ತುಳು ಬರವುನು ಸೇರ್ದ್ ಮೂಜಿ ಬಾಸೆಡ್ ಮೂಡ್ದ್ ಬತ್ತುಂಡ್ ಅಂಚೆ ಚೀಟಿ;

ಉಡುಪಿ ಅಂಚೆ ವಿಭಾಗ,ಉಡುಪ ರತ್ನ ಪ್ರತಿಷ್ಠಾನ,ಕೊಡವೂರು ಬ್ರಾಹ್ಮಣ ಮಹಾಸಭಾ,ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ಉಡುಪಿ ವಲಯದ ಒತ್ತುಸೇರಿಗೆಡ್ ರಾಷ್ಟ್ರೀಯ ಅಂಚೆ ಸಪ್ತಾಹ ಕೊಡವೂರುದ ಭಾಮಾ ಗ್ಯಾಲರಿಡ್ ನಡತುಂಡ್. ಉಡುಪಿ ಅಂಚೆ ವಿಭಾಗದ ಉದ್ಯೋಗಿ ಆಯಿನ ಪೂರ್ಣಿಮಾ ಜನಾರ್ಧನ್ ಮೇರು ತಾನು ಸಂಗ್ರಹ ಮಲ್ದಿನ ಅಂಚೆ ಚೀಟಿಲೆಗ್ ಕನ್ನಡ,ತುಳು ಬೊಕ್ಕ ಇಂಗ್ಲೀಷ್ ಅಕ್ಷರೊಲೆನ್ ಜೋಡಣೆ ಮಲ್ತುದ್ “ಅಂಚೆ ಚೀಟಿಲೆಗ್ ತ್ರಿಭಾಷ ತೋರಣ” ಪನ್ಪಿನ ಕೃತಿನ್ ಉಡುಪಿ ಅಂಚೆ ಅಧೀಕ್ಷಕೆರಾಯಿನ ನವೀನ್ ಚಂದರ್ ಬುಡುಗಡೆ ಮಲ್ತೆರ್.

ಈ ಪೊರ್ತುಡ್ ಹಿರಿಯ ಫಿಲಾಟಲಿಸ್ಟ್ ಎಮ್ ಕ್ರಷ್ಣಯ್ಯ, ಕೊಡವೂರು ಬ್ರಾಹ್ಮಣ ಮಹಾಸಭಾ ರಜತ ಮಹೋತ್ಸವದ ಕಾರ್ಯಾಧ್ಯಕ್ಷೆರಾಯಿನ ಮಂಜುನಾಥ್ ಭಟ್,ಸಹಾಯಕ ಅಂಚೆ ಅಧೀಕ್ಷಕೆರಾಯಿನ ನವೀನ್ ವಿ ಎಲ್,ಸೌತ್ ಕೆನರಾ ಫೋಟೊಗ್ರಾಫರ್ಸ್ ಅಸೋಸಿಯೇಷನ್ ಉಡುಪಿ ವಲಯದ ಅಧ್ಯಕ್ಷೆರಾಯಿನ ಪ್ರಕಾಶ್ ಕೊಡಂಕೂರು ಉಪಸ್ಥಿತರಿತ್ತೆರ್.
ಉಡುಪಿ ವಿಭಾಗದ ಸಹಾಯಕ ಅಂಚೆ ಅಧೀಕ್ಷಕೆರಾಯಿನ ಜಯರಾಮ್ ಶೆಟ್ಟಿ ಸ್ವಾಗತ ಮಲ್ತುದ್, ಕ್ರಷ್ಣರಾಜ ವಿಠಲ ಭಟ್ ಪ್ರಾಸ್ತವಿಕ ಪಾತೆರಿಯೆರ್.ಕೃತಿ ಸಂಪಾದಕಿ ಪೂರ್ಣಿಮಾ ಜನಾರ್ಧನ್ ಸೊಲ್ಮೆ ಸಂದಾಯ್ತ ಮಲ್ತೆರ್.ಉಡುಪ ರತ್ನ ಪ್ರತಿಷ್ಠಾನದ ಸಂಚಾಲಕೆರಾಯಿನ ಜನಾರ್ಧನ್ ಕೊಡವೂರು ನಿರೂಪಣೆ ಮಲ್ತೆರ್.