ಯಶ್ಪಾಲ್ ಡ ಭಟ್ರು ಕ್ಷಮೆ ಕೇನಡ್

ಶಾಸಕ ಯಶ್ ಪಾಲ್ ಸುವರ್ಣ ವಿರುದ್ಧ ಹತಾಶ ಆರೋಪಗ್ ರಘುಪತಿ ಭಟ್ ಬೇಷರತ್ ಕ್ಷಮೆ ಕೇನಡ್ : ಉಡುಪಿ ಬಿಜೆಪಿ


ಉಡುಪಿ ಶಾಸಕ ಯಶ್ ಪಾಲ್ ಸುವರ್ಣ ವಿರುದ್ಧ ರಾಜಕೀಯ ಹತಾಶೆಡಾದ್ ಮಾಜಿ ಶಾಸಕ ರಘುಪತಿ ಮಲ್ದಿನ ಆಧಾರ ರಹಿತ ಆರೋಪನ್  ಕೂಡಲೇ ಪಿರ ದೆತೊಂದ್ ಬೇಷರತ್ ಕ್ಷಮೆ ಕೇನೊಡ್ ಪಂಡುದ್ ಉಡುಪಿ ನಗರ ಬಿಜೆಪಿ ಅಧ್ಯಕ್ಷ ದಿನೇಶ್ ಅಮೀನ್ ಬೊಕ್ಕ ಗ್ರಾಮಾಂತರ ಬಿಜೆಪಿ ಅಧ್ಯಕ್ಷ ರಾಜೀವ್ ಕುಲಾಲ್ ಆಗ್ರಹ ಮಲ್ದೆರ್.

ಹತಾಶೆರಾದ್ ಶಾಸಕೆರೆನ ವಿರುದ್ಧ ಸುಳ್ಳು ಆರೋಪ

ಬಡಾನಿಡಿಯೂರು ಗ್ರಾಮಡ್  ಮಾಜಿ ಶಾಸಕ ರಘುಪತಿ ಭಟ್ ಒಡೆತನದ ಖಾಸಗಿ ಜಮೀನುದ ನಕಲಿ ದಾಖಲೆ ಸೃಷ್ಟಿ ಮಲ್ತುದ್ ಸುಳ್ಳು ಮಾಹಿತಿ ಕೊರ್ದೂ ನಗರಾಭಿವೃದ್ಧಿ ಪ್ರಾಧಿಕಾರಗ್  ಅರ್ಜಿ ಸಲ್ಲಿಕೆ ಮಲ್ದಿನ ಬಗ್ಗೆ ಸ್ಥಳೀಯ ಕರಾವಳಿ ಯುವಕ ಮಂಡಲ ಬೊಕ್ಕ ಊರುದ  ಜನತೆದ ದೂರುದಂಚ ಓರ್ವ ಜವಾಬ್ದಾರಿಯುತ ಶಾಸಕೆರಾದ್  ಕಾನೂನು ಪ್ರಕಾರ ಕ್ರಮ ದೆತೊಂದ್ ಸಾರ್ವಜನಿಕೆರೆಗ್ ನ್ಯಾಯ ಕೊರೊಡು ಪಂಡುದ್ ಪತ್ರ ಬರೆತಿನ  ಶಾಸಕ ಯಶ್ ಪಾಲ್ ಸುವರ್ಣ ವಿರುದ್ಧ 3 ಬಾರಿ ಶಾಸಕರಾದಿತ್ತಿನ ರಘುಪತಿ ಭಟ್ ರಾಜಕೀಯ ಪ್ರೇರಿತೆರಾದ್ ಸುಳ್ಳು ಆರೋಪಲೆನ್ ಮಲ್ತುದ್ ತೇಜೋವಧೆಗ್ ಪ್ರಯತ್ನ ಮಲ್ತೊಂದುಲ್ಲೆರ್.

