜೊಂಜಿ ರಾಜ್ಯಡ್ ಒಂಜೊಂಜಿ ವಿಧವಾದುಂಡ್.. ಅಂಚಾದ್ ಮೀನುಗಾರಿಕೆದ ನಿಯಮ ಬೊಕ್ಕ ಮೀನುಗಾರೆರೆಗ್ ಕೃಷಿಕೆರೆಗ್ ಸಿಕ್ಕುನ ಸೌಲಭ್ಯಲು ಸಿಕ್ಕಡ್ ಪಂಡುದು ಈ ಕಾರ್ಯಾಗಾರದ ಮೂಲಕ ಸರ್ಕಾರದ ಗಮನ ಸೆಳೆಯಡ್ ಪಂಡುದು ಯಶ್ ಪಾಲ್ ಸುವರ್ಣ ಒತ್ತಾಯ ಮಲ್ತೆರು.
ವಿಶೇಷ ತರಬೇತಿ ಕಾರ್ಯಕ್ರಮದ ಅಧ್ಯಕತೆಡಿತ್ತಿನ ಉಡುಪಿ ಜಿಲ್ಲಾ ಸಹಕಾರ (ರಿ) ಯೂನಿಯನ್ ದ ಅಧ್ಯಕ್ಷರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಮೇರು ಪಾತೆರ್ದ್ , ಜ್ಞಾನ ಪನ್ಪಿನವ್ ನಿರಂತರ ಕಲಿಕೆಗ್ ಸಹಕಾರಿ. ಆ ನಿಟ್ಟುಡ್ ಇನಿ ಆಯೋಜನೆ ಮಲ್ದಿನ ಕಾರ್ಯಾಗಾರ ಮಾತೆರೆಗ್ಲಾ ಮಹತ್ವವಾಯಿನವ್ವ್. ಮೀನುಗಾರ ಸಮುದಾಯ ಸಹಕಾರಿ ಸಂಘದ ಅಭಿವೃದ್ಧಿಗ್ ಕಾರಣಿಭೂತವಾದುಂಡ್. ಅವ್ವೇ ರೀತಿ ಸಹಕಾರಿ ಕ್ಷೇತ್ರ ಬೊಕ್ಕ ಮೀನುಗಾರಿಕೆ ಕ್ಷೇತ್ರ ದೊಟ್ಟುಗ್ ಜತೆಯಾದ್ ಸಾಗುನ ಮೂಲಕ ತಮ್ಮ ಆರ್ಥಿಕ ಅಭಿವೃದ್ಧಿದಂಚ ಪಜ್ಜೆ ದೀಯೊಡಾತುಂಡ್ ಪಂಡುದು ಪಂಡೆರು.
ಕಾರ್ಯಕ್ರಮಡ್ ಆಡಳಿತ ಮಂಡಳಿ ನಿರ್ದೇಶಕೆರಾಯಿನ ಡಾ.ದೇವಿ ಪ್ರಸಾದ್ ಶೆಟ್ಟಿ ಬೆಳಪು, ಉಡುಪಿ ಸಹಕಾರ ಸಂಘದ ಉಪನಿಬಂಧಕಿ ಕೆ.ಆರ್.ಲಾವಣ್ಯ, ಮೀನುಗಾರಿಕಾ ಉಪನಿರ್ದೇಶಕ ಕುಮಾರಸ್ವಾಮಿ ಬಿ.ವಿ, ಅಲೆವೂರು ಹಾಲು ಉತ್ಪಾದಕರ ಸಹಕಾರ ಸಂಘದ ಅಧ್ಯಕ್ಷ ಅಲೆವೂರು ಹರೀಶ್ ಕಿಣಿ ಸೇರಿನಂಚ ಕೆಲವು ಗಣ್ಯೆರು ಉಪಸ್ಥಿತರಿತ್ತೆರು.
ಉದ್ಘಾಟನಾ ಕಾರ್ಯಕ್ರಮಡ್ ಬೊಕ್ಕ ನಿವೃತ್ತ ಸಹಕಾರ ಸಂಘದ ಜಂಟಿ ನಿಬಂಧಕೆರಾಯಿನ ಎಸ್.ಎನ್.ಸಂತೋಷ್ ಕುಮಾರ್ ಮೇರು ವ್ಯಕ್ತಿತ್ವ ವಿಕಸನ ಬೊಕ್ಕ ಒತ್ತಡ ನಿರ್ವಹಣೆ ವಿಷಯದ ಬಗೆಟ್ ಉಪನ್ಯಾಸ ಕೊರಿಯೆರು. ಮಧ್ಯಾಹ್ನ 2-30ಡ್ದ್ 3-30ಮುಟ್ಟ ಮೀನುಗಾರಿಕಾ ಇಲಾಖೆಡ್ದ್ ತಿಕ್ಕುನ ಸೌಲಭ್ಯದ ಬಗ್ಗೆ ಮೀನುಗಾರಿಕೆ ಇಲಾಖೆದ ಉಪನಿರ್ದೇಶಕ ಕುಮಾರಸ್ವಾಮಿ ಬಿ.ವಿ ಉಪನ್ಯಾಸ ಕೊರಿಯೆರು. ಬಯ್ಯಗ್ 4ಗಂಟೆಡ್ದ್ ಸಂತೋಷ್ ಕುಮಾರ್ ಮೇರು ಸಹಕಾರ ಸಂಘಲೆಡ್ ಆಂತರಿಕ ಸಂಬಂಧ ಬೊಕ್ಕ ಪರಿಣಾಮಕಾರಿ ಸಂವಹನ ಬಗೆಟ್ ಉಪನ್ಯಾಸ ಕೊರಿಯೆರು.
by 