ರಘುಪತಿ ಭಟ್ರೆಗ್ ಹಿಂದುಳಿದ ವರ್ಗದ ಸಾಮಾನ್ಯ ಕಾರ್ಯಕರ್ತ ರೆನ್  ಶಾಸಕೆರಾದ್ ಒಪ್ಪುನ ಮನಸ್ಥಿತಿ ಇಜ್ಜಿ.

ಹಿಂದೂ ಕಾರ್ಯಕರ್ತೆರಾದ್, ರಾಷ್ಟ್ರೀಯವಾದಿ ಚಿಂತನೆದ ಮೂಲಕ ಹಂತ ಹಂತವಾದ್ ಬುಲೆದು, ಉಡುಪಿ ನಗರಸಭೆತ್ತ ಸದಸ್ಯೆರಾದ್ ಸಹಕಾರ ಕ್ಷೇತ್ರಡ್ ಸೇವೆ ಸಲ್ಲಿಸಾಯಿನ ಯುವ ಸಹಕಾರಿ ನಾಯಕೆರಾದ್ ಮುಖಂಡೆರಾದ್, ಕರಾವಳಿ ಜಿಲ್ಲೆದ ಮೀನುಗಾರ ಮುಖಂಡೆರಾದ್, ಪಕ್ಷಡ್ ಬೇತೆ ಬೇತೆ ಜವಾಬ್ದಾರಿಲೆನ್ ನಿರ್ವಹಿಸಾಯಿನ  ಓರ್ವ ಹಿಂದುಳಿದ ವರ್ಗದ ಸಾಮಾನ್ಯ ಕಾರ್ಯಕರ್ತ ಪಕ್ಷದ ಹಿರಿಯೆರೆನ ಸೂಚನೆದ ಪ್ರಕಾರ ಕರಿನ ವಿಧಾನಸಭಾ ಚುನಾವಣೆಡ್ ಉಡುಪಿಡ್ದ್ ಸ್ಪರ್ಧೆ  ಮಲ್ತುದ್ ಅಭೂತಪೂರ್ವ ಗೆಲುವು ಸಾಧಿಸಾಯೆರ್ಡಲಾ ಯಶ್ ಪಾಲ್ ಸುವರ್ಣ ರೆನ್ ಶಾಸಕೆರಾದ್ ರಘುಪತಿ ಭಟ್ ನನಲಾ ಒಪ್ಪುಜೆರ್..

ಕ್ಷೇತ್ರದ ಜನತೆ ಬೊಕ್ಕ ಪಕ್ಷದ ಕಾರ್ಯಕರ್ತೆರು ತರೆ ತಗ್ಗಾವುನ ಕೆಲಸ ಶಾಸಕೆರು ಏಪಲಾ ಮಲ್ದುಜೆರ್.

ಉಡುಪಿ ಕ್ಷೇತ್ರದ ಸಮಗ್ರ ಅಭಿವೃದ್ಧಿಗ್ ರಾಜ್ಯ ಸರ್ಕಾರದ ಅನುದಾನದ ಕೊರತೆದ ನಡುಟುಲಾ ರಾತ್ರೆ ಪಗೆಲ್ ಬೇಲೆ ಮಲ್ತೋಂದ್ , ಪಕ್ಷದ ಕಾರ್ಯಕರ್ತೆರೆನ  ಬೇಡಿಕೆ ಸಮಸ್ಯೆಲೆಗ್ ಸದಾ ಸ್ಪಂದಿಸಾವೊಂದ್, ರಾಷ್ಟ್ರೀಯತೆ ಹಿಂದುತ್ವದ ವಿಚಾರಡ್  ಏಪೊಲಾ ರಾಜಿಯಾವಂದೇ ಪಕ್ಷದ ಹಿರಿಯೆರೆನ , ಕಾರ್ಯಕರ್ತರ ಬೊಕ್ಕ ಉಡುಪಿ ಕ್ಷೇತ್ರದ ಜನತೆದ  ಘನತೆಗ್  ಧಕ್ಕೆಯಾವಂದೆ ಓರ್ವ ಜವಾಬ್ದಾರಿಯುತ ಶಾಸಕೆರಾದ್ ಯಶ್ ಪಾಲ್ ಸುವರ್ಣ ಕಾರ್ಯ ವೈಖರಿ ಬಗ್ಗೆ ಹೆಮ್ಮೆ ಉಂಡು..

ಅಧಿಕಾರ ಅನುಭವಿಸಾದ್  ಪಕ್ಷ ದ್ರೋಹ ಮಲ್ದಿನ ವ್ಯಕ್ತಿಗ್ ಶಾಸಕೆರೆನ್  ಟೀಕೆ ಮಲ್ಪುನ ನೈತಿಕತೆ ಇಜ್ಜಿ..

ಬಿಜೆಪಿ ಪಕ್ಷಡ್ದ್  3 ಬಾರಿ ಶಾಸಕೆರಾದ್  ಅಧಿಕಾರ ಅನುಭವಿಸಾದ್, ಕರಿನ ಚುನಾವಣೆಡ್  ಸೀಟು ಸಿಕ್ಕುಜಿ ಪನ್ಪಿನ ಒಂಜೇ ಕಾರಣಗ್  ಆಧಿಕಾರದ ಲಾಲಸೆಠ್ ತಂಕಾದ್ ರಾತ್ರೆ ಪಗೆಲ್ ಬೆಂದಿನ ಕಾರ್ಯಕರ್ತೆರೆನ್  ನಡು ನೀರುಡ್ ಕೈಬುಡ್ದ್ , ಬಿಜೆಪಿ ಪಕ್ಷಗ್ ದ್ರೋಹ ಬಗೆದು ಕರಿನ ವಿಧಾನ ಪರಿಷತ್ ಚುನಾವಣೆಡ್  ಬಂಡಾಯವಾದ್ ಸ್ಪರ್ಧೆ ಮಲ್ತುದ್ ಪಕ್ಷದ ಹಿರಿಯೆರೆನ  ಮನವಿಗುಲಾ ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಹಿರಿಯರೆಗುಲಾ  ಗೌರವ ಕೊರಂದಿನ ರಘುಪತಿ ಭಟ್ರೆಗ್  ಶಾಸಕರ ಕಾರ್ಯವೈಖರಿ, ಪಕ್ಷ ನಿಷ್ಠೆ ಬೊಕ್ಕ ಬದ್ಧತೆದ  ಬಗ್ಗೆ ಟೀಕೆ ಮಲ್ಪುನ ನೈತಿಕತೆ ಒರಿದುಜಿ..

ಈ ಬಾರಿ ಶಾಸಕರಾದಿತ್ತಿನರೆಗ್ ಕಾನೂನು ಮಾರ್ಗಡ್ ಅಧಿಕಾರಿಲೆನ ವಿರುದ್ಧ ಕ್ರಮ ಆಗ್ರಹಿಸಾವುನ ಕನಿಷ್ಠ ಜ್ಞಾನ ಇಜ್ಜಾ?

ಒಂಜಿ ವೇಳೆ ರಘುಪತಿ ಭಟ್ ಅರೆನ ನಿಯಮ ಬದ್ಧವಾದುಪ್ಪುನ ಕಡತಲೆಗ್ ದುರುದ್ದೇಶ ಪೂರ್ವಕವಾದ್ ನಗರಾಭಿವೃದ್ಧಿ ಪ್ರಾಧಿಕಾರಡ್ ತಮ್ಮ ಕಡತದ ಬಗ್ಗೆ ಅಧಿಕಾರಿಲೆಡ್ದ್  ತೊಂದರೆ ಕೊರ್ಪಿನ ಉದ್ದೇಶಡ್ ವಿಳಂಬ ಮಲ್ತೊಂದುಲ್ಲೆರ್ .ಅಧಿಕಾರಿಲೆನ ವಿರುದ್ಧ ಕಾನೂನು ಹೋರಾಟ ಮಲ್ಪೊಲಿ ಅತ್ತುಂಡ ಮೇಲ್ಮನವಿ ಸಲ್ಲಿಸಾವರೆಗ್ ಅವಕಾಶ ಇತ್ತುಂಡಲಾ ಈ ಬಗ್ಗೆ ಕನಿಷ್ಟ ಜ್ಞಾನ ಇಜ್ಜಾಂದೆ ವರ್ತಿಸಾದ್  ಸಮಾಜದ ಎದುರುಡ್ ‘ಸಂತ್ರಸ್ತ ಪಂಡುದ್ ಬಿಂಬಿಸಾವರೆಗ್ ಪಿದಾಡುದೆರ್.. ಉನ್ನತ ಅಧಿಕಾರಿಗ್

ಶಾಸಕರೆನ್ ರೌಡಿ ರೀತಿಡ್ ಬಿಂಬಿಸಾವುನ ವಿಫಲ ಯತ್ನ

ಶಾಸಕ ಯಶ್ ಪಾಲ್ ಸುವರ್ಣ ವಿರುದ್ಧ ನಿರಂತರವಾದ್ ತೇಜೋವಧೆ ಮಲ್ತೊಂದುಪ್ಪುನ ರಘುಪತಿ ಭಟ್, ಈ ಬಾರಿ ಒಂಜಿ  ಪಜ್ಜೆ ದುಂಬು  ಪೋದ್  ಶಾಸಕೆರು ಅಧಿಕಾರಿಲೆಗ್ ಬೆದರಿಕೆ ಪಾಡ್ದ್ ಒತ್ತಡ ಮಲ್ತೊಂದುಲ್ಲೆರ್ ಪನ್ಪಿನ ಬಾಲಿಕ ಆರೋಪ ಮಲ್ತುದ್ ಸಮಾಜದ ಎದುರು ಶಾಸಕೆರೆನ್ ರೌಡಿಯ ರೀತಿಡ್ ಬಿಂಬಿಸಾವರೆಗ್ ఆಧಾರ ಸಹಿತ ಪ್ರಯತ್ನ ಮಲ್ತೊಂದುಲ್ಲೆರ್.

ಅಧಿಕಾರಕಾರಿಲೆಗ್  ಶಾಸಕೆರು ಬೆದರಿಕೆ  ಪಾಡಿನ ಬಗ್ಗೆ ದಾಖಲೆ ಕೊರಡ್.

ರಘುಪತಿ ಭಟ್ರೆಗ್ ನೈತಿಕತೆ ಇತ್ತುಂಡ ಇಂಚಿನ ಸುಳ್ಳು ಆರೋಪ ಮಲ್ಪುನ ಬದಲು ಶಾಸಕೆರು ಅಧಿಕಾರಿಲೆಗ್ ಬೆದರಿಕೆ ಮಲ್ದಿನ ಬಗ್ಗೆ ಒವ್ವೇ ಸೂಕ್ತ ದಾಖಲೆ ಇತ್ತುಂಡ ಬಹಿರಂಗ ಮಲ್ಪೊಡ್ ಇಜ್ಜಿಡ ಅರ್ಧ ಗೋಡೆಡ್ ದೀಪ ದೀಲೆಕ್ಕ ಗಾಳಿಡ್ ಗುಂಡು ಬುಡ್ರೆಗ್ ಬಲ್ಲಿ.

ರಾಜ್ಯಡ್ ಕಾಂಗ್ರೆಸ್ ಸರಕಾರ ಇಪ್ಪುನವ್ ಮಾಜಿ ಶಾಸಕೆರು ಮದದೆರ್..

ತನ್ನ ಖಾಸಗಿ ಜಮೀನುಧ ಕಡತದ  ಬಗ್ಗೆ ಸದಾ ಶಾಸಕೆರೆನ ಬಗ್ಗೆ ಗೂಬೆ ಕುಲ್ಲಾವುನ ದುಂಬು ರಾಜ್ಯಡ್ ಕಾಂಗ್ರೆಸ್ ಸರಕಾರ ಆಡಳಿತ ಮಲ್ತೊಂದಿತ್ತುದ್, ಉಡುಪಿ ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷೆರಾದ್ ಕಾಂಗ್ರೆಸ್ ನಾಯಕರೇ ಉಲ್ಲೆರ್ ಪನ್ಪಿನವ್ವೆನ್ ಮದತುದೆರ್..

ಶಾಸಕೆರು ಕಾಂಗ್ರೆಸ್ ಸಚಿವರೆಡ್ದುಲಾ ಪ್ರಭಾವಿಯೇ?

ರಘುಪತಿ ಭಟ್ ಪ್ರಕಾರ ಶಾಸಕ ಯಶ್ ಪಾಲ್ ಸುವರ್ಣ ಕಾಂಗ್ರೆಸ್ ಪಕ್ಷದ ಜಿಲ್ಲಾ ಉಸ್ತುವಾರಿ ಸಚಿವೆರೆಡ್ದುಲಾ ಜಾಸ್ತಿ ಪ್ರಭಾವಿ ನಾಯಕೆರಾದುಲ್ಲೆರ್ ಪಂಡುದು ಪನೊಂದುಲ್ಲೆರ್..

– ರಘುಪತಿ ಭಟ್ ಹತಾಶ ಮನಸ್ಥಿತಿ ಬಯಲಾತುಂಡ್

ಶಾಸಕ ಯಶ್ ಪಾಲ್ ಸುವರ್ಣ ವಿರುದ್ಧ ರಘುಪತಿ ಭಟ್ ಸುಳ್ಳು ಆರೋಪದ  ಮೂಲಕ ತನ್ನ ರಾಜಕೀಯ ಸ್ತಿತ್ವಕ್ಕಾದ್ ಕಾಂಗ್ರೆಸ್ ಪಕ್ಷದ ಕೈಗೊಂಬೆಯಾದ್  ತೇಜೋವಧೆ ಮಲ್ತೊಂದುಪ್ಪುನ ಈ ಹತಾಶ ಮನಸ್ಥಿತಿನ್  ಬುಡುದ್ ಕ್ಷಮೆ ಯಾಚನೆ ಮಲ್ಪೊಡ್..

– ಕಾರ್ಯಕರ್ತರೆಗ್ ಮಲ್ತಿನ ಅವಮಾನ

ು ಜನತೆದ  ಪ್ರತಿನಿಧಿಯಾದ್  ಪ್ರಜಾಪ್ರಭುತ್ವ ವ್ಯವಸ್ಥೆದ ಚುನಾವಣೆಡ್ ಪ್ರಚಂಡ ಬಹುಮತಡ್ ಗೆಂದುದ್ ವಾದ ಯಶ್ ಪಾಲ್ ಸುವರ್ಣ ರೆನ್ ಟೀಕಿಸಾವುನ ಭರಟ್ ರಘುಪತಿ ಭಟ್ರು ಪರೋಕ್ಷವಾದ್  ಬಿಜೆಪಿ ಕಾರ್ಯಕರ್ತೆರೆನೇ ಅವಮಾನ ಮಲ್ಪರೆಗ್ ಪಿದಾಡುಧ್, ಯಶ್ ಪಾಲ್ ಸುವರ್ಣ ರೆನ್  ಗೆಂದಾಯಿನ  ಬಿಜೆಪಿ ಕಾರ್ಯಕರ್ತೆರೇ  ರಘುಪತಿ ಭಟ್ರು  3 ಬಾರಿ ಗೆಂದಾದೆರ್. ಪನ್ಪಿನವ್ವೆನ್ ಮದಪರೆ ಬಲ್ಲಿ..

ಸುದ್ದಿಗೋಷ್ಠಿಡ್  ಗ್ರಾಮಾಂತರ ಬಿಜೆಪಿ ಅಧ್ಯಕ್ಷ ರಾಜೀವ್ ಕುಲಾಲ್, ಪ್ರಭಾಕರ್ ಪೂಜಾರಿ, ಪ್ರದೀಪ್, ಶ್ರೀವತ್ಸ ಮೊಕುಲು ಉಪಸ್ಥಿತರಿತ್ತೆರು.